5-6 Basa naa ma, Yesus denu ana mana tungga atahori kasanahulu rua na ra, Ana parenda se nae, “Au denu nggi mii sia hita atahori Yahud'i na ra, huu hetar mia hita atahori na ra nda tungga Lamatualain dalan noo matetu' sa. Ara 'ona' bib'i lombo mana mopo' ra. Huu naa, ama 'afi' mii sia atahori nda Yahud'i ra sa ma atahori Samaria ra. 7 Mii mifad'e hita atahori Isra'el na ra mae, ‘Fain losa de basa atahori bisa dad'i Lamatualain atahorin ena.’ 8 Mii tao mi'ihahai' atahori mamahed'i' ra, mii tao misod'a bali' atahori mates ra, tao mi'ihahai' atahori mamahed'i kusta, ma 'use-'oi hendi nitu ra. Lamatualain pala-b'anggi fee nggi naen seli ena, te Ana nda no'e bali' saa-saa sa boe. Dad'i ia naa ama musi mii fo pala-b'anggi nae' fee neu atahori laen fai, 'aka' naa 'afi' mo'e bali' saa-saa sia se boe. 9 Ama lao' rou-rou, e. Nda parluu mendi doi' sa, 10 lepa-nggees, bua-b'a'u selu-ao', sapatu, do teteas. Huu atahori mana tao ues, nandaa hambu eni hahambun fo nasod'a.^b

11 Mete ma misi' kota esa, do, kambo' esa, na, ama sangga atahori mana na'ena rala malole' mana nau simbo nggi. Fo leo sia naa, losa ama lao hela mamana' naa. 12 Mete ma misi' atahori sa umen, na, 'ola' mae, ‘Sod'a-mole'! Lamatualain fee nggi papala-b'ab'anggi'.’ 13 Mete ma atahori sia ume a simbo nggi noo malole', ama mo'e fo Lamatualain fee se papala-b'ab'anggi'. Te mete ma ara nda simbo nggi sa, na, Lamatualain o nda fee se papala-b'ab'anggi' sa boe. Te papala-b'ab'anggi' a bali' neti nggi. 14 Mete ma atahori nda nau rena nggi sa, na, lao hela ume naa, do, kota naa. Basa naa nggafur hendi afu sia ei ma ra, fo dad'i tatanda' 'oi, ara nda nau rena sa, de, ara lemba-d'oi ao na ra.^c 15 Mete ma losa fai nggero-furi' fo Lamatualain huku-d'oki atahori sia raefafo', na, huku-d'oki' soa' neu atahori nda mana nau simbo nggi sa, beran lena' huku-d'oki' neu Sod'om noo Gomora fo de'ulaka na ra manaseli' a. Te misined'a, e! Te dei fo Ana natud'a' huku-d'oki' beran seli soa' neu atahori nda mana nau simbo nggi sa!”^d

16 “Misined'a, e! Te Au denu nggi ia, 'ona' Au fee bib'i lombo nisi' busa fui de'ulaka' a talad'a na. Huu naa, ama musi pake dud'u'at 'ona' mengge mahine'. Boe ma rala ma ra musi ndoos 'ona' mbui lunda nda mana sangga dala de'ulaka' sa.^e 17 Te besa-b'esa, o! Dei fo atahori tao doid'oso nggi. Dei fo ara nore nggi misi' mamana nggenggero ded'eat agama. Ma dei fo ara filo nggi sia ume hule-o'e na ra. 18 Dei fo ara nore nggi mii mitaa sia hofernor noo mane' a, huu ama tungga Au. Te ama musi pake kaka'e' naa fo mifad'e Hara-lii Malole ngga neu se. Noo ta'o naa, atahori nda mana rahine Lamatualain sa o, hambu rena so'al Au boe. 19 Te mete ma atahori nore rendi nggi 'ona' naa, na, 'afi' mimitau mae, ‘Dei fo au 'ola' 'ae saa?’ Do, ‘Dei fo, au 'utaa 'ae, saa?’ Sud'i boe dud'u'a ta'o naa, huu losa fain, dei fo hei Amam sia sorga nafad'e saa fo ama musi 'ola'. 20 Lele' naa, saa fo ama 'ola' naa, nda mia 'a hei e sa, te Dula-d'alen nafad'e nggi saa fo ama 'ola' a.^f

21 Hei mete neu' ena, te dei fo sia ume sa rala, mete ma hambu atahori ramahere Au, dei fo toronoo na ra sangga dala' fo fee atahori tao risa e. Ma mete ma 'ana' sa namahere, dei fo aman tao nisa e. Mete ma ina-ama' ra ramahere, na, dei fo ana bonggi na ra tao risa se.^g 22 Mete te, dei fo basa atahori binci nggi seli, huu ama tungga Au. Te atahori mana na'atataa' nakandoo losa bab'asan, dei fo Lamatualain fee ne masoi-masod'a'.^h 23 Mete ma atahori tao doid'oso nggi sia kota esa, na, mela misi' kota laen. Teb'e! Au ia, Atahori Matetu' a. Dei fo ama nda fe'e lao ndule basa kota Isra'el sa, te Au bali' 'uma ena.

