Atahori Farisi roo atahori Saduki ra rae tao ra'atutud'a' Lamatua' Yesus
16
Lao esa, hambu atahori Farisi hira roo atahori Saduki ra rema risi' Yesus. Ara rae raselu-b'ale roo Yesus, fo rae ra'atutud'a' E. Huu naa, ara ro'e rae, “Pak! Tulun mutud'u manad'ad'i manaseli' mata' esa dei, fo dad'i bukti 'oi, Pak hambu koasa mia Lamatualain ena.”a2 Te Yesus nataa nae, “Mete ma relo mopo ma lalai dulan mbilas, na, hei mihine mae, ‘Mbila na nda 'ud'a sa.’ 3 Ma mete ma relo boti' ata nema noo lelee nggeo', hei mihine mae, ‘Fai' ia nae 'ud'a.’ Naa, mete ma hei bisa mihine fula-fai ra nenendin, na, ta'o bee de hei nda mihine lele' ra nenendin sa? 4 Wou! Hei atahori 'ale' ia ra, mihine tao 'a de'ulaka'! Hei nda taoafi' neu Lamatualain sa! Mae hei mo'e manad'ad'i manaseli' ra o, Au nda fee sa. Huu ma'ahulun Lamatualain fee manad'ad'i manaseli' nendi' mana 'ola-'olan Yunus ena. Dad'i naa dai ena!” Yesus 'ola' basa, ma Ana lao hela se.b
Lamatua' Yesus nanori nae, besa-b'esa moo atahori Saduki ra kokoe-nanasi na ra
5 Lele' Yesus se losa dano a talad'an, dei de ana mana tungga na ra rasaned'a rae, sira lilii' rendi roti soa' neu sira lepa-nggees na. 6 Lele' Yesus rena ara 'ola' ra'o naa, ma Ana nafad'e nae, “Hei musi besa-b'esa mbali atahori Farisi roo atahori Saduki ra bib'it rotin e.”c
7 Ana mana tungga na ra rena ma, ara bingun. Ara 'ola-'ola' rae, “Tou lasi' a 'ola' saa ia? Mbei ma Ana 'ola' ta'o naa, huu ata nda tendi roti sa, do?”
8 Te Yesus nahine dud'u'a na ra. Basa ma, Ana 'ola' nae, “Weh! Hei ia ra seli teb'e ma! Ta'o bee de hei 'ola' so'al roti! Hei kuran mimihere neu Au, do? 9 Hei nda fe'e mihine Au koasa ngga sa, do? Te fai' naa Au bib'ib'i roti bue' lima fo fee atahori rifon lima raa, hei kumbu mala lena na ra boa hira?d 10 Boe ma ta'o bee fai noo roti hitu fo Au banggi fee neu atahori rifon kahaa' ra? Hei kumbu mala lena na ra boa hira fai?e 11 Ta'o bee de ama nda mihine Au 'o'ola ngga faa' ra sa? Au nda 'ola' so'al roti sa. Au 'ae fee nesenened'a' neu nggi, ama besa-b'esa moo atahori Farisi ma Saduki ra nenori na ra. Te nenori na ra kokoe-nanasi rala atahori hetar, 'ona' bib'it roti tao neu roti fo hene na'amoko.”
12 Yesus 'ola' ta'o naa, dei de ara rahine rae, Ana nda 'ola' so'al roti sa. Te Ana 'ola' so'al atahori Farisi roo atahori Saduki ra nenori na ra.
Petrus nataa nae, Lamatua' Yesus naa, Kristus
13 Basa ma, Yesus se lao' reu sia mamana' mana deka' noo kota Kaisarea Filipi. Ana natane se mia dala' talad'an nae, “Tungga atahori 'o'olan, ara rae, Au, naeni Atahori Matetu' ia, seka?”
