Ina-ina' mana tungga Lamatua' Yesus
8
Nda doo' sa ma, Yesus noo ana ded'enun kasanahulu rua na ra, reu lao' ndule kota-kota ma kambo-kambo' sia naa. Ana lao' nafad'e atahori so'al Lamatualain parenda na. Naa dad'i hara-lii malole' neu se. 2 Sia nononggo' naa, hambu ina' ruma tungga boe. Ina' ia ra, ruma parnaa ramahed'i mata'-mata', ma ruma nitu tao' boe. Te Yesus tao nahai' basa se ena. 'Ona' Maria mia kambo Magdala. Fe'esa'an Yesus 'oi hendi nitu hitu mia e. 3 Susana noo mama Yohana o tungga boe. Mama Yohana ia, ama Kusa sao na. Kusa ia, malangga mana nanalalau sia mane Herod'es ume panggat na. Fe'e hambu ina' hetar mana lao' roo Yesus se. Ina' ia ra tanggon Yesus se do'i dala na ra.aNekendandaa' so'al atahori mana sela fini sia rae mata'-mata'
4 Lao esa, atahori rema mia kambo' hetar fo sangga Yesus. Lele' atahori ra ra'ab'ue ena, ma Ana dui se nekendandaa' sa nae, 5 “Hambu atahori mana ue rae sa neu nggari fini sia osi na. Fini ruma tud'a sia dala'. Lele' atahori lao' sia naa, ara tatab'u fini ra. Basa ma mbui' ra rema de bid'o-raa hendi basa se. 6 Fini ruma tud'a sia rae fatu'. Fini ra ranumbu boe, te male hendi se, huu oe mbei 'a. 7 Fini ruma tud'a sia mamana duri-nggaut. De lele' fini ra ranumbu boe, duri-nggaut ra hapi risa se. 8 Te fini ruma fai, tud'a sia rae isi malole'. Ara ranumbu, ma ra'amoko losa rab'oa. Fini naa ra fee bali' buna-b'oa' lao natun sa.”
Dui basa ta'o naa, ma Yesus nate'e nekendandaa' naa, ma nafad'e nae, “Hei mana pasa ndiki ma ra, ama du'a malolole!”
Lamatua' Yesus nafad'e nae saa de Eni hii 'a pake nekendandaa'
9 Basa ma, Yesus ana ded'enu na ra ratane nekekendandaa' a sosoa na.
10 Ana nataa nae, “Ta'o ia! Huu hei tungga teb'e-teb'e' Lamatualain hihii-nanaun ena, naa de Au 'ufad'e relo-relo fo ama bub'ulu', Lamatualain nae parenda atahori na ra ta'o bee. Te atahori fea' ra nda nau taoafi' neu Lamatualain hihii-nanaun sa. Naeni de Au 'unori se 'endi' nekendandaa'. Huu Lamatualain mana 'ola-'ola na sura' mema' so'al atahori ia ra nae,
‘Ara rita ena,
te nda nau rahine sa.
Ara rena ena,
te nda nau bub'ulu' sa.’”b
Lamatua' Yesus nafad'e nekekendandaa' so'al fini a sosoan
11 Boe ma Yesus nafad'e nekendandaa' naa sosoan, nae “Fini naa, naeni Lamatualain Ded'ea-'o'ola na. 12 Fini mana tud'a sia dala' a, naeni atahori mana rena Lamatualain Ded'ea-'o'olan, te basa ma nitur malanggan nema rambas nendi Ded'ea-o'ola' ra mia rala na ra. Noo ta'o naa, ara nda ramahere Lamatualain, ma nda hambu masoi-masod'a' sa. 13 Fini mana tud'a sia rae fatu' a, naeni atahori mana rena Lamatualain Ded'ea-'o'olan noo nemeho'ot. Te 'oka na ra nda roma' rala reu sa. Ara mulai ramahere, te mete ma hambu sususa', ara tud'a neu' ena. 14 Fini mana tud'a sia mamana duri-nggaut naa, naeni atahori mana rena ma simbo Lamatualain Ded'ea-'o'ola na. Te nda doo' sa ma, ara lilii' hendi Ded'ea-'o'ola' naa ra, huu ara hii 'a seb'o-mue roo ue-tatao na ra, hata-heto' mata'-mata', ma hii 'a rasod'a noo nemeho'ot 'a. Naa de, nemehere na ra, nda na'ena buna-b'oa' saa-saa sa boe. 15 Te fini mana tud'a sia rae isi malole' naa, naeni atahori rala ndoos noo malole'. Lele' ara rena Lamatualain Ded'ea-'o'olan, ara mbed'a' malolole sia rala na ra. Noo ta'o naa, ramahere rakandoo, ma tao dala malole' nae'.”
