Yesus solok maktuir na'in hitu nulu resin rua
10
Nunia hotu, Yesus boi nola maktuir seluk sia. Sia na'in hitu nulu resin rua.a Hotu, Nia fa'e sia nalo na'in rua-rua atu baa uluk Nia, baa fatin mak Nia atu baa.
Lukas 10:1-24
2 Nia solok sia nodi na'ak, “Ema lear hanesan hare mak naktuuk ti'an. Hein loos ema serwisu mai ku'u. Tan baa nia, emi musti hamulak, husu baa Na'i Maromak tu'an Niakaan ema serwisu, nebee sia baa nanorin ema atu tuir Ha'u. Tan ema wa'in mak nakara tuir. Mais ema mak serwisu, la duun wa'in.b
3 Oras ne'e, emi baa ona! Ha'u ksolok emi atu serwisu baa ema lear. Mais hanoin! Emi ne'e, hanesan bibi malae oan mak laran di'ak. Oras ne'e, emi baa asu fuik leet.c
4 Emi lalika hodi osan, tais, lale, kaso resin iha dalan. Keta soe butan leet hodi hasee ema iha dalan.
5-8 Kalo tama baa leo ida, keta lori hosi uma baa uma. Kalo ema simu emi iha uma ida, hein iha nia dei, da-dau to'o la'o hela leo nia. Husu nebee Na'i Maromak natuun matak-malirin baa ema uma laran nia. Kalo uma na'in ida simu emi, nanis Na'i Maromak natudu laran di'ak baa ema nia. Mais kalo la no'uk simu emi, habusik Na'i Maromak natudu laran di'ak baa emi dei. Kalo tama baa uma ida, lale leo ida, haa-hemu saa dei mak sia foo. Simu hodi neon di'ak, tan fatan sia foo baa emi, atu selu emikaan kolen.d 9 Hadi'ak hola siakaan ema moras. Katak baa sia ha'ak, ‘Na'i Maromak oras to'o ti'an atu babilan Niakaan hutun-renun.’
10 Mais iha leo seluk, kalo ema la no'uk simu emi, baa hariik iha leo nia dalan, hodi katak ha'ak, 11 ‘Hoi, ema leo ne'e! Rona! Ami mai hodi Maromak Manfatin bodik emi, mais emi la titu netik. Oras ne'e, ami hisik hela ahukresan leo ne'e hosi amikaan ain, atu dadi baa tadak na'ak, emi hatiu dinu du'uk. Mais hanoin di'a-di'ak! Na'i Maromak oras to'o ti'an atu babilan Niakaan hutun-renun!’”e
12 Hotu Yesus katak tenik baa maktuir na'in hitu nulu resin rua nia na'ak, “Hanoin ema kota Sodom siakaan a'aat. Mais Ha'u katak nune'e: Kalo rai falu fila, Na'i Maromak nanis kastikar ema mak dudu emi, todan liu tan nosi Nia kastikar ema Sodom!”f
Ema mak la no'uk simu Yesus
13 Hotu Yesus katak tu'an tenik na'ak, “Hoi! Ema leo Korasing no ema leo Betsaida. Sintidu! Dinu atu kona emi! Ha'u kase'i lia kasalak basuk oi-oik iha emikaan oin ti'an, mais emi la fiar kois. Tuir loos, emi ne'e, ema Yahudi mak katak sain ha'ak emi hatene Maromak. Mais kalo lia kasalak basuk mak Ha'u kase'i iha emikaan leo, tadu iha leo Tirus no leo Sidon, nanis ema leo rua nia la'o nela siakaan salan atu tuir Na'i Maromak. Masik sia lahoos ema Yahudi, sia nanis tau tais neon susar, nodi tau ahukresan baa ulun dadi tadak na'ak, sia neon aat tan siakaan salan.h 14 Tebes! Haree dei! Nosi ikus Na'i Maromak nakotu ema hotu-hotu lian, Nia kastikar ema Tirus no ema Sidon kmaan liu nosi Nia kastikar emi.
