Dud'ui Fefeu' a
Eni' a Lamatualain tao lalai noo raefafo'
Lamatualain na'ad'ad'ad'i' lalai ma raefafo' noo isi-oe na
1
Fefeun, Lamatualain na'ad'ad'ad'i' lalai noo raefafo'.2 Lele' naa, raefafo' nda fe'e dad'i sa, ma basa' e fe'e runggu-rangga'. Fe'e 'aka' 'a, oe', ma ma'ahatu' a tatana nala e. Lamatualain Dula-d'alena natambele neu-nema sia oe' ata.
3 Boe ma Lamatualain 'ola' nae, “Musi hambu manggarelo'.” Ana 'ola' basa na'o naa ma, manggarelo' a dad'i tute 'a. 4 Ana nita manggarelo' a ma, ralan namaho'o, huu saa fo Eni tao' naa, mema' malole'. Basa de, Ana tad'a manggarelo' mia hatu' a, de esa-esa' noo fai na. 5 Ana bab'ae manggarelo' a nae, ‘rerelo'’, ma hatu' a nae, ‘tetemba'’. Naa, fai kaesa na.
6-7 Boe ma, Lamatualain 'ola' fai nae, “Musi hambu mamana rou', fo tad'a neu oe' a. Naa fo, hambu oe' sia ata', ma sia rae' boe.” Ana 'ola' basa na'o naa ma, oe' a banggi neu rua tute' 'a. 8 Ana bab'ae mamana rou' mana sia ata' a, ‘lalai’. Naa, fai karuan a.
9 Boe ma, Lamatualain 'ola' fai nae, “Oe mana sia rae' a musi na'ab'ue neu mamana' esa, fo hambu rae mad'a'.” Ana 'ola' basa na'o naa ma, rae mad'a' a dad'i tute 'a. 10 Ana bab'ae rae mad'a' a nae, ‘mad'a ata’; ma oe mana ma'ab'ue' a nae, ‘tasi'’. Ana nita basa naa ra ma, ralan namaho'o, huu saa fo Eni tao' naa ra, mema' malole'. 11 Boe ma, Lamatualain 'ola' fai nae, “Basa huu-huu' ra musi mori sia mad'a' ata. Musi hambu huu mab'oa', mad'eke', ma maroo mod'o' boe. Naa fo huu-huu' ra esa-esa' mbule-b'oan tungga mata na.” Ana 'ola' basa na'o naa ma, basa huu-huu' ra dad'i tute 'a. 12 Sia mad'a' ata, huu-huu' ra rambule-b'oa esa-esa' tungga mata na ra. Ana nita basa naa ra ma, ralan namaho'o, huu saa fo Eni tao' naa ra, mema' malole'. 13 Naa, fai katelun a.
14-15 Boe ma, Lamatualain 'ola' fai nae, “Sia ata' musi hambu sud'i 'a saa manggarelo' fo raronda neu raefafo' ia. Musi hambu mana fee manggarelo' neu fai rerelo', ma mana fee manggarelo' neu fai tetemba'. Basa naa ra, dad'i tatanda' fo bisa reken fai, too, noo fula-fai.” Ana 'ola' basa na'o naa ma, manggarelo' ra dad'i tute 'a. 16 Ana tao manggarelo monae' mata' rua. Manggarelo monae' a naronda sia fai rerelo', ma manggarelo anad'iki' a naronda sia fai tetemba'. Ana o tao nduu' ra boe. 17 Ana ator basa sud'i 'a saa sia lalai, fo raronda neu raefafo' a. 18 De ara fee manggarelo' sia fai rerelo' ma fee manggarelo' sia fai tetemba'. Noo ta'o naa, ara tad'a manggarelo' mia hatu' a. Ana nita basa naa ra ma, ralan namaho'o, huu saa fo Eni tao' naa ra, mema' malole'. 19 Naa, fai kahaan a.
20 Boe ma, Lamatualain 'ola' fai nae, “Musi hambu banda tasi' mata'-mata' rasod'a sia oe' rala. Ma musi hambu mbui' mata'-mata' ratambembele sia raefafo' ata.” 21 Boe ma Ana na'ad'ad'ad'i' basa 'u'u mata'-mata' noo banda tasi monae' mana rasod'a sia oe rala. Ana o na'ad'ad'ad'i' mbui' mata'-mata' mana ratambembele sia lalai. Ana nita basa naa ra ma, ralan namaho'o, huu saa fo Eni tao' naa ra, mema' malole'. 22 Basa ma Ana 'ola' fee papala-b'ab'anggi' neu basa banda naa ra nae, “'U'u ra musi ramaheta, fo rasofe oe' a sia bee-b'ee. Ma mbui' ra o musi ramaheta boe.” 23 Naa, fai kaliman a.
24-25 Boe ma, Lamatualain 'ola' fai nae, “Musi hambu banda mata'-mata' rasod'a sia mad'a' ata. Musi hambu banda ne'eb'oi', banda fui, ma banda mana nod'o sia rae, esa-esa' noo mata na.” Ana 'ola' basa 'ona' naa ma, basa banda naa ra dad'i tute 'a. Ana nita basa naa ra ma, ralan namaho'o, huu saa fo Eni tao' naa ra, mema' malole'.
26 Boe ma Lamatualain 'ola' fai nae, “La'i fo Ata tao atahori tungga 'ona' Hita mata-ao ta ra boe. Naa fo, ara ator ma tao mata' neu 'u'u ra sia tasi rala, mbui' ra sia lalai, banda ne'eb'oi' ra, ma basa banda fea' mana rasod'a sia raefafo' ia.”b
27 Boe ma Ana na'ad'ad'ad'i' atahori 'ona' mata-aon boe. Ana na'ad'ad'ad'i' se, tou' noo ina'. 28 Ma Ana 'ola' fee se papala-b'ab'anggi' nae, “Ama musi bonggi mimihefu fo misofe ma ator raefafo' ia. Au o fee nggi hak fo ator ma tao mata' neu 'u'u ra, mbui' ra, ma basa banda mana sia mad'a' ata ra. 29 Rena malolole! Au fee nggi nanaat mata'-mata' sia raefafo' ia. Au fee huu-huu mab'oa', mad'eke', ma maroo mod'o' ra. 30 Au o fee basa huu-huu' mata'-mata' fo dad'i neu basa banda ra nanaa na ra. Hambu nanaat soa' neu banda ne'eb'oi', banda fui, banda mana nod'o', ma mbui' ra.” Ana 'ola' basa na'o naa ma, basa nanaat mata'-mata' dad'i tute 'a. 31 Ana nita basa naa ra ma, ralan namaho'o, huu saa fo Eni tao' naa ra, mema' malolen seli. Naa, fai kaneen a.