3 De lami ka! Ja'a pua miu lami asa dhèu ae. Te ngaa sanèd'e sèmi ne'e. Miu èci èèna ka dènge ana kahib'i-kalèbho dhu lami asa talora aae busa hui dhu bhelu.^c

4 Miu baku mèti doi-dhari, tas tao mèdha-papake, do salapa dhu risi ètu d'ara kakako miu. Mage core eele ai lod'o dènge padhai lii iia d'ara dènge dhèu ètu talora j'ara.

5-8 Ladhe miu maso asa d'ara rae èci, miu baku pidha-pidha era pea. Ladhe dhèu sèmi rare miu dènge be'a ètu d'ara èmu cue, pea dhoka ètu èèna toke miu pakèd'i tèke eele rae èèna. Ladhe miu maso asa èmu cue, miu hud'i manèngi sèna ka Ama Lamatua hia berkat mi dhèu isi èmu èèna. Ladhe lamatua èmu ètu sèra sèmi nare miu dènge be'a, tatu Lamatua pad'elo d'ara hua iia Na mi isi èmu èèna. Te ngaa ladhe ro'o boe sèmi miu, na, hud'i laa Lamatua pad'elo d'ara hua iia Na hia miu mesa mi. Ladhe miu maso asa èmu cue, do, asa rae èci, ra hia miu nganga'a, mi'a-minu laa dènge karej'e. Te ra hia èèna pamèci dènge èi kabhèsu miu dhu hae.^d 9 Puri-pa'èle dhèu rèngu dhu pèd'a. Aa peka-padhai dènge dhèu sèra, na, ‘Paredha Ama Lamatua ètu katanga madha miu le!’

10 Te ngaa abhu kahèi rae dhu dhèu ra ro'o boe sèmi rare miu. Ladhe ra tao miu sèmi èèna, na, lami titu asa j'ara-j'ara ètu d'ara rae èèna, mi lii dènge ra, peka na, 11 ‘Nanene paie! Miu dhèu dhu ètu d'ara rae ne. Ji'i mai le ngèti Lii Lolo Be'a Lamatua hia miu, te ngaa miu pusi-pahae boe. De ji'i caro eele ahu rae ne'e nèti haga ji'i, ho j'aj'i mi tadha dhu peka na, pe bèli-camèd'a sèmi mere pala mi! Te ngaa sanèd'e paie-iie! Paredha Ama Lamatua ètu katanga madha miu le.’^e

12 Miu me'a, sina ma, bhabhelu dhèu kota Sodom? Ja'a pasanèd'e miu! Bèli-camèd'a, d'ai lod'o èle rai-haha ne, Ama Lamatua huku dhèu-dhèu dhu ro'o boe sèmi rare miu, bia risi nèti dhèu Sodom!”^f

13 Ka Yesus tuhu hari lii padhai Na, aku Nèngu na, “Mate unu miu dhu pea ètu rae Korasin^g dènge miu ètu rae Betsaida! Miu dui mere j'aj'èra! Ja'a tao tadha-tadha malaa ètu katanga madha miu, te ngaa miu mo'o boe parcaya Lamatua. Ngaa hari miu dhèu Yahudi dhu peka na, miu tadhe Ne. Ladhe sèmi tadha-tadha malaa se, dhu Ja'a tao ètu rae miu, lèke ètu kota Tirus dènge kota Sidon, tatu nèbhu nare sange ne'e dhèu sèra ele-ho'a le, aa ra tèke eele sasala-sasigo ra, ho mai madhutu Lamatua. Aa rèngu tatu pake le mèdha sasusa, dènge tao ahu ètu kètu ra j'aj'i mi tadha dhu peka na, rèngu manyasa nèti sasala-sasigo ra. Te ngaa dhèu Tirus dènge dhèu Sidon sèra, dhèu Yahudi boe. De ra peka boe, na, rèngu dhèu dhu tadhe Lamatua.^h 14 Tare'a! Miu ladhe ku laa! Bèli-camèd'a d'ai lod'o Lamatua pama'ète lii langu dhèu aa'i-aa'i, hahuku nèti Lamatua mi dhèu Tirus dènge dhèu Sidon samaa risi nèti hahuku miu.

