Ema Nasaret sia la simu Yesus
6
Hotu, Yesus no Niakaan maktuir sia fila nikar baa Yesus Niakaan leo Nasaret. 2 Loron hamulak to'o, ema wa'in baa namulak. Yesus moos tama baa uma hamulak atu nanorin. Baa oras nanorin, ema nia sia blaar nodi tonun na'ak, “Ema ne'e matenek liu! Nia moos no beran! Oin nunabee Nia bele nunia? 3 Tuir loos, Nia ne'e badaen ai dei. Ita hatene Niakaan inan mak Maria no Niakaan alin sia mak Yakobus, Yoses, Yudas no Simon. Nia moos no alin feto. Ita hatene malu, tan ita leo ida!” Masik nunia moos, sia sei hirus Yesus to'o la no'uk rona tenik baa Nia.4 Natene nola nunia, Yesus katak na'ak, “Tebes! Maromak mako'an ida baa iha nabee dei, ema nakneter nia. Mais niakaan ema sia iha leo du'uk la nakneter nia.”a
5-6a Yesus blaar tan ema Nasaret sia la no'uk fiar baa Nia. Tan lia nia, Nia la natudu beran wa'in iha leo nia. Nadi'ak nola loos ema moras ida-rua dei.
Yesus solok Niakaan maktuir na'in sanulu resin rua
6b Hotu, Yesus tuur sura leo mak kre'is nia sia nodi nanorin ema. 7 Nia moos bolu nola Niakaan maktuir na'in sanulu resin rua nodi solok sia na'in rua-rua baa keke lema Na'i Maromak Manfatin. Nia moos foo beran baa sia atu nodi te'ur sai diabu. 8-9 Nia naruka sia na'ak, “Emi musti la'o tanan dei. Lalika hodi bakae, osan no kakaluk. Hodi mesan kaso ain no faru tahan ida, no kaer hodi kno'a ida dei. 10 Kalo ema simu emi iha siakaan uma, hein iha nia to'o la'o. 11 Mais, kalo emi to'o fatin ida, hotu ema la no'uk simu emi, la'o hela fatin nia hodi katak baa sia ha'ak, ‘Tan emi la ho'uk rona Na'i Maromak Manfatin, ami hisik hela ahukresan leo ne'e hosi amikaan ain atu dadi tadak na'ak, emi na'in du'uk mak hatiu dinu.’”b
12 Hotu sia baa keke lema Na'i Maromak Manfatin nodi katak baa ema, nebee sia nanawa nalo sala nodi moris tuir Na'i Maromak hakaran. 13 Sia te'ur sai diabu. Sia kose mina baa ema moras ulun nodi namulak atu nadi'ak nola sia. Hotu, ema moras sia moos di'ak.c
Ema no'o Yohanis Mak Sarani Ema
14 Baa oras nia, ema nosi fatin hotu-hotu natene Yesus ti'an. Lia nosi Yesus beran nia moos to'o Na'i Herodes tilun ti'an. Noo ema mak na'ak, “Yesus ne'e, Yohanis Mak Sarani Ema. Yohanis mate ti'an, mais moris nikar iha Yesus isin lolon. Tan baa nia, Yesus bele nalo tadak blaar oi-oik.”
15 Mais noo ema balu mak na'ak, “Lale! Yesus ne'e, Maromak mako'an Elia hori uluk. Nia mak moris nikar iha Yesus isin lolon.” Balu tenik na'ak, “Lahoos nunia! Yesus ne'e, Maromak mako'an foun ida, hanesan mako'an uluk sia.”d
16 Mais oras Na'i Herodes rona lia nia sia, nia nalore na'ak, “Yesus ne'e, nanis Yohanis. Uluk ha'u karuka ema taa kotu ulun, mais oras ne'e, nia moris nikar!”