15 Hoi, ema leo Kapernaum! Sintidu! Keta haneo Na'i Maromak atu foti sa'e emi, tama baa lale'an. Lale! Na'i Maromak atu soe emi, tama baa naraka!”i
16 Hotu Yesus katak tenik baa maktuir sia na'ak, “Hanoin di'a-di'ak! Ema mak rona emi, sia moos rona Ha'u. Ema mak dudu emi, sia moos dudu Ha'u. Liu tan tenik, sia dudu Maromak mak solok Ha'u kmai iha raiklaran ne'e.”j
Yesus Niakaan maktuir na'in hitu nulu resin rua mai nikar
17 Nunia hotu, Yesus Niakaan maktuir na'in hitu nulu resin rua niak moos baa, nalo tuir Niakaan haruka. Oras sia mai nikar, sia neon boot. Sia katak baa Yesus na'ak, “Maka'as tebes Ama! Oras ema nusu ami hadi'ak hola ema mak diabu tekar, ami te'ur diabu nia hodi Ama naran. Diabu rona baa ami, hotu sia sai! Maka'as resik Ama!”
18 Rona sia dale nunia, Yesus nataa na'ak, “Tebes! Baa oras emi halo nunia, Ha'u karee Na'i Maromak soe diabu ulun nosi lale'an, hanesan mameran laka karuk-kwana nosi kalo'an. 19 Hanoin! Diabu ulun nia, itakaan funu mak noo beran. Mais Ha'u kfoo beran baa emi hodi hatohar niakaan beran nia. Kalo emi sama kona samodo mak noo raso, emi la kona sa-saa. Kalo emi sama kona sakunar, emi la kona sa-saa. Tan la noo saa ida mak bele nalo dinu kona emi.l 20 Kalo emi neon boot tan diabu rona baa emi, lia nia di'ak. Mais lia nia, lia ki'ik! Di'ak liu, emi neon boot tan Na'i Maromak nakerek nola emikaan naran nebee emi dadi Niakaan ema mak tama baa lale'an.”
Yesus neon boot
21 Baa oras nia, Maromak Kmalar Lulik nalo Yesus neon boot. Hotu Nia tonu-naboot Na'i Maromak na'ak, “Ama! Ama mak Na'in Boot iha lale'an no raiklaran. Ha'u kamulak sera dodan baa Ama, tan Ama subar lia ne'e bodik ema mak naneo aan matenek no mak nahaas aan. Mais Ama nalore bodik ema ki'ik no ema mak naraik aan. Tebes, Ama! Tan lia nia mak kona baa Ama neon!”
22 Hamulak notu nunia, Yesus katak baa ema lear na'ak, “Rona! Ha'ukaan Ama iha lale'an latan beran hotu-hotu baa Ha'u. Mais ema la natene Ha'u ne'e, see. Ha'ukaan Ama mesan mak natene. Ema moos la natene Ha'ukaan Ama nia, see. Ha'u mak katene. Ha'u moos foo katene baa ema mak Ha'u kboi.”m
23 Dale hotu baa ema lear nunia, Yesus se'i oin baa maktuir sia, nodi katak baa sia mesan na'ak, “Emi sotir tebes, tan emi bele haree Na'i Maromak beran ti'an. 24 Na'in sia no mako'an uluk sia beer basuk naree saa mak emi haree, mais la bele. Sia moos beer basuk rona saa mak emi rona, mais la bele.”
Ema Samaria mak laran maluak
25 Baa dala ida, ema matenek ukun Yahudi ida nariik atu buka Yesus ain. Nia nusu Yesus na'ak, “Ama Boot! Ama Boot hanorin ha'u lai! Ha'u kmusti kalo saa, nebee katene ha'u kbele moris kamutuk ko Na'i Maromak iha lale'an to'o nima-nimak?”
Lukas 10:25-42
26 Yesus nataa na'ak, “Bei Musa nakerek saa nosi lia ne'e? Ita hatene saa hosi lia ne'e?”
27 Ema nia nataa na'ak, “Bei Musa nakerek na'ak:
‘Ita musti beer Maromak, mak itakaan Na'in, liu hotu-hotu.
Ita musti hadomi Nia nohuun,
Ita musti haka'as aan atu tuir Niakaan hakaran
no haka'as aan atu hatene di'a-di'ak Nia.’
