Yesus nahaan ema na'in rihun lima resin
6
1-4 Nunia hotu, ema Yahudi siakaan loron boot ‘Paska’ kre'is mai ona. Yesus no Niakaan maktuir sia moos baa debu Galilea sorin balu baa. (Debu nia naran seluk, ‘Tiberias’.) Ema wa'in moos baa tuir, tan naree ti'an tadak blaar mak Yesus nase'i baa oras Nia nadi'ak nola ema moras sia. To'o debu balu baa, Yesus no maktuir baa tuur iha foho ida.5 Ema wa'in moos mai naklibur iha nia. Naree nunia, Yesus nusu baa maktuir na'in ida naran Filipus na'ak, “Ita bele sosa haan iha nabee atu hodi hahaan ema ne'e sia?” 6 Baa oras nia, Yesus natene ti'an Nia atu nalo nunabee. Mais Nia dale nunia atu nodi koko Filipus neon.
7 Hotu Filipus nataa na'ak, “Aikee Ama! Masik badaen kansera loron atus rua moos, sei la to'o dauk hodi sosa tubi bodik ema ne'e sia hotu-hotu! Masik ema ida netan loos rohan ida moos, sei la to'o dauk!”
8 Iha nia noo maktuir ida seluk naran Andreas, mak Simon Petrus alin. Nia mai katak baa Yesus na'ak, 9 “Ama! Lawarik ida iha ne'e nodi tubi baluk lima, no na'an tasi lolon rua. Mais tubi no na'an tasi nia, sei la to'o dauk atu hodi hahaan ema lear ne'e!”a
10 Fatin nia hae molik ida. Dadi Yesus naruka Niakaan maktuir sia na'ak, “Haliku nebee sia hotu-hotu tuur baa hae ne'e.” Hotu, sia moos tuur. Sia, ema wa'in basuk. Sura ema mane dei, takseer ema na'in rihun lima.
11 Yesus nola tubi nia sia, hotu namulak nodi sera dodan baa Na'i Maromak. Hotu Nia fa'e baa maktuir sia, nebee fa'e baa ema lear nia. Nunia moos na'an tasi nia. Fa'e hotu, ema hotu-hotu naa to'o bosu.
12 Sia naa notu, Yesus naruka Niakaan maktuir sia na'ak, “Libur hola hahaan resin nia sia, keta to'o soe butan.” 13 Hotu maktuir sia libur nola hahaak resin nia sia, nakonu ko'e sanulu resin rua.
14 Baa oras ema lear nia naree tadak blaar mak Yesus nase'i nia, sia dale na'ak, “Adeei! Nia ne'e, nanis mako'an nia mak Na'i Maromak nameno ti'an atu solok mai iha raiklaran ne'e.” 15 Yesus natene nola ema lear nia nakara seten Nia atu dadi siakaan na'i. Tan lia nia, Nia nariik la'o, nadook aan tenik, nebee Nia bele mesan iha foho nia.
Yesus la'o iha wee leten
16 Oras loro foin monu, Yesus Niakaan maktuir sia tuun baa debu. 17 Hotu, sia sa'e baa bero ida atu baa kota Kapernaum iha debu balu baa. Baa oras fofer bero baa, loro kalan ti'an, mais Yesus sei la mai dauk naklibur no sia. 18 La kleur, laloran debu nahuu nakfake baa-mai, tan anin dadurus nuu nakdiuk. 19 Maktuir sia la'o nela debu tehen takseer kilo lima, sia titu-naree Yesus la'o iha wee leten. Nia mai nare'is aan baa siakaan bero, to'o sia nata'uk basuk. 20 Mais Yesus katak baa sia na'ak, “Hei! Keta hata'uk! Tan Ha'u mak ne'e.” 21 Rona nola nunia, sia la nata'uk tenik. Sia nakara Yesus sa'e bero bele-bele no sia. Fila falik, bero nia to'o balu ti'an .
Ema buka Yesus
22-24 Baa awan, ema lear nia sei kre'is iha fatin mak ohin Yesus namulak sera dodan baa Na'i Maromak nodi nahaan sia nia. Sia buka Yesus iha fatin nia, tan sia natene na'ak, Yesus la sa'e tuir bero, tan hori sehik bero mesak dei. Niakaan maktuir sia sa'e nodi bero nia baa ti'an.
Hatene hodi baa, noo ema seluk mak sa'e bero mai nosi Tiberias, katak na'ak, Yesus to'o Kapernaum ti'an bele-bele no Niakaan maktuir sia. Rona nola nunia, ema lear nia baa buka Yesus iha Kapernaum, iha debu balu baa.
Yesus nu'u Tubi mak foo moris
25 Hotu, ema lear nia nasoru Yesus iha debu balu baa. Sia nusu baa Nia na'ak, “Ita Boot! Ita Boot to'o fatin ne'e hori hirak?”
