2 Nia solok sia baa katak lia nosi Na'i Maromak fohorai nodi nalore oin nunabee Na'i Maromak naliku hutun-renun. Nia moos solok sia atu nadi'ak nola ema moras. 3 Mais Nia nameno baa sia na'ak, “Hanoin di'a-di'ak! Emi baa, lalika hodi sa-saa. Hodi loos faru iha isin dei. Lalika hodi kno'a, kakaluk, bakae, lale, osan. Faru selu moos, lalika hodi. 4 Kalo tama baa leo ida, hotu ema simu emi, emi hein iha siakaan uma nia dei. Keta boi uma. Hein iha nia to'o la'o hela leo nia. 5 Kalo tama baa leo ida, mais ema la simu emi, hi'it aan la'o hela sia. Baa oras sai hosi leo nia, musti halo tuir adat hodi hisik hela ahukresan iha emikaan ain, hotu katak baa sia ha'ak, ‘Tan emi la ho'uk rona, habusik emi hatiu hola du'uk.’”^a

6 Rona notu nunia, ema maktuir sia baa la'o sura leo. Sia katak baa ema lia Na'i Maromak Manfatin Di'ak. Sia moos nadi'ak nola ema moras sia.

7 Baa oras nia, lia oi-oik nosi Yesus to'o Na'i Herodes Antipas^b tilun ti'an. Rona nola lia nia sia, Herodes benar tan noo ema na'in hira mak na'ak, “Yesus nia, Yohanis Mak Sarani Ema. Nia moris nikar ti'an.” 8 Balu tenik na'ak, “Yesus nia, Bei Elia mak moris nikar. Kalo lale, ida seluk nosi Maromak mako'an uluk sia.”^c

9 Mais Herodes naneo na'ak, “Hori hirak nia, ha'u karuka taa kotu Yohanis ulun ti'an. Oras ne'e, nia moris nikar ti'an ka? Kalo lahoos nia, ida ne'e, see tenik?” Tan Herodes benar nunia, nia buka dalan atu nasoru du'uk Yesus.

10 Baa leet ida, maktuir mak Yesus solok nia sia, fila mai naklibur nikar no Nia. Sia nasara baa Nia saa hotu-hotu mak sia nalo ti'an. Hotu sia bele-bele la'o no-nook baa fatin ida kre'is leo Betsaida atu nanawa. 11 Mais ema lear noran nola sia baa, hotu sia moos tuir. Yesus simu sia di'a-di'ak, nodi nadi'ak nola ema moras hotu-hotu. Nia moos katak baa sia lia Na'i Maromak Fohorai nodi nalore oin nunabee Na'i Maromak naliku hutun-renun.

12 Loro malirin ti'an, maktuir na'in sanulu resin rua nia baa katak Yesus na'ak, “Di'ak liu Ama naruka ema ne'e sia, baa leo kre'is iha ne'e sia, nebee sia buka haan du'uk. Sia moos musti buka fatin du'uk bodik toba. Tan fatin ne'e, fatin fuik.”

13-14 Mais Yesus nataa na'ak, “ Nune'e! Emi mak musti hahaan sia!”

Mais sia sakar na'ak, “Adeei, Ama! Oin nu'u saa bele nunia? Ema ne'e sia rihun lima resin! Nia foin mane dei, sei la sura feto no lawarik dauk! Itakaan tubi moos, baluk lima dei. Na'an tasi moos, lolon rua dei. Ne'e la to'o! Kalo Ama nakara ami hahaan sia, nunabee ami bele sosa haan wa'in bodik sia?!”^d

Mais Yesus naruka sia na'ak, “Haruka ema ne'e sia tuur naklibur, sura klibur ema na'in lima nulu.”

15 Hotu sia baa nahulin nunia. 16 Ema nia sia tuur ti'an, Yesus nola tubi baluk lima no na'an tasi lolon rua nia. Nia tanaat baa lale'an, nodi namulak baa Maromak. Hotu, Nia tohi fa'e tubi no na'an tasi nia, lolo baa maktuir sia nebee fa'e baa ema nia sia. 17 Sia hotu-hotu naa to'o bosu. Hotu maktuir sia libur nola haan resin sia, to'o nakonu ko'e sanulu resin rua.

18 Dala ida, Yesus namulak mesan iha fatin ida. Hotu Niakaan maktuir sia mai naklibur no Nia. Namulak notu, Nia nusu baa sia na'ak, “Tuir ema dalen, Ha'u ne'e see?”

