Yesus nahaan ema na'in rihun haat
8
1-3 Baa oras nia, ema wa'in mai atu rona Yesus nanorin. Sia tuir Yesus loron tolu, to'o la noo bakae ona. Naree nunia, Yesus bolu Niakaan maktuir sia na'ak, “Ha'u kadomi ema wa'in ne'e sia. Balu mai nosi fatin dook, libur malu loron tolu ti'an, to'o la no bakae ona. Di'ak liu, sia keta fila kabun mamuk. Keta to'o siakaan oin nakukun, hotu nakloti iha dalan klaran.”4 Mais maktuir sia nataa na'ak, “Ama! Fatin ne'e dook nosi leo. Ami la bele hahaan hola ema wa'in ne'e!”
5 Mais Yesus nusu baa sia na'ak, “Emi hoo tubi baluk hira iha nia?”
Sia nataa na'ak, “Baluk hitu dei!”
6 Hotu, Yesus naruka ema lear nia tuur baa rai. Nia nola tubi baluk hitu nia, nusu matak-malirin baa Na'i Maromak. Hotu, Yesus fa'e tubi nia foo baa maktuir sia, nebee fa'e nadaar baa ema lear nia hotu-hotu. 7 Iha nia moos, noo na'an tasi lolon hira. Yesus moos nusu matak-malirin baa Na'i Maromak, hotu naruka Niakaan maktuir sia fa'e nadaar tenik baa ema lear nia. 8-9 Sura ema hotu-hotu mak naa nia, bele tama rihun haat. Sia hotu-hotu naa to'o bosu. Hotu ti'an, Yesus Niakaan maktuir sia libur nola haan resin sia, nakonu nola ko'e boot hitu. Hotu, Yesus naruka fila ema nia sia. 10 Nunia ti'an, Yesus no Niakaan maktuir sia sa'e bero atu baa fatin ida naran Dalmanuta.
Ema Farisi sia nusu tadak blaar atu nodi nahonu Yesus
11 Yesus sia to'o Dalmanuta ti'an, ema partee Farisi na'in hira mai nasoru Nia. Sia taruka lia fuan no Yesus, tan atu kohi Nia. Sia nusu na'ak, “Ama! Matudu tadak blaar baa ami lai, nebee dadi kakaer na'ak Na'i Maromak mak latan beran baa Ama.”a
12 Mais Yesus nola nawan hotu katak baa sia na'ak, “Kalo Ha'u krona emi dale nunia, Ha'u laran moras! Tan saa ema oras ne'e nusu tadak blaar? Keta nunia! Ha'u nanis bele kalo, mais Ha'u la katudu baa emi!”b
13 Hotu, Yesus la'o nela ema Farisi sia, sa'e nikar bero no Niakaan maktuir sia, nakur baa debu boot balu baa.
Yesus foo natene nebee sintidu baa ema Farisi sia
14 To'o debu klaran, foin Yesus Niakaan maktuir sia nanoin nola na'ak, sia nalu'a bakae. Sia nodi loos tubi baluk ida dei. 15 Rona nola sia temi tubi, Yesus katak na'ak, “Musti sintidu baa na'i Herodes no ema Farisi sia, tan siakaan hahalok hanesan tua teen tubi.”c
16 Rona nola Yesus temi tua teen tubi, maktuir sia moos neon tabasar. Sia nusu baa malu na'ak, “Itakaan Ama dale saa mak nia? Keta arumak Nia dale nunia tan ita la hodi tubi.”
17 Mais Yesus natene siakaan neon. Hotu, Nia nusu na'ak, “Tan saa emi hanoin baa tubi dei? Tan saa emi sei la hatene Ha'ukaan lia isin? Emikaan kakutak naktomak tebes! 18 Emi haree du'uk ti'an, mais emi sei nu'u ema delek. Emi rona du'uk ti'an, mais emi sei nu'u ema diuk.d 19 Tubi baluk lima mak Ha'u ktohi fa'e kodi kahaan ema rihun lima nia, emi halu'a ti'an ka? Baa oras nia, emi libur hola tubi resin sia, nakonu ko'e hira?”
Sia nataa na'ak, “Ko'e sanulu resin rua Ama!”
20 Hotu, Yesus nusu tenik na'ak “Tubi mak Ha'u ktohi fa'e kodi kahaan ema rihun haat nia, emi halu'a ti'an ka? Baa oras nia, emi libur hola tubi resin sia nakonu ko'e boot hira?”
Sia nataa na'ak, “Ko'e hitu Ama!”
21 Rona nola nunia, Yesus na'ak, “Loos tebes! Emi haree du'uk ti'an, mais tan saa emi sei la hatene dauk See mak latan beran nia baa Ha'u?”
