Yesus Lia Di'ak
tuir
Yohanis
Yesus nia, see?
1
Uluk fohon, Na'i Maromak Manfatin iha kedan ti'an.Manfatin nia, manesak no Ema ida.
Nia namutuk no Na'i Maromak.
Nia du'uk moos Na'i Maromak.
2 Tebes. Hori uluk fohon,
Nia namutuk kedan no Na'i Maromak.
3 Na'i Maromak nodi Nia nase'i nola hotu-hotu.
La noo saa ida mak Nia la nase'i.
4 Nia, mak Moris Huun.
Nia moos, Kroman maksinak
naroma ema neon.
5 Kroman nia, naksinak nima-nimak,
to'o makukun moos la bele terus.
6 Noo ema raiklaran ida, naran Yohanis. Na'i Maromak solok niaa 7 atu foo natene nosi Kroman nia, nebee ema hotu-hotu bele fiar baa Nia.
8 Yohanis ne'e, lahoos Kroman nia. Mais Na'i Maromak solok nia mai atu katak baa ema nosi Kroman nia. 9 Tan Kroman nia, Kroman malolok mak mai baa raiklaran ne'e, atu naroma ema hotu-hotu neon.
10 Masik Na'i Maromak nodi Nia nase'i hotu-hotu moos, ema la natene Nia baa oras Nia mai nein iha raiklaran ne'e. 11 Niakaan ema sia moos la no'uk simu Nia. 12 Mais ema mak simu Nia nodi fiar baa Nia, Na'i Maromak foo beran baa sia atu dadi baa Niakaan oan. 13 Sia dadi baa Na'i Maromak oan, la manesak no ema nahoris oan. Lahoos tan mane ida beer netan husar-binan. Lale. Sia dadi baa Na'i Maromak oan, tan Nia du'uk mak foo moris nunia baa sia.
14 Na'i Maromak Manfatin
dadi baa ema raiklaran.
Nia tuur heik iha itakaan klaran.
Ita hobun Niakaan kabaas, tan Nia,
Na'i Maromak Oan mesak mak kabaas manesak no Aman.
Nia natudu laran di'ak baa ita,
tan lisan nunia tebes.
Nia nanis tebes no loos.
15 Yohanis foo natene Na'i Maromak Manfatin nia see, nodi nahii na'ak, “Rona mai! Ne'e, ema mak ha'u kdale ti'an baa emi ka'ak, ‘Ema ida atu mai. Nia boot liu ha'u, tan ha'u ksei la moris dauk, Nia iha kedan ti'an!’”
16 Yohanis dale nunia, tan Ema nia beer basuk natudu laran di'ak baa ita nima-nimak. 17 Uluk aan, itakaan bei uluk sia simu Ukun-badu nosi Bei Musa. Mais oras ne'e, ita simu matak-malirin no hanorin loos nosi Yesus Kristus. 18 La noo ema ida mak naree Na'i Maromak. Oan mesak du'uk mak naree. Oan nia bele nalore Na'i Maromak baa ita, tan Nia namutuk kedan no Aman.
Yohanis sarani ema nodi nalore lia Kristus
19 Dala ida, ema Yahudi ulun sia iha Yerusalem bolu na'ilulik na'in hira, no ema na'in hira nosi hunun Lewi mak naliku Na'i Maromak Niakaan Uma Hamulak Huun. Bolu nola notu, sia solok ema nia sia baa mota Yordan balu baa,b atu nusu Yohanis Mak Sarani Ema na'ak, “O ne'e, Kristus mak Na'i Maromak nameno ti'an atu solok mai ka?”
21 Hotu, sia nusu tenik na'ak, “Kalo nunia, o ne'e see? Bei Elia ka?”
Yohanis nataa tenik, na'ak, “Lale.”
Hotu sia nusu tenik na'ak, “Keta to'o o ne'e, Maromak mako'an seluk mak ida nia ka?”