19 Sia nataa na'ak, “Noo ema na'ak, Ama ne'e, Yohanis Mak Sarani Ema. Seluk tenik na'ak, arumak Ama ne'e, Bei Elia. Kalo lale, ida seluk nosi Maromak mako'an uluk sia, mak moris nikar ti'an.”^e

20 Yesus nusu nati'i sia tenik na'ak, “Tuir emi du'uk, Ha'u ne'e see?”

Petrus nataa na'ak, “Ama ne'e, Kristus mak uluk Na'i Maromak nameno kedan atu solok mai.”^f

21 Petrus nataa nunia, hotu Yesus nakahik sia nebee keta katak baa se-see ha'ak, Nia ne'e, mak Kristus.

22 Nunia hotu, Yesus dale tu'an baa Niakaan maktuir sia na'ak, “Ha'u ne'e, Ema Raiklaran Isin kosi lale'an. Ha'u kmusti katiu susar todan oi-oik. Fukun adat sia, na'ilulik ulun sia, no manorik ukun Yahudi sia la simu na'ak, Ha'u ne'e, mak Kristus. Sia atu no'o Ha'u. Nanis Ha'u kmate, mais wainrua, Ha'u kmoris kikar!”^g

23 Hotu, Yesus moos dale baa ema lear sia na'ak, “Ema mak nakara tuir Ha'u, nia musti tuir bei-beik sura loron! Nia musti nalu'a niakaan hakara du'uk, nebee tuir Na'i Maromak hakaran. Masik ema no'o nia moos, nia musti tuir, hanesan ema natiu niakaan ai karuus atu baa niakaan mate fatin.^h 24 Ema mak moris nodi nadi'a aan simu mate tan tuir Ha'u, nia netan moris no Na'i Maromak nima-nimak. Mais ema mak moris tuir hakaran du'uk, nia la netan moris no Na'i Maromak.ⁱ 25 Kalo ema netan raiklaran sasoin tomak, mais la netan moris no Na'i Maromak, nia netan sotir saa? 26 Ha'u ne'e, Ema Raiklaran Isin kosi lale'an. Ema mak moe aan tuir Ha'u, no moe aan kaer Ha'ukaan hanorin, baa oras Ha'u kfila kikar kosi lale'an mai, Ha'u moos moe aan katene ema nia iha Na'i Maromak oin. Nosi ikus, Ha'u atu ktuun mai kodi Ama beran maka'as, bele-bele ko Niakaan makbukar lale'an sia. 27 Keta halu'a lia fuan ne'e! Nosi emi hotu-hotu ne'e, balu la mate dauk, to'o naree Na'i Maromak kaer ukun.”

28 Loron walu siku, Yesus nodi Petrus, Yohanis no Yakobus sa'e baa foho ida atu namulak.

29 Baa oras namulak, Yesus ilas nakfilas aan. Niakaan tais mutin naksinak.

30 Teki-tekis, ema na'in rua mosu mai. Sia rua, mak Bei Musa no Bei Elia. Sia dale no Yesus. 31 Sia moos tadu naksinak. Sia na'in tolu dale baa malu nosi lia Yesus mate iha Yerusalem.

32 Baa oras nia, Petrus no mamaluk na'in rua nakati la bele netu aan, to'o toba. Baa oras naktekir, sia titu-naree Yesus nariik no ema na'in rua. Sia moos titu-naree Yesus sinak nakroma.

33 Naree Bei Musa no Bei Elia atu fila ona, Petrus benar nodi dale karin na'ak, “Ama Boot! Ami horan di'ak iha ne'e. Di'ak liu ami hariik batane tolu. Ida bodik Ama Boot, ida bodik Bei Musa, ida tenik bodik Bei Elia.” 34 Petrus sei dale nunia, kalo'an tuun, taka nola sia. Naree nunia, Petrus sia nata'uk. 35 Sia moos rona noo lia maliak nosi kalo'an na'ak,

36 Nunia hotu, Petrus sia titu-naree Yesus mesan dei. Sia na'in tolu taka ibun, la dale baa se-see saa mak sia naree ti'an nia. Kleur, foin loke ibun dale baa ema seluk.

37 Baa awan, oras Yesus no Petrus sia tuun nosi foho nia, ema lear mai nasoru Yesus. 38 Noo ema ida nahii baa Yesus na'ak, “Ama Boot! Maree kokon ha'ukaan oan mane mesak ne'e lai! 39 Tan diabu tekar nia, nalo nia sarebak nakrake, nodi nitak nia to'o kaban furin sai. Diabu moos ta'e rua-ruan no kakoen nia nohuun. 40 Ha'u kusu baa Ama maktuir sia ti'an nebee te'ur sai diabu nia, mais sia la bele!”

41 Rona nola nunia, Yesus nakanas maktuir sia na'ak, “Hoi! Emi ne'e etuk oin, huun la fiar no la loos! To'o wainhira Ha'u katerus aan ko emi?”

Dale notu nunia, Nia katak baa ama nia na'ak, “Modi o oan mai!”