26 Yesus nataa na'ak, “Rona, tan Ha'ukaan dalen ne'e, tebes no loos: emi la buka Ha'u atu hatene tadak blaar isin. Emi buka Ha'u, tan kahaan emi to'o bosu. 27 Keta serwisu buka hahaan mak atu dois. Di'ak liu, serwisu buka hahaan mak nafati nohuun no foo moris nima-nimak. Ha'u ne'e, Ema Raiklaran Isin. Ha'u kbele foo moris nia baa emi, tan Ama iha lale'an latan ti'an beran nia baa Ha'u.”
28 Rona nola nunia, ema nia sia nusu baa Yesus na'ak, “Kalo nunia, ami musti halo nunabee, nebee ami bele hala'o Na'i Maromak Niakaan serwisu?”
29 Yesus nataa na'ak, “Na'i Maromak Niakaan serwisu nia, nune'e: emi musti fiar baa Ha'u, tan Na'i Maromak mak solok Ha'u.”
30 Hotu sia nusu tenik na'ak, “Kalo nunia, Ama atu natudu tadak blaar saa, nebee ami bele haree hodi fiar baa Ama? Nunia hotu, noo saa tenik mak Ama atu nalo bodik ami? 31 Foo hahaan baa ami nu'u tubi manna mak itakaan bei uluk sia naa oras sia la'o iha fatin fuik ka? Tan Hakerek Moon na'ak, ‘Nia foo tubi nosi lale'an, bodik sia naa.’”b
32 Sia dale hotu nunia, Yesus katak na'ak, “Rona, tan Ha'ukaan dalen ne'e, tebes no loos: lahoos Bei Musa mak natuun tubi nia nosi lale'an bodik bei uluk sia. Mais Ha'ukaan Ama mak natuun. Oras ne'e, Nia moos nadi'a ti'an tubi nosi lale'an bodik emi. Tubi ne'e, Tubi tebes mak nafati nohuun. 33 Tubi ne'e, tuun mai nosi Na'i Maromak iha lale'an atu foo moris nima-nimak baa ema raiklaran.”
34 Rona nola nunia, sia nusu na'ak, “Kalo nunia, Ama Boot foo tubi nia baa ami lai! Ami hakara nohuun tubi oin nunia.”
35 Hotu Yesus katak na'ak, “Ha'u ne'e, mak Tubi nia. Tan Ha'u mak kodi moris loos. Ema mak tama dadi baa Ha'ukaan ema, la salaen tenik ona! Ema mak fiar baa Ha'u, la nanroo tenik ona!
36 Ha'u kdale kedan ti'an ka'ak, masik emi haree ti'an Ha'u moos, emi la fiar. 37 Mais ema hotu-hotu mak Ha'ukaan Ama boi ti'an mai baa Ha'u atu dadi Ha'ukaan ema, nanis Ha'u ksimu sia! 38 Ha'u ktuun mai kosi lale'an lahoos atu kala'ok Ha'ukaan hakara du'uk, mais atu kala'ok Ha'ukaan Ama hakaran, tan Nia mak solok Ha'u. 39 Niakaan hakara, nune'e: Ha'u kmusti libur kola ema hotu-hotu mak Nia boi ti'an atu dadi baa Ha'ukaan ema. Ida moos, Ha'u la kabusik lakon. Nosi ikus, baa oras rai falu fila, Ha'u moos kalo sia moris nikar. 40 Nunia tebes. Ha'ukaan Ama nakara nebee ema hotu-hotu natene Ha'u no fiar baa Ha'u, mak Niakaan Oa ne'e. Hodi nunia, sia bele netan moris nima-nimak.”
41 Yesus dale notu nunia, Yahudi ulun sia nakusuk malu, tan Nia dale na'ak, “Ha'u ne'e, Tubi mak tuun mai nosi Na'i Maromak iha lale'an.”
42 Hotu sia nakusuk malu tenik na'ak, “Nunabee ti'an? Ema ne'e, Yesus, Yusuf oan. Ita hatene malorek inan-aman. Oin nunabee Nia na'ak, ‘Ha'u ktuun mai kosi lale'an’? Netan nosi nabee?”
43 Hotu Yesus naruka sia na'ak, “Hoi! Hanawa hakusuk malu ona! 44 La noo ema ida mak bele mai baa Ha'u, kalo Ha'ukaan Ama la nakara. Baa oras rai falu fila, Ha'u kalo sia moris nikar. 45 Maromak mako'an uluk aan sia nakerek ti'an na'ak, ‘Na'i Maromak atu nanorin ema hotu-hotu.’ Ne'e na'ak, ema hotu-hotu mak rona baa Ama iha lale'an, nodi simu hanorin nosi Nia, sia mai baa Ha'u atu dadi baa Ha'ukaan ema.c 46 Ha'u ne'e, tuun mai kosi Na'i Maromak. Ne'e na'ak, Ha'u mesan dei mak karee Nia ti'an. Ema seluk la naree Nia.
