2 Lele' naa, Yohanis sia bui rala ena. De lele' ana rena basa saa fo Yesus tao' ra, ma ana denu ana mana tungga na ra reu ratane Yesus rae, 3 “Lamatualain helu-fuli mema' eni' a lele ulu' a nae, Eni nae denu Kristus nema fo fee masoi-masod'a' neu hita atahori Yahud'i ra. Ama' ia, Kristus, do? Do, hai musi mihani atahori laen fai?” Boe ma reu ratane Yesus.

4 Rena ta'o naa, ma Yesus nataa nae, “Hei rena ma mita noo ao ma ra ena. De bali', fo mifad'e 'a'a Yohanis mae, basa' e dad'i 'ona' saa fo Lamatualain mana 'ola-'olan Yesaya sura' hela ena, nae:

6 Dad'i ta'o ia: mii mifad'e 'a'a Yohanis, mae ana 'onton mete ma ana namahere nakandoo neu Au. Huu dei fo Lamatualain fee papala-b'ab'anggi' neu atahori mana namahere teb'e-teb'e' neu Au!”

7 Lele' Yohanis ana mana tungga na ra bali', boe ma Yesus 'ola' noo atahori hetar so'al Yohanis nae, “Lele' hei mii sangga Yohanis sia mamana ma'afuni' naa, hei du'a mae mindaa moo atahori mata' 'ona bee? Ne'o hei nda mindaa moo atahori mana male-male', 'ona' 'oo mana uli-fae' tungga anin sa, to? 8 Ma ne'o hei nda mita atahori mana pake bua-b'a'u mafelit sa, huu atahori mata' naa leo sia 'a mane' umen! 9 Dad'i hei mita atahori mata' bee sia naa? Hei du'an hei mii sangga Lamatualain mana 'ola-'ola na ra? Teb'e! Te eni, mana 'ola-'ola manaseli'. 10 Huu Lamatualain Susura Meumaren sura' mema' so'al Yohanis nae,

11 Rena malolole, o! Sia raefafo' ia, nda hambu atahori esa, manaseli' lena' Yohanis sa. Te mia basa atahori mana nataa rae Lamatualain naa sira manen, atahori ma'ab'uit a manaseli' lena' Yohanis ena. 12 Eni' a mia Yohanis so'u ue-tataon losa ia nema, atahori hetar dad'i Lamatualain atahorin ena. Te ruma du'a sala, de ratati fo ra'asusuu' atahori maso' dad'i Lamatualain atahori na. Ma ruma ratati lab'an Lamatualain atahorin boe. 13 Losa Yohanis mana sarani' a neneman, hita atahori Yahud'i biasa tasod'a tungga ba'i Musa noo Lamatualain mana 'ola-'olan hohoro-lalane na.^c 14 Dad'i mimihere neu 'a Au leo! Yohanis naa, naeni Elia fo Lamatualain mana 'ola-'olan nafad'e mema' neneman ena.^d 15 Dad'i mana nau nahine musi rena malolole, o!

16 Au 'ae fee nekendandaa' fo ama bub'ulu', atahori 'ale' ia ra, atahori mata' saa. Huu sira, 'ona' anad'iki' mana nggua-nggua sia pasar. Ara 'aka' eki-randu roo nonoo na ra rae,

18 Hei ia 'ona' anad'iki' ra mana nda ramed'a rae dai ena sa. Lele' Yohanis nema, ana hii 'a puasa, ma nda ninu anggor sa. Te atahori cap e rae, ‘Nitu tao'!’ 19 Te 'ale' ia, Au, Atahori Matetu' ia, 'uma ena. Au nda puasa sa, ma Au 'inu anggor. Te atahori cap Au rae, ‘Eni, mema' atahori mana bare-na'o! Mamafun seli boe! Ana neu na'ab'ue noo mana 'ed'a bea ra! Partei sa noo atahori nda papake' ra sa! Nda nahine aon sa ena!’ Te ama mete neu' ena e, Au 'o'ola ngga ia, e! Lamatualain mahinen nenenita' sia atahori na ra masod'a na ra.”