42 Baa oras nodi oan baa Yesus, diabu nitak baa rai nodi doko nia. Mais Yesus te'ur diabu sai nela oan nia. Hotu oan nia di'ak kedas. Yesus moos latan nikar baa aman. 43a Ema hotu-hotu mak naree Yesus beran maka'as nia, blaar karin.

43b Ema hotu-hotu sei dale tadak blaar mak Yesus nase'i nia, Nia katak Niakaan maktuir sia na'ak, 44 “Hatadan di'a-di'ak lia ne'e! Ha'u ne'e, Ema Raiklaran Isin kosi lale'an. La kleur ona, ema atu fa'an lakon Ha'u, hotu latan Ha'u baa ema seluk.” 45 Rona nola nunia, Yesus Niakaan maktuir sia benar karin, tan la natene lia nia isin. Mais sia moos nata'uk nusu lia nia isin na'ak saa.

46 Baa dala ida, Yesus Niakaan maktuir sia toe malu baa lia see mak boot kaliuk.^k 47 Mais Yesus natene sia toe malu tan lia nia. Hotu Nia nola lawarik ida, nalo nariik iha Niakaan sorin. 48 Hotu Nia katak baa sia na'ak, “Rona di'a-di'ak! Ema mak simu ema ki'ik hanesan lawarik ne'e, ema nia moos simu Ha'u no Ha'ukaan Ama mak solok Ha'u kmai iha raiklaran ne'e. Ema wa'in naraik ema ki'ik sia, mais Na'i Maromak nafoli kaliuk, ema mak naliku ema ki'ik sia.”^l

49 Nunia hotu, Yohanis nasara baa Yesus na'ak, “Ama Boot! Baa dala ida, ami haree ema ida te'ur sai diabu nodi temi Ama naran. Ami hakahik nia nebee keta temi nodi Ama naran, tan nia lahoos itakaan eman.”

50 Mais Yesus nataa na'ak, “Hoi! Keta hakahik nia! Tan ema mak la sakar ita, nia itakaan eman.”

51 Yesus natene na'ak, Niakaan loron sa'e baa lale'an kre'is ona. Hotu, Nia nakotu atu baa kota Yerusalem. 52 Mais Nia naruka ema na'in hira atu baa uluk, nebee babilan haa-hemu no fatin bodik sia nein heik. Hotu ema nia sia moos baa, tama leo ida iha rai Samaria. 53 Mais ema Samaria iha nia la simu Yesus sia, tan sia atu baa lo'u-sudur baa Maromak iha kota Yerusalem.^m 54 Baa oras Yakobus no Yohanis rona ema Samaria la simu Yesus nunia, sia namaus Yesus na'ak, “Ama Boot! Kalo ita husu Na'i Maromak solok ha'i nosi kalo'an mai naa mohu sia, nunabee?”ⁿ

55 Mais Yesus se'i oin baa sia rua nodi de'an na'ak, “Keta nunia.” 56 Hotu sia la'o liu baa leo seluk.

57 Baa oras sia sei la'o, ema ida dale baa Yesus na'ak, “Ama Boot! Ama baa nabee dei, ha'u ktuir bei-beik!”

58 Mais Yesus nataa na'ak, “Di'ak no! Mais manoin nune'e. Ema hotu-hotu noo fatin du'uk. Asu fuik fila baa fatuk kuak. Manu fila baa knuuk. Mais Ha'u ne'e, la koo uma toba fatin. Tan Ha'u ne'e, Ema Raiklaran Isin kosi lale'an.”

59 Baa dala ida Yesus bolu ema ida seluk na'ak, “Mai, tuir Ha'u atu dadi baa Ha'ukaan ema.”

Ema nia nataa na'ak, “Di'ak! Mais nune'e, Ama Boot. Mabusik ha'u kfila, baa babilan ema matas sia lai. Kalo ha'ukaan ama mate ti'an, foin ha'u kmai tuir Ama.”

60 Mais Yesus dale baa nia na'ak, “Nune'e! Mabusik ema mak la fiar Maromak, babilan siakaan ema maten. Mais emi mak fiar baa Maromak, musti baa katak lia nosi Nia babilan hutun-renun.”

61 Baa dala ida seluk, ema ida tenik na'ak, “Di'ak no, Ama Boot! Ha'u kakara tuir Ama Boot bei-beik. Mais mabusik ha'u kbaa katak ha'ukaan famili sia lai, foin ha'u kmai tuir Ama.”^o

62 Mais Yesus katak baa nia na'ak, “Nune'e! Kalo ema nahuu fila rai, hotu nalau aan no serwisu seluk sia to'o nalu'a furi, niakaan to'os la dadi. Nunia moos, ema mak nakara tuir Ha'u. Kalo nia nanoin bei-beik moris uluk, nia la noo folin dadi ema mak serwisu iha Na'i Maromak fohorai.”