2 Te Yesus nataa nae, “Ume ia mema' meulau'! Nda doo sa te, atahori rasea' hendi fatu ia ra.”

3 Basa ma, Yesus se lao risi' lete Saitun, de 'endo' mbali Ume Hule-o'e Huu' a. Boe ma, mana tungga na ra haa rema 'ola-'ola' roo mesa' ne. Sira ia ra, Petrus, Yakob'is, Yohanis, ma Anderias. 4 Ara ratane rae, “Papa! Sob'a mufad'e selu' 'o'olam faa' ra dei. Fai hira' fo fai' naa losa? Ma tatanda na ra, 'ona' bee?”

5 Basa ma Yesus 'ola' nae, “Sad'i ama minea matalolole! Fo ara 'afi' 'ed'i rala nggi. 6 Te dei fo hambu atahori mata'-mata' rema to'o tenda na ra rae, ‘Au ia, Kristus, naeni Atahori fo Lamatualain helu-fuli mia fai ma'ahulun ena!’ Boe ma ara 'ed'i rala atahori hetar. 7 Mete ma ama mita atahori ratati, do rena siu' 'oi, hambu netati' sia bee-b'ee, na, ama 'afi' mimitau. Te 'ona' naa musi dad'i dei, te fai matete'en nda fe'e losa sa. 8 Dei fo leo esa natati noo leo laen. Nusa' esa natati lab'an nusa' laen. Hambu rae nanggenggo sia bee-b'ee. Fai ndoe-la'as o sia bee-b'ee boe. Basa tatanda' ia ra, 'ona' ina' mana fe'e named'a nae bonggi.

9 De ama musi minea matalolole! Te dei fo ara rema humu rala nggi fo roo nggi misi' agama mamana na'etu' ded'ea na. Ma ara poko-paru nggi sia ume-ume hule-o'e' rala. Ara o pa'a rendi nggi misi' atahori mana to'u koasa, huu ama tungga Au. Te naa o dad'i neu kaka'e' fo mifad'e se so'al Au. 10 Huu Lamatualain atahori na ra musi reu rafad'e ra'ahulu' Hara-lii Malole ngga neu basa leo sia raefafo' ia, dei fo fai matete'en fe'e losa ena. 11 Misined'a, e! Mete ma ara pa'a rendi nggi misi' mamana ne'etu' ded'eat, na, 'afi' mimitau mae, ‘Au 'ola' ta'o bee? Do au 'utaa 'ae saa?’ Mete ma fai naa losa ena, na, ama 'ola' tungga 'a saa fo Lamatualain Dula-d'ale Meumaren nafad'e neu nggi.^a

12 Sia ume esa rala, mete ma hambu atahori ramahere Au, na, dei fo 'od'i-'a'a na ra sangga dala' fo tao risa e. Ma mete ma ana' a namahere, na, dei fo aman mana tao nisa e. Ma mete ma inan noo aman ramahere neu Au, na, dei fo ana na ra tao risa se. 13 De dei fo atahori ramanasa nggi, huu mimihere Au. Te see na'atataa' losa basa, na, dei fo Lamatualain fee ne masoi-masod'a'.”^b

14 Yesus 'ola' nakandoo nae, “Atahori de'ulaka manaseli' esa nae nema. Ana rala neu nambarii' sia mamana meumare' sia Lamatualain Ume Hule-o'e Huu na. Ana nda nandaa soa' neu mamana' naa sa, losa ana tao nanggenggeo mamana' naa. Naa de, Lamatualain hiru' nasad'ea hela mamana' naa. Mete ma ama mita ta'o naa, na, besa-b'esa, o! (See mana baca ia, musi besa-b'esa boe!) Naa natud'u' nae, fai-fai sususa' a losa lelesu a bafan ena. Mete ma mita ta'o naa ena, atahori mana sia profinsi Yud'ea ra, fela mela lete' ata mii leo.^c 15 Musi mela' lai-lai, fo 'afi' doid'oso. Mete ma hambu atahori kalua hela umen ena, 'afi' bali' ha'i bua-lo'as fai. 16 Ma atahori mana sia osi rala, 'afi' bali' ha'i lafe fai. Te mela mikindoo leo!^d 17 Te kasian lena' ina mairu', ma mama mana rasusu anad'iki mana bonggi feu' ra. Huu ara nda bisa rela' haelai sa. 18 De malole lena' ama hule-o'e fo mo'e dala de'ulaka' na ra 'afi' dad'i nandaa noo fai 'ud'an. 19 Huu fai' naa, sususan seli! Mia Lamatualain na'ad'ad'ad'i' raefafo' losa lele' ia, atahori nda fe'e rita sususa monae' mata' naa sa boe. Ma dei fo atahori nda rita sususa' mata' naa sa ena fai.^e 20 Mete ma Lamatualain nda na'a'e'eku fai naa ra sa, nda hambu atahori esa sa boe bisa na'atataa' nasod'a. Te, huu Lamatualain sue atahori fo Ana pili nala' ra, naa de Ana na'a'e'eku fai sususa-sosona' naa ra.

