Lamatua' Yesus tao nahai' atahori, nandaa noo fai hule-o'e'
14
Lao esa, nandaa noo fai hule-o'e', atahori partei agama Farisi ra malanggan esa no'e Yesus fo nema naa sia ume na. Ana 'endo' naa-ninu, ma hambu atahori maku-ma'u E fo rae rita Ana nae tao saa nandaa noo fai hule-o'e'. 2 Lele' naa, hambu atahori esa mamahed'i ao ma'asofe' 'endo' sia naa boe. 3 Boe ma, Yesus natane mahine hukun Yahud'i ma atahori Farisi mana 'endo' raa-rinu sia naa nae, “Tungga ba'i Musa hohoro-lalanen, bisa tao nahai' atahori hed'is, nandaa noo fai hule-o'e', do hoko'?”4 Te nda hambu esa nahara sa boe. Boe ma Yesus kois atahori mamahed'i' a, de hai neu' ena. Basa ma Yesus denu e bali'. 5 Basa naa ma, Yesus natane se fai nae, “Mete ma hambu anad'iki' sa tud'a oe rala neu, nandaa noo fai hule-o'e', hei mii nore bali' e dean, do hoko'? Mete ma sapi a tud'a rala neu, na, hei hela e, do, lea hendi e dea neu? Ne'o hei lea hendi e dea neu. De naa sosoan nae, hei o tao ues ena boe, to!”a
6 Rena Yesus 'ola' ta'o naa, te nda hambu atahori esa bisa nataa E sa boe.
'Afi' sangga rala'
7 Lele' naa, Yesus memete' atahori mana rema raa sia ume fefetas a. Hambu atahori hetar pili mamana' sia mata', fo reu 'endo' sia naa. Nita ta'o naa, boe ma Ana 'ola' nae, 8 “Besa-b'esa, o! Mete ma atahori rarolo nggi misi' fefeta kakab'i', na, 'afi' mii 'endo sia atahori moko-monaen ra mamana na. Huu 'afi' losa tenu fefetas narolo fui' manaseli' lena' nggo. 9 Mete ma ta'o naa, tenu fefetas ne'o nema 'ola' noo nggo nae, ‘'Afi' mumunasa, e! Ama' tulun lali misi' dea' naa dei, huu au sad'ia hela kad'era ia fee neu atahori moko monaen ra.’ Boe ma ho fela hela kad'era naa noo mamaet, de muu 'endo' sia seku dea'. 10 Dad'i mete ma hambu nerolot, na, muu 'endo' sia kad'era mana seku sia dea'. Dei fo mete ma tenu fefetas nita nggo, na, neti no'e nae, ‘Eh, Ama'! La'i fo 'endo' sia mata' ia.’ Noo ta'o naa hei hambu had'a-hormat sia atahori fui' ra mata na ra.b 11 Huu atahori mana so'u-so'u' aon, dei fo Lamatualain na'atutud'a' e. Te atahori mana tao aon 'ona' anad'iki', dei fo Lamatualain so'u nanaru e.”c
12 Basa naa ma, Yesus 'ola' noo tenu ume' a nae, “Fai' ruma, mete ma ama' tao fefetas, na, 'afi' murolo 'a bob'onggim noo nonoom atahori mamasu'i' ra! Te ne'o ara bisa rarolo bali' nggo fai! 13 De mete ma ama' feta-d'ote, na, murolo atahori hata-taa', ei do'o', keko-luku', ma atahori poke' ra. 14 Huu ne'o ara nda bisa bala-b'ae rala nggo sa. Te mete ma ama' murolo se, Lamatualain mana bala-b'ae. Dei fo mete ma nafefela bali' atahori mamahere' mia mamates ena, Ana nda lilii' ama' malolem sa.”
Nekendandaa' so'al fefeta ine'
15 Rena ta'o naa ma, hambu atahori sa mana 'endo' noo Yesus 'ola' nae, “Atahori mana 'onton seli naeni atahori mana raa ra'ab'ue sia Lamatualain ume manen, o!”
16 Yesus nataa e nae, “Au dui ta'o ia: Hambu atahori sa tao fefeta ine'. Boe ma ana narolo atahori hetar. 17 Lele' ara sad'ia rala fefetas ena ma, ana denu atahori ded'enun, neu no'e atahori mana hambu nerolot ra nae, ‘La'i, te fefetas sangga mulai ena.’ 18 Te basa se sangga dala' mata'-mata' naa fo ara nda reu sa. Esa bale nae, ‘Waa! Au fe'e hasa 'ala osi sa, de au musi 'uu mete sob'a e dei. 'Afi' mumunasa, o! Huu au nda bisa 'uu sa.’ 19 Hambu esa fai nae, ‘Au fe'e hasa 'ala sapi hohombu mole' pasan lima. Au 'ae 'uu pake sob'a se, de 'afi' mumunasa, o!’ 20 Esa fai nae, ‘Au fe'e sao ena, de nda bisa 'uu sa.’
