Na'i Maromak lalore Yesus Niakaan maka'as
17
Loron neen hotu, Yesus bolu nola Petrus, Yakobus no alin Yohanis. Nia tene sia atu sa'e bele-bele baa foho aas ida, nebee sia mesan iha nebaa. 2 To'o foho leten baa, sia titu-naree Yesus nakfilas. Niakaan oin naksinak hanesan loro. Niakaan tais moos dadi mutin molen. 3 Teki-tekis, sia titu-naree tenik Nia no'i dale no Bei Elia no Bei Musa. 4 Naree nola nunia, Petrus benar to'o dale karin na'ak, “Ama! Ami horan furak ti'an iha ne'e! Di'ak liu ami hariik hola batane tolu. Ida bodik Ama, ida bodik Bei Musa, no ida tenik bodik Bei Elia.”5 Baa oras Petrus sei dale nunia, teki-tekis kalo'an tuun mai nakalus nola sia. Sia moos blaar tan rona lia maliak ida sai nosi kalo'an nia na'ak, “Rona lai! Yesus ne'e, Ha'ukaan Oan dadobe. Nia nalo Ha'u neon di'ak tebes. Rona di'a-di'ak baa Nia!”a
6 Rona nola nunia, maktuir nia sia nata'uk basuk to'o nakloti tabarakat. 7 Mais Yesus mai kebit sia nodi dale na'ak, “Hadeer ona! Keta hata'uk!” 8 Rona nola nunia, sia foti oin mais la titu-naree se-see tenik iha nia. Hela mesan Yesus dei mak iha nia.
9 Oras sia nahuu tuun nosi foho nia, Yesus nakahik sia na'ak, “Saa mak emi foin haree nia, keta katak baa se-see! Tan Ha'u ne'e, Ema Raiklaran Isin mak tuun mai nosi lale'an. Ha'u kmusti mate uluk lai. Ha'u kmoris kikar ti'an, foin emi bele katak baa ema seluk.”
10 Hotu sia nusu baa Nia na'ak, “Ama ne'e, Kristus tebes. Mais Bei Elia iha nabee? Manorik ukun sia nanorin na'ak, Bei Elia musti mai uluk lai, foin Kristus mai. Mais tuir Ama, nunabee?”b
11 Yesus nataa na'ak, “Tebes. Bei Elia musti mai uluk nebee loke dalan bodik Kristus. 12 Mais rona di'a-di'ak! Bei Elia mai ti'an, mais ema la natene nia. Sia nasusar nia tuir siakaan hakaran dei. Sia moos atu nalo nunia baa Ha'u ne'e, mak Ema Raiklaran Isin nosi lale'an.”c
13 Rona notu nunia, foin sia natene na'ak Bei Elia mak Yesus dale nia, Yohanis Mak Sarani Ema.
Yesus nadi'ak nola lawarik oan ida mak diabu tekar
14 Baa oras Yesus sia fila nikar, noo ema lear mak nein sia ti'an. Hotu katuas ida mai nakni'a nodi nusu tulun baa Yesus na'ak, 15 “Ama Boot! Madomi ha'ukaan oan lai! Nia moras horak bibi maten to'o nia susar basuk. Kalo nasa'e horak, na'in monu aan baa wee laran, lale, baa ha'i laran. Tulun lai, Ama Boot! 16 Ha'u kodi nia baa Ama Boot Niakaan maktuir sia ti'an, mais sia la bele nadi'ak nola nia.”
17 Rona nola nunia, Yesus nakbehek Niakaan maktuir sia na'ak, “Hoi! Emi ne'e liu resik ti'an! Ha'u kanorin emi hei-hein ti'an, mais emi la tolan. Tan saa emi sei la duun fiar baa Ha'u? Ha'u kmusti katerus aan baa emi to'o wainhira tenik? Hodi lawarik nia mai!”
18 Sia nodi lawarik nia mai, hotu Yesus te'ur sai diabu nia. Diabu sai ti'an, lawarik nia moos di'ak kedas.
19 Baa oras Yesus no Niakaan maktuir sia mesan, sia nusu baa Nia na'ak, “Ama! Tan saa ami la bele te'ur sai diabu ohin nia?”
20 Yesus nataa fila na'ak, “Emi la bele te'ur sai diabu nia, tan emi la fiar tebe-tebes. Hanoin! Kalo emi fiar tebe-tebes, masik fiar oan ida dei moos,d la noo saa ida mak la bele halo. Emi bele haruka foho ida ha'ak, ‘Hoi foho! Lori baa nebaa!’ Foho nia moos, nanis lori.e 21 [Mais rona, tan Ha'ukaan dalen ne'e, tebes no loos! Diabu sia aat tebes. Kalo emi la hamulak no halirin aan hodi husu tulun baa Na'i Maromak, emi la bele te'ur sai diabu oin nunia.”]f
Yesus dale tenik nosi Niakaan mamaten
(Markus 9:30-32; Lukas 9:43b-45)
22 Baa loron ida, Yesus no maktuir sia libur malu iha rai Galilea. Nia katak baa sia na'ak, “La kleur ona, ema atu fa'an Ha'u baa ema seluk. 23 Hotu sia no'o Ha'u, Ema Raiklaran Isin nosi lale'an ne'e. Ha'u nanis kmate, mais baa wainrua, Ha'u kmoris kikar.”
Rona nola Nia dale nunia, maktuir sia noran susar basuk.
Yesus dale nosi selu bea baa Uma Hamulak Huun
24 Baa loron ida, Yesus no maktuir sia baa leo Kapernaum. To'o nebaa, ema nosi Na'i Maromak Niakaan Uma Hamulak Huun mai baa Petrus nodi nusu na'ak, “Okaan manorik selu bea baa Uma Hamulak Huun ka lale?”g
25 Petrus nataa na'ak, “Selu!”
Hotu Petrus fila nikar baa siakaan hein fatin. Nia sei la nasara lia nia baa Yesus, Yesus katak kedan baa nia na'ak, “Simon! Manoin kokon! Na'in sia iha raiklaran ne'e nola bea nosi see? Nosi siakaan oan du'uk ka, nosi siakaan hutun-renu?”
26 Petrus nataa na'ak, “Nosi hutun-renu!”
Yesus natutan tenik na'ak, “Kalo nunia, na'in oan du'uk la kona bea.
27 Nunia moos, bea Uma Hamulak Huun. Mais ita lalika buka lia ho maksisi bea sia. Di'ak liu, o baa makair na'an tasi iha debu dei. Kohi mola na'an tasi uluk fohon, hotu loke naan tasi nia nunun. O atu metan osan murak tomak ida iha nunun laran. Hotu foti mola, modi baa selu bea bodik ita rua. Tan osan nia to'o ti'an bodik ita rua.”h