Hakerek ida tenik na'ak, ‘Ita musti hadomi itakaan maluk, hanesan ita hadomi itakaan isin lolon du'uk.’”n
28 Yesus nataa na'ak, “Tebes Ama! Kalo o halo tuir nunia, o bele moris nima-nimak mo Na'i Maromak.”o
29 Mais ema nia nalo aan nu'u ema matenek. Nia nusu tenik Yesus na'ak, “Mais ha'ukaan ‘maluk’ nia, mak see?”
30 Yesus nataa na'ak, “Nune'e! Ha'u atu katak lia hatetek ida, nebee ama boi ema ida nabee mak dadi ‘maluk’ tebe-tebes. Lia nia nune'e: Baa loron ida, noo ema Yahudi ida la'o nosi kota Yerusalem, tuun baa Yeriko. Mais teki-tekis, ema madauk teen sia mai nadau naloot nia. Sia ta'e nia, nadau nola niakaan osan no tais sia hotu-hotu. Sia soe lerek nia iha dalan tehen, hotu la'o nela nia kre'is mate.
31 Mais la hatene falik, na'ilulik Yahudi ida la'o tuir nia. Nia titu-naree ema kanek nia toba iha dalan tehen, mais nia la nanawa atu tulun nia. Nia sees, la'o liu dei. 32 La kleur falik, ema ida seluk moos la'o tuir nia. Ema nia nosi hunun Lewi, mak serwisu iha Na'i Maromak Uma Hamulak Huun. Nia titu-naree ema nia toba iha dalan tehen. Nia moos nare'is aan baa naree, mais la tulun. Nia sees, la'o liu dei.
33-34 La kleur falik, ema ida nosi rai Samaria liu iha nia nodi kuda keledai. Ema Yahudi la nafolin ema Samaria. Mais baa oras ema Samaria nia titu-naree ema mak kona hadau nia, nia neon monu baa ema nia. Nia mai nare'is aan, hotu tulun ema nia. Nia fui anggor ween nodi namoos kanek, hotu tau mina baa. Nia falun di'a-di'ak, hotu naka'u sa'e ema kanek nia baa kuda keledai leten, nodi baa kota. Nia natama kedan ema nia iha uma ida, nodi bali nia di'a-di'ak.p
35 Baa awan, ema Samaria nia selu kedan osan murak tomak rua baa uma na'in,q nodi katak na'ak, ‘Ama hodi osan ne'e bali di'a-di'ak ema ne'e to'o di'ak. Kalo osan ne'e la to'o, modi heik okaan lai. Baa oras ha'u kfila mai, foin ha'u kselu kikar.’”
36 Yesus Niakaan lia hatetek to'o nia dei. Hotu Nia nusu ema matenek ukun nia na'ak, “Tuir ama, ema nabee mak dadi ‘maluk’ tebe-tebes bodik ema mak kona hadau ohin nia?”
37 Ema nia nataa na'ak, “Nanis ema mak neon monu baa ema kanek nia.”
Yesus na'ak, “Tebes! Surak o moos malo tuir nunia.”
Yesus iha Marta no Maria uman
38-40 Nunia hotu, Yesus no Niakaan maktuir sia la'o liu baa Yerusalem. Sia tuli iha leo ida. Iha leo nia, noo feto biin-alin na'in rua, naran Marta no Maria. Oras sia naree Yesus, Marta mai nusu baa Yesus nebee nein sa-sala lai iha siakaan uman. Yesus moos nakara.
Hotu Yesus tuur nodi nanorin ema iha siakaan uma. Baa oras nia, Marta nalau aan nadi'a haa-hemu iha kotuk baa. Mais alin Maria tuur nare'is aan baa Yesus ain, nanono Nia dale. La kleur, Marta tama mai nakmuuk baa Yesus na'ak, “Ama! Nu'unabee ti'an! Ha'u kalo aan kadi'a haa-hemu, mais ha'ukaan alin tuur di'a-di'ak iha ne'e dei. Ama maruka nia serwisu tuan ha'u iha kotuk nebaa lai!”r