Ina falu mana fee kolete naen lena'
21
Lele' Yesus nanori mia Ume Hule-o'e Huu' a, Ana nita atahori mamasu'i' ra rema mbed'a' kolete sia peti kolete a. 2 Ana o nita ina falu mana tud'a-lolo'e esa nema hule-o'e boe. Ana mbed'a' doi' sen rua sia peti naa boe. Doi' a felin mbei' lena' basa e. 3 Basa ma Yesus 'ola' neu ana ded'enu na ra nae, “Rena malolole! Ina falu mana tud'a-lolole' a, ana mbed'a' a doi' sen rua' a, te huu ana fee nalena' basa atahori ra. 4 Atahori laen naa ra rendi kolete mia sira doi lena na ra. Te ina falu ia fee nab'asa' doin ena. Tao-tao te, eni tai 'a doi' naa ra.”Lamatua' Yesus nafad'e Ume Hule-o'e Huu' a fofoin
5 Lele' naa, Yesus ana ded'enu na ra 'ola' koa-b'o'u Ume Hule-o'e Huu' a rae, “Ama'! Mita Ume ia meulaun dei! Ara tao e rendi' fatu tatati' monae' ra, ma ara dama se tetu'. Boe ma hambu atahori fee sud'i 'a saa mafelit fo paroon neu Ume a!”
Te Yesus nataa nae, 6 “Ume ia mema' meulau'. Te nda doo' sa te, atahori ra poko ralutu hendi basa fatu ra losa ra'ab'eb'ela' roo rae a.”
Fai sususa' noo doid'oso'
7 Basa ma, Yesus ana ded'enu na ra ratane rae, “Ama Meser! Saa fo Ama' 'ola' faa' ra, fai hira' fo dad'i? Mete ma fain deka ena, na, tatanda na ra 'ona bee?”
8 Boe ma Yesus nataa nae, “Sad'i minea malolole fo 'afi' nene'ed'i nala'. Huu dei fo hambu atahori mata'-mata' rema to'o tenda na ra rae, ‘Au ia, Kristus.’ Hambu ruma fai rae, ‘Fai matete'en deka-d'eka nema ena!’ Te 'afi' mimihere! 9 Mete ma hei rena hara' 'oi, atahori ra ramue-raanggi ma ratati sia bee-b'ee, na, 'afi' mimitau. Mema', basa naa ra musi dad'i ra'ahulu'. Te fai matete'en nda fe'e losa sa.
10 Dei fo leo esa natati noo leo laen. Nusa' esa natati noo nusa' laen. 11 Rae o nanggongga' monaen seli. Sia bee-b'ee fai ndoe-la'as manaseli', hed'is de'ulaka ndule-feo mamana'. Dei fo atahori o rita dala' mana tao atahori ao na ra tenggou, boe ma manad'ad'i manaseli' sia lalai.
12 Dala mana dad'i' ia ra nda fe'e basa sa, te atahori ra humu nggi, ma poko-paru nggi, huu mimihere Au. Basa' fo ara rendi ded'ea ma ra nisi' ume hule-o'e' ra, ma tao nggi bui rala mii. Ara o rendi nggi misi' mane' ra noo mana parenda laen ra boe. Basa ia ra, huu hei tungga Au. 13 Te hei musi pake naa dad'i kaka'e' fo mifad'e Hara-lii Malole ngga neu se. 14 Dad'i sud'i boe dud'u'a mi'ihulu' mae, hei mae misila'e ao ma ra ta'o bee. 15 Te dei fo Au fee ded'ea-'o'ola' nandaa neu nggi fo misila'e ao ma ra. Noo ta'o naa, hei musu ma ra nda rita' rae 'ola' saa sa ena boe.a 16-17 Dei fo atahori hetar mburu-oe' roo nggi, huu hei tungga Au. Hambu mia bob'onggi ma ra, 'ona' ina-ama ma ra, 'od'i-'a'a ma ra, toronoo ma ra, ma nonoo ma ra. Dei fo hambu ruma mia sira e sangga dala' fo seo nggi, losa tao risa hei ruma. 18 Te ama 'afi' mimitau, huu Lamatualain nda lilii' nggi sa. Langga fulu ma ra esa o nda 'ou sa boe, mete ma Ana nda nau sa. 19 Mete ma hei mi'itataa' mikindondoo' a, tantu Lamatualain fee nggi masoi-masod'a'.”