Yesus nadi'ak nola ema delek ida iha leo Betsaida
22 Hotu, Yesus sia to'o leo Betsaida. Iha nia noo ema delek ida. Ema nodi nia mai baa Yesus. Sia nakro'an nebee Yesus koko ema nia nodi nadi'ak nola nia. 23 Rona nola nunia, Yesus kaer ema delek nia liman, nala'o nodi baa kota luan. To'o baa, Nia taniru kaban baa ema delek nia matan, hotu rai liman baa, nodi nusu na'ak, “Nunabee? O maree ti'an ka sei?”
24 Hotu, ema nia foti oin, nodi titu karuk-kwana. Hotu, nia nataa na'ak, “Tebes! Ha'u kbele karee. Ha'u karee ema sia la'o baa-mai, mais nu'u ai huun mak la'o!”
25 Tan ema nia titu sei ba-baur, Yesus rai tenik liman baa matan. Hotu, ema nia loke tenik matan, naree malorek ti'an. 26 Hotu, Yesus naruka nia fila nodi foo natene na'ak, “Fila ona! Mais keta fila mikar baa Betsaida!”
Petrus katak sain na'ak, Yesus mak Kristus
27 Hotu, Yesus no Niakaan maktuir sia la'o nasirin leo iha rai Kaisarea Filipi. To'o dalan klaran, Yesus nusu baa sia na'ak, “Tuir ema dalen, Ha'u ne'e See?”
28 Sia nataa na'ak, “Ema balu na'ak, Ita Boot ne'e Yohanis Mak Sarani Ema. Seluk na'ak, Ita Boot ne'e Elia mak Maromak mako'an uluk. Balu tenik na'ak, Maromak mako'an ida seluk.”e
29 Rona nunia, Yesus nusu tenik na'ak, “Mais kalo tuir emi du'uk, Ha'u ne'e See?”
Petrus nataa na'ak, “Ita Boot ne'e Kristus mak Na'i Maromak boi kedan hori uluk!”f
30 Rona nola nunia, Yesus nakahik sia na'ak, “Keta katak lia ne'e baa ema!”
Yesus katak kedan lia Niakaan susar no mate
31 Nahuu nosi oras nia, Yesus katak baa Niakaan maktuir sia na'ak, “Ha'u ne'e, Ema Raiklaran Isin. Ha'u atu katiu susar oi-oik, tan fukun sia, na'ilulik sia, no manorik ukun sia, hotu-hotu la simu Ha'u. Sia nanis no'o Ha'u. Mais to'o wainruag , nanis Ha'u kmoris kikar.” 32 Rona nola nunia, Petrus dada nola Yesus baa sorin, hotu nakahik na'ak, “Ita Boot keta katak nunia! Ha'u la ksimu!”
33 Mais Petrus dale nia la kona baa Na'i Maromak hakaran. Yesus titu fila baa maktuir rumak sia. Hotu, Nia de'an Petrus na'ak, “Okaan dale nia, diabu ulun lian. Sai mosi ne'e! O manoin loos ema raiklaran hakaran, la manoin Na'i Maromak hakaran!”
34 Hotu, Yesus bolu nola ema wa'in mai namutuk no Niakaan maktuir sia. Nia nanorin sia na'ak, “Ema mak no'uk tuir Ha'u, musti naterus aan bei-beik sura loron. Nia musti nalu'a lakon niakaan hakara du'uk, nebee tuir Na'i Maromak hakaran. Masik ema atu no'o nia moos, nia musti tuir bei-beik, hanesan ema mak natiu ai karuus atu baa mate.h 35 Ema mak moris bodik isin lolon du'uk, niakaan moris atu lakon mohu. Mais ema mak nadi'a aan mate, tan nakara tuir Ha'u no katak Ha'ukaan Manfatin Di'ak, ema nia netan moris nima-nimak no Na'i Maromak.i 36 Rona mai! Kalo ema netan raiklaran sasoin tomak, mais Na'i Maromak soe nia, nia netan sotir saa? 37 La noo saa ida iha raiklaran tomak, mak ema bele nodi selu niakaan kmalar!
38 Ema raiklaran oras ne'e, siakaan hahalok aat oi-oik! Sia la nikir Na'i Maromak. Mais hanoin di'a-di'ak! Ema mak moe tuir Ha'u no Ha'ukaan hanorin, Ha'u moos moe katene nia iha Na'i Maromak oin. Ha'u ne'e, Ema Raiklaran Isin. Nosi ikus, Ha'u kmai kikar kosi lale'an bele-bele ko Na'i Maromak Niakaan makbukar lale'an sia. Ami tuun hodi Ama Niakaan beran boot, foin ema natene malorek na'ak, Ha'u ne'e See.