4 Ka ana madhutu Yesus sèra dhaa, peka na, “Ama. Era ne kaj'èu nèti rae. Èdhi panga'a tare boe dhèu ae sèmi ne'e!”

5 Hèia Yesus karèi si, peka na, “Roti miu pèri bua era?”

Ka ra dhaa peka na, “Ama. Roti ji'i ate dhoka pidhu bua di.”

6 Ropa nanene nare, hèia Na pua dhèu ae sèra madhèdi ètu rai. Ka nare roti pidhu bua sèra, hèia Na sabaj'a manèngi makasi mi Ama Lamatua. Sabaj'a nare, hèia Na pamae roti pidhu bua sèra. Ka Na hia ana madhutu Na papala mi dhèu aa'i-aa'i sèra. 7 Rèngu dènge i'a pèri ngi'u kahèi. Ka Yesus sabaj'a hari manèngi makasi. Èle èèna ka, Na hia ana madhutu Na papala hari mi dhèu ae sèra. 8-9 Dhèu aa'i-aa'i sèra ele boe d'ai èpa riho sa. Ra ra'a toke bècu. Ra'a rare, hèia ana madhutu Yesus pakaboko nganga'a sisa, ka ra ige pidhu soe hahake. Èle èèna ka, Yesus pua dhèu se lèpa. 10 Ropa dhèu se lèpa, Yesus dènge ana madhutu Na ca'e koha pakèd'i asa rae èci, ngara na Dalmanuta.

11 Lod'o Yesus si d'ai Dalmanuta, dhèu partei Parisi pèri-pèri mai paraga dènge Yesus. Ra tenge j'ara neo pamanahu Ne. Ra manèngi, peka na, “Ama. Pad'elo tadha malaa, sèna ka j'aj'i tadha, peka na, Èu tare'a-re'a abhu koasa nèti Ama Lamatua.”^a

12 Hèia Yesus ère a'ae madhera, ka Na dhaa si, peka na, “Ladhe Ja'a madhutu lii padhai lii miu ne, Ja'a manyasa! Nga tao ka miu manèngi tadha malaa? Baku sèmi èèna. Ja'a bisa tao tadha malaa. Te ngaa Ja'a parluu boe pad'elo mi miu.”^b

13 Hèia Yesus tèke eele dhèu Parisi sèra, la'e hari asa dedha koha. Ka Na pakèd'i dènge ana madhutu Na sèra asa cabèka dano.

14 Ropa Yesus si d'ai talora dano, hèia ana madhutu Na sèra heka sanèd'e kèna, na, rèngu rèti boe nganga'a leo, dhoka roti cue di. 15 Tadèngi ra ale roti, hèia Yesus peka dènge si, aku Nèngu na, “Miu mage-mage ku! Baku lèke pangaru karehe nèti dhèu aae Herodes dènge dhèu Parisi. Pangaru rèngu, sama sèmi ragi dhu dhèu pakihu tao roti.”^c

16 Ra tadèngi Na padhai lii sèmi èèna, ka ana madhutu sèra malaa. Ka ra papeka isi-aanga si, peka na, “Mone heka nèi, peka ngaa ne? Tao-tao èdhi tèti boe roti, ka Na lii sèmi èèna.”

17 Te ngaa Yesus ne'a lii padhai rèngu. Ka Na peka, aku Nèngu na, “Nga tao ka miu padhue dhoka roti di! Miu me'a mere boe ngaa dhu Ja'a peka na, do? Mema kahadhu miu kateme. 18 Miu mèdhi dènge madha le, te ngaa mo'o boe me'a! Èci èèna ka dènge miu mèdhi mèka. Miu tadèngi dènge ro'a dhilu le, te ngaa mo'o boe nanene. Èci èèna ka dènge miu tadèngi mèka. Miu bhèlu le, do?^d 19 Roti lèmi bua dhu Ja'a pamae kore ka hia dhèu lèmi riho sèra ra'a, si? Ca hari ni, miu pakaboko mere roti dhu risi sèra pèri soe?”

Ka ra dhaa, aku rèngu na, “Canguru dua soe, Ama.”

20 Ka na karèi hari, aku Nèngu na, “Miu sanèd'e era lod'o Ja'a pamae kore roti pèri bua sèra, ka hia dhèu èpa riho ra'a sa, do aad'o? Miu pakaboko mere sisa pèri soe hahake?”

Ka ra dhaa, na, “Pidhu, Ama.”

21 Hèia Na peka, na, “Mema tare'a! Miu mèdhi dènge madha le. Te ngaa, nga tao ka miu me'a mèka koasa Ja'a kapua nèti mia?”

22 Ropa Yesus si d'ai rae Betsaida, dhèu rèti dhèu bèdhu èci mai asa Yesus. Ra manèngi sèna ka Yesus pa'èle musi madha dhèu bèdhu ne.

23 Ka Yesus kadhèi nare kacui-aai dhèu ne, ka dua ra lasi asa li'u rae. Èle èèna ka, Yesus sabhuu ilu mi musi madha dhèu ne, hèia Na g'ag'e. Ka Na karèi, peka na, “Samia? Èu mèdhi le, do dhae?”

