Ara tati risa Yohanis mana sarani' a
14
Lele' naa, mane Herod'es to'u parenda' sia profinsi Galilea. Ana o rena hara' mata'-mata' so'al Yesus boe. 2 Ana nafad'e pagau na ra nae, “Yesus ia, ne'o Yohanis mana sarani' fo fe'esa'an au denu nggero rala langga na. Ia naa ana nasod'a bali' ena, o! Naa de na'ena koasa fo tao manad'ad'i manaseli' naa ra.”3 Mane Herod'es 'ola' ta'o naa, huu dalahulun ana nad'ed'ea noo Yohanis, losa ana humu ma tao Yohanis bui rala neu. Ded'eat naa dud'uin ta'o ia: mane Herod'es sao nala 'od'in Filipus saon, naran Herodias. Tao-tao te Filipus noo Herodias nda fe'e mahela' sa. 4 Naeni de Yohanis 'ai nasafafali nae, “Ama mane' 'afi' ha'i mala 'od'im sao na. Te naa mulena-langga hita hohoro-lalane 'ad'at Yahud'i na!”a
5 Te Herod'es nda nau rena e sa, de sao nala Herodias boe. Herod'es nae tati nisa Yohanis mana Sarani' a. Te ana namatau atahori hetar, huu ramahere rae, Yohanis naa, Lamatualain mana 'ola-'ola na. Naa de ana denu atahorin, fo tao Yohanis bui rala neu.
6 Te doo-d'oo ma, Herod'es tao fefeta fai bob'onggi na. Lele' naa, ina mane Herodias ana feton neu lendo mbali fui' ra. Lelendon malolen seli, de tao Herod'es ralan ma'ahee nala seli. 7 Ana feto' a lendo basa ma, Herod'es no'e e de nafad'e nae, “Mae mo'e saa sia au, na, mufad'e leo! Te dei fo au fee nggo. Au to'u 'uhere' hehelu-fufuli ngga ia. Ma au sumba 'endi' Lamatualain nara na.”
8 Ana feto' a inan rena mane' a 'o'olan ma, ana 'ira anan. Naa de anan neu no'e nae, “Ama'! Au 'o'e Yohanis mana sarani' a langga na. Tao neu dulan rala, fo mendi fee neu au.”
9 Lele' Herod'es rena nala ana feto' a no'e ta'o naa ma, ralan susa. Te ana nda bisa lea bali' susumban sa, huu basa fui' ra rena ena na. Naa de ana tungga 'a ana feto' a hihii-nanau na. 10 Boe ma ana parenda atahori reu nggero rala Yohanis langgan, mia bui rala. 11 Ara nggero rala Yohanis langgan, ma tao neu dulan rala, de reu fee neu ana feto' a. Ana simbo nala dulan ma, ana 'o'o nendi e fee neu ina na.
12 Lele' Yohanis ana mana tungga na ra rena 'oi ara nggero rendi langgan, ma ara reu ha'i rendi ao-sisin, de reu ra'oi e. Basa de ara reu rafad'e Yesus.
Lamatua' Yesus nahao atahori rifon lima lena'
13 Lele' Yesus rena nala hara' so'al Yohanis, ma Ana noo ana mana tungga na ra rae lao hela mamana' naa boe. Ara sae 'ofa' de rae reu risi' mamana rou' fo hahae ao na ra. Te atahori hetar rita Yesus se 'ofan tungga-tungga 'a dano suu na. De ara lao hela kambo na ra, ma lao' lai-lai tungga dala mad'a' ata. Naeni de ara losa mamana' naa ra'ahulu' Yesus se. 14 Lele' Ana 'onda mia 'ofa', ma Ana nita atahori hetar rahani E. De Ana tud'a kasian mbali se. Ma Ana tao nahai' atahori mamahed'i' ra.
15 Bob'o' neu ma, Ana mana tungga na ra reu rafad'e rae, “Ama', e! Malole lena' Ama' denu basa atahori ia ra, reu hasa nanaat sia kambo-kambo' mana deka-d'eka ia. Te bob'o' ena na! Sia ia nda hambu nanaat saa sa boe.”