24 Atahori ra biasa fee had'a-hormat neu meser esa, lena' ana ded'enu na ra. Ma atahori fee had'a-hormat neu malangga esa, lena' ana mana tao ues na ra.ⁱ 25 Mete ma ana ded'enu' esa nanori fo mahinen 'ona' meser na, ana nae naa dai ena. Ma mete ma ana mana tao ues naa nanori fo mahinen 'ona' malanggan, na, ana o nae naa dai ena boe.

Dad'i misined'a, e! Mete ma atahori ro'e tenu ume' a ena rae, ‘Ho ia, Balseb'ul, naeni nitu ra malanggan!’ na, tantu ume isi na ra o hambu nara' nda malole' lena' sa fai.”^j

26 “Dad'i ama 'afi' mimitau atahori mana lab'an nggi. Te saa fo atahori tao ra'afuni', dei fo basa atahori rita boe.^k 27 Saa fo Au 'unori neu mesa' nggi ena, dei fo ama musi mii mifad'e neu basa atahori ra. Boe ma saa fo Au 'ufad'e nee-nee, dei fo ama musi mii mifad'e ndule basa mamana' ra. 28 'Afi' mimitau atahori, huu ara bisa ramate 'a atahori, te nda bisa tao ralutu atahori ao samana na ra sa. Naa de, ama musi mimitau Lamatualain, huu na'ena koasa fo nggari atahori ao-sisin noo samanan nisi' tasi ai mana mbila roo-roo nakandoo 'a. 29 Dad'i tao manggatetee rala ma ra. Atahori seo mbui randak sia pasar felin mbei 'a. Te nda hambu esa tud'a fo mate sa boe, mete ma Amam mana sia sorga nda nau sa. 30 Hei Amam sia sorga o tao mata' neu nggi losa dala-d'ala anad'iki' ra. Langga fulu ma ra ded'esi na ra o, Ana nahine ena. 31 De ama 'afi' mimitau! Huu Lamatualain nile nggi mafeli' lena' basa mbui randak ra.”

32 Basa ma Yesus 'ola' fai nae, ta'o ia, “Atahori mana nambarani nataa sia atahori matan, sia raefafo' ia nae eni nahine Au, dei fo Au o 'utaa sia Ama ngga matan sia sorga 'ae, ‘Eni ia, Au atahori ngga.’ 33 Te atahori mana nafanii Au sia atahori matan nae, eni nda nahine Au sa, dei fo Au o 'ufad'e Ama ngga sia sorga 'ae, ‘Au nda 'uhine atahori ia sa.’”^l

34 “Hei 'afi' du'a mae, Au 'uma 'endi sod'a-mole' sia raefafo' ia. Te Au 'uma tao atahori esa balab'an noo esa. 35 Au raefafo' 'uma ia, tungga saa fo Lamatualain mana 'ola-'ola na ra 'ola' mema' rae,

37 De atahori mana nae tungga Au teb'e-teb'e', musi sue Au lena' basa e; lena' ina-aman ma lena' ana na ra. Te hoko', na, atahori naa nda nandaa dad'i Au atahori ngga sa. 38 Huu atahori mana nae tungga Au, te nda nau lemba susa-sona' sa, na, nda nandaa dad'i Au atahori ngga sa.ⁿ 39 Atahori mana sad'ia mate huu ana tungga Au, dei fo ana hambu nasod'a nakandoo noo Lamatualain. Te atahori mana nau 'a nasod'a soa' neu 'a aon, dei fo masod'an, mopo hendi' e neu' ena!”^o

40 “Atahori mana simbo nggi noo malole', eni o simbo Au boe. Ma atahori mana simbo Au, ana o simbo Lamatualain mana denu Au' a.^p 41 Atahori mana simbo Lamatualain mana 'ola-'olan, huu ana 'ola' so'al Lamatua', dei fo Lamatualain bala-b'ae e 'ona' Ana bala-b'ae mana 'ola-'olan esa. Boe ma atahori mana simbo atahori rala ndoos esa, huu atahori naa tungga teb'e-teb'e' Lamatualain hihii-nanaun, dei fo Lamatualain bala-b'ae e 'ona' Ana bala-b'ae atahori rala ndoos esa. 42 Atahori mana simbo anad'iki ana' esa huu ana tungga Au, dei fo Lamatualain bala-b'ae e. Mae atahori fee 'aka' oe nggalaas esa o, Lamatualain nda lilii' e sa boe.”