2 Nandaa noo atahori Yahud'i fai hule-o'en, Yesus nisi' ume hule-o'e' de nanori. Fai' naa atahori hetar reu hule-o'e boe. Lele' ara rena nenorin ma, ara titindindii, de rae, “Atahori ia mahinen dei! Ana na'ena koasa! Saa de Ana bisa tao ta'o naa? 3 Tao-tao te, Eni tukan hau' a. Hita tahine maman Maria; noo 'od'i na ra, Yakob'is, Yoses, Yud'as ma Simon. Eni mafeto' hira boe. Huu basa hita leo kambo' esa na!” Naa de, rala na ra mera ma nda nau rena E sa.

4 Boe ma Yesus nafad'e nae, “Mema' teb'e! Lamatualain mana 'ola-'olan hambu had'a-hormat mia kambo' laen. Te sia eni kambon, atahori nda fee had'a-hormat sa.”^a

5-6a Te atahori naa ra rala manggatee na ra seli, de nda nau ramahere Yesus sa. Naa de, Ana heran ma nda 'afi' pake koasan sia naa sa ena. Ana tao nahai' 'aka' a atahori esa-rua' a.

6b Basa ma, Yesus lao' ndule kambo' mana deka-d'eka' ra, fo nanori Lamatualain hihii-nanau na. 7 Ana no'e nala mana tungga na ra atahori sanahulu rua, de denu se lao rua-rua' reu dui-b'engga Lamatualain Hara-lii Malole na. Ana o fee se koasa fo 'oi nitu ra boe. 8-9 Ana parenda se nae, “'Afi' mendi sud'i 'a saa nae-nae sia dala' a, huu dei fo Lamatualain mana sad'ia. 'Afi' mendi lepa-nggees, doi', ma kapi'. Te mendi' a teteas, laopei' sia eim, ma bad'u esa. 10 Mete ma hambu atahori simbo nggi sia umen, na, ama musi leo sia naa losa lao bali'. 11 Te mete ma losa mamana' esa, ma atahori naa ra nda simbo nggi sa, ma nda nau rena nggi sa, na, lao hela naa. Boe ma mifad'e se mae, ‘Ama nda nau rena sa, de hela fo lemba-misaa ao ma ra!’”^b

12 Basa ma, reu dui-b'engga Hara-lii Malole' a. Ara rae basa atahori musi doa' tao sala' leo, fo bali' misod'a tungga Lamatualain hihii-nanau na. 13 Ara o 'oi hendi nitu ra boe. Ma ara tao mina neu atahori hed'is ra langga na ra, ma hula-o'e tao rahai' se. Ma ara hai neu' ena.^c

14 Lele' naa, atahori sia bee-b'ee rahine Yesus ena. Mane Herod'es o rena dud'uit so'al koasan ena boe. Hambu atahori rae, “Yohanis mana sarani' a, nasod'a bali' sia Yesus ao na! Naa de, Ana tao manadad'i manaseli' naa ra.”

15 Te hambu atahori ruma rae, “Hoko'! Yesus ia, Elia nasod'a bali' sia ao na.” Hambu ruma fai rae, “Eni, Lamatualain mana 'ola-'olan laen mia dalahulu na.”^d

16 Te lele' mane Herod'es rena ara 'ola' Yesus ta'o naa boe, ma ana nae, “Eni, Yohanis mana sarani' fo ma'ahulun au denu nggero rala langga na. Ia naa, nasod'a bali' ena!”

17-18 Mane Herod'es denu ta'o naa, huu nad'ed'ea noo Yohanis. Dud'uin ta'o ia: mane Herod'es sao nala 'od'in Filipus saon, naran Herod'ias. Te Filipus noo Herod'ias nda fe'e mahela' sa. Naa de, Yohanis 'ai nasafafali e nae, “Papa mane' nda bole sao mala 'od'im saon sa. Te, naa sala noo hita 'ad'at Yahud'in ena!” Te 'ona' naa o, Herod'es sao nala ina' naa. Basa ma, ana denu humu Yohanis, de tao e bui rala neu.^e

19 Huu Yohanis 'ai nasafafali ta'o naa, naa de ina' naa nambed'a rala' ma nae tao nisa e. Te nda fe'e ka'e nala sa, huu Herod'es tao e sia bui rala ena. 20 Ma ana denu sold'ad'u ra ranea rahere' Yohanis.

Mema' Herod'es hia Yohanis. Ana nahine nae Yohanis naa, Lamatualain ded'enu na. Ma eni o atahori malole' boe. Mema' Herod'es hii rena Yohanis 'o'olan, te lao-lao esa naa, ralan med'a nda malole' neu 'o'olan sa.

21 Fai' esa ma, ina Herod'ias ka'e nala fo balas rala mera na. Fai' naa, ara tao mane Herod'es fai bob'onggi na. Ara ro'e malangga ra rema raa fefeta fai bob'onggi'. Mana nema' naa ra, mana parenda ra, sold'ad'u ra malangga na ra, roo lasi 'ad'at Galilea ra. 22 Sia fefetas naa, ina Herod'ias ana feton neu lendo. Lelendon malolen seli, de tao namaho'o Herod'es noo fui' ra rala na ra. Boe ma Herod'es no'e nala e, de nafad'e nae, “Mae mo'e saa, na, mufad'e leo! Dei fo au fee. 23 'Ita' mae mo'e banggi rua nusa ngga ia o, au fee. Au sumba 'endi' Lamatualain nara na!”

24 Boe ma, ana feto' naa neu natane maman nae, “Mama! Au 'o'e saa malole' sia papa?”

Boe ma maman nataa nae, “Naaa! Muu mo'e mala Yohanis langga na.”

