Yesus boi nola Niakaan maktuir na'in sanulu resin rua
10
Nunia hotu, Yesus bolu nola maktuir na'in sanulu resin rua atu libur malu. Nia latan beran baa sia atu te'ur sai diabu, nodi nadi'ak nola ema moras oi-oik. 2 Maktuir na'in sanulu resin rua mak Nia boi nia atu dadi baa Niakaan klosan, siakaan naran mak ne'e:Mak dala uluk, naran Simon (nia mak ema temi na'ak ‘Petrus’),
no alin, naran Andreas.
Hotu Yakobus
no alin, naran Yohanis (sia na'in rua nia, Sebadeus oan).
3 Noo tenik Filipus
no Bartolomeus.
Hotu Tomas
no Mateus (ema maksisi bea).
Hotu Yakobus (Alfeus oan)
no Tadeus.
4 Hotu Simon (mak tuir partee politik Selot)a
no Yudas Iskariot (nosi ikus, nia mak fa'an lakon Yesus).
Yesus solok Niakaan maktuir sia
5-6 Nunia hotu, Yesus solok Niakaan maktuir na'in sanulu resin rua nia nodi naruka na'ak, “Ha'u ksolok emi baa itakaan ema Yahudi sia tan sia wa'in la tuir Na'i Maromak dalan. Sia hanesan bibi malae mak la'o sala dalan. Tan lia nia, emi musti baa sia dei. Keta baa ema seluk nu'u ema Samaria. 7 Baa katak ha'ak, ‘Na'i Maromak Niakaan oras to'o ti'an, nebee ema hotu-hotu bele tama dadi baa Niakaan hutun-renu.’ 8 Baa hadi'ak hola ema moras, halo ema maten moris nikar, hadi'ak hola ema moras funi mea, no te'ur sai diabu sia. Na'i Maromak foo wa'in baa emi ti'an, mais Nia la nusu nikar sa-saa. Tan lia nia, oras ne'e emi musti baa foo wa'in baa ema seluk sia, mais lalika husu hikar sa-saa. 9 Baa la'o tanan dei. Lalika hodi osan, 10 bakae, tais selu, kaso, lale ai kno'an. Tan ema musti foo baa ema serwisu, saa mak sia fatan simu.b
11 Kalo emi tama baa kota, lale baa leo, buka ema mak nakara simu emi. Hotu hein iha nia to'o la'o hela. 12 Kalo tama baa ema uman, hasee sia ha'ak, ‘Dame!’ 13 Kalo sia simu emi di'a-di'ak, hakro'an nebee Na'i Maromak natuun matak-malirin baa sia. Mais, kalo sia la simu emi, Na'i Maromak moos la natuun matak-malirin baa sia. 14 Kalo ema la no'uk nanono baa emi, sai hosi uma nia, lale kota nia. Hotu hisik hela ahukresan hosi emikaan ain atu dadi baa tadak na'ak, sia na'in nataa du'uk baa siakaan hahalok.c 15 Nosi ikus, kalo Na'i Maromak natuun kastikar baa ema raiklaran ne'e, nanis Nia natuun kastikar todan baa ema Sodom no ema Gomora mak uluk aat basuk nia. Mais rona, tan Ha'ukaan dalen ne'e, tebes no loos! Na'i Maromak atu natuun kastikar todan liu tan tenik baa ema mak la no'uk simu emi.”d
Yesus katak baa Niakaan maktuir sia na'ak, sia atu netan susar
16 “Hanoin! Ha'u ksolok emi hanesan Ha'u ksolok bibi malae baa asu fuik krakat leet. Tan lia nia, emi musti hodi kakutak hanesan samea matenek. Emikaan neon moos musti loos hanesan manu lakateu sina mak la natene buka lia.e 17 Sintidu, tan ema atu naloot emi hanesan asu fuik krakat tata no'o bibi malae. Sia atu dada nodi emi baa moon-metan fatin. Sia moos atu ta'e emi iha uma hamulak laran sia. 18 Sia atu dada nodi emi baa hataa gubernur no na'in sia tan tuir Ha'u. Mais emi musti hodi leet nia atu katak baa sia hosi Ha'u. Hodi nunia, ema mak la natene Na'i Maromak moos bele rona lia nosi Ha'u. 19 Baa oras sia dada nodi emi nunia, emi lalika hata'uk ha'ak, ‘Ha'u atu kdale ka'ak saa? Ha'u atu kataa ka'ak saa?’ Lalika hata'uk nunia, tan to'o baa niakaan oras, emikaan Ama iha lale'an atu katak lia saa mak emi musti dale. 20 Baa oras nia, saa mak emi dale, la nahabut baa emi du'uk, mais nahabut baa Na'i Maromak Kmalar Lulik mak atu nanorin emi atu dale saa.f
21 Emi lei haree! Kalo noo ema mak fiar baa Ha'u iha uma ida laran, niakaan maun-biin-alin du'uk atu buka dalan no'o nia. Kalo oan fiar, niakaan ama mak buka dalan no'o nia. Kalo inan-aman fiar, siakaan oan du'uk mak buka dalan no'o sia.g 22 Lei haree! Ema hotu-hotu atu hirus emi tebe-tebes tan tuir Ha'u. Mais ema mak naterus aan bei-beik to'o mohu, Na'i Maromak atu sori nia.h 23 Kalo ema naloot emi iha kota ida, hi'it aan halai baa kota seluk. Rona, tan Ha'ukaan dalen ne'e, tebes no loos! Ha'u ne'e, Ema Raiklaran Isin nosi lale'an. Emi sei la la'o hasiri mohu dauk kota hotu-hotu iha rai Isra'el ne'e, mais Ha'u kmai kikar ti'an. Nunia tebes!
