4 Yesus 'ola' nakandoo nae, “Ana ngga ra, e! 'Afi' mimitau mete ma atahori rae tao risa nggi. Huu ara bisa risa 'a hei ao-sisim, te nda bisa tao saa-saa mbali samanam sa boe. 5 Au 'ae 'ufad'e 'ae, hei musi mimitau seka. Hei musi mimitau Lamatualain. Huu Eni bisa tao nisa nggi, ma mbia nggi misi' naraka rala mii. De Eni ia, fo hei musi mimitau teb'e-teb'e'.

6 Ama du'a sob'a, mbui lutuk felin ba'u saa? Nda mafelit sa, to?! Mbui' lima na sen rua, to? Mae ta'o naa o Lamatualain nda lilii' hela esa sa boe. 7 'Ona' naa boe, Lamatualain tao mata' neu nggi. Ana nahine teb'e langga fulu' hira sia langga ma ra. Dad'i ama 'afi', mimitau, huu Lamatualain nile hei lena' mbui lutuk hetar naa ra.”

8 Basa ma, Yesus 'ola' fai noo Ana ded'enun nae, “Pasa ndiki ma ra malolole! Mete ma hambu atahori nambarani nataa Au sia atahori hetar matan sia raefafo' ia, dei fo Au o 'utaa e sia Lamatualain ana ded'enu na ra matan sia sorga 'ae, eni, Au atahori ngga. 9 Te mete ma hambu atahori 'ola' sia atahori matan nae, eni nda nahine Au sa, dei fo Au o, 'ola' sia Lamatualain ate na ra matan sia sorga 'ae, Au o nda 'uhine e sa boe.

10 Au ia, Atahori Matetu' a. Mete ma hambu atahori 'ola' tao ma'afoo nara malole ngga, na, Lamatualain fe'e nau lilii' hendi sala na. Te mete ma ana 'ola' tao ma'afoo Lamatualain Dula-d'ale Meumaren nara malolen, Lamatualain nda lilii' salan sa.^c

11 Mete ma atahori roo nggi misi' mamana ne'etu' ded'eat agama, fo, misi' atahori mana to'u parenda ra, huu hei mimihere Au, na, 'afi' mimitau so'al hei mae misila'e ao ma ra ta'o bee. 12 Huu lele' naa o, Lamatualain Dula-d'ale Meumaren nanori nggi ded'ea-'o'ola' nandaa noo saa, fo hei parluu mitaa neu se.”^d

13 Basa naa ma, esa mia atahori hetar naa ra natane Yesus nae, “Ama Meser! Tulun denu 'a'a ngga fo banggi noo au hai amam hata-heton dei.”

14 Te Yesus nataa e nae, “Wah! Seka mana so'u Au dad'i mana ma'etu' hei ru'a nggi ded'e'a ma mata' naa?”

15 Basa ma Yesus 'ola' neu atahori hetar naa ra nae, “Hei musi besa-b'esa fo 'afi' misuu-miseti. Huu hata-heto' nae' nda bisa tao nggi misod'a noo mole-d'ame sa.”

16 Boe ma, Ana dui nekendandaa' sa nae, “Hambu atahori mamasu'i' sa, osin hambu buna-b'oa' naen seli. 17 Losa nggud'an na ra sofe nened'id'ina', de nda nita' nae tao ta'o bee sa boe. 18 De ana du'a nae, ‘Au 'ae tao ta'o 'a ia! Au ofe hendi nggud'an mbaraa' a, fo tao 'u'umoko e, fo au mbed'a' osi ngga buna-b'oa na ra ma basa hata-heto ngga ra sia naa. 19 Mete ma ta'o naa ena, na, au 'ola' mbali ao ngga 'ae, ‘We! nggud'an sofe ena! Nanaat dai 'ua losa too-too ena. De mua-minu malalad'a ma mumuho'o peped'os eim leo!” 20 Te huu Lamatualain nafad'e neu e nae, ‘Woi! Nggoam, dei! Tetemba' ia boe, mate nggo. Naa, seka mana hambu basa nggud'an ma isi-oen?’

21 Dad'i ta'o ia! Atahori bisa ra'ad'uru hata-heto' nae-nae sia raefafo' ia soa' neu aon, te huu sia Lamatualain dud'u'an, eni, hata-taa', huu nda malole noo Lamatualain sa.”