Nia nataa na'ak, “Lale.”c
22 Hotu, sia nusu tenik na'ak, “Kalo nunia, o ne'e see? Katak malorek lai, tan ami musti fila baa hasara hikar baa amikaan ulun sia mak solok ami.”
23 Rona nola nunia, Yohanis nataa sia tuir saa mak Yesaya nakerek kedan hori uluk na'ak,
“Ha'u ne'e, ema mak nahii iha rai fuik na'ak,
‘Ema hotu-hotu hadi'a dalan,
atu simu Na'in!
Haweer dalan, hodi simu Nia.’”d
24 Baa oras nia, ema na'in hira nosi partee Farisi moos mai baa Yohanis. 25 Sia nusu nia na'ak, “Lia nune'e. Kalo o lahoos Kristus, lahoos bei Elia, no lahoos Maromak mako'an seluk nia, tan saa o sarani ema? See mak foo beran nia baa o?”
26 Yohanis nataa na'ak, “Ha'u ne'e, sarani ema kodi wee dei. Mais noo Ema ida iha emikaan klaran ti'an mak emi la hatene. 27 Masik ha'u kahuluk Nia moos, Nia boot liu ha'u. Ha'u kdadi ata baa Nia moos, ha'u la kfatan.”e
28 Lia ne'e sia hotu-hotu dadi iha leo Betania, iha mota Yordan balu baa. Yohanis no niakaan maktuir sia sarani ema iha fatin nia.f
Bibi Malae Oan mak Na'i Maromak nadi'a kedan dadi baa sera
29 Baa awan, Yohanis naree Yesus mai baa sia. Hotu Yohanis dale na'ak, “Mana lai! Bibi malae oan mak Na'i Maromak nadi'a kedan, Nia mai ti'an. Nia mak atu dadi sera, kasu ema raiklaran salan. 30 Ema nia mak hori sehik ha'u katak ka'ak, “Ema ida atu mosu mai. Nia boot liu ha'u, tan oras ha'u ksei la moris dauk, Nia iha ti'an.” 31 Uluk, ha'u la katene ema ne'e mak Kristus. Mais Na'i Maromak solok ha'u baa ema Isra'el sia, atu foo katene nosi lia Kristus. Tan lia nia, ha'u kmai sarani sia kodi wee.
32-33 Uluk, Na'i Maromak katak baa ha'u na'ak, ‘Ema ida atu mai baa o. Hotu, Ha'ukaan Kmalar Lulik atu tuun mai nein iha Nia. Hotu, Nia nodi Ha'ukaan Kmalar Lulik, foo beran baa Ha'ukaan ema sia.’ Na'i Maromak katak kedan nunia, mais baa oras Ema ne'e mai baa ha'u, ha'u la katene Nia mak Kristus. Dau-dau ha'u ktitu-karee Maromak Kmalar Lulik tuun nosi lale'an hanesan lakateu sina, hotu nein baa Nia, foin ha'u katene ka'ak, ‘Nia ne'e, mak Kristus!’ 34 Lia nia, karee kodi matan du'uk. Etuk, ha'u katak baa emi ka'ak, ‘Ema mak mai ne'e, Na'i Maromak Oan!’”
Yesus boi nola maktuir na'in rua
35 Baa awan, Yohanis no'i nariik no niakaan maktuir na'in rua. 36 Naree Yesus la'o liu, nia katak baa maktuir sia na'ak, “Mana lai! Ema nia, bibi malae oan mak Na'i Maromak nadi'a kedan atu dadi baa sera!”
37 Rona nola nunia, Yohanis niakaan ema maktuir na'in rua nia, la'o nela nia, baa tuir Yesus. 38 Yesus mana kotuk, naree sia tuir Nia. Hotu Nia nusu sia na'ak, “Nunabee? Emi tuir Ha'u baa saa?”
