Lamatua' Yesus denu ana ded'enun atahori hitu nulu rua
10
Basa ma, Yesus pili nala ana ded'enun laen atahori hitu nulu rua.a Basa de Ana banggi se atahori rua-rua', fo reu ra'ahulu' E sia mamana-mamana' fo nae neu' a. 2 Ana denu se nae, “Hambu atahori hetar 'ona' are mbule manahuni' ena. Hela' a tenu osi' a haitua atahori mana tao ues na ra rema 'etu-'oru. Dad'i hei musi hule-o'e mo'e Lamatualain haitua selu' mana tao ues na ra fo ra'ab'ue rala atahori mana nae tungga Au ra. Huu, atahori mana nae tungga Au ra, hetar. Te atahori mana tao ues ra hid'a' a.b3 Ia naa ama lao' leo! Au denu nggi mii sia atahori hetar. Te misined'a ta'o ia. Hei 'ona' bib'i lombo ana rala malole', mana neu sia busa fui de'ulaka' ra talad'a na.c
4 Ama 'afi' mendi doi', do tas bua-b'a'us, do laopei lena' sia dala'. 'Afi ngganggari fai parsuma 'a, huu 'aka' mitea atahori sia dala'.
5-8 Mete ma hei misi' kambo' sa, 'afi' lali-lali' mia ume sa misi' ume laen. Mete ma atahori simbo hei noo malole' sia ume sa, na, mihani sia naa leo, losa hei lao hela kambo' naa. Mete ma hei misi' ume sa, hei musi mo'e fo Lamatualain fee papala-b'ab'anggi' neu atahori sia ume naa. Mete ma tenu ume' a simbo nggi noo malolole, dei fo Lamatualain natud'u rala malolen neu ume isi' naa ra. Te mete ma ara nda nau simbo nggi sa, na, hela neu fo Lamatualain natud'u rala malolen neu 'aka' mesa' nggi. Mete ma hei misi' ume sa, do, kambo' sa, na, mia-minu sud'i 'a saa fo ara fee' ra. Simbo noo rala nemeho'ot, te nandaa ara fee nggi ta'o naa fo nggati mbusa-titi ma ra.d 9 Tao mihai' atahori mamahed'i na ra. Boe ma mifad'e se mae, ‘Lamatualain to'u parendan deka ena!’
10 Te dei fo hambu kambo' ruma atahori na ra nda nau simbo nggi sa. Mete ma ara tao ta'o naa mbali nggi, na, mii mimbirii' sia kambo' a dalan fo 'ola' mae, 11 ‘Rena malolole! Hai 'ima mendi Lamatualain Ded'ea-'o'olan neu nggi, te hei nda nau mbei-mbei sa boe. Dad'i ia naa hai henda' hendi kambo' ia afun sia hai ei ma ra, fo dad'i bukti 'oi, dei fo hei lemba-misaa ao ma ra! Te misined'a malolole! Lamatualain to'u parendan deka ena!’e
12 Hei bub'ulu' kota Sod'om de'ulakan, to? Au 'ufad'e, e! Dei fo nandaa noo fai netete'en, Lamatualain fee huhuku-d'od'oki' neu atahori nda mana simbo hei' ra sa, beran lena' atahori Sod'om ra!”f
Atahori nda mana nau simbo Lamatua' Yesus sa
13 Yesus 'ola' nakandoo fai nae, “Hei mana sia kambo Korasing ma kambo Betsaida ra, ama besa-b'esa! Sosoe' dai nggi ena! Au tao manad'ad'i manaseli' mata'-mata' sia mata ma ra ena, te hei nda nau mimihere Lamatualain sa. Tao-tao te, hei ia ra, atahori Yahud'i mana mitaa mae hei mihine E. Te 'ona' manad'ad'i manaseli' fo Au tao sia hei kambom dad'i sia kota Tirus noo Sid'on, ne'o doo basa ia de atahori sia naa ra doa' mema' ena, ma lao hela basa sala-kilu na ra fo tungga Lamatualain ena. Ne'o ara pake bua-b'a'u sususa', ma mbori afu neu langga na ra fo dad'i bukti rae, sira fale rala na ra mia sala-kilu na ra. Tao-tao te atahori Tirus roo Sid'on ia ra, nda atahori Yahud'i mana rataa rae sira rahine Lamatualain sa.h 14 Teb'e! Hei mete neu' ena! Mete ma Lamatualain na'etu' basa atahori ded'ea na ra, atahori Tirus roo Sid'on ra huhuku-d'od'oki na ra fe'e nggafat lena' hei huhuku-d'od'oki ma ra.
