Yesus Lia Di'ak
tuir
Markus
1
Manfatin ne'e, Lia Di'ak nosi Na'i Maromak Oan,a naran Yesus. Yesus ne'e, Kristus mak Na'i Maromak nameno kedan hori uluk. Yesus Niakaan lia nahuu nodi lia Yohanis nune'e:Yohanis nasori dalan bodik Yesus
2 Baa oras Yesus sei la nahuu dauk Niakaan serwisu, Na'i Maromak solok kedan ema ida naran Yohanis atu nasori dalan bodik Yesus atu mai. Uluk, Maromak naruka mako'an ida naran Yesaya, nebee nia nakerek nela kedan nosi lia nia na'ak,
“Rona mai! Ha'u atu ksolok Ha'ukaan ema ida, nebee nia nasori dalan bodik O.b
3 Ema nia atu baa rai fuik ida, nodi nahii na'ak,
‘Ema hotu-hotu hadi'a dalan bodik Na'in atu mai!
Ema hotu-hotu haweer dalan atu simu Nia.’”c
4-6 Yohanis ne'e, mak sarani ema. Nia tuur iha rai fuik. Niakaan tais halo hosi kuda unta rahun. Niakaan bolas halo hosi kulit. Niakaan haan, kala'ek no wani ween alas laran. [Niakaan moris lala'ok ne'e, hanesan Maromak mako'an ida hori uluk, naran Elia.]d
Baa oras Yohanis baa rai fuik nia, ema wa'in nosi kota Yerusalem no rai Yudea tomak, mai nasoru Nia iha nebaa. Yohanis katak baa sia na'ak, “Emi musti katak hasai emikaan salan, hotu la'o hela sala nia sia, nebee Na'i Maromak foo pardua baa emi. Hotu, emi musti simu sarani, hanesan marak ida na'ak, emi di'a-di'ak ti'an ho Na'i Maromak.”
Rona nola nunia, ema nia sia katak nasai kedan siakaan salan. Hotu, Yohanis sarani sia iha mota Yordan.
7 Nia moos katak baa sia na'ak, “Ema ida mak boot liu ha'u, atu mai. Dadi baa Niakaan ata moos, ha'u la kfatan.e 8 Ha'u ksarani emi kodi wee dei. Mais Nia nalo liu tan ha'u. Tan Nia atu nakonu nola emikaan neon no laran, nodi Maromak Kmalar Lulik.”
Yohanis sarani Yesus
9 Baa oras nia, Yesus mai nosi leo ida naran Nasaret iha rai Galilea, atu nasoru Yohanis. Nasoru ti'an, Yohanis sarani Yesus iha mota Yordan. 10 Baa oras Yesus sai nosi wee laran, teki-tekis naree lale'an nakloke. Hotu, Maromak Kmalar tuun baa Nia, hanesan manu lakateu sina ida. 11 Hotu, ema rona Na'i Maromak lian nosi lale'an na'ak:
“Oa! O ne'e, Ha'ukaan Oan mak kakara no kadomi.
O malo Ha'u neon di'ak.”f
Diabu ulun mai sokur Yesus iha rai fuik ida
12 Hotu, Maromak Kmalar dada nodi Yesus baa rai fuik ida. 13 Nia tuur nein iha fatik nia namutuk no osa no lotuk alas laran sia, to'o loron haat nulu, kalan haat nulu. Iha nia, diabu ulun moos mai sokur Yesus, nebee atu tuir nia. Mais, la bele. Hotu, Na'i Maromak Niakaan makbukar lale'an sia mai naliku Yesus.
Yesus baa nalore Na'i Maromak dalan moris iha rai Galilea
14 Baa oras nia, ema natama Yohanis baa bui laran. Yesus moos baa rai Galilea, atu nalore Na'i Maromak Manfatin Di'ak iha nebaa. 15 Nia katak baa ema na'ak,
“Rona! Oras ne'e, Na'i Maromak Niakaan oras to'o ti'an.
Oras ne'e, Na'i Maromak nabesi aan kaer ukun iha raiklaran.
Emi musti hanawa hosi hahalok aat ona!
Hotu mai tuir Na'i Maromak dalan moris.”g
Yesus bolu nola maktuun tasi na'in haat
16 Loron ida, Yesus la'o tuir debu boot Galilea tehen. Nia naree ema maun-alin na'in rua. Maun naran Simon, alin naran Andreas. Sia rua no'i tiha na'an tasi, tan sia buka moris nunia. 17 Hotu, Yesus bolu sia na'ak, “Hei! Emi mai tuir Ha'u ona! Uluk emi buka na'an tasi. Mais Ha'u atu kanorin emi buka ema, nebee sia tuir Na'i Maromak.” 18 Rona nola nunia, sia rua la'o nela kedas siakaan daitiha, hotu tuir Yesus.
19 Sia la'o liu baa, Yesus naree tenik ema na'in rua. Sia ne'e, Sebadeus oan. Maun naran Yakobus, alin naran Yohanis. Sia no'i nadi'a daitiha iha bero laran. 20 Yesus bolu sia na'ak, “Hei! Emi mai tuir Ha'u ona!” Rona nola nunia, sia la'o nela kedas siakaan aman no ema serwisu sia iha bero laran. Hotu sia tuir Yesus.
