Lamatua' Yesus na'ahahai' atahori hed'i' kusta esa
8
Yesus 'onda nema mia lete' a, ma atahori hetar nonggo-nonggo reu tungga E. 2 'Aib'oi' ma, atahori hed'i kusta esa neu nisi' E. Ana sende' lulu-langgan de no'e tulun Yesus nae, “Papa, e! Tulun au dei! Mete ma Papa nau, na, Papa bisa mu'uhahai' hed'i ngga ia, naa fo atahori sud'i boe melumud'u au fai, ma au o bisa 'uu hule-o'e sia ume nggarei' rala.”3 Rena 'ona' naa, ma Yesus loo liman, de kois atahori kusta a, ma 'ola' nae, “Au nau! Hai leon!” 'Aib'oi' ma, atahori naa hed'is na mopo neu' ena. 4 De Yesus 'ola' noo e nae, “Musuned'a, e! Ho hai ena, te 'afi' mufad'e esa boe. Musi tungga ba'i Musa hohoro-lalanen dei. Dad'i muu sia malangga agama, fo ana paresa' aom dei, naa fo ana nahine hed'im mopo teb'e ena, do fe'e hoko'. Basa naa musi muu fee tutunu-hohotu' dad'i tanda makasi, fo basa atahori bub'ulu' rae, ho hai teb'e ena.”a
Lamatua' Yesus nahai' malangga sold'ad'u Roma esa ana mana tao ues na
5 Basa naa ma, Yesus neu sia Kambo Kapernaum. Sia naa, malangga sold'ad'u Roma esa nema no'e tutulu-fafali' nae, 6 “Papa, e! Au ana mana tao ues ngga esa namahed'i sia ume. Ana nda fela nala mia koi a sa, huu ana namahed'i nita' mamate na.”
7 Yesus nataa nae, “Malole! Dei fo Au 'eti fo tao 'uhai' e.”
8 Te malangga nae, “Papa 'afi' bengge-b'engge muu fai, huu Au nda 'undandaa simbo Papa sia ume ngga sa. Sad'i Papa 'ola' mia ia nema, na, au ana mana tao ues ngga, hai neu' ena. 9 Au 'uhine dala' ia, huu au malangga ngga ra ra'ena koasa parenda au. Ma au o 'u'ena koasa fo parenda sold'ad'u ngga ra boe. Mete ma au parenda sold'ad'u ngga 'ae, ‘Muu sia naa!’ na, ana neu. Ma mete ma au 'ae, ‘Ia 'uma!’ na, ana nema. Ma mete ma au denu ana mana tao ues ra 'ae, ‘Ue-tao ia!’ na, ana tao ta'o naa. Dad'i sad'i Papa 'ola', na, au ana mana tao ues ngga, hai neu' ena.”
10 Yesus rena nala 'ona' naa, ma Ana heran. Ana 'ola' neu atahori hetar mana tungga Eni nae, “Heran, e! Doon basa ia te, Au nda fe'e 'undaa 'oo atahori Yahud'i esa sa boe nemehere seli 'ona' atahori Roma ia! 11 Rena, e! Te dei fo hambu atahori fui' hetar 'ona' atahori Roma ia rema mia seri' rulu ma mia seri' muri, fo 'endo' raa fefetas ra'ab'ue roo ba'i Abraham, ba'i Isak, ma ba'i Yakob sia Lamatualain umen sia sorga. 12 'Ona' mae Lamatualain pili atahori Yahud'i fo dad'i atahorin ena o, te hambu atahori hetar nda taoafi' neu E sa. Dei fo Ana timba hendi se risi' mamana ma'ahatu kib'u-kib'u' a. Sia naa ara nggae ei-ei ma doid'oso rita' mamate na ra.”b
13 'Ola' basa 'ona' naa ma, Yesus 'ola' neu malangga sold'ad'u a nae, “Pak bali' leo. Te ana mana tao ues ma hai ena, 'ona' Pak nemehere na.” Nandaa noo lele' naa o, 'ana' naa hai neu' ena boe.c
Lamatua' Yesus tao nahai' atahori hed'is hetar
14 Lao esa ma, Yesus neu nisi' Petrus ume na. Ana nita Petrus ina arin sunggu' sia koi a, mana mera mafeo-matob'i'. 15 Yesus to'u liman, ma mafeo-matob'i' a mopo neu' ena mia ina lasi' a. Basa ma ana fela de neu lole-lau fee Yesus se.