14 Ara rataa rae, “Hambu ruma rae Ama' ia, Yohanis mana sarani' a nasod'a bali' ena. Laen fai rae, mbei ma Ama' ia, ba'i Elia. Laen ra fai 'oi, ba'i Yermia. Mete ma hoko', na, Lamatualain mana 'ola-'olan laen esa mia dalahulu na.”f
15 Boe ma Yesus natane selu' se fai nae, “Mete ma tungga hei, na, Au ia, seka?”
16 Boe ma Simon nataa nae, “Ama' ia, Kristus, naeni Atahori fo dalahulun Lamatualain helu-fuli nae haitua nema' a! Ma Ama' ia, Lamatualain mana nasod'a nakandoo' a Anan!”g
17 Yesus nae, “Simon, Yunus anan, e! Ho ia, 'onton, o! Huu atahori nda rafad'e nggo hal ia sa. Te Au Ama ngga sia sorga mana nafad'e. 18 Rena, e! 'Ale' ia Au 'ae bab'ae naram ‘Petrus’. Nara' naa sosoan naeni, fatu.h Huu nemeherem manggatee' 'ona' fatu, dei fo dad'i netehuu' fee neu Au atahori mamahere ngga ra. Mae ara nenepoko-paru' losa mate boe o, ara ra'atataa' rakandoo 'a. 19 Dei fo Au fee nggo hak, fo mete-se'u atahori ngga ra, 'ona' ho to'u lelesu sorga nggoe na. Huu saa fo ho 'ena-'ai sia raefafo' ia, Lamatualain 'ena-'ai sia sorga ena. Ma saa fo ho fee 'isin sia raefafo' ia, Lamatualain fee 'isin sia sorga ena.”i
20 Yesus 'ola' basa ta'o naa, ma Ana na'angge se fo 'afi' rafad'e esa-esa boe rae Eni ia, Kristus.
Lamatua' Yesus nafad'e so'al Eni mamaten noo Eni nasod'a bali'
21 Eni' a lele' naa, Yesus nafad'e neu ana mana tungga na ra nae, “Au musi 'uu 'isi' kota Yerusalem. Te dei fo sia naa, Au hambu doid'oso' naen seli mia lasi-lasi 'ad'at, ma malangga agama Yahud'i ra malangga na ra, roo basa meser agama ra. Dei fo ara tao risa Au, te fini-esan ma Au 'usod'a bali'.”j
22 Yesus nafad'e ta'o naa ma, Petrus nore nala E nisi' bob'oan de 'ai nae, “Ama' 'afi' 'ola' ta'o naa! Ne'o Lamatualain nda hela neu ta'o naa sa!”
23 Te Petrus 'o'olan nda tungga Lamatualain hihii-nanaun sa. Naa de Yesus heo' mbali e de 'ai e nae, “Hee! Dinggo' hela mamana' ia! Naa, nitu ra malanggan 'o'olan! 'Afi' bab'aa Au! Ho du'a tungga 'a atahori hihii-nanaun, te nda tungga Lamatualain hihii-nanaun sa!”
24 Basa boe ma Yesus nanori ana mana tungga na ra nae, “Atahori mana nau tungga Au, eni musi na'atataa' nakandoo tungga-tungga fai! Eni musi lilii' hendi hihii-nanaun, fo tungga 'a Lamatualain hihii-nanau na. Mae atahori rae tao risa e o, eni musi tungga nakandoo 'a, 'ona' atahori lemba hau ngganggen fo neu mate.k 25 Huu atahori mana sad'ia mate huu eni tungga Au, dei fo ana hambu nasod'a nakandoo noo Lamatualain. Te atahori mana nasod'a soa' neu 'a aon, dei fo masod'an sambu-lalo!l 26 Rena, e! Mete ma ho hambu basa hata-heto raefafo' ia, te Lamatualain nda simbo nggo sa, na, hahambun sa? Mae lemba mendi basa raefafo' isin o, ho nda bisa soi mala ao samanam sa!
27 Au 'ufad'e basa dala' ia ra neu nggi, huu Au ia, Atahori Matetu' a. Dei fo Au 'onda bali' 'uma 'endi' Ama ngga mandete-masa'an, 'oo ana ded'enu na ra mia sorga. Lele' naa, dei fo Au bala-b'ae atahori tungga saa fo ana tao' a.m 28 Misined'a malolole, e! Mia basa hei ia, dei fo hambu atahori hira nda mate sa, losa fai' bee fo ara rita Au, Atahori Matetu' a, dad'i Mane' mana to'u parenda'.”