15 Mata unu miu, kabarai Kapernaum! Miu baku pangee, na, bèli-camèd'a Lamatua nedhe miu pamaso asa d'ara sorga. Aad'o! Mola-mèu èi! Èèna na Lamatua pèci miu asa d'ara naraka lami!ⁱ

16 Sanèd'e pabe'a-be'a. Dhèu dhu nanene lii miu, nuka sèmi rèngu nanene Ja'a. Aa dhèu dhu pusi boe nanene miu, èci èèna ka ra pahae boe Ja'a. Aa dhèu dhu ro'o boe nanene Ja'a, èci èèna ka dènge rèngu dhu pusi-pahae boe Ama Lamatua, dhu pua Ja'a mai asa rai-haha ne.”^j

17 Ropa ana madhutu pidhu nguru dua sèra lèpa hari mai,^k d'ara ra karej'e bia. Ka ra lole dènge Yesus, aku rèngu na, “Ira ii! Kakako ji'i ne, be'a bia! Ropa ji'i pake kolongara Ama ho babège eele nidhu, na, nidhu sèra nanene lii ji'i, hèia ra rai bhalèta.”

18 Te ngaa Yesus b'ala si, peka na, “Mema tare'a! Lod'o miu tao sèra sa, Ja'a ladhe kèdhi Ama Lamatua pèci eele nidhu dènge dhèu aae ra nèti dedha-liru nèi, nuka sèmi bela dhu kaha'a nèti haa, nèti dhimu! 19 Sanèd'e! Dhèu aae nidhu èèna, musu èdhi. Aa nèngu dènge koasa kahèi. Te ngaa Ja'a pangèd'u le miu koasa, ho palaho koasa na. Ladhe miu j'èli lèke kaisao, do karaka rai, miu ngaa-ngaa tao boe. Ngaa èci sa bisa boe paj'èra miu.^l 20 Miu karej'e lula nidhu nanene miu. Be'a kahèi, te ngaa sèra sa ana iiki era! Dhu be'a risi, d'ara miu karej'e, lula Lamatua suri nare le ngara miu, j'aj'i ana kabarai Na ètu sorga.”

21 Lod'o èèna, Roh Lamatua dhu Mola-Mèci tao d'ara Yesus karej'e-karae. Hèia Na koa-kio Ama Lamatua, peka na, “Ama dhu j'aj'i Lamatua ètu dedha-liru dènge rai-haha. Ja'a manèngi makasi ae-ae, lula Ama pa'abhe j'ara-j'ara se'e nèti dhèu dhu tao iisi d'èlu-mèu dènge dhèu lela dedha. Te ngaa Ama bhoke patalele aa'i-aa'i se hia mi ana iiki-ana iiki dènge dhèu-dhèu dhu pahaha iisi. Tare'a Ama! Lula èèna ka dhu pakarej'e d'ara Ama!”

22 Hèia Yesus peka dènge dhèu ae sèra, aku Nèngu na, “Nanene paie! Ama Ku ètu sorga pangèd'u aa'i le koasa mi Ja'a. Dhu tadhe mèu, Ja'a ne cee, dhoka Ama di. Aa dhu tadhe mèu, Ama èèna cee, dhoka Ana nèti Ama di, nuka Ja'a ne. Aa Ja'a hag'e kore dhèu leo, sèna ka nori si, ho ra tadhe mèu Nèngu kahèi.”^m

23 Ka Yesus kabib'a asa ana madhutu Na, hèia Na peka dènge rèngu mesa ra, aku Nèngu na, “Miu se oto titu kèna, lula mèdhi le koasa Lamatua. 24 Dhèu aae-dhèu aae dènge dhèu rèti lii padhai Lamatua uru-uru sèra, d'èi titu kèna neo rèdhi ngaa dhu miu limuri ne mèdhi, te ngaa rèdhi boe. Rèngu d'èi kahèi neo tadèngi ngaa dhu miu nanene ne, te ngaa ra tadèngi rèdhi boe.”

25 Ca tèka, ca dhèu d'èlu-mèu atora agama Yahudi, titu ho neo sèku pamanahu Yesus. Na karèi peka na, “Ama Mese! Mu peka ku laa! Ja'a ad'u j'ara sèmi ngaa, sèna ka ja'a mamuri taa-taa dènge Ama Lamatua ètu sorga?”

26 Ka Yesus b'ala ne, aku Nèngu na, “Musa suri tasamia lula-nèti j'ara ne'e ne? Aa madhutu mame'a èu, tasamia?”

27 Hèia dhèu ne dhaa peka na, “Na suri sèmi ne'e ka:

Dhu suri kahèi, peka na, ‘Èu hud'i sue ku dhèu èu, sama sèmi èu sue ngi'u èu mesa mu.”’ⁿ

28 Hèia Yesus b'ala ne, “Dhu lèke kèna! Ladhe èu tao madhutu sèmi sèra, na, èu mamuri taa-taa dènge Ama Lamatua.”^o

29 Te ngaa dhèu ne, tao iisi na sèmi dhèu mola sa. Ka na karèi hari Yesus, aku nèngu na, “Te ngaa, ‘dhèu ja'a’ èèna, ka cee?”

