Ia dud'ui malole'. Ia Lamatualain Anan^a dud'ui na. Naran, Yesus Kristus, fo Lamatualain dud'u basa mia doon ena. Dud'uin mulai ta'o ia:

2 Yesus nda fe'e tao Eni ue-tataon sa, te Lamatualain denu atahori esa, naran Yohanis, musi neu soi dala' fee neu Yesus nenema na. Te fai dalahulun, Lamatualain pake mana 'ola-'olan esa, naran ba'i Yesaya. Ana sura' mema' 'oi:

4-6 Atahori biasa ro'e Yohanis rae, mana sarani'. Ana leo sia mamana rou'. Bua-b'a'un tao mia onta fulu na. Bob'orin, tao mia banda rou'. Ma nanaan, lamat noo oni oe'. [Yohanis masod'an ia, 'ona' ba'i Elia dalahulu na.]^d

Lele' naa, atahori mia kota Yerusalem, noo profinsi Yud'ea isi na ra, rema randaa roo Yohanis sia mamana na. Ara rema rae rita e ma rae rena nenori na. Yohanis nafad'e nae, “Musi mitaa ma lao hela basa sala-singgo ma ra, fo Lamatualain 'ose hendi basa sala' naa ra. Basa naa, hei musi sarani dei, fo dad'i tanda 'oi, hei malole moo Lamatualain ena.”

Rena rala ma, ara rataa sala-singgo na ra, boe ma ana sarani se sia loe Yordan.

7 Ana nafad'e na'o ia, “Dei fo hambu Atahori esa manaseli' lena' au, nae nema. Mae dad'i' a Eni ded'enun o, au nda 'undaa sa boe.^e 8 Au sarani nggi 'endi' a oe, te dei fo Ana tao lena' au, huu Ana tao nasofe hei rala ma ra noo Lamatualain Dula-d'ale Meumare na.”

9 Lele' naa, Yesus nema mia kambo Nasaret sia profinsi Galilea, de nandaa noo Yohanis. Boe ma Yohanis sarani E mia loe Yordan. 10 Lele' Yesus dea nema mia oe a, nggengger ma, nita lalai a sii. Basa ma Lamatualain Dula-d'alen 'onda neu E, 'ona' mbui lunda e. 11 Boe ma rena Lamatualain haran mia lalai a 'oi,

12 Basa ma, Lamatualain Dula-d'alen nore nendi Yesus nisi' mamana rou'. 13 Banda fui ra sia naa boe. Yesus leo sia mamana' naa fai haa nulu. Sia naa, nitu ra malanggan nema sob'a Yesus fo tungga e, te nda nala E sa. Basa ma, Lamatualain ate na ra mia sorga rema tao mata' neu E.

14 Lele' naa, ara tao Yohanis mana sarani' a bui rala neu, ma Yesus nisi' profinsi Galilea, fo dui-b'engga Lamatualain Hara-lii Malolen sia naa.

15 Ana 'ola' nae,

16 Fai' esa, Yesus lao' tungga dano Galilea suu na. Ana nita atahori esa, naran Simon, noo 'od'in, Anderias. Ru'a se dala 'u'u. Naa sira ue-tatao na ra fai-fai esa. 17 Yesus no'e se nae, “Wae! 'Ima tungga Au leo! Hei biasa sangga 'u'u, te ia naa Au 'ae tao nggi dad'i mana sangga atahori.” 18 Rena rala boe ma, ru'a se lao hela dala, de tungga E neu' ena.

19 Basa ma, Yesus lao' nakandoo mbei fai, ma Ana nita Sab'ad'eus ana na ra. 'A'a ka, naran Yakob'is, noo 'od'in Yohanis. Ru'a se tao ralolole pu'at sia 'ofa' ata. 20 Yesus no'e ru'a se nae, “Wae! 'Ima tungga Au.” De ru'a se lao hela aman, noo mana tulu-fali na ra sia 'ofa' ata. De ara tungga E.

21 Basa ma, Yesus noo atahori kahaa' mana tungga E, losa kambo Kapernaum. Lele' atahori Yahud'i ra fai hule-o'en,^h ma Yesus nisi' ume hule-o'e rala, de nanori sia naa. 22 Rena 'o'olan naa, ma basa atahori ra ndii-ndii' a, huu nahine teb'e nenori' naa isi na. Naa, fea noo atahori Yahud'i meser agama na ra.ⁱ

23 Lele' naa, hambu atahori nitu tao' esa. Ana o tungga ume hule-o'e' rala neu boe, ma nitu mana sia atahori naa rala randu nae, 24 “Weh! Yesus, atahori Nasaret! Mae tao saa moo hai? 'Uma mae tao mulutu hai, do? Hai mihine nggo. Ho ia, Atahori fo dalahulun Lamatualain helu nae haitua nema' a. Ho ia, Lamatualain Atahori Meumaren nda mana ma'ena sala' sa.”