16 Te Yesus nataa nae, “'Afi'! Hei mana mihao se.”
17 Te ara rataa rae, “Awee, Ama', e! Hai nda mi'ena saa-saa fo mihao neu atahori desi basa ia ra sa. Hai mae tao ta'o bee? Te 'aka' roti bala' lima, ma 'u'u rua' a na!”
18 Te Yesus 'ola' nae, “Naa malole ena. Mendi nema leo!” 19 Boe ma Ana denu basa atahori ra 'endo' ra'ab'ub'ue reu uru ata. Basa ma, Ana ha'i nala roti bue' lima, ma 'u'u karua' ra. Boe ma Ana 'oro'aa mbali lalai a de no'e makasi neu Lamatualain. Basa ma, Ana bab'anggi roti naa ra, de loo fee neu ana mana tungga na ra, fo reu banggi fee neu basa atahori naa ra. 20 De basa se raa losa ra'ab'eta. Ara raa basa ma, kumbu rala nanaa sisa' ra, boa sanahulu rua. 21 Basa atahori mana raa' ra, mbei ma tou' rifon lima. Nda fe'e reken ina' ra roo anad'iki' ra sa.
Lamatua' Yesus lao' sia oe' ata
22 Basa se raa basa ma, Yesus denu ana mana tungga na ra reu sae 'ofa' fo lao ra'ahulu' risi' dano a seri. Te Ana fe'e nahati naa, fo denu basa atahori naa ra bali'. 23 Lele' basa se bali', ma Yesus hene nisi' lete' esa, de hule-o'e. Losa temba, te mesa' ne fe'e sia naa. 24 Lele' naa, ana mana tungga na ra 'ofan losa dano a talad'an ena. Te ara sefe rita' mamate na ra, huu 'ofa' lab'an ani mata', ma ree monae' ra mbembesi' se. 25 Deka manggarelo ma, Yesus neu tungga se boe. Te Ana lao' sia oe' ata. 26 Ana mana tungga na ra rita ta'o naa ma, ara nggengger. De ara 'ola' ramatatau rae, “He'e, o! Maro sa sini!”
27 Te Yesus 'ola' noo se nae, “Woe! Ama 'afi' mimitau! Te Au ia Yesus! Sub'a-sub'a leo!”
28 Petrus rena ta'o naa ma nataa nae, “Mete ma teb'e-teb'e' Yesus, na, denu au lao' sia oe' ata fo naa 'eti.”
29 Boe ma Yesus nataa nae, “Neu! 'Uma leo!” Boe ma Petrus 'onda mia 'ofa' de lao' nisi' Yesus tungga oe' ata. 30 Te lele' Petrus med'a nae hambu sanggu anin, ma namatau nala seli. Ana nae 'a tena ena, ma randu nae, “Ad'uu, Papa, e! Tulun fee au 'usod'a dei!”
31 Boe ma Yesus loo Liman lai-lai de to'u nala e. Ana 'ola' nae, “Awee, Petrus, e! Ta'o bee de ralam nab'ab'anggi? Nda mumuhere teb'e Au sa, do?”
32 Basa ma, ru'a se 'ofa' rala reu. Boe ma anin o naloe' neu' ena boe. 33 Ana mana tungga na rita ta'o naa, ma ara so'u kokoa-kikio' neu E rae, “Awii! Ama' ia, mema' teb'e-teb'e' Lamatualain Anan!”
Lamatua' Yesus na'ahahai' atahori mamahed'i' ra sia Genesaret
34 Lele' ara losa dano a seri' ma, ara 'onda risi' kambo Genesaret dano suu na. 35 Ara 'onda ma, atahori hetar rahine se neu' ena. De ara rameli rae, “Wee! Yesus nema ena, o!” Ara rela' reu rafad'e ndule kambo', ma atahori rendi basa atahori mamahed'i' ra. 36 Ara ro'e rae sad'i sira nggama 'a bad'u na. Huu ara du'a rae, “Sad'i atahori mamahed'i' ra nggama rala Yesus bad'un suun, ne'o ara hai reu' ena.” De basa atahori mamahed'i' mana nggama bad'u narun, hai reu' ena.