21 Basa ma, atahori ded'enu' a bali' de nafad'e tenu fefetas a. Rena nala ma, tenu fefetas namanasa seli. Boe ma ana parenda atahori ded'enu' a nae, ‘Mete ma ta'o naa, lao muu leo lai-lai! Muu sia basa okofoo' ma dala kab'ia' ra sia kota, fo murolo mendi basa atahori hata-taa' ra, ei do'o', poke', ma keko-luku' ra.’ 22 Rena ta'o naa ma, atahori ded'enu' a neu narolo atahori ra. De ana bali' ma nafad'e nae, ‘Ama'! Basa se rema ena, te mamana rou' fe'e hetar.’
23 Boe ma tenu fefetas nae, ‘Mete ma ta'o naa, muu selu' fai sia kambo-kambo' sia kota dea', losa osi-lutu ra. Kokoe sud'i 'a see, fo moo se rema, sad'i tao sofe mamana fefetas ia. 24 Rena, e! Atahori nda mana simbo nerolo ngga naa, ara nda ramed'a rita fefetas ia nanaa na ra malad'an mbei sa boe!’”
Du'a malolole dei fo tungga Lamatua' Yesus
25 Basa naa ma, Yesus se lao rakandoo risi' Yerusalem. Atahori hetar tungga E. De Ana mbali se, ma Ana 'ola' nae, 26 “Atahori mana teb'e-teb'e' nau tungga Au, ana musi sue Au lena' basa e: lena' ina-ama na ra, lena' sao-ana na ra, lena' 'od'i-'a'a na ra, lelenan fai eni ao na. Mete ma hoko', atahori naa, nda nandaa dad'i Au ana mana tungga ngga sa.d 27 Te atahori mana nda nau lemba doid'oso' sa, huu ana tungga Au, ana nda nandaa dad'i Au atahori ngga sa. Atahori mana nae dad'i Au atahori ngga, 'ona' mae atahori rae tao risa e o, ana lemba nakandoo doid'oso na.e
28 Dad'i mete ma mae tungga Au, na, du'a malolole dei. 'Ona' atahori rae rafefela ume dek. Ana musi reken lutu'-lelo' na'ahulu' dei, ume nala doi' ba'u saa. 'Afi' losa doi' nda dai sa. 29 Huu mete ma nda 'ito-reken lutu'-lelo' sa na, 'afi' losa fe'e tao 'a ume a netehuun, te doi' basa ena. Ma atahori ra mali ra'amamae' e, 30 rae, ‘Hei mita atahori naa dei! Ana fe'e tao 'a ume netehuun, nda fe'e saa sa boe, te doin basa ena.’
31 Conto Laen fai, naeni so'al netati'. Mane mana nae natati musi 'endo' noo nonoo na ra fo 'ola-'ola' ra'ahulu' dei' Mete ma na'ena 'a sold'ad'u atahori rifon sanahulu' a, na, musi timba-tai eni bisa nasenggi' musu, atahori rifon rua nulu, do hoko'? 32 Mete ma timba-tai basa, ma du'a nae ne'o eni nda nasenggi' sa, na, malole lena', lele' musu a fe'e sia doo-d'oo', te ana haitua mema' ded'enu' fo 'ola' dame. 33 'Ona' naa boe, atahori mana nae tungga Au. Eni musi du'a neu-nema malolole, nae eni nahehere lao hela basa' e, do hoko'? Mete ma hoko', atahori naa nda nandaa dad'i ana ded'enu ngga sa.”
Atahori mana nda nandaa tungga Lamatua' Yesus sa, 'ona' masi' mana nda na'ena ngguna' sa ena
34-35 Yesus tute selu' ded'ea-'o'olan noo conto laen fai nae, “Masi' naa, malole'. Hita pake fo tao malad'a nanaat. Te mete ma masi' a nda masi sa ena, na, nggunan sa fai? Hita nda bisa pake e fo tao malad'a nanaat sa ena. Tae tao dad'i pupuk o, nda bisa sa ena. Hita nggari hendi e neu' ena. Dad'i hei o musi dad'i 'ona' masi' a, fo misod'a sue-lai basa atahori. Seka mandiki', na, rena malolole, o!”