Lamatua' Yesus Hara-lii Malolen
tungga
Yohanis
Yesus naa, seka?
1
Fefeun, Lamatualain Ded'ea-'o'olan sia mema' ena.Lamatualain Ded'ea-'o'olan, naeni Atahori esa.
Atahori naa na'ab'ue noo Lamatualain.
Ma Eni o, Lamatualain boe.
2 Lele' lalai noo raefafo' nda fe'e dad'i sa,
Atahori naa sia mema' noo Lamatualain ena.
3 Lamatualain na'ad'ad'ad'i' basa-b'asa' e nendi' Ded'ea-'o'ola na.
Nda hambu sud'i 'a saa esa dad'i sa boe, mete ma Atahori naa nda tao sa.
4 Eni, masod'a' a 'oka na.
Dad'i atahori mana hambu masod'a matetu' a,
ara rasod'a mia E.
Ana o 'ona' Manggarelo' mana naronda,
fo atahori mana rasod'a sia Manggarelo' naa,
bisa rita ma rahine.
5 Manggarelo' naa naronda tora ma'ahatu' a rala;
de ma'ahatu' a nda 'ai-b'aa nala Manggarelo' naa sa.
Huu Manggarelo' naa naronda nakandoo 'a.
6 Naa, hambu atahori laen esa, naran Yohanis. Lamatualain o denu e boe,a 7 fo dad'i sakasii mana dui-b'engga Manggarelo' naa neu atahori. Naa fo basa atahori ramahere neu Lamatua', huu Yohanis 'o'ola na.
8 Yohanis ia, nda Manggarelo' naa sa. Te Lamatualain denu e dui-b'engga so'al Manggarelo' naa neu atahori. 9 Huu Atahori mana dad'i Manggarelo matetu' a nae nema sia raefafo' ia. Manggarelo' naa mana tao dala-d'ala ndoo-tetu' ra nenenita' soa' neu basa atahori.
10 Mae Ana tao basa mana sia raefafo' ia ra dad'i ena o, te atahori sia raefafo' ia nda rahine E sa, lele' Ana nema leo sia ia. 11 Mae Ana nema leo noo Eni atahori na ra o, te ara nda nau simbo E sa. 12 Mae 'ona' naa o, basa atahori mana simbo ma ramahere neu E, Ana fee se hak dad'i Lamatualain ana na ra. 13 Naa 'ona' sira neneb'onggi bali' ena. Te sira neneb'onggi feu' naa, nda 'ona' atahori bonggi anad'iki' sa. Ma nda mia tou' esa mana hii-nau hambu tititi-nonosi' sa. Te ara dad'i Lamatualain ana na ra, huu Lamatualain mana fee se masod'a feu' naa.
14 Boe ma ‘Lamatualain Ded'ea-'o'olan’ naa,
neneb'onggi' dad'i atahori.
Ana leo sia talad'a ta ra.
Hita mete-tita Eni manaseli na.
Eni manaseli' 'ona' naa, huu Eni, Lamatualain Ana 'ise na.
Ana hii 'a natud'u rala malolen nema nggita,
huu mema' Eni ndolu-had'an 'ona' naa ena.
Boe ma basa saa fo Ana nafad'e so'al Lamatualain, mema' teb'e.
15 Naa, Yohanis naa dui-b'engga so'al Atahori ia. Ana nameli nae, “Rena, e! Eni ia, au dui ena 'ae, ‘Dei fo Atahori esa nae nema. Ana manaseli' lena' au. Huu nda fe'e bonggi au sa te, Ana sia na'ahulu' ena!’”
16 Yohanis 'ola' na'o naa, huu Atahori naa hii 'a natud'u rala malole na. Boe ma Ana tao nasafafali ta'o naa nakandoo 'a soa' neu basa nggita. 17 Lele ulu' a, ba'i Musa mana na'onda' Lamatualain Hohoro-lalanen soa' neu bei-ba'i ta ra. Te 'ale' ia, Atahori naa, naeni Yesus Kristus, mana natud'u Lamatualain rala malolen neu nggita. Boe ma basa saa fo Ana nafad'e so'al Lamatualain, mema' teb'e. 18 Nda hambu atahori esa sa boe mana nita teb'e-teb'e' Lamatualain. Te Eni Ana 'ise susuen, mana natud'u neu nggita Lamatualain rala na. Ana' naa, sia Aman bob'oa na. Huu Eni o, Lamatualain boe.
