2 Rona nunia, Yesus bolu nola lawarik oan ida, hotu natuur baa siakaan klaran. 3 Hotu Nia dale na'ak, “Rona, tan Ha'ukaan dalen ne'e, tebes no loos! Ema mak nakara dadi baa Na'i Maromak eman, nia musti filas neon no laran, nebee dadi hanesan lawarik oan mak neon loos.^b 4 Ema mak naraik aan hanesan lawarik oan ne'e, ema nia mak boot kaliuk iha Na'i Maromak oin. 5 Kalo noo ema simu ema ki'ik tan fiar baa Ha'u, hanesan lawarik oan ne'e, ne'e na'ak, ema nia moos simu Ha'u.”

6 Hotu Yesus katak tenik baa sia na'ak, “Kalo ema sasu'at ema ki'ik ida nebee nia tuir dalan sala to'o la fiar tenik baa Ha'u, ema nia musti sintidu! Di'ak liu kesi fatuk boot ida^c baa niakaan kakorok, hodi baa tonan mout baa tasi laran. 7 Raiklaran ne'e nanis fatin mak nakonu dinu, tan noo lia wa'in mak nalo ema to'o monu baa sala. Mais ema mak netan dinu kaliuk, ne'e mak, ema mak nase'i dalan aat to'o ema seluk nalo sala.

8 Kalo malo sala modi okaan liman, lale, okaan ain, taa kotu baa dei! Di'ak liu o tama lale'an modi liman sorin dei, lale, ain sorin dei, nosi sia soe o baa ha'i naraka modi liman rua no ain rua.^d 9 Kalo o malo sala modi matan, sukit sai dei! Di'ak liu o tama lale'an modi matan sorin dei, nosi sia soe o baa ha'i naraka modi matan rua.”^e

10 Hotu Yesus dale tenik na'ak, “Sintidu! Keta to'o emi titu haraik ema ki'ik hanesan lawarik ne'e sia, tan Na'i Maromak Niakaan makbukar lale'an daka sia. Baa oras nabee dei, makbukar lale'an nia sia bele tama baa Na'i Maromak atu nasara siakaan lia.

11-13 Rona mai. Noo ema makbalin ida, niakaan bibi malae matan atus ida. Baa loron ida, bibi malae matan ida lakon. Emi haneo makbalin nia musti nalo saa? Nia nanis la'o nela niakaan bibi malae matan siwi nulu resin siwi nia iha foho leten, baa buka bibi malae matan ida mak lakon nia.^f

Netan nikar ti'an, makbalin nia neon di'ak tebes naree bibi malae matan ida mak lakon nia, liu nosi nia naree niakaan bibi malae matan siwi nulu resin siwi mak la lakon. [Ha'u ne'e, Ema Raiklaran Isin nosi lale'an. Ha'u kmai atu sori ema mak lakon nosi dalan moris loos.]^g 14 Masik mak lakon nia, lawarik ki'ik oan ida dei moos, Ha'ukaan Ama iha lale'an la nakara.”

15 Hotu Yesus dale tenik na'ak, “Kalo okaan maluk nalo sala baa o, o du'uk mak musti baa masoru nia. Emi na'in rua mesan ti'an lai, foin katak niakaan salan. Kalo nia rona o, emi dame malu ti'an.^h 16 Mais, kalo la no'uk rona, baa mola mamaluk ida-rua seluk. Hotu baa bele-bele hasoru ema nia, nebee dale tenik ho nia. Hakerek Moon na'ak, ‘Iha lia ida, musti noo ema na'in rua-tolu mak naree nodi matan du'uk, foin bele simu siakaan dale.’ⁱ 17 Mais, kalo ema nia sei la no'uk rona emi, baa katak baa fukun sarani sia. Kalo nia la no'uk rona tenik, filak nia baa ema mak la natene Na'i Maromak. Kalo lale, filak nia baa ema matak, hanesan ema maksisi bea sia.

18 Ha'ukaan dalen ne'e, tebes no loos! Saa mak emi hakahik iha raiklaran, Na'i Maromak nakahik ti'an iha lale'an. Saa mak emi habusik iha raiklaran, Na'i Maromak nabusik ti'an iha lale'an.^j

19 Ha'u kdale tebes tenik ka'ak, masik emi na'in rua dei hamulak hodi neon ida, Ha'ukaan Ama iha lale'an atu foo saa mak emi husu. 20 Kalo ema libur malu tan Ha'u, masik na'in rua-tolu dei moos, Ha'u kamutuk ko sia iha nia.”

21 Yesus dale notu nunia, Petrus mai nusu baa Nia na'ak, “Ama Boot, ha'u atu kusu oan ida. Kalo ha'ukaan belun nalo sala rua-ruan baa ha'u, ha'u kmusti foo pardua baa nia isin hira? To'o isin hitu ka?”

22 Yesus nataa na'ak, “Lale! Musti foo pardua baa belun isin hitu dala hitu nulu^k to'o la bele sura hola.^l 23 Tan Na'i Maromak moos atu sura nunia, hanesan na'in iha lia hatetek ne'e. Rona mai! Noo na'in ida mak nakara sura tusan nosi eman serwisu sia. 24 Nia naruka ema baa bolu nola ema serwisu ida mak natusan maliun-maliun baa nia.^m 25 Mais nia la bele selu nola tusan nia. Rona nola nunia, na'in naruka na'ak, ‘Baa fa'an ema ne'e no feen-oan sia hotu-hotu, dadi baa ata. Hotu fa'an niakaan naha sia hotu-hotu, hodi selu niakaan tusan.’

26 Rona nola nunia, ema serwisu nia nakni'a iha na'in oin nodi nakro'an na'ak, ‘Adeei ama! Tulun foo leet oan ida baa ha'u lai, foin ha'u kselu moos ha'ukaan tusan.’ 27 Rona nola nunia, na'in neon monu. Nia moos no'as mohu tusan nia sia hotu-hotu, hotu nabusik ema serwisu nia.

28 Mais baa oras ema serwisu nia sai, nia nasoru nola belun ida mak natusan oan ida baa nia. Nia kohi nola kedan belun nia, misak baa kakorok nodi nakbehek na'ak, ‘Hoi! Selu kedan okaan tusan oras ne'e ona!’ⁿ

29 Rona nola nunia, belun nia moos nakni'a nodi nakro'an na'ak, ‘Adeei belu! Tulun foo leet oan ida baa ha'u lai, foin ha'u kselu moos ha'ukaan tusan baa o.’

30 Mais ema nia na'ak, ‘La bele! Musti selu kedan!’ Hotu nia natama belun baa bui, to'o belun selu mohu niakaan tusan. 31 Baa oras na'in eman seluk sia rona saa mak dadi ti'an nia, sia noran susar. Hotu sia baa nasara kedan baa na'in. 32 Rona nola nunia, na'in bolu nola ema mak la natene aan nia. Nia de'an na'ak, ‘Hoi ema aat! O musu ha'u nebee kadomi o, hotu ha'u ko'as mohu okaan tusan hotu-hotu. 33 Mais, tan saa o la madomi okaan belun hanesan ha'u kadomi o nia?’ 34 Na'in krakat to'o naruka dada hatama ema nia baa bui, nebee ema tonan naloot to'o nia selu mohu niakaan tusan sia hotu-hotu.”

35 Hotu Yesus taka lia hatetek nia nodi katak na'ak, “Ha'ukaan Ama iha lale'an moos atu sura nunia, kalo emi la halu'a lakon emikaan belun salan.”