Nekendandaa' so'al tatana lambu rendi' hura rae
16 Basa ma Yesus 'ola' fai nae, “Nda hambu atahori rambila' lambu ti'oek, basa naa tatana hura rae neu e sa. Boe ma nda hambu atahori mbed'a' lambu nisi' koi a rae' sa. Mete ma tao ta'o naa, na, atahori nda rita rondan sa ena. Lambu mana na'ena ngguna', naeni mana mbed'a' sia mamana naru' ata, naa fo rondan fee manggarelo' neu atahori mana rala rema.c 17 Ia naa basa mana ma'afuni' ra, dei fo nenenita'. Boe ma basa saa fo atahori nda rahine lele' ia sa, dei fo ara hambu rahine boe.d
18 Dad'i hei musi du'a malolole dala' ia ra. Atahori mana nau sangga nahine teb'e-teb'e' Lamatualain hihii-nanaun, ana boe nahine. Te atahori fo nda mana taoafi' neu Lamatualain hihii-nanaun sa ana boe namanggoa.”e
Lamatua' Yesus bob'onggi matetu' na ra
19 Lao esa, Yesus seb'o-mue noo atahori hetar. Boe ma maman noo 'od'i na ra rema rae randaa roo E. Te ara nda bisa deka-d'eka roo E sa, huu atahori naen seli. 20 Boe ma hambu atahori sa neu nafad'e Yesus nae, “Ama'! Mamam noo 'od'i ma ra sia dea'. Ara rae randaa roo Ama'.”
21 Boe ma Ana nataa nae, “Ia! Te ta'o ia. Mama ngga ma toronoo matetu ngga ra, naeni atahori mana rena ma tao tungga Lamatualain Ded'ea-'o'ola na.”
Lamatua' Yesus tao naloe' sanggu-anin
22 Lao esa, Yesus no'e ana mana tungga na ra nae, “Lao teu sae 'ofa', fo tisi' dano seri'.” Boe ma ara sae 'ofa' sa, de ara lao. 23 Lele' ara lao, ma Yesus sunggu'. Nda doo' sa ma, sanggu anin losa. Ma ree po'a 'ofa' rala neu, de rae' a molo.
24 Ana mana tungga na ra rita ta'o naa ma, ara fafae Yesus rae, “Papa! Papa, e! Fela fo tulun dei! Hita tae' a molo mate ia ena!”
Boe ma Yesus o fela boe. De Ana 'ai anin noo ree a nae, “Miloe' leo!” Boe ma ree noo anin o ramalino neu' ena.
25 Basa ma Ana bua ana mana tungga na ra nae, “Ta'o bee de hei nda fe'e mimihere Au sa?”
Ara ramatau ma heran. Boe ma esa natane esa nae, “Awii! Yesus ia, seka? Ta'o bee de Ana bisa parenda ree-anin, fo tungga hihii-nanaun, e?”
Lamatua' Yesus 'oi nitu nae' mia atahori mulu' esa
26 Nda doo' sa ma, Yesus se losa nusa Gerasa, sia dano Galilea seri'.f 27-29 Sia naa, hambu atahori sa nitu ra tao e doo' ena. Ana nda ma ume' sa, de ana leo sia 'a rates. Fais-fais na ana lao' neu-nema noo ma'ahola na. Huu nitu ra parenda e rakandondoo' a. Atahori pa'a e rasafafali rendi' rante ma kale besi' ena, te ana na'etu' hendi se. Boe ma nitu ra 'aka' ra'asusuu' e fo nela nisi' mamana rou'.
Lele' Yesus se 'onda mia 'ofa' ma, atahori mulu' naa neu nisi' Yesus. Atahori naa nggasi, ma natud'a' aon sia Yesus ei na. Boe ma Yesus parenda nae, “Woi, nitu! Kalua mia atahori ia!”
Boe ma atahori mulu' naa nggasi nae, “Woi! 'Afi' ngganggu au! Huu au 'uhine nggo, Yesus, Lamatualain Manaseli' a Anan! 'Afi' tao doid'oso au!”
30 Yesus natane e nae, “Naram seka?”
Boe ma nitu naa nataa nae, “Legion, huu hai hetar, 'ona sold'ad'u rifon-rifon.” Ana na'o naa, huu nitu hetar leo sia aon rala.
31 Nitu ra ro'e rakandoo 'a mbali Yesus fo 'afi' fee sira risi' Ndola Doid'oso' a, naeni koasa de'ulaka' ra mamana na.
32 Te deka-d'eka sia naa, hambu fafi nononggo monae' esa soso'a rae fo sangga nanaat sia lete' a suu na. De nitu ra ro'e Yesus rae, “Denu hai misi' fafi naa ra rala!” Boe ma Yesus na'ahei'. 33 Basa ma, nitu ra lao hela tou' naa, de risi' fafi naa ra rala. Basa fafi ra ramulu, de rela' mia lete' naa, ma boke risi' dano rala reu. De basa se mate rasamele.
34 Mana manea fafi ra rita ta'o naa ma rela reu dui basa' e ndule kambo-kambo' mana sia naa ra. 35 Rena rala dud'uit naa, ma atahori hetar reu risi' mamana' naa. Ara rae rita mata' saa mana dad'i' ena. Losa naa, ma rita atahori nitu dai' a 'endo' sub'a-sub'a deka Yesus ei na. Ana pake bua-b'a'us ena, ma mulun mopo ena. Rita ta'o naa, ma basa se ramatau. 36 Basa ma atahori mana rita manadad'i' naa ra, dui atahori mana rema feu' ra so'al ta'o bee de atahori mulu' naa hai. 37 Boe ma basa atahori Gerasa mana leo sia mamana' naa, ro'e mbali Yesus fo Ana lao hela se, huu basa se ramatau rae mate.