25 Te Yesus bua e nae, “Soo bafa ma! Lao hela atahori naa!”

26 Nitu ra tao atahori naa aon ndundu-lea nahere', boe ma ana kalua hela e noo randu nahere'. 27 Boe ma basa atahori mana sia ume hule-o'e rala titindindii. Ma basa se 'ola-'ola' rae, “Wii! Ia, saa ia! Ana parenda nitu ra dea reu, boe ma ara tungga hihii na. Ia nenori feu', do? Tou ia, 'o'olan manaseli'!”

28 Boe ma atahori 'aka' dui-b'engga mia kambo' esa nisi' kambo' laen ndule basa kambo' sia profinsi Galilea.

29 Lele' ara lao hela ume hule-o'e' naa, ma Yesus lao nisi' Simon noo Anderias ume na. Yakob'is noo Yohanis reu ramalolo' roo se. 30 Simon ina arin mera mafeo-matob'i', de ana sunggu' mia koi a. Lele' Yesus se maso' risi' ume naa, ma atahori rema rafad'e rae, “Ina lasi' a mera mafeo-matob'i'.”

31 Boe ma, Yesus neu se'u ina lasi' a, to'u nala liman, de nafefela e. Ma mafeo-matob'i' a mopo neu' ena. Basa ma ina lasi' a dea neu tao mata' neu se.

32 Lele' relo a loe-loe boe, ma atahori ra rendi atahori mamahed'i na ra, roo atahori nitu tao' na ra. Ara rendi se risi' Yesus fo ro'e tutulu-fafali'. 33 Ara tao ta'o naa, losa basa kambo isi' a, rema tesa sia ume naa mata'. 34 Atahori naa ra hed'i na ra mata'-mata', te Yesus na'ahahai' basa se. Ana o 'oi hendi nitu de'ulaka' hetar boe. Te Ana nda fee nitu ra ka'e rala fo 'ola' sa, huu ara rahine Eni ena.

35 Mbila' neu deka manggarelo, fe'e ma'ahatu', Yesus fela ena lao dea neu mia ume naa. Ana neu sia mamana rou' esa, de hule-o'e, 'ola-'ola' noo Lamatualain. 36 Lele' Simon se fela, te nda rita Yesus sa, de ara reu sangga E. 37 Ara randaa roo E, ma rafad'e rae, “Papa, atahori hetar sangga nggo.”

38 Te Ana nataa nae, “Naa o malole boe. Te malole' lena' teu tisi' kambo' laen mana deka ia dei. Huu Au 'ae 'ufad'e Hara-lii Malole' neu se boe. Huu naa, Au ue-tatao ngga.”

39 Basa ma, Ana lao' ndule profinsi Galilea, de dui-b'engga Hara-lii Malole' mia Lamatualain sia sira ume hule-o'e na ra. Ma Ana 'oi hendi nitur mia atahori ra.^j

40 Lele' naa, hambu atahori hed'i kusta esa, nema nisi' Yesus. De ana sende' lulu-langgan no'e tutulu-fafali' neu E nae, “Papa, e! Tulu-fali mala au dei! Au bub'ulu' Papa bisa na'ahahai' au hed'i ngga ia, fo atahori 'afi' sud'i melumud'u au fai. Sad'i Papa nau.”

41 Boe ma Yesus kasian atahori naa, de Ana loo liman de to'u nala e, ma nae, “Mema', Au nau! Hai leo!” 42 'Aib'oi' ma, atahori naa hed'in mopo boe, de hai neu' ena. 43 Yesus denu atahori naa bali', ma fee nesenened'a' neu e 44 nae, “Musuned'a matalolole! Ho hai ena, te 'afi' mufad'e esa boe! Musi tao tungga ba'i Musa parendan dei. Misi' malangga agama, fo ana paresa' aom, fo se'u hed'im hai teb'e, do hoko'. Basa naa, ho musi fee tutunu-hohotu' dad'i makasi, fo basa atahori ra bub'ulu' rae ho hai teb'e ena.”^k

45 Te atahori naa lao, ma neu dui sud'i 'a sia bee-b'ee. Huu naa, atahori hetar sangga rae randaa roo Yesus, de Ana nae 'a nda natud'u nala matan sia kambo' naa sa. Dad'i Ana leo sia 'a mamana-mamana rou' sia kambo dea'. Te atahori 'aka' nonggo rema mia bee-b'ee, fo rae randaa roo E.