Lamatua' Yesus tao nahai' atahori mamalu'u' esa
9
Basa naa ma, Yesus se hene bali' 'ofa' rala reu, de lea laar risi' dano seri' reu, losa Eni kota na. 2 Sia naa, atahori ndoro rendi nonoon esa mamalu'u' nisi' Yesus mata na. Yesus nita ta'o naa ma, Ana bub'ulu' ara ramahere Eni rae, Eni bisa tao nahai' sira nonoo na. Boe ma Ana 'ola' neu atahori mamalu'u' a nae, “Ana, ngga, e! Tao manggatetee ralam dei! Huu Au 'ose hendi basa sala ma ra ena.”3 Te hambu meser agama Yahud'i hira sia naa, rena Yesus 'o'ola na. Ma ara ramanasa neu' ena. Boe ma ara 'ola-'ola' rae, “Atahori ia nambarani 'ola' ta'o naa, o! 'Aka' Lamatualain mana fee ambon neu atahori sala na. Te atahori ia 'o'olan, tao aon 'ona' Lamatualain. Ana na'amuti!”
4 Te Yesus bub'ulu' rala na ra. Basa ma Ana 'ola' nae, “Ta'o bee de ama du'a mae, Au, 'ola' 'u'umuti? 5 Bee mud'a' lena'? Mete ma Au 'ufad'e atahori mamalu'u' ia 'ae, ‘Sala-kilum hambu ambon ena,’ do, Au 'ae, ‘Fela leo, fo bali'.’ 6 Mete ma ana fela neu' ena, ama fe'e mita bukti mae, Au ia, Atahori Matetu' a. Huu Au 'u'ena hak fee ambon neu atahori sala-kilu na.”
Boe ma Yesus parenda atahori mamalu'u' a nae, “Fela leo! So'u-b'oti' rad'at ma fo lao bali' leo!”
7 Boe ma, atahori mamalu'u' a fela, de lao bali'. 8 Rita 'ona' naa ma, basa atahori ra titindindii. De ara so'u rananaru Lamatualain naran rae, “Lamatualain manaseli', o! Ana fee koasa monae' 'ona' ia neu atahori.”
Lamatua' Yesus no'e Mateos fo tungga Eni
9 Basa ma, Yesus lao mia naa, ma nita atahori mana 'ed'a bea esa sia ume bea a. Naran, Mateos. Yesus no'e nala e nae, “'Uma tungga Au!” Mateos rena nala ma, Ana fela de tungga neu' ena.
10 Basa ma, Mateos no'e Yesus se reu raa sia ume na. Ana o no'e nonoo mana 'ed'a bea na ra roo fui' laen ra, fo atahori Yahud'i ra du'a rae atahori de'ulaka' ra, fo rema raa ra'ab'ue roo se.
11 Te hambu atahori partei Farisi hira o, rema ramue mbali Yesus ana mana tungga na ra rae, “Ta'o bee de hei meser ma 'endo' naa na'ab'ue noo atahori nda mana laku-laku' ra sa, 'ona' mana 'ed'a bea ra, roo nonoo atahori de'ulaka na ra?”a
12 Te Yesus nafad'e se nae, “Atahori mamahed'i' ra mema' parluu doter. Te atahori nda mamahed'i' ra sa, nda parluu sa. 13 Malole lena' ama bali' fo paresa' malolole Lamatualain Ded'ea-'o'olan, fo lele ulu' a Ana denu mana 'ola-'olan Hosea sura' nae,
‘Au hihii ngga, naeni,
Au atahori ngga esa sue esa ratud'u susue-lalai'.
Mete ma ara nda tao ta'o naa sa, na,
banda tutunu-hohotu' fo rendi fee Au' a,
nda na'ena sosoa' sa.’
Naa Lamatualain nafad'e ena. Huu naa, Au nda 'uma mete-se'u atahori mana du'a rae sira ndoo-tetu' sa, te 'uma mete-se'u atahori mana rahine rae sira masala-kilu'.”b
Atahori ratane rae ta'o bee de Lamatua' Yesus atahori na ra nda puasa sa
14 Basa ma, Yohanis mana sarani' a, ana mana tungga na ra rema risi' Yesus. Ara ratane rae, “Hai mana tungga Yohanis, biasa puasa. Atahori Farisi ra o puasa boe. Te ta'o bee de Ama' ana mana tungga ma ra 'aka' raa-rinu rakandoo 'a? Saa de ara nda puasa sa?”
15 Te Yesus nataa se nendi' nekendandaa' nae, “Ta'o ia: mete ma hambu fefeta kakab'i', fui' ra nda puasa sa, te raa ra'ab'eta. Mete ma tou' a lemba-d'od'en fe'e sia naa, ne'o basa se raa ra'ab'ue reu esa. Te dei fo lao esa, mete ma atahori laen to'u rendi tou' a lemba-d'od'en, na, nonoo na ra susa, dei fo 'oras naa ara puasa.
16 Atahori nda ha'i teme feu' mbei, fo tanda neu bad'u mbaraa manasid'e' sa. Huu mete ma safe bad'u a, na, teme feu' a kurulululu. Noo ta'o naa, bad'u nenetanda' a boe sika na'ad'ua'.
17 'Ona' naa boe, atahori nda 'oni tua feu' neu mba'o mboko' sa. Te hoko', na, mba'o a fanggi neu' ena, ma nosi hendi' tua' a. Dad'i tua feu' musi 'oni neu mba'o feu' boe, naa fo ru'a se ra'atataa' noo malole'!”c [De Yesus nanori se nae Eni nenorin, feu'. De 'afi' ne'eb'ue noo nenori mbaraa'.]