Boe ma Yesus se hene 'ofa' reu, de bali' risi' dano Galilea seri' reu.
38 Te atahori faa' ra mana nenembo'i' mia nitu ra, 'aka' no'e mbali Yesus nae, “Ama'! Au tungga 'oo nggo boe!” Te Yesus nataa nae,
39 “Ta'o ia! Malole lena' bali' misi' bob'onggi ma ra, fo dui se Lamatualain malolen, fo Ana tao fee nggo' a.”
Basa ma, atahori naa lao' rereo' kota naa, ma dui neu basa atahori so'al Yesus tao nahai' eni.
Lamatua' Yesus tao nasod'a bali' Yairus ana feton ma tao nahai' ina' mana mamahed'i mbo'a-mbo'a 'a raa'
40 Basa ma Yesus se lao risi dano Galilea seri'. Lele' ara 'onda mia 'ofa', atahori hetar nea-nea' E ena. Ara reu rakarumbu rae soru E. 41-42 Sia naa o, hambu atahori esa, naran Yairus. Eni, malangga ume hule-o'e sia kota naa. Anan, 'aka' esa' a; ana feto', too sanahulu rua ena. Ana feto' naa namahed'i nae', de nae 'a mate. Lele' Yairus nita Yesus nema, ana neu sende' lulu-langgan sia Yesus mata na. Ana no'e Yesus neu sia umen, fo tulu-fali ana feto na.
Lele' Yesus na'ahei' boe, ma ara lao risi' Yairus ume na. Atahori hetar o rae tungga boe de raote de reu. Naa de ara lao' rakaseseti.
43 Hambu ina' sa o tungga noo se boe. Ana namahed'i mbo'a raa' nda naloe' batuu sa, doon too sanahulu rua ena. Ana nab'asa' doin noo hata-heton ena, huu bae neu doter ra. Te nda hambu esa bisa tao nahai' e sa boe. Hed'in naa, 'aka' mesu-fela nakandoo 'a.g 44 De ana neu deka-d'eka neu Yesus dea na. Boe ma ana kois Yesus bad'un suu na. Lele' ana kois basa boe ma, hed'i mbo'a-mbo'a raan naloe' neu' ena boe.
45 'Aib'oi' ma Yesus nambarii', de natane nae, “Seka mana kois Au?”
Te atahori esa o nda nataa sa boe. De Petrus nae, “Malangga, dei! Te atahori hetar rakaseseti 'ona' ia! Ne'o mana ratimba mia dea' rema.”
46 Te Yesus 'ola' noo e nae, “Hoko'! Au med'a koasa kalua mia Au e. Dad'i Au 'uhine atahori esa sangaja kois Au.”
47 Lele' naa ina' a nahine nae eni nda na'afuni' nala sa, boe ma namatau seli. Ana ngge'e-ngge'e, de sende' lulu-langgan neu Yesus mata na. De ana dui saa manad'ad'i neu e sia basa atahori hetar mata na. Boe ma nafad'e nae, eni kois Yesus boe ma, eni hai neu' ena.
48 Boe ma Yesus 'ola' noo e nae, “Feto ngga, e! Ho hai, huu mumuhere Au. Bali' moo sod'a-mole' leo!”
49 Lele' Yesus fe'e 'ola' noo ina' naa, ma Yairus atahorin esa nema nafad'e nae, “Ad'uu, ama', e! Ama' anan nese ena! Ana mate ena, dad'i sud'i boe ne'eb'eb'engge' Ama Meser fai.”
50 Te lele' Yesus rena atahori naa dud'uin, boe ma Ana 'ola' noo Yairus nae, “'A'a! Sub'a-sub'a' a! 'Afi' du'a-d'u'a! Mumuhere neu 'a Lamatualain. Mana fee masoi-masod'a' neu 'a'a ana na.”
51-53 Lele' ara losa Yairus umen, atahori sofe ume ena. Ara nggae ei-ei. Boe ma Yesus 'ai se nae, “Ama sud'i boe nggae fai! Ana' ia nda mate sa. Ana sunggu' a!”
Te atahori ra mali rapepenggo bafa na ra neu E, huu sira rita noo mata na ra ana' a 'etu hahae na. Basa ma Yesus no'e ana' a ama-ina na ra, Petrus, Yohanis, noo Yakob'is, rala reu roo E. Laen ra Ana denu se rahani sia 'a dea'.
54 Ara rala reu, boe ma Yesus to'u ana' a liman, de no'e nae, “Nona, e! Fela leo!” 55 'Aib'oi' ma, ana' naa nasod'a bali', de fela neu' ena. De Yesus denu ana feto' naa maman nae, “Fee ana' ia naa leo!” 56 Ana' a ina-ama na ra heran rala seli. Te Yesus fee nesened'a' neu se, fo 'afi' dui-b'engga dala' ia neu atahori ra.