22 Basa ma Yesus nanori selu' ana ded'enu na ra nae, “Ama 'afi' mbute-mue moo masod'a ma ra fai-fai esa, so'al mae mia saa do pake saa. 23 Huu hita masod'an ia, lena' mia saa fo hita taa' a, ma saa fo hita pake' a. 24 Mete sob'a mbui kaa' ra! Ara nda sela sa, nda 'etu-'oru sa, nda ra'ena nggud'an fo mbed'a' nanaat sa, te Lamatualain na'ab'oi se. Mete ma ta'o naa, na, Ana o bisa na'ab'oi nggi boe. Huu Ana nile hei lena' mbui' naa ra. 25 Mete ma atahori rambarii' sia tiro-ao a matan, fo barias aon, na, ana bisa tao namad'oo fula-fai masod'an, do? Hoko'! 26 Dad'i mete ma soa 'a mbute-mue moo dala anak naa ra, nda nendi fee nggo saa sa boe, na, saa de hei fe'e mae mbute-mue moo dala monae' ra fai? Naa, 'onton na saa?

27 Mete sob'a buna lasi ra. Ara nda tao osi-lutu sa, ma nda tenu-lolo sa. Te mane Soleman bua-b'a'u meulaun o, nda malole' lena' buna lasi a meulaun sa.^e 28 Huu Lamatualain na'ab'oi uru ana' fo nda na'ena sosoa' sa, mana nasod'a fai' ia, ma mbila' neu na mate, fo atahori nggari nisi' ai rala. Mete ma ta'o naa, na, Ana o bisa na'ab'oi hei fo mana mafeli' lena' uru ana'. Dad'i, ta'o bee de hei nda mimihena teb'e-teb'e' neu E sa? 29 'Ona' naa boe, hei sud'i dud'u'a dala nanaa-nininu' fai. Te dei fo Lamatualain mana ator. 30 Atahori nda mana namahena neu Lamatualain sa, ara ue-tao rita' mamate na ra tao basa dala' naa ra. Te ama 'afi' ta'o naa, huu hei Amam sia sorga nahine basa saa fo hei parluu' ra ena. 31 Mete ma hei milalao Lamatualain ue-tatao na ra ra'ahulu', na, dei fo Ana o fee ia ra neu nggi boe.”

32 Basa ma Yesus 'ola selu' nae, “Hei 'ona' bib'i lombo nononggo ana' sa nda be'i saa sa boe. Te 'afi' mimitau! Huu Amam sia sorga, Mane Monae'. Saa fo Eni 'enan, Ana namaho'o fee neu ana susue na ra. 33 Dad'i mii seo hendi sud'i 'a saa ma ra, basa naa bab'anggi doi na ra fee neu atahori mana to'a-taa' ra. Noo ta'o naa hei mbed'a' su'it sia sorga. Na'o ra nda reu ramana'o rala se sa, ma mba'i ra o nda ra'aninisi ralutu hendi se sa. 34 Misined'a malolole! Hei hata-heto ma ra sia bee, na, rala ma ra o sia naa boe.”

35-36 Yesus 'ola' fai nae, “Hei musi mihehere fo ue-tao fee Lamatualain hatu'-rerelo na. 'Ona' ana ded'enu' mana be'e nahani tenu ume' a bali' ume nema mia fefeta kakab'i'. Mete ma malangga ded'eu lelesu a, na, ana bisa soi lai-lai.^f 37 Mete ma malangga nema hambu atahori mana tao ues na ra rahani ta'o naa, na, ara 'onton. Huu dei fo malangga natud'u rala malolen neu se. Ana pake bua-b'a'us 'ona' atahori mana tao ues na ra, fo neu nahao se nanaa malad'a'. 38 Atahori mana tao-ues ra mema' 'onton huu ara tao mata' neu malangga noo malole. Mae malangga sud'i 'a nema fai' ba'u saa, neofaa' do deka manggarelo o, ara rahehere rakandoo 'a.