20 Basa ma, Lamatua' Yesus 'ai atahori mana leo sia kambo' hira. Ana tao manad'ad'i' hetar lena' sia naa ena, te ara nda nau lao hela sala-kilu na ra fo tungga bali' Lamatualain dala masod'a ndoo-tetu na sa. 21 Yesus 'ai se nae, “Hei atahori Korasin ma atahori Betsaida ra! Besa-b'esa, e! Dei fo ama hambu sosoe'! Au tao manad'ad'i' mata'-mata' sia mata ma ra ena, te ama nda nau mimihere Lamatualain sa. Te hei ia ra, atahori Yahud'i, fo mana mitaa mae hei mihine Lamatualain. Te 'ona' saa-saa manad'ad'i' fo Au tao sia kambo ma ra, dad'i na'ahulu' sia nusa de'ulaka' 'ona' kota Tirus noo kota Sid'on, ne'o doo basa ia ena atahori sia naa ra doa' mema', ma lao hela sala-kilu na ra fo tungga Lamatualain. Ma ne'o ara pake bua-b'a'u sususa' ena, ma tao afu sia langga na ra fo dad'i tatanda' 'oi, sira fale rala na ra mia sala-kilu na ra. Tao-tao te atahori Tirus roo atahori Sid'on ia, nda atahori Yahud'i mana rataa rae, sira rahine Lamatualain sa.^e 22 Teb'e! Dei fo hei mete neu' ena! Mete ma Lamatualain na'etu' basa atahori ded'ea na ra, na, atahori Tirus roo atahori Sid'on ra huku-d'oki na ra nggafat lena' hei huku-d'oki ma ra.

23 Hei atahori Kapernaum! Besa-b'esa, e! Ama 'afi' du'a mae, dei fo Lamatualain so'u nggi sorga mii. Hoko', o! Dei fo Lamatualain nggari hendi nggi misi' naraka rala mii! 'Ona' manad'ad'i' fo Au tao sia kambo ma ra dad'i na'ahulu' sia nusa de'ulaka' 'ona' kota Sod'om, ne'o Lamatualain nda parluu tao nalutu nusa de'ulaka' naa sa. Te mete ma atahori Sod'om ra rita manad'ad'i naa ra, ne'o ara lao hela de'ulaka na ra ena.^f 24 Teb'e! Dei fo ama mete neu' ena! Mete ma Lamatualain na'etu' basa atahori ra ded'ea na ra, na, atahori Sod'om ra huku-d'oki na ra fe'e nggafat lena' hei huku-d'oki ma ra!”^g

25 Yesus 'ola' basa ma, Ana hule-o'e nae, “Ama'! Ama' mana dad'i Malangga sia lalai noo raefafo'. Au 'o'e makasi nae-nae, huu Ama' tatana mala ndoo-tetu' a mia atahori mana tao ao na ra 'ona' atahori mahine', ma mana koao' ra. Te Ama' soi basa dala' naa ra fee neu atahori anad'iki' ra, ma atahori mana maloe-mad'ae rala na ra. 26 Teb'e, Ama'! Huu naa mana tao Ama' ralan namaho'o!”

27 Yesus hule-o'e basa na'o naa, ma Ana nafad'e atahori sia naa ra nae, “Rena malolole, o! Au Ama ngga sia sorga fee basa koasa neu Au. Mana nahine Au noo malole, naeni 'aka' Ama ngga. Ma mana nahine Ama ngga noo malole, naeni 'aka' Ama' Anan, naeni Au. Ma Au pili atahori laen ra, fo rafad'e neu se, naa fo ara rahine E noo malole boe.^h

28 Basa hei mana bengge tao ues mita' mamate ma ra, 'ima tungga Au! Ma basa hei mana lemba-misaa bera', 'ima misi' Au ia! 'Ima hahae ao ma ra. 29 Mete ma ama simbo Au nenori ngga fo lao' mi'ib'ue moo Au, na, hita ia ra 'ona' sapi mana hohombu' rua lea ra'ab'ue tali hohombu' sa. Huu Au ia, rala malole', ma Au ia, rala maloe-mad'ae'. Mete ma hei tungga Au, na, ama dad'i ma'ad'ere bali'.ⁱ 30 Huu Au nenori ngga naa, nda susa sa. Ma Au parenda ngga nda namab'era sa.”