24 Ka dhèu èèna padoa kètu, ka na ladhe sa g'ana-kariu, hèia na dhaa, peka na, “Oo! Ja'a kèdhi dhèu kako rango-rango era, nuka sèmi ana aaj'u dhu kako.”

25 Hèia Yesus caro hari kacui-aai Na ca tèka mi musi madha dhèu ne'e. Ka na ladhe patae hari, ho neo ne'a, na, musi madha na be'a le, do dhae. Ne'e ne, heka nèdhi dènge mèu kèna. 26 Ka Yesus pua na lèpa, te ngaa pasanèd'e ne, aku Nèngu na, “Èu lamu ka, te ngaa madhutu j'ara leo. Re ia ka Betsaida.”

27 Èle èèna ka, Yesus si kako palème rae-rae ètu Kaisarea Pilipi. Ètu talora j'ara, Yesus karèi ana madhutu Na, peka na, “Madhutu lii lolo dhèu, na, Ja'a ne, cee?”

28 Ka ra dhaa, peka na, “Dhèu cahag'e peka, na, Èu ne, Yohanis tuka sarani dhu madhe le, te ngaa mamuri hari. Abhu cahag'e peka na, Èu ne, Elia, ca dhèu nèti lii padhai Ama Lamatua uru sèra. Aa abhu cahag'e hari peka na, Ama ne, dhèu nèti lii padhai Ama Lamatua dhu leo.”^e

29 Ka Yesus karèi hari rèngu, “Madhutu a'abhu miu, Ja'a ne, cee?”

Petrus dhaa, peka na, “Ama ne, Kristus, dhu Ama Lamatua paj'uj'u nèti uru ka.”^f

30 Hèia Yesus pasanèd'e si, aku Nèngu na, “Baku lolo mi cee-cee kahèi, ee!”

31 Èle èèna ka, Yesus mulai peka dènge ana madhutu Na sèra, aku Nèngu na, “Ja'a ne, Dhèu Rai-haha Tare'a-re'a. Bèli-camèd'a Ja'a abhu j'aj'èra ae titu kèna, lula dhèu heka-dhèu heka Yahudi, kètu agama Yahudi, dènge mese agama sèra, aa'i-aa'i ra sèmi rare boe Ja'a. Ho èèna na, ra pamadhe Ja'a, te ngaa d'ai camèd'a, na,^g Ja'a mamuri hari.”

32 Yesus peka boe dènge pahuni, hèia Petrus ère Ne asa karasa na, ka na kai, aku nèngu na, “Ama, baku padhai lii sèmi èèna! Ja'a ko'o boe dhèu tao Ama ku sèmi èèna.”

33 Lii padhai lii Petrus èèna, madhutu boe dad'èi Ama Lamatua. Hèia Yesus kabib'a, ka ladhe asa ana madhutu dhu leo sèra. Ka Na nasa dènge Petrus, aku Nèngu na, “Weh! Èèna lii dhèu aae nidhu! Èu pakaj'èu nèti ne'e! Èu madhutu dhoka dad'èi dhèu rai-haha di. Madhutu boe dad'èi Ama Lamatua!”

34 Èle èèna ka, Yesus paroa dhèu ae sèra ho mai pakaboko dènge ana madhutu Na. Ka Na aj'a si, peka na, “Dhèu dhu neo madhutu Ja'a, hud'i taha taruu bèli-bèli. Nèngu hud'i tèke eele dad'èi na, ho madhutu dad'èi Lamatua di. Masi ka dhèu neo pamadhe ne, te ngaa nèngu hud'i taha taruu kahèi, nuka sèmi dhèu pasae aj'u palolo-palèbha nèngu unu na ho la'e asa era ra pamadhe ne.^h 35 Te dhèu dhu mamuri dhoka lalau ngi'u aae na di, bèli-camèd'a mamuri nèngu ele iie d'ara! Te ngaa dhèu dhu sadia madhe lula madhutu Ja'a, aa lula na peka-padhai j'ara mamuri Ama Lamatua, bèli-camèd'a nèngu abhu mamuri dhu ma'ète boe dènge Ama Lamatua.ⁱ 36 Mi nanene, ee! Ladhe èu abhu aa'i isi rai-haha ne, te ngaa Ama Lamatua core eele èu, a'oto na ngaa? 37 Masi ka èu bau mèti aa'i kakaja rai-haha ne, te ngaa bisa boe pasilu dènge samanga èu.

38 Sanèd'e paie! Dhèu ètu rai-haha limuri ne, bhelu-katub'a rupa-rupa. Rèngu pusi-pahae boe madhutu Ama Lamatua. De cee dhu makae madhutu Ja'a, do makae madhutu lii holo-nori Ja'a, bèli-camèd'a Ja'a makae kahèi mangaku nèngu ètu madha Ama Lamatua. Te Ja'a, Dhèu Rai-haha Tare'a-re'a ne, bèli-camèd'a mai hari nèti sorga, palere dènge ana pajuu Ama Lamatua sèra. Ji'i puru mai dènge dadedha Ama ku, heka dhèu re'a mèu kèna, Ja'a ne cee.