Feto sia mak tuir Yesus
8
La kleur, Yesus no Niakaan maktuir na'in sanulu resin rua, la'o nasirin kota no leo iha nebaa, nodi katak Lia Di'ak nosi Na'i Maromak ukunrai.
Lukas 8:1-21
2 Feto na'in hira moos la'o no sia. Uluk, feto balu moras oi-oik, balu diabu tekar. Mais Yesus nadi'ak nola sia. Feto nia sia, mak Maria nosi leo Magdala. Uluk, Yesus te'ur sai diabu hitu nosi nia. 3 Iha nia moos, noo Susana no ina Yohana. Ina Yohana ne'e, ama Kusa feen. Kusa nia, ulun mak babilan iha na'i Herodes tofatik. Sei noo feto wa'in seluk mak la'o bele-bele no Yesus sia. Feto ne'e sia nodi siakaan osan du'uk, sosa bakae bodik Yesus sia iha dalan.a
Lia hatetek nosi fini mak monu baa rai oi-oik
4 Dala ida tenik, ema lear sai nosi leo wa'in atu buka Yesus. Sia libur malu ti'an, Yesus nanorin sia nodi lia hatetek. Dala ida ne'e, Nia dale nune'e: 5 “Noo ema mafaho rai ida baa kari fini iha to'os. Fini balu monu baa dalan. Baa oras ema la'o tuir nia, sia sama fini nia sia. Hotu manu mai tutu nola. 6 Fini balu tenik monu baa rai fatuk. Fini nia sia tubu, mais naklaik mohu, tan wee la to'o. 7 Fini balu seluk monu baa rai mak noo ai tarak. Baa oras fini nia sia nahuu tubu, ai tarak neti no'o. 8 Mais fini seluk tenik, monu kona rai isin. Sia tubu, hotu boot to'o nafua. Fini nia sia foo nikar fuan dala atus ida.”
Dale notu nunia, Yesus taka lia hatetek nia na'ak, “See mak noo tilun, rona di'a-di'ak!”
Yesus nalore tan saa Nia nanorin nodi lia hatetek
9 Nunia hotu, Yesus maktuir sia nusu lia hatetek nia isin.
10 Nia nataa na'ak, “Nune'e! Tan emi tuir Na'i Maromak dalan ti'an, Ha'u katak malorek nebee emi bele hatene Na'i Maromak fohorai no oin nunabee Nia naliku hutun-renun. Mais ema seluk sia mak la no'uk tuir Na'i Maromak dalan, Ha'u kanorin sia kodi lia hatetek dei. Maromak mako'an nakerek kedan ti'an lia nosi ema nia sia na'ak,
‘Sia naree ti'an,
mais la no'uk natene.
Sia rona ti'an,
mais la no'uk simu.’”b
Yesus nalore lia hatetek isin nosi fini
11 Hotu Yesus nalore lia hatetek nia isin na'ak, “Fini nia, nu'u Maromak Manfatin. 12 Fini mak monu baa dalan, nu'u ema mak rona Maromak Manfatin, mais la kleur diabu ulun mai nadau nola Manfatin nia nosi niakaan neon. Tan nunia, ema nia la fiar Na'i Maromak, no la netan moris. 13 Fini mak monu baa rai fatuk, nu'u ema mak rona Maromak Manfatin no simu nodi neon di'ak. Mais abut tama la le'an. Nia nahuu fiar, mais kalo susar sa'e tan, nia monu ma'as. 14 Fini mak monu baa rai mak noo ai tarak, nu'u ema mak rona nodi simu Maromak Manfatin. Mais la kleur, nia nalu'a lakon, tan nia nalau aan no niakaan lia du'uk, no naha oi-oik, nodi moris nafurak aan dei. Nosi ikus, niakaan fiar nia la nafua saa ida. 15 Mais fini mak monu baa rai isin, nu'u ema neon loos. Nia rona Maromak Manfatin, hotu rai di'a-di'ak baa neon. Hodi nunia, nia fiar nohuun nodi nalo lia di'ak wa'in.”