15 Besa-b'esa hei atahori kambo Kapernaum! Ama 'afi' du'a mae, dei fo Lamatualain so'u boti' nggi sorga mii. Hoko'! Dei fo Lamatualain mbia nggi naraka rala mii!i
16 Misined'a malolole! Atahori mana rena hei, 'ona' ara rena neu Au boe. Ma atahori nda mana nau rena hei sa, 'ona' ara nda nau rena Au sa boe. Lena' fai, atahori nda mana nau rena Au sa, 'ona' ara nda nau rena Lamatualain sa, mana denu Au raefafo' 'uma.”j
Ded'enu kahitu nulu rua' ra bali'
17 Lele' ded'enu kahitu nulu rua ra bali' rema,k rala na ra ramaho'o. Boe ma rafad'e neu Yesus rae, “Awii! Manaseli' teb'e! Lele' hai 'oi nitu ra mendi' Ama' naran, nitu ra rena hai boe, de rela neu' ena! Manaseli' teb'e!”
18 Boe ma Yesus nataa se nae, “Teb'e! Lele' hei tao ta'o naa, Au 'ita Lamatualain mbia hendi nitu ra noo malanggan mia lalai, 'ona' ndelas nakahahad'o' dii-'ona' mia lalai a! 19 Misined'a, e! Nitur malanggan naa, hita musu na. Eni o ma koasa' boe! Te Au o fee nggi koasa fo misenggi' koasa na. Mete ma hei tab'u mala mengge maraso', do 'ura', na, hei nda ta'o bee sa boe. Nda hambu saa bisa tao nasoe' nggi sa.l 20 Hei rala ma ra ma'ahee, huu nitu ra rena nggi. Malole boe, te naa fe'e dala anad'iki'! Malole lena' rala ma ra ma'ahee, huu Lamatualain sura' nala nara ma ra fo dad'i rauinggun mana maso' sorga.”
Lamatua' Yesus ralan namaho'o
21 Lele' naa, Lamatualain Dula-d'ale Meumaren tao Yesus ralan namaho'o. De Ana koa-kio Lamatualain nae, “Ama'! Ama' mana dad'i Malangga Monae' sia lalai noo raefafo'. Au 'o'e makasi nae-nae, huu Ama' bab'ata mala basa dala' ra mia atahori mana tao aon 'ona' mahine' ma mana koao' ra. Te Ama' mutud'u basa dala' ia ra neu anad'iki ra ma neu atahori mana maloe-mad'ae rala' ra. Teb'e, Ama'! Huu naa mana tao Ama' ralan namaho'o!”
22 Basa ma Yesus nafad'e atahori hetar nae, “Rena, o! Ama ngga sia sorga fee basa koasa neu Au ena. Mana nahine teb'e nae, Au ia, seka, naeni 'aka' Ama'. Ma mana nahine teb'e nae, Ama' naa, seka, 'aka' Ama' Anan, naeni Au. Ma atahori laen fo Au pili 'ala 'ae 'ufad'e se, fo ara o rahine E boe.”m
23 Basa de Yesus heo' mbali ana ded'enu na ra, de nafad'e neu 'a mesa' se nae, “Hei 'onton teb'e, huu mita Lamatualain koasan ena. 24 Mane-mane' roo mana 'ola-'ola ma'ahulu' ra rae rita saa fo hei mita' a ena, te ara nda bisa rita sa. Ara o hii rae rena saa fo hei hambu rena' a, te ara nda hambu rena sa.”
Atahori Samaria rala lilo' a
25 Lao esa, hambu atahori Yahud'i mahine hukun esa, nambarii' nae na'atutud'a' Yesus. Ana natane nae, “Ama Meser! Tulun mufad'e dei! Au musi tao saa, fo 'ona bee naa au 'uhine hambu 'usod'a 'ukundoo 'oo Lamatualain sia sorga?”
26 Yesus nataa nae, “Ba'i Musa sura' saa so'al dala' ia ra? Tungga dud'u'am, na, ta'o bee?”
27 Atahori naa nataa nae, “Ana sura' nae:
‘Ho musi sue Lamatualain, ho Lamatua ma, lena' basa' e.
Huu naa, ho ralam musi hii mukundoo E,
manggate fo tungga hihii-nanaun,
ma muhine E.’