21 Mete ma fai naa losa, ama rena atahori rae, ‘Mete dei! Kristus sia ia!’ Te atahori laen ra rae, ‘Kristus sia naa!’ Te ama 'ona' rena, e! 22 Te dei fo hambu atahori kalua ma to'o tenda na ra rae, ‘Au ia, Kristus!’ Ruma fai rae, ‘Au ia, Lamatualain mana 'ola-'ola na.’ Dei fo ara ratud'u manadad'i manaseli' mata'-mata' rendi' nitu koasan, fo peko-leleko' atahori. Ara sob'a-sob'a fo Lamatualain atahori na ra nenepeko-leleko'! 23 Te ama musi minea matalolole! Fai sususa' naa ra nda fe'e losa sa te, Au fee hela nesenened'a' neu nggi ena!”

24 Basa ma Yesus tute 'o'olan de nafad'e mbali mana tungga na ra nae, “Mete ma fai sususa' naa ra basa ena,

26 Basa naa, dei de basa atahori rita Au, Atahori Matetu' ia. Dei fo Au 'onda mia lalai a isi' lelee'. Ma basa atahori ra rita koasa ngga, ma mandete-masa'a ngga!^h 27 Boe ma, Au parenda Lamatualain ate na ra sia sorga reu ra'ab'ue basa atahori fo pili 'ala' ra mia raefafo' suun, mia rulu losa muri, ma dii losa 'ona.”

28 Yesus 'ola' nakandoo nae, “Au ha'i nekendandaa' mia hau huu'. Mete ma roon nae fula, na, naa tanda fai matob'i' a deka-d'eka nema ena.

29 'Ona' naa boe, mete ma ama mita fai sususa' naa nema, 'ona' Au 'ufad'e faa' ra, na, naa tanda 'oi Au deka-d'eka 'uma ena. 30 Rena matalolole, e! Mia basa atahori mana masod'a' lele' ia, dei fo hambu ruma nda fe'e mate sa, te fai sususa' naa ra losa ena. 31 Mae lalai noo raefafo' a mopo, te 'o'ola ngga ia na'atataa' nakandoo.”

32 Yesus tute 'o'olan nae, “Nda hambu atahori esa sa boe bub'ulu' fai' bee noo lele' bee Au bali' 'uma sa. Lamatualain ate na ra sia sorga o nda rahine sa boe. Au o nda 'uhine sa boe. 'Aka' Ama ngga nahine.ⁱ 33 Huu naa, musi minea matalolole, te nda bub'ulu' fai' bee Au bali' 'uma sa boe.

34 Nda doo' sa te, Au lao hela nggi, te dei fo Au heo' bali'. 'Ona' tenu ume' a lao hela umen, de lao mamana doo-d'oo' neu. Ana denu mana tungga na ra fo tao mata' neu ume naa. Boe ma ana banggi fee se esa-esa' noo ue-tatao na. Ana parenda mana nanea lelesu a, fo nanea matalolole losa eni bali'.^j 35 Ama o musi minea hatu'-rerelon, huu nda bub'ulu' fain saa tenu ume' a nema sa. Nema bob'ob'o' do, fai banggi rua do, relo mamatetu' do, relo a tod'a saa. Ama nda bub'ulu' fain saa sa boe. 36 'Afi' losa ana nema 'aib'oi', te hambu nggi sunggu' masambeta'.

37 De saa fo Au 'ufad'e nggi ia, Au o 'ufad'e basa atahori laen ra 'ae, ‘Ama musi minea matalolole fo simbo nenema ngga.’”

[Basa naa ma, Lamatua' Yesus naloe' 'ola-'ola' noo mana tungga na ra sia lete Saitun.]