Yerusalem tutud'an
20 Yesus 'ola' fai nae, “Mete ma hei mita musu ra heo rala kota Yerusalem ena, hei bub'ulu' mae, ana nae nambalutu ena. 21 Hei atahori sia profinsi Yud'ea mita ta'o naa, na, fela mela misi' lete' a leo. Atahori mana sia kota o fela mela leo. Ma atahori mana sia kambo' sud'i misi' kota mii fai. 22 Huu Lamatualain haitua fai sususa' ra fo huku-d'oki atahori nda mana nau rena E sa. Basa naa ra dad'i tungga 'ona' saa fo Lamatualain mana 'ola-'ola na ra sura' mema' eni' a lele ulu' ab 23 Kasian neu ina mairu' ma ina mana nasusu ana na ra. Lele' naa, basa raefafo' ia hambu susa-sona', ma basa atahori Yahud'i ra hambu doid'oso' beran seli, huu Lamatualain namanasa se. 24 Dei fo musu ra tao risa ruma, ma futu ruma, fo dad'i ate sia bee-b'ee sia raefafo' ia. Atahori fui' mana nda rahine Lamatualain sa, rema tab'u-roroo ranggenggeo kota Yerusalem, ma parenda kota isin, losa sira fula-fain basa.”
Atahori Matetu' a neneman
25 Basa naa ma Yesus nafad'e so'al Eni neneman, nae “Dei fo lele' Atahori Matetu' a nae bali' nema, hambu tatanda' sia relo a, fulan, ma sia nduu' ra. Sia raefafo' ia o hambu tatanda', naeni tasi' namue, noo sanggu-anin manaseli', rii-ree ra sou ata rema monaen seli. Basa ia ra tao fee atahori ramatau ma titindindii, de nda rita' rae ta'o bee saa ena boe.c 26 Basa koasa mana sia lalai ra ranggenggo leli. Rita 'ona' naa ma, atahori ramatau rala seli, huu raefafo' nae soe ena! 27 Basa naa, dei fo atahori rita Au, ‘Atahori Matetu' a, 'onda 'uma 'oo lelee' a’. Au 'onda 'oo koasa ma mandete-masa'a manaseli ngga.d 28 Mete ma basa tatanda' ia ra dad'i, na, ama boti' langga ma ra leo, huu Lamatualain fain losa fo fee nggi masoi-masod'a'.”
Nekendandaa' mia hau huu'
29 Basa naa ma, Yesus nafad'e nekendandaa' esa nae, “Hei mete mi'ib'eb'esa hau-hau huu' ra. 30 Mete ma roo na ra huni-huni ena, naa dad'i bukti 'oi, fai matob'i' deka nema ena. 31 'Ona' naa boe noo fai sususa' ra boe. Mete ma ara sou rema, naa dad'i tanda 'oi, Lamatualain parendan deka nema ena.
32 Au 'ufad'e mema'! Mia basa atahori fe'e masod'a ia ra, dei fo ruma nda fe'e mate sa, te fai sususa' ra losa ena, 33 'Ona' mae lalai noo raefafo' sambu-lalo boe o, Au Ded'ea-'o'ola ngga na'atataa' nakandoo a.”
Mihehere mihani Lamatua' neneman
34 Yesus 'ola' nakandoo fai nae, “Mihehere, huu 'aib'oi' te Au 'uma! 'Afi' losa hei nda du'a noo matetu' sa, ma misod'a moo 'a minu mafu, ma mbute-mue sangga 'a lole-lad'a' ra. 'Afi' losa hei nda mihine tatanda' ra sa, huu hei mbute-mue moo 'a ue-tataos laen ra. 35 'Afi' du'a mae nda dai hei sa. Te 'aib'oi' ma Au 'uma. Ma mete ma Au bali' 'uma, nda hambu atahori esa bisa keke nala aon sia Au mata ngga sa boe. 36 De minea mikindoo 'a. Hule-o'e mikindoo 'a, naa fo bisa mi'itataa' sia basa sususa' naa ra. Noo ta'o naa, mete ma Au bali' 'uma, hei nda mae mimbirii' sia Atahori Matetu' a matan sa.”