2 Boe ma Yesus no'e nala anad'iki' sa, de naririi e neu talad'a na ra. 3 Basa ma Ana 'ola' nae, “Rena malolole! Atahori mana nau maso' dad'i Lamatualain atahorin, ana musi 'ub'a dud'u'an dei, fo dad'i 'ona' anad'iki' nda mana nahine so'u-so'u' aon sa.^b 4 Huu atahori mana maloe-mad'ae rala' 'ona' anad'iki' ia, eni atahori monae' lena' sia Lamatualain mata na. 5 Boe ma atahori mana simbo atahori anak 'ona' anad'iki' ia, huu namahere neu Au, na, atahori naa simbo Au ena.”

6 Basa ma Yesus nafad'e se fai nae, “Mete ma hambu atahori tao anad'iki' esa tungga dala sala', losa ana nda namahere Au sa ena, na, besa-b'esa, o! Malole lena' atahori pa'a fatu monae' esa neu boton,^c fo ne'etetena' e tasi roma' rala neu. 7 Raefafo' ia mema' mamana de'ulaka', huu hambu dala' hetar mana tao atahori tud'a sala' rala reu. Te atahori mana hambu sosoe' seli, naeni atahori mana tao atahori laen tud'a sala'.

8 Mete ma tao sala' mendi' limam, do eim, na, nggero hendi e! Huu malole lena' sorga muu mendi 'a limam seri, do eim seri. 'Afi' losa ara nggari nggo misi' ai naraka rala muu moo limam ma eim ru'a se.^d 9 Mete ma, tao sala' mendi' matam, na, 'ed'o hendi e! Huu malole lena' maso' sorga muu moo matam esa' a. 'Afi' losa ara nggari nggo misi' ai naraka muu moo matam ru'a se.”^e

10 Yesus 'ola' fai nae, “Besa-b'esa, o! 'Afi' losa hei miloe-mid'ae anad'iki' 'ona' ia. Huu Lamatualain aten mana sia sorga ranea se. Ma ate naa ra sud'i 'a reu fain sa, fo rafad'e so'al atahori ia ra dala na ra neu Lamatualain mana sia sorga.

11-13 Ama du'a malolole, te Au 'ae fee nekendandaa' ta'o ia: hambu atahori sa bib'i lombon natun esa. Fai' sa ma, hambu bib'i lombo esa lao leli, tungga 'a dala na. Naa, ama du'a mae manatad'a a musi tao saa? Ne'o Ana lao hela bib'i lombo kasio nulu sio (99) na ra sia lete' fo neu sangga bib'i lombo kaesa' mana mopo' naa.^f

Mete ma ana hambu bali' ena, na, ana namaho'o mete bib'i lombo kaesa' fo ana nita bali' naa lena' mia bib'i lombo kasio nulu sio (99) na ra fo nda mana mopo' ra sa. [Au, Atahori Matetu' ia, 'uma fo 'ae fee masoi-masod'a' neu atahori mana lao leli' mia dala ndoo-tetu' a.]^g 14 Huu mae 'aka' anad'iki' sa mopo o, Au Ama ngga sia sorga nda namaho'o sa.”

15 Yesus 'ola' fai nae, “Mete ma toronoom atahori mamahere' esa tao sala' neu nggo, na, musi muu mundaa moo e. Mete ma 'aka' ru'a nggi, dei fo fe'e mufad'e salan na. Mete ma ana rena 'o'olam, na, hei ru'a nggi malole bali' ena.^h 16 Te mete ma ana nda nau rena nggo sa, na, muu mo'e mala nonoom atahori esa do rua fo mii mimilolo'. Mii mindaa moo atahori naa, fo 'ola' moo e fai. Huu nenesura' sia Lamatualain Susura Meumaren 'oi, ‘Sia ded'eat esa, musi hambu sakasii rua do telu mana 'ola' 'ona esa', dei fo fe'e na simbo ded'ea-'o'ola na ra na.’ⁱ 17 Te mete ma ana nda fe'e nau rena 'o'ola ma ra sa, na, mii mifad'e jama'at. Mete ma ana o nda fe'e nau simbo noo malole' jama'at ra 'o'olan sa, na, du'a mae ana 'ona' atahori nda fe'e nahine Lamatualain sa. Mete ma hoko', du'a mae de'ulakan 'ona' mana 'ed'a bea ra.