Ma nenesura' 'oi, ‘Ho musi sue toronoom 'ona' ho sue aom boe.’”n
28 Yesus nataa nae, “Teb'e! Mete ma ho tao tungga ta'o naa, na, musod'a moo Lamatualain mukundondoo' a.”o
29 Te atahori naa nae tao aon 'ona' atahori malole'. Boe ma natane Yesus nae, “Te au ‘toronoo’ ngga ra, seka ra?”
30 Boe ma Yesus nataa nae, “Ta'o ia! Au 'ae 'ufad'e nekendandaa' esa. Dei fo mufad'e, bee ka teb'e-teb'e' ‘toronoo'’. Dud'uin ta'o ia: Hambu atahori Yahud'i esa mia kota Yerusalem, 'onda nisi' Yeriko neu. Te 'aib'oi' ma, hambu mana rambok ra rema rambok e. Ara momoko e, basa ma rambas rala doi' ma basa bua-b'a'u na ra. Boe ma ara nggari hendi e nisi' dala' suun, de lao hela e neu naa. Atahori naa nae 'a mate ena.
31 Tao tao te, malangga agama Yahud'i esa lao' tungga naa boe. Te lele' ana nita atahori ma'ahina' mana lengga-lengga sia dala' suun, ana nda nambarii' fo tulu-fali atahori naa sa, te ana dinggo' nisi' dala' suun seri de lao nakandoo. 32 Nda doo' sa ma, atahori laen sa nema tungga naa fai. Eni, atahori mia leo Lewi mana ue-tao sia Lamatualain Ume Hule-o'e Huu na. Lele' ana nita atahorin sia dala' suun, ana neu deka-d'eka de mete 'a, te nda tulu-fali e sa, ma dinggo' nisi' dala' suun seri de lao nakandoo.
33-34 Nda doo' sa fai ma, atahori sa mia kambo Samaria tungga naa noo banda keled'ei na ra. Basa nggita bub'ulu' tae, atahori Yahud'i ra raloe-rad'ae atahori Samaria ra. Te lele' atahori Samaria a nita atahori mana nenerambo' naa, ma ana kasian e. Ana neu deka-d'eka fo nae tulu-fali atahori naa. Ana 'ombo oe anggor de safe nameu hina' ra, ma tao mina neu se. Basa ma ana mbalu malolole e, de 'o'o e keled'ei ata neu. Boe ma noo atahori naa losa kota. Ana fee atahori naa leo sia ume seseb'a', ma mete-se'u e noo malole'.p
35 Mbila' neu ma, atahori Samaria naa neu fee na'ahulu' doi fula' ruaq neu tenu ume' a, de nafad'e nae, ‘Mala doi' ia fo mete-se'u neu atahori mamahed'i' a losa ana hai. Mete ma nda dai sa, na, tulun mete-se'u mendi' doim, fo au 'uma fai, fo fee bali' ama' doi na.’”
36 Yesus nekendandan losa 'a naa ena. Basa ma Ana natane mana mahine hukun a nae, “Tungga dud'u'am, na, bee ka teb'e-teb'e' ‘toronoo'’ soa' neu atahori nenerambo' faa' ra?”
37 Atahori naa nataa nae, “See fai, ne'o atahori mana tud'a kasian neu e.”
Yesus nae, “Teb'e, 'a'a! Bali' leo, fo tao tungga.”
Lamatua' Yesus noo Marta ma Maria
38-40 Basa ma, Yesus noo ana ded'enu na ra lao rakandoo risi' Yerusalem. Ara tuli mia kambo' sa. Sia naa hambu toronoo 'od'i-'a'a' rua, nara na ra Marta ma Maria. Marta no'e fo Yesus se leo sia eni ume na. De ara leo ra'atataa' sia naa.
Lele' Yesus 'endo' nanori atahori ra, Marta mbute-mue noo nanaa-nininu' sia dapu rala. Te 'od'in Maria, 'endo' deka-d'eka sia Yesus ein, fo rena 'o'ola na. Nda doo' sa, ma Marta rala neu de 'o'ola' neu Yesus nae, “Ama', e! Ta'o bee, o! Au mbute-mue 'ulalau nanaa-nininu' 'ita' mamate ngga, te 'od'i ngga 'endo' te'e-te'e sia ia. Tulun dei! Denu e tulun au mbei sia dapu rala.”r