2 Loron neen siku ti'an, Yesus no Petrus, Yakobus no Yohanis sa'e baa foho aas ida mak la noo ema. To'o baa, maktuir na'in tolu nia sarebak, tan sia naree Yesus nakfilas. 3 Niakaan faru moos naksinak. Iha raiklaran tomak la no saa ida mak mutin liu faru nia. 4 Teki-tekis, sia moos naree Yesus dale no Bei Elia no Bei Musa, mak Maromak mako'an uluk sia.

5-6 Maktuir na'in tolu nia nata'uk tebe-tebes. Neon moos tabasar to'o Petrus dale karin baa Yesus na'ak, “Ama! Ita iha ne'e, furak ti'an. Di'ak liu ami hariik batane tolu: ida bodik Ita Boot, ida bodik Bei Elia, no ida tenik bodik Bei Musa.”

7 Teki-tekis, ababun tuun taka nola sia hotu. Sia rona lia maliak ida mai nosi ababun laran na'ak, “Rona mai! Ne'e, Ha'ukaan Oan mak Ha'u kadomi! Rona di'a-di'ak baa Nia!”^a

8 Rona ti'an lia maliak nia, Petrus sia titu baa-mai. Mais sia la naree ema seluk, hela mesan Yesus.

9 Hotu, Yesus sia tuun nikar nosi foho nia. Oras la'o, Yesus nakahik maktuir sia na'ak, “Saa mak emi foin haree ohin nia, keta katak baa ema. Ha'u ne'e, Ema Raiklaran Isin. Nanis Ha'u kmate. Mais kalo Ha'u kmoris kikar ti'an, foin emi bele katak hasai lia mak emi haree ti'an nia baa ema.”

10 Rona nola nunia, sia rai Yesus mamenon nia. Mais sia nakusuk baa malu na'ak, “Nia katak na'ak Nia nanis mate, hotu moris nikar. Lia saa mak oin nunia?”

11 Sia moos nusu baa Yesus na'ak, “Tuir manorik ukun siakaan hanorin, Maromak mako'an Elia musti mai uluk lai, foin Kristus mai. Mais tuir Ita Boot hanorin, nunabee?”^b

12 Yesus nataa na'ak, “Tebes! Elia musti mai uluk atu nasori dalan bodik Kristus. Maromak mako'an sia moos nakerek kedan hori uluk nosi lia Ema Raiklaran Isin na'ak, ema atu nasusar to'o no'o Nia. Tan saa emi sei la hatene lia ne'e? 13 Rona di'a-di'ak! Elia nia mai ti'an. Mais ema no'o nia, tuir siakaan hakara. Hodi nunia, sia nato'o saa mak mako'an sia nakerek nela ti'an.”

[Hodi katak nunia, Yesus nalore na'ak mako'an Elia mak nasori dalan bodik Kristus, nia mak Yohanis.]

14 Yesus no Niakaan maktuir na'in tolu nia mai nikar ti'an nosi foho nia, sia naree ema wa'in naklibur nodi nobun Yesus Niakaan maktuir rumak sia. Sia no'i toe malu no manorik ukun Yahudi sia. 15 Oras sia naree Yesus mai, sia sarebak, tan sia na'ak falik Yesus sei iha foho leten baa. Hotu, sia nalai baa nasoru Nia.

16 Yesus moos nusu baa sia na'ak, “Emi toe malu baa saa?”

17 Mais ema ida mai nusu teri baa Yesus na'ak, “Ama! Tulun lai! Ha'u kodi ha'ukaan oan mane mai, nebee Ama nadi'ak nola nia. Ha'ukaan oan ne'e la bele dale, tan diabu tekar. 18 Oras diabu tekar, nia nitak lawarik ne'e baa rai. Hotu, kaban furin sai no ruun ne'an. Isin moos maka'as nu'u ai. Ha'u kakro'an ti'an baa Okaan maktuir sia nebee te'ur sai diabu nia. Mais sia la bele nalo saa ida.”

19 Rona nola nunia, Yesus de'an Niakaan maktuir sia na'ak, “Emi ne'e, liu resik ti'an! Ha'u kamutuk ko emi kleur ti'an, mais emi la fiar Ha'u! Ha'u kmusti katerus aan ko emi to'o wainhira? Modi lawarik nia mai!” 20 Hotu, sia naka'u nodi lawarik nia mai. Mais oras diabu naree Yesus, nia nitak tenik lawarik nia baa rai nodi naduir baa-mai to'o kaban furin sai.

21 Naree nunia, Yesus nusu baa lawarik nia aman na'ak, “O oan dadi nune'e hori hirak ti'an?”

Ama nia nataa na'ak, “Hori sei ki'ik. 22 Kleur ti'an, diabu beer no'o lawarik ne'e. Naloti lawarik baa ha'i, no namout baa wee. Kalo bele, Ita Boot tulun no hadomi ami. Hadi'ak hola lawarik ne'e lai.”

23 Hotu Yesus nataa na'ak, “Tan saa o katak ma'ak, ‘kalo bele’? Ha'u kbele kalo sa-saa hotu-hotu, surak ema fiar tebe-tebes.”

24 Rona nola nunia, ama nia nataa nodi tanis na'ak, “Ama! Ha'u kfiar tebe-tebes. Mais tulun ha'u, nebee ha'ukaan fiar ne'e, bele hetak biit.”

25 Baa oras nia, ema wa'in mai kabuun nola Yesus. Naree nunia, Yesus moos naruka diabu nia na'ak, “Hoi diabu aat! Sai mela lawarik ne'e, nebee nia bele rona no bele dale. Keta tama mikar tenik baa nia ona.”