Sia nusu fila baa Nia na'ak, “Rabi hein iha nabee?” [Iha siakaan lia Aram, sia temi ema boot na'ak ‘Rabi’. Lia isin na'ak, ‘ema manorik’.]
39 Hotu Yesus nataa na'ak, “Mai, baa haree du'uk.” Hotu sia tuir Nia, baa naree Niakaan hein fatin. To'o nebaa, takseer tuku haat loro malirin. Sia moos nein no Nia to'o loro monu.
40 Ema na'in rua mak tuir Yohanis, hotu tuir Yesus nia, ida naran Andreas, Simon Petrus alin. 41 Fila no fila, Andreas lai-lais baa buka maun Simon nodi katak na'ak, “Hei, mau! Ami hasoru Mesias ti'an!” [Iha siakaan lia Aram, ‘Mesias’ na'ak, ‘Kristus.’ Kristus nia, mak Na'i Maromak nameno kedan atu solok mai.] 42 Hotu, Andreas no maun baa nasoru Yesus.
To'o baa, Yesus mana Simon nodi katak na'ak, “O ne'e, Simon. Okaan aman, mak Yohanis. Nahuu baa oras ne'e, ema bolu o na'ak, ‘Kefas’” [‘Kefas’ lia isin manesak no ‘Petrus’ mak na'ak ‘fatuk’].g
Yesus bolu nola Filipus no Natanel
43-44 Iha fatin nia moos, noo ema ida seluk naran Filipus. Niakaan leo huun naran Betsaida. Petrus no Andreas moos huun nosi leo nia.
Baa awan, Yesus nakotu atu baa rai Galilea. To'o baa, Yesus nasoru Filipus, hotu tene na'ak, “Mai tuir Ha'u, dadi baa Ha'ukaan ema!”
45 Rona nola nunia, Filipus baa buka nola ema ida naran Natanel. Nia katak na'ak, “Mau! Ami hasoru ti'an Ema mak ita ho'i hei-hein nia. Nia naran Yesus, nosi leo Nasaret. Aman, naran Yusuf. Ema nia mak hori uluk Bei Musa no Maromak mako'an seluk sia nakerek nela kedan iha Hakerek Moon.”
46 Rona nola nunia, Natanel na'ak, “Ema Nasaret!? Aikee! Leo nia, la noo folin. La noo di'ak saa mak naksain nosi leo nia.”
Mais Filipus nakahik nia na'ak, “Hoi! Keta nunia. Mai maree du'uk baa!”
47 Rona nola nunia, Natanel moos nakara, hotu baa. Oras Yesus titu-naree Natanel, Yesus katak na'ak, “Ema ne'e, ema Isra'el isin. Nia ema moon mak la natene tolek.”h
48 Rona nola nunia, Natanel nusu na'ak, “Nunabee Ita Boot bele hatene ha'u?”
Yesus nataa na'ak, “Nune'e. Baa oras Filipus la baa bolu o dauk, o sei tuur iha ai ohak nia,i Ha'u ktitu-karee o ti'an.”
49 Hotu Natanel katak na'ak, “Ita Boot ne'e, Na'i Maromak Oan tebe-tebes! Ita Boot ne'e, tebe-tebes Na'in bodik ita ema Isra'el!”
50 Mais Yesus nusu baa nia na'ak, “Arumak o fiar baa Ha'u, tan ohin nia Ha'u katak ka'ak, ‘Baa oras o sei tuur iha ai ohak nia, Ha'u ktitu-karee o ti'an.’ Nunia ka? Manoin, tan o atu maree lia mak maka'as liu tenik lia ne'e!
51 Ha'ukaan dalen ne'e, tebes no loos. Loron ikus, emi atu haree lale'an nakloke no Na'i Maromak Niakaan makbukar lale'an sia sa'e-tuun iha Ha'ukaan sorin, tan Ha'u ne'e, Ema Raiklaran Isin mak tuun mai nosi lale'an.”j