18 Misined'a malolole Au 'o'ola ngga ia, e! Saa fo hei 'ena-'ai sia raefafo' ia, naa Lamatualain 'ena-'ai sia sorga ena boe. Ma saa fo hei fee 'isin sia raefafo' ia, naa Lamatualain fee 'isin sia sorga ena boe.^j

19 Ma Au 'ufad'e selu' 'ae, mete ma hambu atahori rua sia hei hule-o'e moo rala' esa, dei fo Au Ama ngga sia sorga fee se saa fo ara ro'e' a. 20 Mete ma hambu atahori rua do telu ra'ab'ue fo hule-o'e reu esa, huu sira, Au atahori ngga ra, na, Au o sia talad'a na ra boe.”

21 Basa naa ma, Petrus nema natane Yesus nae, “Papa, au 'ae 'utane mbei. Mete ma toronoo ngga atahori mamahere' tao sala' nasafafali mbali au, na, au musi fee ambon neu e lao hira? Lao hitu, do?”

22 Boe ma Yesus nataa nae, “Hoko'! Musi fee ambon neu e losa hitu lao hitu nulu,^k losa nda bisa 'ito-reken mala sa ena.^l 23 Ama musi tao tungga ta'o naa, huu Lamatualain 'ona' mane' esa mana 'ito-reken pagau na ra huta-b'uku na ra. 24 Lele' ana 'ito-reken ma, ana denu atahorin esa neu no'e pagaun esa mana nahuta doi' mbali e, losa juta-juta.^m 25 Te pagau a nda bae nala huta-b'ukun sa. Dad'i mane' a parenda nae, ‘Mii seo atahori ia noo basa sao ana na ra, fo ara dad'i ate. Boe ma seo mib'asa' hata-heto na ra, fo bae neu huta-b'uku na ra.’

26 Rena ta'o naa, ma pagau naa naloe aon de sende' lulu-langgan neu mane' a matan, de kokoe e nae, ‘Ad'uu! Ama', e! Ama mane' tulun fee fai mbei neu au dei, do! Dei fo au fee bali' basa huta ngga.’ 27 Mane' a rena nala ma, ana kasian e. Boe ma ana nggaris mema' hendi basa pagau naa huta na ra. Boe ma ana mbo'i hendi pagau naa.

28 Te lele' pagau naa dea neu, ma nandaa noo nonoon esa nahuta e doi' mbei.ⁿ Boe ma ana to'u nala nonoon, de mese nggara-boten ma bua e nae, ‘Weh! Fai' ia bae hutam leo!’

29 Nonoon rena nala 'ona' naa ma, ana naloe aon de sende' lulu-langgan ma kokoe e nae, ‘Ad'uu! Toronoo', e! Tulun fee fai mbei nema au dei! Dei fo au bae huta ngga.’

30 Te pagau naa nae, ‘Nda bisa sa! 'Aka' fai' ia musi bae!’ Basa ma ana mbia nonoon bui rala neu, losa ana bae nab'asa' huta na. 31 Lele' mane' a pagau laen na ra rita saa fo manad'ad'i' naa, ma rala na ra susa. De basa ma reu rafad'e neu mane' a.

32 Mane' a rena nala ma, ana no'e pagau naa, de 'ola' nae, ‘Hee, atahori de'ulaka'! Huu mo'e Au kasian nggo, naa de au nggaris hendi basa huta-b'uku ma ra. 33 Te ta'o bee de nda mu'ena kasian neu nonoom sa, 'ona' au kasian nggo ena, to?’ 34 Mane' a namue losa ana denu atahori tao e bui rala neu, fo ara poko-paru e losa ana bae nab'asa' huta-b'uku na ra.”

35 Boe ma Yesus nate'e dud'ui na, ma nafad'e nae, “Naa, Au Ama ngga sia sorga boe o 'ito-reken 'ona' naa boe. Dei fo Ana hukun nggi, mete ma ama nda lilii' teb'e-teb'e hendi' hei toronoo atahori mamahere ma ra sala-kilu na ra sa.”