Lia hatetek nosi taka badut hodi hanek
16 Hotu Yesus nanorin tenik na'ak, “Ita sunu badut, hotu taka hodi hanek ka? Ita sunu badut, hotu rai iha koi ohak ka? Lale! Ita rai badut baa fatin aas, nebee laka naroma ema mak tama mai.c 17 Tan hotu-hotu mak sei nakfunin baa oras ne'e, atu naksain. Hotu-hotu mak ita sei la hatene baa oras ne'e, ita atu hatene.d
18 Hanoin di'a-di'ak lia ne'e sia. Ema mak nakara buka tebe-tebes Na'i Maromak beer, nia hetak natene. Mais ema mak la nakara rona Na'i Maromak beer, nia hetak la natene.”e
Yesus familin tebes
19 Baa dala ida, Yesus sei dale no ema lear. Hotu Yesus inan no Yesus alin sia mai atu nasoru Nia. Mais sia la bele kre-re'is baa Nia, tan ema wa'in resik. 20 Hotu ema baa katak Yesus na'ak, “Ama! Okaan inan no alin sia iha luan. Sia atu nasoru O.”
21 Yesus nataa na'ak, “He'e! Mais nune'e. Ema mak rona Maromak Manfatin hotu nalo tuir, sia mak Ha'ukaan inan no Ha'ukaan alin tebes.”
Yesus nalo anin dadurus nakmatek
22 Baa dala ida, Yesus tene Niakaan maktuir sia na'ak, “Mai ita sa'e bero, baa debu balu baa.” Sia moos sa'e bero, la'o baa.
Lukas 8:22-39
23 Baa oras la'o, Yesus toba. La kleur, anin dadurus toma sia. Laloran nakfake tama baa bero, to'o sia kre'is netan dinu.
24 Naree nunia, ema maktuir sia fu'a nadeer Yesus na'ak, “Ama Boot! Ama Boot! Madeer lai! Ita atu mate mout ona!”
Yesus moos nadeer, hotu nakahik anin no laloran na'ak, “Manawa ona!” Laloran no anin moos nakmatek kedas.
25 Hotu Yesus de'an Niakaan maktuir sia na'ak, “Tan saa emi la fiar Ha'u?”
Mais sia nata'uk no blaar. Sia moos nusu baa malu na'ak, “Hoi! Yesus ne'e, see? Oin nunabee Nia bele naruka anin no laloran, to'o tuir Niakaan harukan?”
Yesus te'ur sai diabu nosi ema bulak
26 La kleur, Yesus sia to'o rai Garasa iha debu boot Galilea balu baa. 27-29 Iha nebaa, noo ema ida mak diabu tekar kleur ti'an. Nia la nein iha uma. Nia nein dei iha rate fatik sia. Sura loron nia nakwalan nodi la'o baa-mai, tan diabu sia naruka nia nohuun. Ema kesi nia rua-ruan ti'an nodi besi talik, mais nia nasiit mohu. Hotu, diabu sia naloot nia to'o nalai baa rai fuik.
Oras Yesus sia tuun nosi bero, ema bulak nia mai nasoru. Nia nakrake, nodi soe aan baa Yesus oin. Hotu Yesus naruka na'ak, “Hoi, diabu! Sai mela ema ne'e!”
Hotu ema bulak nia nakrake na'ak, “Hoi! Keta kakoen ha'u! Tan ha'u katene O ne'e Yesus, Maromak Mak Aas Kaliuk Oan! Keta masusar ha'u!”
30 Hotu Yesus nusu baa nia na'ak, “O naran see?”
Diabu nataa na'ak, “Legion, tan ami lear hanesan sondadu rihun-rihun.” Bulak dale nunia, tan diabu wa'in nein iha niakaan laran.
31 Hotu diabu nia sia nakro'an baa Yesus nebee keta naruka sia baa Kuak Kastikar, mak diabu siakaan kastikar fatin.
32 Kre'is baa nia, noo fahi klibur ida. Fahi nia sia no'i naa iha foho tehen. Diabu nia sia nakro'an baa Yesus na'ak, “Maruka ami tama baa fahi nia sia dei!” Yesus moos nalo tuir nunia. 33 Diabu nia sia sai nela bulak nia, tama kedan baa fahi nia sia. Fahi nia sia hotu-hotu bula, nalai lakon tuun nosi foho nia, tama baa debu boot laran. Hotu-hotu mate mout.