Yohanis mana sarani' a natud'u Lamatua' Yesus
19 Lao esa, atahori Yahud'i ra malangga na ra sia Yerusalem denu malangga agama hira roo atahori hira mia suku Lewi, mana lole-lau sia Lamatualain Ume Hule-o'e Huu na. Ara reu sia loe Yordan bob'oanb de ratane Yohanis mana sarani' a rae, “Ho ia, Kristus fo Lamatualain helu-fuli nae haitua nema' a, do?”
21 Boe ma ratane selu' rae, “Mete ma ta'o naa, ho ia, seka? Ba'i Elia, do?”
Ana nataa nae, “Hoko' boe.”
Boe ma ratane fai rae, “'Afi' losa ho ia, Lamatualain mana 'ola-'olan laen naa, do?”
Ana nataa nae, “Hoko' boe.”c
22 Basa naa ma, ara ratane selu' rae, “Mete ma ta'o naa, na, ho ia, seka? Mufad'e dei! Huu hai musi bali' mii mifad'e neu malangga-malangga mana denu hai ra. Tulun dei!”
23 Boe ma ana 'ola' tungga saa fo ba'i Yesaya sura' nita 'oi,
“Au ia, naeni atahori mana nameli sia mamana rou' 'oi,
‘Basa atahori mihehere tao milole dala' ra,
fo simbo Lamatua' neneman!
Tao mitetu dala' fo soru E.’”d
24 Sia atahori mana rema mia Yerusalem talad'a na ra, hambu atahori hira mia partei agama Farisi. 25 Basa ma ratane Yohanis rae, “Ta'o ia. Mete ma ho nda Kristus sa, nda ba'i Elia sa, ma nda Lamatualain mana 'ola-'olan naa sa, na, ta'o bee de sarani atahori? Hambu hak mia bee?”
26 De Yohanis nataa nae, “Au sarani atahori 'endi' a oe. Te hambu Atahori esa sia talad'a ma ra ena, te nda mihine sa. 27 Mae au 'unori 'u'uhulu' atahori, te Eni manaseli' lena' au. Mae dad'i' a Eni aten boe o, au nda 'undandaa sa.”e
28 Basa dala' ia ra dad'i sia Betania, sia loe Yordan bob'oa na. Yohanis noo ana mana tungga na ra sarani atahori sia naa.f
Lamatua' Yesus 'ona' Lamatualain Bib'i Lombo Anan
29 Mbila' neu ma, Yohanis mete nita Yesus lao' nisi' e. Boe ma ana 'ola' nae, “Mete Atahori mana sia naa dei! Eni, Lamatualain Bib'i Lombo Anan mana dad'i tutunu-hohotu' fo soi-tefa atahori sia raefafo' ia sala-kilu na ra. 30 Atahori ia, au 'ufad'e neu nggi afis a ena 'ae, ‘Dei fo Atahori esa nema. Eni manaseli' lena' au, huu Ana sia na'ahulu' au ena.’ 31 Fai ma'ahulun, au nda 'uhine 'ae, Eni, Kristus sa. Mae 'ona' naa o, 'uhine ena 'ae au musi fee atahori Isra'el ra rahine E. Huu naa, au 'uma fo sarani atahori 'endi' oe.
32-33 Lamatualain denu au sarani atahori 'endi' oe. Ana o nafad'e au nae, ‘Dei fo Atahori esa nisi' nggo. Basa naa ma, Dula-d'ale ngga 'onda nema leo sia E. Atahori naa, mana nendi Dula-d'ale Meumare ngga, fo fee koasa neu atahori ngga ra.’ Lele' Atahori naa nema, au nda 'uhine tute' E sa. Te lele' au 'ita Lamatualain Dula-d'alen 'onda nema mia lalai a, 'ona' mbui lunda tee neu E, dei de au 'uhine E 'ae, ‘Atahori ia, Eni ena!’ 34 Au 'ita dala' naa ra noo mata ao ngga. Basa de au 'ufad'e neu nggi 'ae, ‘Atahori mana nema' naa, naeni Lamatualain Anan!’”
