Yesus nadi'ak nola ema ida mak moras funi mea
8
Nunia hotu, Yesus tuun nosi foho ki'ik nia. Ema lear moos baa tuir Nia. 2 Teki-tekis, ema ida mak moras funi mea mai nasoru Yesus. Ema nia nakni'a, hotu nusu baa Yesus na'ak, “Ama Boot! Tulun ha'u lai! Kalo Ita Boot hakara, Ita bele halakon moras ne'e, nebee ema keta nakribi ha'u ona.”3 Rona nola nunia, Yesus lolo liman baa, kaer ema moras funi mea nia, nodi dale na'ak, “Ha'u kakara. O di'ak ona!” Teki-tekis, moras nia lakon kedas. 4 Hotu Yesus katak baa ema nia na'ak, “Manoin! O di'ak ti'an, mais keta katak baa se-see o! Musti mala'o uluk ukun nosi Bei Musa lai. Baa na'ilulik, hotu musu nebee nia leno okaan isin, atu natene okaan moras lakon tebes ka sei. Hotu musti matetu sera nebee ema hotu-hotu natene na'ak, o di'ak tebes ti'an.”a
Yesus nadi'ak nola sondadu ulun Roma ida niakaan ema serwisu
5 Hotu Yesus tama baa leo Kapernaum. Iha nia, sondadu ulun Roma ida mai nusu tulun na'ak, 6 “Ama Boot! Ha'ukaan ema serwisu ida moras todan iha uma. Nia la bele nadeer nosi toba fatin ona, tan nia susar basuk.”
7 Yesus nataa na'ak, “Di'ak! Ha'u atu kbaa kadi'ak kola nia.”
8 Mais sondadu ulun nia na'ak, “Ama Boot! Ita Boot lalika hakole aan mai ona, tan ha'u la kfatan simu Ita Boot iha ha'ukaan uma. Surak Ita Boot dale hosi ne'e dei, nia di'ak kedan.
9 Ha'u katene lia ne'e, tan ha'ukaan ulun sia noo beran atu naruka ha'u. Ha'u moos koo beran atu karuka ha'ukaan sondadu sia. Kalo karuka ha'ukaan ain-liman sia ka'ak, ‘Baa nebaa!’ nanis sia baa. Kalo ka'ak, ‘Mai ne'e!’ nanis sia mai. Tenik, kalo karuka ema serwisu sia ka'ak, ‘Serwisu ne'e!’ nanis sia nalo nunia. Dadi, surak Ita Boot dale dei, nanis ha'ukaan ema nia di'ak kedan.”
10 Rona nola nunia, Yesus moos blaar. Nia dale baa ema lear mak tuir Nia na'ak: “Ha'u kblaar! Kleur ti'an nune'e, Ha'u la kasoru ema Yahudi ida mak fiar biit manesak no ema Roma ne'e! 11 Rona! Ema matak wa'in manesak no ema Roma ne'e. Sia atu mai nosi lorosa'e no loromonu atu tuur naa nodi nadahur bele-bele no Bei Abraham, Bei Isak, Bei Yakob no Na'i Maromak Niakaan ema seluk sia iha lale'an.b 12 Tuir loos, Na'i Maromak boi ti'an ema Yahudi dadi baa Niakaan ema, mais balu la titu Nia. Nosi ikus, Nia atu dudu sees sia baa fatin makukun. Iha nia, sia noran susar basuk nodi tanis la nanawa.”c
13 Dale notu nunia, Yesus naruka sondadu ulun nia na'ak, “Ama fila ona. Ama eman nia di'ak ti'an, tuir ama niakaan fiar.” Baa oras nia moos, ema nia di'ak kedas.
Yesus nadi'ak nola ema moras lear
14 Baa loron ida, Yesus baa Petrus uman. Nia naree Petrus banin feto toba iha toba fatin, tan moras kiki. 15 Yesus kaer ferik nia liman, moras nia moos lakon kedas. Hotu ferik nia nadeer, baa naliku Yesus.