39 Du'a malolole! Mete ma hambu tenu ume' nahine teb'e fai' ba'u saa na'o ra rae rema, ne'o ana nda fee kaka'e' fo na'o ra bonggar umen sa. 40 Dad'i hei musi mihehere mikindoo 'a, huu nda hambu atahori rahine teb'e fai hira' Atahori Matetu' a nae nema sa.”^g

41 Basa ma, Petrus natane Yesus nae, “Ama Meser! Ama' nekendandaan faa' ra naa, dai 'aka' hai, do dai basa atahori?” 42-44 Ma Yesus nataa nae, “Nekendandaa' naa dai basa atahori mana tao 'ona' malangga mana tao-ues mahine' a, mana na'tataa' noo malangga na. Dei fo malanggan so'u e fo bab'anggi nanaat fee atahori mana tao-ues laen ra. Mete ma ana manggate tao tungga ue-tataon ta'o naa, mae malanggan nema sud'i 'a fain sa o, ana tao-tao' a ue-tataon noo teb'e-teb'e'. De ana 'onton, huu dei fo malanggan so'u e fo mete-se'u basa hata-heto na ra.

45 Te soe neu e mete ma malangga mana tao-ues dud'u'a nae, ‘Eh! Ne'o tou lasi' a fe'e doo' fo ana nema.’ Boe ma ana poko-paru atahori mana tao-ues laen ra, tou' ma ina' ra. Boe ma ana 'endo' naa-ninu ma'ahee losa mafu. 46 Te fai' sa ma, lele' malangga mana tao-ues a nda med'a nala sa, 'aib'oi' ma malangga a bali'. Lele' malangga bub'ulu dala' naa ra, ma ana poko-paru e tute 'a, de 'oi hendi e, fo hambu nala bala-b'aen 'ona' atahori nda mana ra'atataa' tungga malangga hihii-nanaun sa.

47 Huu atahori mana tao-ues mana nahine malangga hihii-nanaun, te nda nahehere tao tungga sa, do, nda nau tao tungga sa, dei fo nenehuku-d'oki' beran seli. 48 Te atahori mana tao ues mana ue-tao leli huu nda nahine malangga hihii-nanaun sa, dei fo hambu huku-d'oki nggafat. Atahori mana simbo naen seli, eni bab'ala-b'ab'aen o nae' boe. Atahori mana simbo ue-tatao monae', lemba-nesaan o nae' boe.”

49 Yesus tute 'o'olan nae, “Au 'uma fo saranggaa hendi atahori ngga ra mia atahori laen ra sia raefafo' ia. Naa, 'ona' atahori hotu manggarau' rendi' ai mbila'. Au hihii ngga ai a mulai mbila sia bee-b'ee ena. 50 Te huu Au musi lemba-d'oi 'u'uhulu' doid'oso manaseli' dei, naa fo teb'e-teb'e' Au doid'oso losa ue-tatao ngga basa.^h 51 Hei du'a mae Au 'uma 'endi mole-d'ame' nisi' raefafo' ia, do? Hoko'! Au 'uma tao atahori ra ratofa rasimbo bafa', ma tao fee atahori ra sea-saranggaa huu nenori ngga. 52 Mia lele' ia 'od'i-'a'a toronoo bonggi' ra o sea-saranggaa. Sia ume sa, telu lab'an rua, do rua lab'an telu.

54 Boe ma Yesus 'ola' noo atahori hetar naa ra nae, “Mete ma hei mita lelee fau' sou sia muri, hei mae, ‘ia, nenendin 'ud'an nae nema ena.’ Mema' teb'e ta'o naa. 55 Mete ma ani 'onas fuu nema, hei mae, ‘ia, nenendin fai' ia matob'i' seli.’ Mema' teb'e ta'o naa. 56 Woi! Hei atahori mana dea-rala' mana 'ola' laen na tao laen ra, e! Hei mi'indandaa' mihine fula-fai tungga lalai noo raefafo' ia nenendi na. Te ta'o bee de hei nda nau mihine Lamatualain hihii-nanaun lele' ia sa?”

57-58 Yesus 'ola' nakandoo nae, “Mete ma hei mid'ed'ea, na, ta'o bee de hei nda mi'etu' aom mae bee teb'e sa! Malole lena' dame dei! 'Afi' losa hei losa mana nggero-furi' a matan, ma ana na'etu' tao nggi bui rala mii. 59 Huu mete ma ta'o naa, ne'o hei nda bisa dea mii sa losa bae mib'asa' huta-b'uku' fo mana nggero a na'etu' basa' a.”