47 Rona, tan Ha'ukaan dalen ne'e, tebes no loos: ema mak fiar baa Ha'u atu netan moris nima-nimak, 48 tan Ha'u ne'e, Tubi mak nodi moris nia. 49 Itakaan bei uluk sia naa tubi manna baa oras sia la'o nasirin fatin fuik. Masik nunia moos, kleu-leur sia mate. 50 Mais tubi mak tuun nosi lale'an baa oras ne'e, oin seluk. Ema hotu-hotu mak naa, netan moris nima-nimak. 51 Tebes. Ha'u ne'e, Tubi mak nodi moris mak tuun mai nosi lale'an. Ema hotu-hotu mak naa Tubi nia, netan moris nima-nimak. Tan Ha'u atu klatan Ha'ukaan isin lolon to'o mate, nebee ema raiklaran bele netan moris.”
52 Rona nola nunia, Yahudi ulun sia dale baa malu na'ak, “Hoi! Nia dale saa ti'an? Oin nunabee Nia bele foo isin lolon bodik ita atu haa?”
53 Mais Yesus katak baa sia na'ak, “Rona, tan Ha'ukaan dalen ne'e, tebes no loos: Ha'u ne'e, Ema Raiklaran Isin. Ema mak nakara moris nima-nimak, musti talin aan no Ha'u. Kalo emi la haa Ha'ukaan isin, no la hemu Ha'ukaan raan, emi la hetan moris.d 54 Mais ema mak naa Ha'ukaan isin, no nemu Ha'ukaan raan, nia netan moris nima-nimak. Baa oras rai falu fila, Ha'u moos kalo nia moris nikar. 55 Haan malolok, mak Ha'ukaan isin. Hemun malolok, mak Ha'ukaan raan. 56 Ema mak naa Ha'ukaan isin, no nemu Ha'ukaan raan, nia moris talin aan no Ha'u. Ha'u moos talin aan ko nia. 57 Ha'ukaan Ama iha lale'an mak solok Ha'u mai. Nia, mak moris huun. Ha'u ketan moris loos kosi Nia. Etuk, ema mak naa Ha'ukaan isin, nia moos netan moris loos nosi Ha'u. 58 Bei uluk sia naa tubi manna mak tuun nosi lale'an. Kleu-leur sia mate. Mais tubi mak tuun nosi lale'an baa oras ne'e, oin seluk, tan ema mak naa Tubi nia, netan moris nima-nimak.”
59 Yesus nanorin lia ne'e sia, iha ema Yahudi siakaan uma hamulak ida iha kota Kapernaum.
Ema wa'in nakiduk nela Yesus
60 Baa oras nia, ema wa'in tuir Yesus ti'an. Mais oras sia rona Niakaan hanorin nia, balu dale na'ak, “Hanorin nia nalo ami blaar, tan todan basuk! La noo mak atu simu!”
61 Mais Yesus natene sia nakusuk baa malu nunia. Nia nusu baa sia na'ak, “Emi horan susar simu Ha'ukaan hanorin ne'e ka? 62 Kalo nunia, oin nunabee tenik, baa oras emi haree Ha'u, Ema Raiklaran Isin ne'e, sa'e kikar baa Ha'ukaan fatin uluk?
63 Maromak Kmalar dei mak noo beran atu foo moris nima-nimak. Ema raiklaran la noo beran nunia. Tan Ha'ukaan hanorin ne'e nahabut nosi Maromak Kmalar, Ha'ukaan hanorin moos bele foo moris nima-nimak. 64 Mais emi balu la fiar.”
Yesus dale nunia, tan Nia natene kedan, see sia mak la fiar no see mak atu fa'an lakon Nia. 65 Hotu Nia dale tenik na'ak, “Etuk, Ha'u katak baa emi ti'an ka'ak, Ha'ukaan Ama iha lale'an musti loke dalan bodik ema lai, foin ema nia bele dadi baa Ha'ukaan ema.”
66 Nahuu baa oras nia, ema wa'in mak tuir Yesus nakiduk nela Nia. 67 Naree nunia, Yesus nusu baa Niakaan maktuir na'in sanulu resin rua nia na'ak, “Kalo emi, nunabee? Atu hakiduk hela Ha'u no ka?”
68 Mais Simon Petrus nataa na'ak, “Ama Boot! Ami atu baa see tenik? La noo ema seluk tenik mak bele katak baa ami hosi dalan nunabee ami bele hetan moris nima-nimak. Ita Boot mesan! 69 Ami fiar baa Ita Boot. Ami hatene ti'an ha'ak, Ita Boot ne'e Na'i Maromak Eman Moon.”e