26 Rona Yesus dale nunia, diabu nia nahii maka'as nodi naloti lawarik nia baa rai, to'o nasa'e horak, foin sai nela. Hotu, lawarik mate sala, to'o ema nia sia dale na'ak, “Adeei! Lawarik ne'e mate ti'an!”

27 Mais Yesus kaer nola lawarik nia liman, nodi foti nadeer. Lawarik nia moos nadeer kedas.

28 Nunia hotu, Yesus no Niakaan maktuir sia la'o nela fatin nia, tama baa uma ida. Iha nia, maktuir sia no Yesus mesan, hotu sia nusu Yesus na'ak, “ Ama! Tan saa ami la bele te'ur sai diabu ohin nia?”

29 Yesus moos katak nalore baa sia na'ak, “Diabu oin nunia, aat basuk! Emi musti hamulak hodi haloon baa Na'i Maromak, foin bele te'ur sai diabu oin nunia.”

30 Hotu, Yesus no Niakaan maktuir sia la'o nela fatin nia, tama baa rai Galilea. Sia to'o ti'an, mais Yesus la no'uk ema natene na'ak Nia iha nia, 31 tan Nia nakara nanorin Niakaan maktuir sia mesan. Hotu, Nia katak baa Niakaan maktuir sia na'ak, “La kleur ona, ema atu fa'an Ha'u baa ema seluk. Hotu, sia no'o Ha'u, Ema Raiklaran Isin ne'e. Nanis Ha'u kmate, mais wainrua, Ha'u kmoris kikar.”

32 Rona nola nunia, maktuir sia neon tabasar. Mais sia nakerat nusu tenik lia nia isin.

33 Hotu, Yesus no Niakaan maktuir sia la'o to'o Kapernaum. Baa oras sia iha uma ida laran, Yesus nusu sia na'ak, “Ohin nia emi toe malu baa saa?”

34 Mais la noo maktuir ida mak nataa. Tan tebes! Ohin nia sia toe malu iha dalan klaran baa lia see mak boot.^c

35 Hotu, Yesus tuur nodi nanorin sia na'ak, “See mak nakara dadi ema boot, nia musti dadi ema ki'ik nodi naliku ema seluk.”^d

36 Hotu, Yesus baa naka'u nola lawarik oan ida, nodi mai baa siakaan klaran. Hotu, katak na'ak, 37 “Ema mak tuir Ha'u musti naliku ema ki'ik nudaar lawarik oan ne'e. Hodi nunia, nia naliku Ha'u no Ha'ukaan Ama mak solok Ha'u kmai raiklaran ne'e.”^e

38 Hotu, Yesus Niakaan maktuir na'in ida naran Yohanis nasa'e lia na'ak, “Ama! Loron ida, ami haree ema ida te'ur sai diabu nodi Ita Boot naran. Mais ami hakahik nia, tan nia lahoos itakaan ema.”

39 Rona nola nunia, Yesus nataa na'ak, “Keta makahik nia. Tan, see mak nalo tadak blaar nodi Ha'ukaan naran, nia la nahaat Ha'ukaan naran. 40 Kalo nia la sakar ita, nia nanis itakaan ema.^f 41 Rona, tan Ha'ukaan dalen ne'e, tebes no loos! Kalo ema naliku emi tan emi tuir Kristus, nanis Na'i Maromak la nalu'a ema nia. Masik nia tulun emi nodi wee hemu fatik ida dei moos, Na'i Maromak la nalu'a nia.”^g

42 Hotu, Yesus katak tenik baa sia na'ak, “Kalo ema sasu'at ema ki'ik ida tuir dalan kale'uk to'o ema ki'ik nia la fiar tenik baa Ha'u, ema nia, sintidu! Di'ak liu kesi fatuk boot ida^h baa niakaan kakorok, hotu tonan mout baa tasi laran.

43 Kalo o malo sala modi o liman, taa kotu baa dei! Di'ak liu o tama lale'an modi liman mesak, nosi baa o tama ha'i naraka modi liman rua.ⁱ 44 [Ha'i naraka ne'e, fatin susar basuk. Iha nia, kniba tota bei-beik. Ha'i moos laka la nanawa.]^j 45 Kalo o malo sala modi o ain, taa kotu baa dei. Di'ak liu, o tama lale'an modi ain mesak, nosi baa o tama ha'i naraka modi ain rua. 46 [Ha'i naraka ne'e, fatin susar basuk. Iha nia, kniba tota bei-beik. Ha'i moos laka la nanawa.]^k 47 Kalo o malo sala modi o matan, sukit soe baa dei. Di'ak liu, o tama lale'an modi matan mesak, nosi baa o tama ha'i naraka modi matan rua.^l

49 Ha'ukaan hanorin ne'e, todan tebes. Tan ema mak nakara tuir Ha'u, musti naterus aan tuir bei-beik, hanesan na'an hameer mak tamun baa ha'i, nebee bele rai kleur.

50 Masin nanis di'ak. Ita hodi hamidar haan. Mais kalo masin nia la meer ona, la no folin ti'an. Nunia moos emi. Emi musti dadi hanesan masin bodik raiklaran, nebee emi bele moris di'a-di'ak ho ema hotu-hotu.”

[Hodi nunia, Yesus nanorin baa Niakaan maktuir sia na'ak, keta toe malu baa lia see mak boot, see mak ki'ik.]ⁿ