4 Yesus mana tungga na ra rataa 'oi, “Papa. Mamana' ia na'ad'oo' noo kambo' a. De ata nda bisa fee atahori hetar ia ra raa sa!”

5 Te Yesus natane se 'oi, “Hei rotim hira?”

Rataa rae, “Papa. Hai mbed'a hela roti bue' hitu' a.”

6 Basa ma, Yesus denu atahori naa ra 'endo' reu rae a. Boe ma, Ana ha'i nala roti bue kahitu' naa ra, de no'e makasi neu Lamatualain. Ana bib'ib'i roti naa ra, de fee neu mana tungga na ra, fo reu bab'anggi fee neu basa atahori naa ra. 7 Ara o hambu 'u'u hira boe. Boe ma Yesus no'e makasi selu' neu Lamatualain soa' neu 'u'u naa ra. Boe ma, Ana denu selu' mana tungga na ra, fo reu bab'anggi fee atahori naa ra. 8-9 Basa se mbei ma atahori rifon haa. Ara raa losa ra'ab'eta. Ara raa basa ma, mana tungga na ra reu rad'uru nanaa sisa' ra, sofe boa monae' hitu. Basa de, Yesus denu basa se bali'. 10 Lele' ara bali', ma Yesus noo mana tungga na ra hene risi' 'ofa' rala, de lao risi' mamana' esa, naran Dalmanuta.

11 Yesus se losa Dalmanuta ma, atahori hira mia partei Farisi rema randaa roo E. Ara raselu-bale roo E fo rae ra'atutud'a' E. Ara ro'e E rae, “Papa! Mutud'u manadad'i manaseli' fo dad'i tatanda 'oi mema' Papa hambu koasa mia Lamatualain.”^a

12 Yesus lea hahae nae, “Aweh! Mete ma Au rena hei 'ola' ta'o naa, na, Au fale-rala ngga! Saa de hei mo'e manadad'i manaseli' ra? 'Afi' ta'o naa! Mema' Au bisa tao manadad'i ra, te Au nda nau 'utud'u nggi sa.”^b

13 Basa ma, Yesus lao hela se de hene bali' 'ofa' rala neu, noo mana tungga na ra. De ara lao risi' dano a seri'.

14 Lele' Yesus se losa dano a talad'an, dei de mana tungga na ra rasaned'a 'oi sira lilii' rendi lepa-nggees. Ara rendi 'aka' roti bue' esa. 15 Yesus rena se 'ola' roti, ma nae, “Hei musi besa-b'esa! 'Afi' losa mane Herod'es noo atahori Farisi ra kokoe-nanasi de'ulaka na ra dai nggi. Kokoe-nanasi na ra 'ona' bib'it roti fo atahori pake fo tao roti a reis.”^c

16 Mana tungga na ra rena Ana 'ola' na'o naa, ma ara bingun. De ara 'ola-'ola' rae, “Tou lasi' a 'ola' saa ia? Mbei ma Ana 'ola' ta'o naa, huu hita nda tendi roti sa.”

17 Te Yesus nahine dud'u'a na ra. De Ana 'ola' nae, “Saa de ama 'ola' 'aka' a roti! Hei nda mihine Au 'o'ola ngga sa, do? Mema' hei 'uta ma ra mbakat seli ena! 18 Hei mita noo mata ao ma ra, te nda mihine sosoan sa. 'Ona' a nda mita sa! Hei rena noo ndiki ma ra, te nda mihine saa-saa sa boe. 'Ona' a nda rena mihine sa! Hei lilii' hendi^d 19 roti bue' lima fo Au bib'ib'i se, de nahao atahori rifon lima naa ra sa, do? Lele' naa, hei mid'uru mala roti a lena na, boa hira?”

Rataa rae, “Boa sanahulu rua, Papa.”

20 Yesus natane selu' nae, “Ama fe'e misined'a fai' naa, Au bib'ib'i roti bue kahitu' ra, de fee atahori rifon haa raa, do? Ama mid'uru mala lena na ra, boa monae' hira?”

Rataa rae, “Hitu, Papa!”

21 Boe ma Yesus nae, “Mema' teb'e! Ama mita noo mata ao ma ra, te saa de nda fe'e mihine Au koasa ngga mia bee nema sa?”

22 Basa ma, Yesus se losa kambo Betsaida. Sia naa atahori ra rendi atahori poke' esa nisi' Yesus. Ara ro'e Yesus kois nahai' atahori poke' naa.