16 Baa oras loro atu monu, ema mai nodi siakaan ema mak diabu tekar. Hotu Yesus te'ur sai diabu na'ak, “Hoi diabu! Sai mosi ema ne'e!” Hotu diabu sia sai kedas. Yesus moos nadi'ak nola ema moras hotu-hotu. 17 Nia nalo lia ne'e sia hotu-hotu atu nato'o saa mak Maromak mako'an Yesaya nakerek kedan hori uluk na'ak,
“Nia nadi'ak nola itakaan moras.
Nia moos natiu nola itakaan susar.”d
Ema mak nakara tuir Yesus, musti tuir tebe-tebes
18 Nunia hotu, Yesus naree ema lear mai nalik Nia. Nia naruka Niakaan maktuir sia na'ak, “Mai ita hodi bero baa debu balu baa.”
19 Sia atu baa, ema ida mai baa Yesus. Ema nia, manorik ukun Yahudi. Nia dale baa Yesus na'ak, “Ama Manorik! Ama atu baa nabee dei, ha'u atu ktuir Ama!”
20 Mais Yesus nataa na'ak, “Di'ak! Mais manoin nune'e. Ema hotu-hotu noo siakaan hein fatin. Asu fuik fila baa kuak. Manu ai leten fila baa knuuk. Mais Ha'u ne'e, Ema Raiklaran Isin Nosi Lale'an. Ha'u la koo uma atu kfila baa. Kluni bodik ulun moos, la koo.”
21 Hotu ema ida seluk mak tuir Yesus mai nusu na'ak, “Ama Boot! Ha'u moos kakara tuir Ita Boot, mais habusik ha'u kfila baa babilan ema matas sia lai. Kalo ha'ukaan ama mate ona, foin ha'u kfila mai tuir Ita Boot.”
22 Mais Yesus nataa na'ak, “Nune'e! Mabusik ema mak la fiar Na'i Maromak babilan siakaan ema maten. Kalo makara tuir Ha'u, tuir kedas ona!”
Yesus nakahik anin dadurus to'o nakmatek
23 Nunia hotu, Yesus sa'e baa bero laran bele-bele no Niakaan maktuir sia. 24 La'o ti'an, Yesus toba. La kleur, anin dadurus mai. Laloran boot moos mai to'o wee tama bero laran. 25 Naree nunia, maktuir sia baa fanun nadeer Yesus na'ak, “Ama Boot! Hadeer! Mai sori ami lai! Ita atu mate mout mak ne'e ona!”
26 Mais Yesus katak na'ak, “Hoi! Tan saa emi hata'uk nune'e? La fiar baa Ha'u ka?” Hotu Nia nadeer, nakahik anin no laloran nia na'ak, “Manawa ona!” Laloran no anin nia moos nakmatek kedas.
27 Naree nunia, Yesus Niakaan maktuir sia blaar nodi na'ak, “Nia ne'e see?! Oin nunabee to'o Nia bele naruka anin no laloran tuir Niakaan hakara!?”
Yesus nadi'ak nola ema na'in rua mak diabu tekar
28 La kleur falik, sia to'o debu balu baa, iha ema Gadarae rain. Iha nia, noo ema na'in rua mak diabu tekar. Sia nein iha fatuk kuak mak ema maten fatin. Sia krakat aat basuk, to'o la noo ema ida moos naksakar aan la'o tuir fatin nia. Baa oras ema rua nia naree Yesus mai, 29 sia nahii na'ak, “Hoi! Na'i Maromak Oan! Tan saa O mai koen ami? Oras atu kastikar ami, sei la to'o dauk!”
30 La dook nosi nia, fahi lear no'i sosok rai, buka haan. 31 Diabu nia sia nusu baa Yesus na'ak, “Maruka ami tama baa fahi nia sia dei!”
32 Yesus moos naruka diabu nia sia na'ak, “Baa ona!” Hotu diabu nia sia sai nela ema na'in rua nia, tama baa fahi nia sia. Fahi nia sia hotu-hotu bula, nalai lakon tuun nosi foho nia, tama baa debu boot laran. Hotu mate mout.