17-18 Uluk Na'i Herodes naruka nunia, tan nia nalo lia boot no Yohanis. Lia nia, nune'e: Uluk na'i Herodes nola nikar alin Filipus feen, naran Herodias. Mais tuir loos, Filipus no Herodias la soe malu dauk. Tan lia nia, Yohanis nakahik Na'i Herodes bei-beik na'ak, “Ama Na'i! Ita Boot la bele hola hikar itakaan alin feen. Lia nia nakur naksoit itakaan adat Yahudi!” Mais, Na'i Herodes nola luku dei. Hotu, nia moos naruka ema kohi nola Yohanis natama baa bui.e
19 Tan Yohanis nakahik sia bei-beik, Ina Na'i Herodias moos hirus to'o atu no'o Yohanis. Mais la noo leet, tan Na'i Herodes natama Yohanis iha bui ti'an, 20 no naruka sondadu sia nebee daka metin nia.
Na'i Herodes du'uk nakerat Yohanis. Nia natene na'ak, Na'i Maromak mak naruka Yohanis mai. Liu tenik, Yohanis ne'e, ema di'ak no loos. Na'i Herodes du'uk nakara rona Yohanis. Mais isin ida-idak, nia moos noran la di'ak rona Yohanis dalen.
21 Nosi ikus, Ina Na'i Herodias netan leet no'o Yohanis. Loron nia, sia nadahur Na'i Herodes loron moris nodi namata ema boot sia mai hotu. Ema nia sia, mak makaer ukun, sondadu ulun, no fukun rai Galilea tomak. 22 Oras sia nadahur, Ina Na'i Herodias oan feto tama bidu. Nia bidu furak lo-loos to'o Na'i Herodes no bainaka sia neon di'ak tebes. Tan baa nia, Na'i Herodes bolu nola oa nia hotu katak na'ak, “Oa! O makara saa, katak mai! Ha'u atu kfoo baa o! 23 Masik o musu ha'ukaan fohorai ne'e fa'e rua moos, ha'u nanis foo. Karai aan kodi lale'an no raiklaran, kalo mamenon ne'e.”
24 Hotu, oa feto nia baa nusu inan na'ak, “Ina! Ina nakara ha'u kusu saa baa Ama Herodes?”
Hotu, inan nataa na'ak, “Aaa! O baa musu Yohanis ulun dei!”
25 Hotu, oa nia baa nikar Na'i Herodes, hotu katak na'ak, “Ama! Ha'u kusu Yohanis ulun. Tau baa bikan ida, hodi mai baa ha'u oras ne'e ona!”
26 Rona nola nunia, Na'i Herodes neon lakon kedan. Mais nia la bele dada nikar niakaan lia fuan nia, tan nia nameno ti'an, no ema wa'in moos rona ti'an. 27 Tan baa nia, Na'i Herodes naruka sondadu ulun ida baa taa kotu Yohanis ulun iha bui laran. 28 Taa nola Yohanis ulun ti'an, sia tau baa bikan ida, nodi mai foo baa oa feto nia. Oa nia simu nola, hotu foo baa inan. 29 Oras Yohanis niakaan maktuir sia rona nola na'ak ema taa kotu Yohanis ulun ti'an, sia moos mai nasai nola Yohanis maten nodi baa nakoi.
Lia Yohanis mate, nunia dei.
Yesus nahaan ema rihun lima resin
30 Baa loron ida, Yesus Niakaan maktuir sia mak Nia solok ti'an nia, fila nikar mai namutuk no Nia. Sia katak lia hotu-hotu mak sia nalo no nanorin ti'an. 31 Baa oras nia moos, ema wa'in la'o baa-mai buka Yesus, to'o Nia no Niakaan maktuir sia la noo leet atu naa. Naree nunia, Yesus katak baa Niakaan maktuir sia na'ak, “Mai ita baa fatin mamuk ida, nebee ita hanawa sala-sala lai.”
