Lamatua' Yesus tao nahai' atahori, nandaa noo fai hahae ao'
3
Basa naa ma, Yesus bali' nisi' ume hule-o'e'. Sia naa, Ana nita atahori esa liman seri mana ma'amate'.
Markus 3:1-19
2 Sia naa o, hambu atahori hira boe, sangga dala' fo fee sala' neu Yesus. De ara 'aka' memete' E, fo rae rahine Ana nae na'ahahai' atahori naa nandaa noo fai hahae ao', do hoko'.
3 Yesus no'e atahori lima ma'amate' naa nae, “'Uma mumburii' sia mata' ia.”
4 Boe ma natane basa atahori naa ra nae, “Tungga hita atoran agaman, hita bole tao saa nandaa noo fai hahae ao'? Hita tao malole', do 'afi'? Hita tao tahai' atahori, do tao tisa atahori?” Te basa se nee-nee' a.
5 Boe ma Yesus ralan susa nala seli, huu ara fad'uli lena' sira atoran na, te nda fad'uli atahori lima ma'amate' a sa. Ana namanasa de nakarereluk ndule se. Boe ma nafad'e atahori naa nae, “Loo limam leo!” Atahori naa loo liman, 'aib'oi' ma, liman hai neu' ena.
6 Basa ma, atahori Farisi ra lao hela ume hule-o'e' naa. Ara reu rala hara' esa roo atahori mia Herod'es partein, fo sangga dala' rae risa Yesus.
Lamatua' Yesus tao na'ahahai' atahori hetar sia dano suu na
7-8 Lao esa, Yesus noo mana tungga na ra dinggo' risi' dano Galilea suu na. Te huu atahori hetar rena basa saa fo Eni tao' a, naa de basa se rema mia kambo-kambo' fo rae tungga E. Ruma rema mia profinsi Galilea, profinsi Yud'ea, ma profinsi Idumea. Ruma rema mia kota Yerusalem, kota Sid'on, ma kota Tirus. Ma ruma fai rema mia loe Yordan bob'oa rulu na. Basa se sangga rae randaa roo E. 9 Huu atahori hetar seli, de Yesus denu mana tungga na ra sangga 'ofa' esa fee neu E. Ana nae 'ola' sia 'ofa' ata, fo basa se bisa rena, ma Eni nda neneb'ambi' sa.
10 Fe'esa'an, Ana na'ahahai' nita atahori hed'is hetar ena. Naa de, ia naa, basa atahori mamahed'i' ra rema rakaseseti rae nggama E.a 11 Lele' atahori nitu tao' ra rita E, boe ma ra'aloli losa ra'atotono' sia Yesus mata na. Basa ma nggasi rae, “Ho ia, mema' Lamatualain Ana na!”
12 Te Ana na'anggee nahere' neu se nae, “Ama 'afi' mifad'e atahori mae Au ia, seka boe!”
Lamatua' Yesus pili atahori sanahulu rua dad'i neu mana tungga na
13 Basa ma Yesus hene nisi' lete' esa ata. Ana no'e nala atahori hira, ndaa noo rala na. Boe ma ara rema risi' E. 14 Ana pili nala atahori sanahulu rua, ma nafad'e se nae, “Au pili nggi fo tungga Au mikindoo, fo dad'i Au ded'enu ngga ra. Au o 'ae denu nggi fo mii dui-b'engga Lamatualain hehelu-fufulin neu basa atahori. 15 Ma Au 'ae fee nggi koasa, fo bisa 'oi nitu mia atahori ra.”
16-19 Atahori kasanahulu rua' ra nara na ra 'ona' ia:
Simon (fo Yesus bab'ae naran Petrus),
Yakob'is,
Yohanis, (Yakob'is noo 'od'in Yohanis ia, ru'a se, Sab'ad'eus ana na. Yesus bab'ae ru'a se nara na ra ‘Boanerges’, sosoan ‘'ona' ndukurulu'’.)b
Anderias,
Filipus,
Bartolomeos,
Mateos,
Tomas,
Yakob'is (Alfius ana na),
Tadius,
Simon (mana tungga partei poletik Selot),c
noo Yud'as Iskariot (eni mana seo Yesus).
Meser agama ra fee sala' neu Yesus rae, nitu ra malanggan mana fee Eni koasa
20 Basa naa ma, Yesus noo mana tungga na ra 'onda bali' mia lete' naa. Boe ma ara maso' ume rala reu. Te atahori hetar rema heo rala Yesus, losa ara nda ka'e rala fo raa sa.
Markus 3:20-35
21 Atahori rita ta'o naa, ma ara rae, “Mita Yesus dei! Ana nda fad'uli nala aon sa ena.” Huu bob'onggi na ra rena atahori 'ola' ta'o naa, naa de ara rema rae roo bali' E.
22 Lele' naa, meser agama ra rema mia Yerusalem de rafad'e atahori mana sia naa ra rae, “Wee! Ama 'afi' tungga-tungga' Yesus naa. Ana bisa 'oi nitu ra ta'o naa, huu Ana hambu koasa mia nitu ra malanggan, fo ara biasa ro'e rae Balseb'ul.”d
23 Yesus rena nala, ma no'e nala basa se de nafad'e nae, “Nda maso' dud'u'at sa! Ta'o bee de nitu ra malanggan bisa 'oi bali' ao na? Nda bisa sa! 24 Sia nusa' esa, mete ma manggarau na ra ramusu', na, ta'o bee fo nusa' naa bisa na'atataa'? Nda bisa sa! 25 Ma mete ma ume isi' ra esa narau ao' noo esa, na, ta'o bee fo ara bisa ra'atataa'? Nda bisa sa! 26 Nitu ra 'ona' naa boe. Mete ma esa musu esa, na, ara sea-sarangganggaa. Noo ta'o naa, ara rambalutu!
27 Mete ma atahori nae nema namana'o sud'i 'a saa sia atahori ma'ad'ere' esa umen, na, ana musi pa'a nahere' tenu ume' naa dei. Dei fo ana fe'e bisa namana'o atahori naa sud'i 'a saa na ra.e
28 De Au 'ufad'e mema' nggi: Lamatualain sad'ia nae 'ose hendi atahori sala na ra. Mete ma atahori 'ola' na'amuti atahori laen, Lamatualain fe'e sad'ia fee ambon neu sala na. 29 Te mete ma atahori esa nambarani 'ola' na'amuti Lamatualain Dula-d'ale Meumaren, na, Lamatualain nda fee ambon neu sala' naa sa, losa fai matete'en!”f
30 Yesus 'ola' na'o naa, huu ara fua sala' neu E ena rae, “Atahori naa, nitu tao'!”
Atahori mana tungga Lamatualain hihii-nanaun, sira teb'e-teb'e' Yesus bob'onggi na ra
31 Basa ma, Yesus maman noo 'od'i na ra risi' ume naa, rae randaa roo E. Losa naa ma, rambarii' sia 'a dea', de denu atahori reu ro'e E. 32 Lele' naa, Yesus 'endo' 'ola' noo atahori hetar. Ma atahori rema rafad'e rae, “Papa, e! Papa maman noo 'od'i ma ra sia dea'. Ara rae randaa roo Papa.”
33 Te Yesus nataa nae, “Au mama ngga noo toronoo matetu ngga ra, seka?”