Yesus te'ur nasai diabu nosi ema ida iha kota Kapernaum
21 Hotu, Yesus no ema na'in haat nia la'o to'o leo ida, naran Kapernaum. Ema Yahudi siakaan loron hamulak to'o mai,h Yesus tama baa nanorin iha siakaan uma hamulak. 22 Rona Yesus nanorin, ema hotu-hotu blaar, tan Nia seluk nosi manorik ukun Yahudi sia. Nia natene tebe-tebes lia hanorin isin.i
23 Iha uma hamulak nia laran noo ema ida mak diabu tekar. Baa oras nia, diabu mak tekar ema nia nahii na'ak, 24 “Hoi! Yesus, ema Nasaret! O mai malo saa!? O moo lia saa mo ami!? O mai keen karin ami baa saa! Ami hatene O ne'e, ema moon nia mak Na'i Maromak nameno atu solok mai.”
25 Rona nola nunia, Yesus te'ur diabu nia na'ak, “Taka ibun! Sai mosi ema nia!”
26 Diabu nia moos tekar ema nia, to'o isin maka'as karin. Hotu, diabu kakaur nodi sai nela ema nia. 27 Naree nunia, ema hotu-hotu iha uma hamulak nia blaar karin. Sia dale baa malu na'ak, “See mak ne'e, to'o Nia bele naruka diabu sia sai. Hotu sia sai kedas, tuir Niakaan hakara. Niakaan hanorin ne'e, oin seluk! Furak tebes!”
28 Nunia hotu, ema dale lia ne'e nosi ibun baa ibun, to'o keke lema rai Galilea tomak.
Yesus nadi'ak nola Petrus banin feto no ema moras wa'in
29 Hotu, Yesus no Niakaan maktuir sia sai nosi uma hamulak nia baa Simon no Andreas uman. 30 Oras nia, Simon banin feto no'i toba, tan moras kiki. Yesus sia tama uma laran, ema mai katak baa sia na'ak, “Ferik moras.”
31 Rona nola nunia, Yesus nare'is aan baa ferik nia. Nia kaer baa liman, nodi foti nadeer nia. Moras kiki nia moos lakon kedas. Hotu, ferik nia baa naliku Yesus sia.
32 Kre'is loro atu monu, ema wa'in nodi siakaan ema moras no ema diabu tekar mai nusu tulun baa Yesus, 33 to'o ema leo nia tomak mai nakonu nola uma nia oin. 34 Hotu, Yesus nadi'ak nola ema wa'in nosi moras oi-oik. Nia moos te'ur sai diabu wa'in. Mais Nia la foo leet baa diabu sia dale, tan sia natene tebes Nia.
Yesus la'o lema leo seluk sia, nodi nalore Na'i Maromak Manfatin
35 Hotu nunia, Yesus no Niakaan maktuir sia toba iha leo nia, tan kalan ti'an. Seisawan oan, Yesus nadeer uluk maktuir sia, hotu sai baa namulak iha fatin mamuk ida. 36 Oras Simon sia nadeer, sia la naree Yesus. Hotu, sia baa buka. 37 Sia nasoru Yesus ti'an, sia nasee na'ak, “Ama, ema buka Ama. Mai ita fila ona.”
38 Mais Yesus nataa na'ak, “Di'ak. Mais di'ak liu, ita baa leo kre'is iha ne'e sia lai, nebee Ha'u kalore Na'i Maromak Manfatin iha nebaa. Tan Na'i Maromak solok Ha'u kmai, atu kala'ok serwisu nia.”
39 Hotu, Yesus la'o lema rai Galilea tomak, nodi nalore Na'i Maromak Manfatin iha uma hamulak sia. Nia moos te'ur nasai diabu wa'in.j
Yesus nadi'ak nola ema ida mak moras funi mea
40 Baa oras nia, ema ida mak moras funi mea mai baa Yesus. Nia nakni'a nodi nakro'an na'ak, “Ama! Tulun ha'u lai! Ha'u katene Ama bele nalakon ha'ukaan moras ne'e, nebee ema keta nakribi ha'u ona. Surak, Ama nakara.”
41 Rona nola nunia, Yesus neon monu. Nia lolo liman nodi kaer ema nia. Hotu, Nia nataa na'ak, “Tebes! Ha'u kakara. O di'ak ona!” 42 Laku matan dei, ema nia di'ak kedas. 43 Hotu, Yesus naruka fila, nodi katak na'ak, 44 “Rona di'a-di'ak! O di'ak ti'an, mais keta masara baa ema. O musti mala'ok ukun nosi Bei Musa. Baa malore okaan isin lolon baa na'ilulik lai, nebee sia leno okaan isin no sia bele natene na'ak, okaan moras ne'e lakon ti'an. Hotu, o matetu sera baa Na'i Maromak, nebee ema hotu-hotu bele natene na'ak, o di'ak ti'an.”k
45 Masik Yesus nakahik nunia moos, ema nia baa keke luku lia nia. Rona nola lia nia, ema lear mai buka Yesus, to'o Yesus la bele nasai oin iha leo hotu-hotu. Tan lia nia, Yesus nein iha rai leet dei. Mais ema rai-rain lolok mai buka Nia.