Lamatua' Yesus tao nahai' ina' mana namahed'i mbo'a-mbo'a raa' esa, ma tao nasod'a bali' 'ana feto' esa
18 Lele' Yesus fe'e 'ola' noo Yohanis ana mana tungga na ra, ma malangga ume hule-o'e' esa nema nandaa noo E. Atahori naa sende' lulu-langgan neu Yesus matan, de no'e nae, “Ama', e! Tulun dei! Te au ana feto ngga fe'e mate ena na. Ama' nema fo tao limam neu e dei, fo ana nasod'a bali'.”
19 Yesus rena nala ma, noo ana mana tungga na ra tungga tute 'a atahori naa.
20-21 Sia dala' talad'an, ma ina' esa lao tungga noo se. Ana mbo'a-mbo'a' a raa' nda naloe' noo matetu' sa too sanahulu rua ena. Ana du'a sia ralan nae, “Sad'i au nggama Yesus bad'un, na, au hai neu' ena.” Naa de ana neu nggama Yesus bad'un suu na.
22 Yesus med'a, de Ana heo' dean de mete ina' naa. Boe ma, Ana 'ola' nae, “Ana ngga, e! Tao manggatee ralam. Huu mumuhere teb'e-teb'e' neu Au, naa de ho hai.” Lele' naa, ina' naa hai neu' ena boe.
23 Boe ma Yesus se lao rakandoo risi' malangga ume hule-o'e' a ume na. Losa naa ma, Ana rala neu ma nita mana ma'amina' lilii sususa', ma atahori hetar nggae ei-ei. 24 Te Yesus nafad'e se nae, “Sud'i nggae, fo ama bali' leo! Huu 'ana' ia nda mate sa. Ana sunggu 'a.” Te ara mali penggo bafa na ra mbali Yesus.
25 Te basa ma, basa atahori ra lao dea reu. Boe ma Yesus nisi' 'ana' a kaman rala neu, de to'u nala lima na. Boe ma 'ana' a nasod'a neu' ena. 26 Atahori rita 'ona' naa, boe ma ara dui-b'engga ndule basa mamana', so'al saa fo Yesus tao' naa.
Lamatua' Yesus tao nahai' atahori poke' rua
27 Boe ma Yesus lao nakandoo. Mia dala' talad'an, atahori poke' rua matutungga' roo Yesus. Ara nggasi rae, “Mane Daud tititi-nonosin, e! Kasian hai dei!”
28 Yesus ume rala neu, boe ma atahori poke karua' ra rema risi' E. De natane se nae, “Hei mimihere teb'e-teb'e' mae Au 'u'ena koasa fo tao nggi mita bali', do?”
Boe ma rataa rae, “Awii! Ama' 'afi' mutane fai, te hai mimihere Ama' teb'e-teb'e'.”
29 Yesus rena nala boe ma, Ana nggama mata na ra, de 'ola' nae, “Mete ma ta'o naa, na, dad'i tungga hei nemehere ma ra!” 30 Yesus 'ola' basa boe ma, ara rita neu' ena. Te Yesus fee nesenened'a' neu se nae, “Misined'a, e! 'Afi' mifad'e neu atahori esa boe so'al saa mana dad'i' ia!”
31 Te ara nda ra'atataa' rala ao na ra sa. De ara lao' ndule mamana' de dui-b'engga saa fo Yesus tao' a.
Lamatua' Yesus tao nahai' atahori nda mana 'ola' nala' sa
32 Atahori poke' karua' ra dea reu boe ma, atahori ra rendi atahori laen esa nisi' Yesus. Atahori naa nda 'ola' nala' sa, huu nitu a tao e. 33 Yesus nita ta'o naa ma, Ana parenda nitu a lao hela atahori naa. Nitu a lao hela e ma, atahori naa 'ola' nala' neu' ena. Basa atahori hetar sia naa titindindii 'a. Ara rae, “Awii! Hita atahori Yahud'i nda fe'e tita 'ona' ia sa!”
34 Te atahori Farisi ra nda nau sa. Ara 'ola' rae, “Weh! Nitu ra malanggan fee koasa fo Ana 'use-'oi hendi nitu ra.”d
Lamatua' Yesus kasian atahori hetar
35 Basa ma Yesus neu ndule kota ma kambo' hetar, fo nanori sia ume hule-o'e' ra. Ana nanori atahori Lamatualain Hara-lii Malolen, ma tao ta'o bee fo ara dad'i atahori na. Ana o tao nahai' basa hed'is mata'-mata'.e 36 Yesus nita atahori hetar naa ra ma, Ana kasian se, huu nda rita' rae tao ta'o bee sa boe. Nda hambu esa nasala'e se sa boe, de ara 'ona' bib'i lombo nda ra'ena manatad'a' sa.f 37 De Yesus 'ola' noo ana mana tungga na ra nae, “Atahori ia ra, 'ona' osi a buna-b'oa na. Buna-b'oan nae', te mana tao ues ra nda dai, fo 'etu-'oru rala basa buna-b'oan, fo mbed'a neu soka-pole' sa. 38 Huu naa, ama musi mo'e sia Tenu osi' a, fo Ana haitua atahori mana tao ues, fo reu ra'ad'uru rala buna-b'oa na.”g