Lamatua' Yesus pili ana mana tungga fefeu na ra
35 Mbila' neu ma, Yohanis nambarii' noo ana mana tungga na ra rua. 36 Lele' Yohanis nita Yesus lao' tungga naa, ma ana nafad'e nae, “Mete dei! Huu Eni ia, Lamatualain Bib'i Lombo Anan dei fo mana dad'i tutunu-hohotu'!”
37 Basa ma Yohanis ana mana tungga karua na ra mana rena 'o'olan, lao hela e, de reu tungga Yesus. 38 Boe ma Yesus heo' dean, ma nita se lao' tungga Eni. Boe ma natane se nae, “Ta'o bee? Parluu, do?”
Ara ratane mbali E rae, “Rab'i leo sia bee?” (Sia sira ded'ea Aram, ‘Rab'i’ sosoan nae, ‘Ama Meser’.)
39 Yesus nataa nae, “'Ima fo mita neu' ena.” Boe ma ara tungga E, de rita mamana leleo na. Lele' ara losa, mbei ma lii' haa bob'on ena. De ara rahani roo E losa relo a mopo.
40 Naa, mia atahori karua' mana rena Yohanis 'o'olan, ma tungga Yesus naa, esa naran Anderias. Eni, Simon Petrus 'od'i na. 41 Anderias bali' losa-losa' ma, neu sangga 'a'an Simon, de nae, “Wee, 'a'a! Hai mindaa moo Mesias ena!” (Sia sira ded'ean ‘Mesias’ sosoan nae, ‘Kristus, naeni Atahori fo Lamatualain helu-fuli mema' eni' a lele ulu' a fo nae haitua nema' a.’) 42 Basa ma, ana noo 'a'an nisi' Yesus.
Boe ma Yesus mete e, de nafad'e nae, “Ho ia, Simon. Amam, Yohanis. Mia fai' ia, atahori ro'e nggo, rae ‘Kefas’” (Eni sosoan 'ona' ‘Petrus’ boe, naeni ‘fatu’.)g
Lamatua' Yesus no'e Filipus noo Natanel
43-44 Sia naa hambu atahori laen esa, naran Filipus. Eni kambon, Betsaida. Petrus noo Anderias o lao' mia naa rema boe.
Naa, mbila' neu ma, Yesus na'etu' nae neu sia profinsi Galilea. Boe ma neu nandaa noo Filipus, de Ana no'e nae, “'Uma, tungga Au fo dad'i atahori ngga!”
45 Basa ma Filipus neu sangga Natanel, de nafad'e nae, “'A'a, e! Hai mindaa moo Atahori fo ba'i Musa sura' sia Lamatualain Hohoro-lalanen ena. Lamatualain mana 'ola-'olan daluhulu' ra sura' so'al Atahori ia boe. Eni naran Yesus, mia kambo Nasaret, ma aman, naran Yusuf.”
46 Te Natanel nataa nae, “Atahori Nasaret!? Awe'! Nda hambu dala malole' esa sa boe, lao' mia naa nema sa, o!”
Boe ma Filipus nae, “Wee! 'Afi' ta'o naa. 'Uma fo mita noo matam!”
47 Lele' Natanel fe'e lao' nema, te Yesus nita e na'ahulu' ena, de nae, “Eni ia, atahori ndoos! Huu sia ralan nda hambu pepeko-leleko' sa. Eni atahori Isra'el matetu'!”h
48 Natanel natane nae, “Ta'o bee de Papa nahine au?”
Yesus nataa nae, “Ta'o ia. Au 'ita nggo ena lele' ho mia hau naa huu na.i Lele' naa, Filipus nda fe'e neu no'e nggo sa.”
49 Boe ma Natanel nataa nae, “Ama Meser ia, tantu Lamatualain Anan! Boe ma Ama' o, tantu hai atahori Isra'el ra Manem boe!”
50 Yesus natane e nae, “Se'u te ho ia mumuhere Au, huu faa' ra Au 'ae, ‘Au 'ita nggo lele' ho mia hau huu' a rae',’ do? Musuned'a, te dei fo bisa mita dala-d'ala manaseli' lena' naa fai!
51 Teb'e! Au 'ufad'e mema'. Dei fo ama mita lalai a sii. Boe ma Lamatualain ate na ra mana sia sorga ra 'onda-hene sia Au bob'oa ngga. Ma Au ia, Atahori Matetu' a.”j