32 Hotu, sia sa'e bero baa buka fatin mamuk ida mak dook nosi leo nia.
33 Mais ema wa'in nia naree siakaan bero tuir debu boot tehen. Sia moos sai nosi leo laran, la'o tesi tuir rai maran, to'o uluk Yesus sia. 34 Oras Yesus sia tuun, ema wa'in nia nein ti'an. Naree nunia, Yesus neon monu, tan ema nia sia la natene atu nalo saa. Sia hanesan bibi malae mak la noo makdaka. Nia moos nanorin siaf 35-36 nosi loro natetu to'o loro malirin. Oras loro malirin ti'an, Yesus Niakaan maktuir sia katak baa Nia na'ak, “Ama! Di'ak liu, maruka ema wa'in ne'e baa sosa haan iha leo kre'is ne'e sia, tan haan la noo iha ne'e.”
37 Mais Yesus nataa na'ak, “Lalika! Emi mak hahaan sia dei!”
Mais sia nataa nikar na'ak, “Aikee! Kalo ami mak hahaan ema lear ne'e, ami musti hasai osan lear boot, hanesan ema kansera tinan ida!g Oin nunabee, ami bele hetan osan lear nunia?”
38 Mais Yesus nataa na'ak, “Emi baa buka lai, keta noo ema mak nodi bakae.”
Sia moos baa buka, hotu mai nikar katak baa Yesus na'ak, “Ami hetan loos tubi baluk lima no na'an tasi lolon rua.”
39 Hotu, Yesus naruka ema lear nia tuur naklibur baa hae fohon. 40 Sia moos tuur naklibur nunia. Klibur balu, ema na'in atus ida, balu tenik, na'in lima nulu.
41 Hotu, Yesus nola tubi baluk lima nia no na'an tasi lolon rua nia. Nia tanaat baa lale'an nodi nusu matak-malirin baa Na'i Maromak. Hotu, Nia tohi fa'e tubi nia, lolo baa maktuir sia, nebee sia fa'e nadaar baa ema hotu-hotu. Nunia moos, na'an tasi lolon rua nia. 42 Ema lear nia moos naa to'o bosu. 43 Sia naa notu ti'an, Yesus Niakaan maktuir sia libur nola haan resin sia, nakonu ko'e sanulu resin rua.
44 Ema lear nia bele tama na'in rihun lima. Nia, foin sura mane dei. Sei la sura feto no lawarik sia.
Yesus la'o iha wee leten
45 Hotu, Yesus naruka Niakaan maktuir sia sa'e bero, uluk Nia baa leo Betsaida iha debu boot balu baa. Mais Nia du'uk sei nein atu naruka ema lear nia fila. 46 Ema nia sia fila hotu ti'an, Nia sa'e baa foho leten atu namulak.
47-50 Kre'is kalan ona, Nia tuun nikar. Nia naree Niakaan maktuir siakaan bero to'o debu boot klaran ti'an. Mais sia fofer mate sala, tan sakar anin. Kre'is rai naroma, Yesus moos baa tuir sia. Mais, Nia la'o iha wee leten dei. Baa oras Nia atu tali'ur bero nia, maktuir sia naree Nia. Sia sarebak tekis, nodi nusu baa malu na'ak, “Hoi! Saa mak nia? Ema kmalar ka?!”
Mais Yesus katak baa sia na'ak, “Keta hata'uk! Ha'u ne'e Yesus!”
51 Hotu, Yesus sa'e baa bero laran. Anin moos nanawa kedan. Niakaan maktuir sia blaar hotu. 52 Sia foin naree Yesus nasai beran nodi nahaan ema rihun lima resin, mais sia sei la natene tebe-tebes Niakaan beran, tan siakaan neon no laran sei monas.
Ema moras iha leo Genesaret mai bele-bele baa Yesus
53 To'o debu boot balu baa, Yesus sia tuun, hotu kesi bero iha leo ida naran Genesaret. 54 Oras nia, ema wa'in naree, hotu sia nahii na'ak, “Hoi! Yesus mai ti'an!” 55-56 Sia moos nalai baa katak ema hotu-hotu iha leo laran. Rona nola nunia, ema natiu nodi mai siakaan ema moras sia.
Rona loos dei na'ak Yesus iha fatin ida, ema mai natoba lerek ema moras sia iha fatin nia. Tan sia naneo na'ak, “Surak koko loos Yesus farun ninin dei moos, ema moras di'ak kedas.”