34 Naree nola nunia, makdaka fahi sia nalai baa nasirin leo sia iha nia, nodi katak lia nia hotu-hotu. 35 Rona nola nunia, ema lear sai baa fatin nia atu naree du'uk saa mak dadi. To'o nebaa, sia naree ema diabu tekar nia tuur mamatek kre'is Yesus ain. Nia moon ti'an no tau tais ti'an. Naree nunia, sia hotu-hotu nata'uk. 36 Hotu ema mak ohin naree lia nia sia, katak baa ema mak foin mai sia, nunabee ema bulak nia bele di'ak nikar. 37 Mais ema Gerasa hotu-hotu mak nein iha rai nia, nusu Yesus nebee la'o nela rai nia, tan sia hotu-hotu nata'uk.
Rona nola nunia, Yesus sia sa'e baa bero, atu fila nikar baa debu balu baa.
38 Mais ema mak ohin diabu tekar nia, namaus Yesus na'ak, “Ama! Kalo bele, ha'u ktuir Ama!”
Mais Yesus nataa na'ak, 39 “Nune'e dei! Di'ak liu, o fila mikar baa okaan familin sia modi katak baa sia lia Na'i Maromak Niakaan dadi'ak baa o.”
Hotu, ema nia baa nasirin kota nia, katak baa ema hotu-hotu nosi lia Yesus nadi'ak nola nia.
Yesus nalo Yairus oan feto moris nikar, no nadi'ak nola feto ida
40 Nunia hotu, Yesus sia fila baa debu boot Galilea balu baa. Baa oras sia tuun nosi bero, ema lear nein ti'an. Sia kabuun mai, simu Yesus.
Lukas 8:40-56
41-42 Iha nia moos, noo ema ida naran Yairus. Nia, uma hamulak ulun iha kota nia. Niakaan oan feto mesak ida, otas tinan sanulu resin rua. Oa feto nia moras todan kre'is mate. Tan baa nia, oras Yairus naree Yesus mai, nia baa nakni'a iha Yesus oin. Nia nakro'an nebee Yesus mai niakaan uma, nadi'ak nola oan.
Yesus simu. Hotu sia baa Yairus uman. Ema lear moos tuir, to'o la'o seti malu. 43 Iha nia, noo feto ida mak tuir sia. Feto nia kona moras raa naruk tinan sanulu resin rua ti'an. Nia namohu osan no naha ti'an, nodi selu makdook sia. Mais la noo makdook ida mak bele nadi'ak nola nia. Niakaan moras hetak tu'an. 44 Baa oras nia, nia nare'is aan baa Yesus nosi kotuk atu koko Yesus faru ninin. Koko ti'an, nia di'ak kedas.
45 Teki-tekis Yesus nariik nodi nusu na'ak, “See mak koko Ha'u ne'e?”
La noo ema ida mak nataa. Hotu Petrus dale na'ak, “Ama Boot! Ema lear seti malu! Sia dudu malu nosi kotuk.”
46 Mais Yesus nataa na'ak, “Lale! Ohin nia, Ha'u koran Ha'ukaan beran sai. Katene ema ida koko Ha'u nodi neon no laran.”
47 Rona Yesus dale nunia, feto nia noran la bele nakfunin to'o nata'uk liu. Nia kiki, nodi nakni'a baa Yesus oin. Nia katak lia huun iha ema lear oin. Hotu nia moos katak na'ak, “Natoon baa ha'u koko kona Yesus, ha'u di'ak kedas.”
48 Hotu Yesus katak baa nia na'ak, “Bii! O di'ak, tan fiar baa Ha'u. Fila ona modi neon di'ak!”
49 Yesus sei dale no feto nia, Yairus eman ida mai katak baa nia na'ak, “Aikee, Ama! Ama oan la no ita ti'an! Lalika makole Ama Boot tenik.”
50 Rona ema nia nasara, Yesus dale baa Yairus na'ak, “Mau! Lalika mata'uk! Fiar baa Na'i Maromak dei. Nia atu sori mau oan.”
51-53 To'o Yairus uman, ema nakonu uma nodi tanis nade'un aan. Yesus nakahik sia na'ak, “Hanawa tanis ona! Oa ne'e la mate. Nia toba dei!”
Rona Yesus dale nunia, ema nia sia nanasa nodi nakmulis ibun baa Nia, tan sia naree du'uk oa nia nawan kotu ti'an. Mais Yesus bolu nola oan nia inan-aman, Petrus, Yohanis no Yakobus, tama bele-bele no Nia. Nia moos naruka ema seluk sia nein iha luan.