16 Lele' relo a soko ma, atahori ra rema rendi atahori nitu tao' ra. Ma Yesus parenda nitu ra nae, “He, nitu! Dinggo' hela atahori ia ra leo!” Boe ma nitu ra rela reu' ena. Ana o tao nahai' basa atahori mamahed'i' ra. 17 Ana tao basa ia ra, tungga saa fo Lamatualain mana 'ola-'olan Yesaya sura' mema' nae,
“Ana na'ahahai' hed'i-nggarau ta ra.
Ma Ana tanggon doid'oso ta ra.”d
Atahori mana nae tungga Lamatua' Yesus musi tungga noo teb'e-teb'e'
18 Basa naa ma, Yesus nita atahori hetar rema rereo' rala E. Boe ma Ana denu ana mana tungga na ra nae, “'Ima fo ata lao tisi' dano seri' teu.”
19 Boe ma meser agama sa nema de 'ola' nae, “Ama Meser! Ama' neu sud'i 'a sia bee o, au nau tungga 'ukundoo 'oo Ama'!”
20 Te Yesus nataa nae, “Malole, boe! Te musuned'a ta'o ia. Basa atahori roo banda ra ra'ena mamana leleo-lulu'u'. Busa fui a bali' nisi' ndola na. Mbui' ra bali' risi' nduna na ra. Te Au, Atahori Matetu' ia, nda 'u'ena ume fo bali' 'uu sa. Mamana' fo ndae langga ngga o, Au nda ma'ena' sa boe.”
21 Basa ma atahori sa fai, mana tungga' noo E, nema no'e nae, “Papa! Au 'ae tungga Papa boe, te au bali' fo mete-se'u 'ala ina-ama ngga ra dei. Mete ma ama ngga mate ena, na, dei fo au tungga.”
22 Te Yesus 'ola' nae, “Ta'o ia! Hela neu fo atahori nda mana namahere neu Lamatualain sa, mete se'u atahori mana mate na ra. Te mete ma ho mae tungga Au, na, musi tungga noo teb'e-teb'e'!”
Lamatua' Yesus tao namalino sanggu-anin
23 Basa naa ma, Yesus hene 'ofa' ata neu, noo ana mana tungga na ra. 24 Lele' ara lea laar de lao risi' dano a seri', boe ma Ana sunggu'. Nda doo' sa ma, sanggu-anin fela boe. Ree ra po'a 'ofa', ma oe' a 'ofa' rala neu. 25 Ara rita 'ona' naa, ma ana mana tungga na ra rafefela E rae, “Papa! Papa, e! Fela fo tulun tao musod'a nggita dei! Te tae 'a tena ena!”
26 Boe ma Yesus nataa nae, “Woi, ta'o bee de hei mimitau? Hei nda mimihere Au sa, do?” Boe ma Ana fela. Basa de Ana 'ai sanggu-anin ma ree ra nae, “Miloe' leo!” Boe ma ree ra noo sanggu-anin lino' neu' ena.
27 Boe ma Yesus ana mana tungga na ra heran. Ara rae, “Awii! Eni ia, seka, e? Ta'o bee de Ana parenda anin noo ree ra de ara tungga hihii-nanaun?”
Lamatua' Yesus tao nahai' atahori nitu tao' rua
28 Nda doo' sa ma, ara losa dano a seri' sia atahori Gadarae ra nusa na. Sia naa hambu atahori nitu tao' rua leo sia lua fatu', atahori mates ra mamana na. Ru'a se de'ulaka na ra seli, losa nda hambu atahori esa nambarani lao' sia naa sa boe. Ara rita Yesus nema ma, 29 ara nggasi rae, “Woi, Lamatualain Anan! Ta'o bee de 'uma ngganggu hai? Eni fain nda fe'e losa sa, te mae tao doid'oso hai ena.”
30 Hambu fafi hetar soso'a rae a sangga nanaat deka-d'eka naa. 31 Boe ma nitu ra ro'e Yesus rae, “Mete ma mae 'oi hai, na, denu hai misi 'a fafi naa ra!”
32 Boe ma Yesus parenda se nae, “Mii leo!” Boe ma nitu ra rela lao hela atahori karua' ra, de maso' risi' fafi ra. Boe ma fafi ra rela leli 'onda tungga lete' a suun de dano rala reu. Boe ma tena hendi basa se de mate.