30 Hèia Yesus b'ala ne, peka na, “Sèmi ne'e. Ja'a neo lolo dènge èu lii pakasame èci. Pe èu mesa mu ka dhu peka, na, mia ka dhu tare'a-re'a ‘dhèu èu’. Lii pakasame ne, sèmi ne'e ka: ca lod'o, abhu dhèu Yahudi ca dhèu pakèd'i nèti kota Yerusalem, puru la'e asa kota Jeriko. Te ngaa ropa d'ai talora j'ara, cag'ag'a laa parapo mai game paroe ne. Ra game, aa parame rare aa'i doi-dhari dènge mèdha-papake dhèu ne. Ka parapo se core ne asa sebhe j'ara la'e, aa ra rai tèke eele ne. Dhèu ne, oe madhe.

31 Te ngaa nèbhu boe, ka ama agama Yahudi ca dhèu puru mai re j'ara èèna. Te ngaa ropa na ladhe nèdhi dhèu ne dhu diu raa, aa dhu tarenga ètu sebhe j'ara, ama agama ne titu boe sa hèi, ho uri dhèu ne. Na kako paseli eele dhèu ne'e, la'e asa cabèka j'ara, ka na taruu. 32 Nèbhu boe ka dhèu leo hari èci kako re èèna. Nèngu ne nèti suku Lewi dhu tema sab'a ètu d'ara Èmu Kapua Manèngi-Mangaj'i Ama Lamatua. Ropa nèdhi dhèu ne dhu baa-baa ètu sebhe j'ara, hèia la'e padètu-dètu ho ladhe, te ngaa na bara boe ne kahèi. Na sigo eele j'ara, ka la'e taruu.

33-34 Nèbhu boe ka, dhèu èci nèti rai Samaria mai re j'ara èèna dènge badha keled'ei na. Dhèu Yahudi pahae boe dhèu Samaria. Te ngaa ropa dhèu Samaria ne nèdhi dhèu dhu lèke rapo èèna, ka d'ara na mèke boe. Na mai padètu-dètu ho neo sarad'e ne. Ka pamèu nu'a dhèu ne dènge èi anggor, hèia na pana'i dènge èi mènyi. Aa na parbaan nu'a na, èle ka na paca'e asa keled'ei na. Hèia nèti ne la'e asa d'ara kota. Na pamaso ne asa d'ara losmen, aa lalau pabe'a-be'a ne.^p

35 Asa bèli mad'ae èèna, dhèu ne la'e b'ae uuru kètu, doi iia dua bua^q mi lamatua losmen ne, ka na peka, ‘Pake uuru doi ne ho lalau dhèu ne toke èle. Ladhe d'ai boe, pake uuru doi èu. Pe ja'a lèpa, pula hari doi sèra.”’

36 Lii pakasame Yesus ne d'ai sange ne'e ka. Hèia Yesus karèi mi dhèu d'èlu-mèu atora agama Yahudi ne, aku Nèngu na, “Madhutu èu, mia ka dhu tare'a-re'a ‘dhèu nèngu,’ mi dhèu dhu lèke rapo ne?”

37 Ka dhèu ne dhaa, peka na, “Tatu dhèu dhu lalau ne toke èle.”

Hèia Yesus lii, peka na, “Tare'a! De lamu ka, tao madhutu sèmi èèna.”

38-40 Èle èèna ka, Yesus dènge ana madhutu Na, lasi taruu asa Yerusalem. Hèia ra dhuli ètu rae èci. Ètu era ne'e, dhèu dua dhu pa'a'ari, ngara ra, Marta dènge Maria. Marta manèngi ho Yesus si manubha ètu èmu rèngu. Ka ra pea taha ètu èèna.

Ropa Yesus madhèdi ho aj'a si, Marta bhute dènge pananasu. Te ngaa ari na Maria, madhèdi padètu-dètu haga Yesus, ho nanene lii padhai Na. Nèbhu boe ka Marta mai ka'ugu ètu madha Yesus, aku nèngu na, “Ama! Tasamia, ee? Ja'a d'ai madhe lalau nganga'a-nganginu mesa-mesa ku, te ngaa ari ja'a madhèdi mau-mau. Peka ku dènge ne laa, sèna ka mai bara ja'a ètu dapu ne.”^r

41 Te ngaa Lamatua Yesus dhaa, na, “Marta. Èu ne bhute dènge ngangee rupa-rupa. 42 Be'a kahèi do, te ngaa j'ara èci dhu be'a risi. Maria pili nare dhu be'a risi le, nuka madhèdi ho nanene Lii Lolo Be'a nèti Ja'a. Dhèu bisa boe parame rare nèti nèngu Lii Lolo Be'a ne.”