25 Ana feton lai-lai neu sia Herod'es, de no'e nae, “Papa! Au 'o'e fo tao Yohanis langgan neu dulang rala, fo fee neu au. 'Oras ia boe!”

26 Herod'es rena nala ma, fale ralan neu' ena. Te ana nda bisa lea bali' susumban sa, huu basa atahori rena ena. 27 Boe ma ana parenda sold'ad'u ra malanggan esa neu nggero nala Yohanis langgan mia bui rala. 28 De ara nggero rala Yohanis langgan, ma tao neu dulang rala, de reu fee neu ana feto' naa. Ana simbo nala dulang boe, ma 'o'o nendi fee neu mama na. 29 Lele' Yohanis mana tungga na ra rena 'oi ara nggero rala Yohanis langgan, ma rema ha'i rendi ao-sisin, de reu ra'oi e.

Yohanis mamaten dud'uin, ba'u 'a naa ena.

30 Lao esa, mana tungga' fo Yesus denu' ra, bali' reu ra'ab'ue roo E fai. Ara rafad'e basa saa fo sira tao ma ranori neu atahori ra ena.

31 Te lele' naa, atahori hetar seli lao' reu-rema sangga Yesus. Naa de, Ana noo mana tungga na ra nda bisa raa rala sa. De Yesus nafad'e mana tungga na ra nae, “'Ima fo teu sangga mamana rou', fo hahae tala ao ta ra mbei dei.”

32 Boe ma basa se hene 'ofa' rala reu, de sangga mamana rou' na'ad'oo' noo kambo' a.

33 Te atahori hetar naa ra rita Yesus se 'ofan tungga-tungga dano a suu na. Boe ma ara lao hela kambo' tungga dala sia mad'a' ata, de ara losa ra'ahulu' Yesus se. 34 Lele' Yesus se 'onda mia 'ofa' a, ma nita atahori hetar rahani ena. Boe ma Ana kasian se, huu basa se nda rita' rae tao saa sa ena, 'ona' bib'i lombo nda ra'ena manatad'a sa. De nanori se Lamatualain hihii-nanaun^f 35-36 mia fefetun losa bob'o'. Mana tungga na ra rafad'e rae, “Papa! Malole lena' denu atahori ia ra reu hasa nanaat sia kambo mana deka ia ra. Huu bob'o' ena te nanaat nese.”

37 Te Yesus nataa nae, “'Afi'! Hei mana fee se nanaat.”

Te ratane bali' rae, “Naa! Mete ma hai mihao atahori ia ra, na, hai musi pake doi' naen seli. 'Ona' atahori esa nggad'in too esa!^g Hai hambu doi' ba'u naa mia bee nema?”

38 Te Yesus nataa nae, “Mii mitane dei, seka nendi lepa-nggees.”

De reu ratane, ma bali' rafad'e rae, “Hambu roti bue' lima, noo 'u'u rua.”

39 Basa ma Yesus denu basa atahori naa ra 'endo' ra'ab'ub'ue sia uru ata. 40 De ara reu 'endo' ra'ab'ue. Hambu ruma ra'ab'ue natun-natun, ma ruma lima nulu-lima nulu.

41 Boe ma Yesus ha'i nala roti kalima', noo 'u'u karua' ra. De Ana 'oro'aa no'e makasi mbali Lamatualain. Basa ma, Ana bib'ib'i roti ra, de loo fee mana tungga na ra, fo reu banggi fee basa atahori naa ra. Ana o banggi fee se 'u'u karua' ra boe. 42 De basa se raa losa ra'ab'eta. 43 Ara raa basa ma, mana tungga na ra rad'uru rala nanaa lena' ra, sofe boa sanahulu rua.

44 Atahori naa ra, mbei ma rifon lima. Naa fe'e reken 'a tou mana naa' ra. Te nda fe'e reken ina' ra roo anad'iki' ra sa.

45 Basa naa ma, Yesus denu mana tungga na ra sae 'ofa' ra'ahulu' risi' kambo Betsaida sia dano seri'. Te Ana fe'e nahani sia naa, fo denu atahori hetar naa ra bali'. 46 Lele' basa se bali' ma, Ana hene neu sia mbuku' esa ata' de hule-o'e.

47-50 Temba neu ma, Yesus 'onda bali'. Ana nita mana tungga na ra 'ofan losa dano a talad'an ena. Ara sefe rae mate, huu 'ofa' lab'an anin. Deka manggarelo boe, ma Yesus tungga se. Ana lao' sia oe' ata. Lele' Ana nae lao' seli 'ofa' a, ma ara rita E. Ara nggengger rala seli. De ratane rae, “Naa! Saa ia? Nitu, do?”

Te Yesus 'ola' nggero nae, “'Afi' mimitau! Ia Au.”

51 Lele' Ana hene 'ofa' ata neu, ma anin o naloe' boe. Mana tungga na ra titindindii rala seli. 52 Ara fe'e rita Yesus pake koasan fo nahao atahori rifon lima lena'. Te nda fe'e rahine teb'e-teb'e' koasan sa, huu rala na ra manggatee'.

53 Lele' ara losa dano a seri' boe, ma ara nafu 'ofa' sia kota Genesaret dano suu na. 54 Ara 'onda mia 'ofa' ata ma, atahori hetar rita se ena. Boe ma, nggasi rae, “We! Yesus nema ena!” 55-56 Basa se rela' reu rafad'e ndule kambo', de atahori ra 'o'o rendi atahori mamahed'i' ra.

Sad'i ara rena rae Yesus sia mamana' esa, na, ara nonggo-nonggo rendi atahori mamahed'i' ra, de ralololi se sia rae loa'. Ara du'a rae, “Sad'i atahori mamahed'i' naa ra kois dai Yesus bad'un suun, na, tantu ara hai reu' ena.” Ara kois ta'o naa, ma hai reu' ena.