23 De Yesus to'u nala atahori naa liman ma nendi e nisi' kambo' dea'. Ana pupu miru neu atahori naa matan, basa ma nggama mata na. Ma natane nae, “Ta'o bee? Mita ena, do?”

24 Atahori naa boti' matan, de mete dii-'ona, ma nataa nae, “Ia! Au 'ita atahori lao-lao'. Te 'ona' hau huu' ra lao'!”

25 Yesus tao liman neu atahori naa matan fai. Boe ma atahori naa sob'a mete selu', naa-naa te matan nita teb'e ena. Ia naa, nita noo manggarelo' ena. 26 Boe ma Yesus denu atahori naa bali', ma fee nesenened'a' neu e, nae “Bali' leo, te muu tungga dala' laen! 'Afi' heo' bali' misi' Betsaida.”

27 Basa ma, Yesus se lao ndule kambo-kambo' sia Kaisarea Filipi. Mia dala' talad'an Yesus natane mbali se nae, “Mete ma tungga atahori ra dud'uin, ara rae Au ia, seka?”

28 Ara rataa rae, “Ruma rae, ‘Yohanis mana sarani.’ Ruma rae, ‘ba'i Elia’, Lamatualain mana 'ola-'olan mia fai dalahulun naa. Ruma rae, Papa ia, esa mia Lamatualain mana 'ola-'olan laen ra.”^e

29 Boe ma Yesus natane selu' nae, “Te tungga nggi, na, Au ia seka?”

Petrus nataa nae, “Papa ia, Kristus, Atahori fo Lamatualain dud'u basa mia dalahulun neu.”^f

30 Te Yesus na'anggee se nae, “Ama 'afi' mifad'e atahori esa boe!”

31 Basa ma Yesus nafad'e mana tungga na ra nae, “Au ia, teb'e-teb'e' Atahori Matetu' a. Dei fo Au doid'oso 'ala seli, huu lasi 'ad'at, malangga agama Yahud'i ra malangga na ra, roo meser agama ra basa se nda simbo Au sa. Dei fo ara risa Au, te fini-esan boe ma,^g Au 'usod'a bali'.”

32 Yesus nafad'e relo-relo ta'o naa, boe ma Petrus nore nala E nisi' suu', de 'ai nae, “Papa 'afi' 'ola' ta'o naa! Au nda hela se lima na ra dai Papa sa.”

33 Te Petrus 'ola' na'o naa, nda tungga Lamatualain hihiin sa. Ma Yesus heo' dean, de mete mana tungga laen na ra. Ana 'ai Petrus nae, “Hee! Naa, nitu ra malanggan ded'ea na! Dinggo' naa! Ho d'u'a 'aka' a atahori hihiin, te nda Lamatualain hihiin sa!”

34 Basa ma Yesus no'e atahori laen ra, fo rema ra'ab'ue roo mana tungga na ra. Basa ma nanori se nae, “See nae tungga Au, na, ana musi na'atataa' nakandoo tungga fai! Ana musi lilii' hendi hihii-nanaun, fo tungga 'aka' Lamatualain hihii na. Mae atahori rae tao risa e o, ana musi tungga nakandoo, 'ona' a atahori lemba hau ngganggen fo neu mate.^h 35 Atahori mana nasod'a soa' neu 'a aon, na, dei fo masod'an mopo neu' ena! Te atahori mana sad'ia mate, huu tungga Au noo dui-b'engga Lamatualain dala masod'an, na, dei fo ana nasod'a nakandoo noo Lamatualain.ⁱ 36 Rena, e! Mae ho hambu basa raefafo' a isin, te Lamatualain nda simbo nggo sa, na, ho hambu saa? 37 Mae lemba mendi basa raefafo' a isin boe o, nda bisa nggati ao samanam sa!

38 Misined'a, e! 'Ale' ia, atahori sia raefafo' de'ulakan mata'-mata'. Ara nda hii tungga Lamatualain sa. De see mae tungga Au, ma mae to'u Au nenori ngga, na, Au o mae 'utaa eni sia Lamatualain matan boe. Au, Atahori' Matetu' ia, dei fo Au bali' mia sorga 'uma. Ma Lamatualain ate na ra mia sorga rema roo Au boe. Hai 'onda mia sorga moo Ama' mandete-masa'an, na, dei fo atahori ra rahine rae Au ia, seka.