24 Kalo ema la nakara ema manorik ida, sia moos la nakara niakaan maktuir sia. Kalo ema la nakara ema boot ida, sia moos la nakara niakaan ema serwisu sia.i 25 Kalo maktuir nanorin aan to'o matenek manesak no niakaan ema manorik, nia noran to'o ti'an. Kalo ema serwisu nanorin aan to'o matenek manesak no niakaan ulun, nia moos noran to'o ti'an.
Hanoin! Kalo ema dale nahaat uma ida na'in na'ak, ‘O ne'e Baalsebul mak diabu ulun!’ ema uma laran moos nanis netan naran aat liu tan.”j
Yesus katak baa Niakaan maktuir sia nebee keta hata'uk ema raiklaran
26 Hotu Yesus dale baa Niakaan maktuir sia na'ak, “Lalika hata'uk baa ema mak sakar emi. Nosi ikus, lia mak oras ne'e sei subar, ema hotu-hotu atu natene.k 27 Lia mak ha'u kanorin baa emi mesan, emi musti katak baa ema hotu-hotu. Lia mak Ha'u katak no-nook baa emi, emi musti katak hasirin fatin hotu-hotu. 28 Keta hata'uk ema raiklaran. Masik sia bele no'o emi moos, sia la bele no'o emikaan kmalar. Musti hata'uk Na'i Maromak dei, tan Nia mesan mak noo beran atu natama emikaan isin no kmalar baa ha'i naraka. 29 Emi musti hakbiit neon. Ema fa'an manu harek nodi folin kmaan basuk. Mais la noo manu ida kois mak monu mate, kalo emikaan Ama iha lale'an la foo leet. 30 Emikaan Ama iha lale'an moos lituk emi to'o lia mak ki'ik oan basuk sia. Emikaan fuuk lahon iha ulun moos, Nia sura nola ti'an. 31 Dadi keta hata'uk! Na'i Maromak nafoli emi liu nosi manu harek nia sia.”
Yesus katak baa Niakaan maktuir sia nebee keta moe katak sain lia Yesus
32 Nunia hotu, Yesus dale tenik na'ak, “Ema mak nakberan aan katak sain Ha'u iha ema lear oin iha raiklaran ne'e, Ha'u moos atu katak sain nia iha Ha'ukaan Ama oin iha lale'an ka'ak, ‘Ema ne'e, Ha'ukaan ema.’ 33 Mais ema mak neli Ha'u iha ema lear oin na'ak, nia la natene Ha'u, nosi ikus Ha'u moos atu katak baa Ha'ukaan Ama iha lale'an ka'ak, ‘Ha'u la katene ema nia.’”l
Yesus katak baa Niakaan maktuir sia na'ak, Niakaan mamain atu nalo ema sakar malu
34 Hotu Yesus dale na'ak, “Keta haneo ha'ak, Ha'u kmai kodi dame baa raiklaran. Lale. Ha'u kmai atu kalo ema raiklaran sakar malu. 35 Ha'u kmai tuir saa mak Maromak mako'an dale kedan hori uluk na'ak,
‘Oan mane sakar aman,
oan feto sakar inan,
oan feen sakar banin feto,
36 tan ema uma laran du'uk atu funu malu.’m
37 Ema mak nakara tuir Ha'u tebe-tebes, musti nadomi Ha'u liu hotu-hotu: liu nosi inan no aman, no liu nosi oan sia. Kalo lale, nia la fatan dadi baa Ha'ukaan ema. 38 Ema mak nakara tuir Ha'u, mais la no'uk natiu susar, nia moos la bele dadi baa Ha'ukaan ema.n 39 Ema mak nadi'a aan mate tan tuir Ha'u, nia atu netan moris nima-nimak no Na'i Maromak. Mais ema mak moris bodik isin lolon du'uk, niakaan moris atu lakon nunia dei!”o
Yesus katak baa Niakaan maktuir sia na'ak, Na'i Maromak atu selu nikar ema mak simu sia
40 Hotu Yesus dale na'ak, “Ema mak simu emi di'a-di'ak, sia moos simu Ha'u. Ema mak simu Ha'u, sia moos simu Maromak mak solok Ha'u.p 41 Kalo ema simu Maromak mako'an ida tan sia fiar na'ak mako'an nia tebe-tebes mai nosi Maromak, nosi ikus Na'i Maromak atu selu baa sia hanesan Nia selu baa mako'an nia. Kalo ema simu ema ida mak neon loos, tan sia fiar na'ak ema nia tuir Maromak hakaran, nosi ikus Na'i Maromak atu selu baa sia hanesan Nia selu baa ema loos nia. 42 Ema mak simu emi tan tuir Ha'u, Na'i Maromak nanis selu nikar baa sia. Rona! Ha'ukaan dalen ne'e, tebes no loos! Masik ema foo wee moon hemu fatik ida dei moos, Na'i Maromak la nalu'a.”