Dhèu bhèni-dhèu bhèni dhu madhutu Lamatua Yesus
8
Nèbhu boe ka Yesus dènge ana madhutu Na, dhèu canguru dua sèra, kako palème kota-kota dènge rae-rae ètu sèra. La'e lolo dènge dhèu dad'èi Ama Lamatua. Èèna ka dhu j'aj'i lii lolo be'a hia rèngu aa'i-aa'i ra. 2 Ètu d'ara kaboko rèngu, abhu kahèi pèri-pèri dhèu bhèni dhu madhutu. Bhèni se dhu uru èèna abhu rupa-rupa papèd'a, aa cahag'e dhu nidhu tao. Te ngaa Yesus ka dhu puri-pa'èle aa'i si. Nuka sèmi Maria nèti rae Magdala, dhu uru èèna, Yesus bata eele pidhu nidhu nèti nèngu. 3 Abhu kahèi Susana, dènge mama Yohana. Yohana ne, dhèu èmu Kusa. Kusa ne, kapala urusan nèti èmu dhèu aae Herodes. Aa abhu ae kahèi bhèni leo dhu lasi palere-lere dènge Yesus si. Bhèni se pake doi-dhari rèngu mesa ra ho ogo Yesus si ètu j'ara.aLii pakasame lula-nèti dhèu ceb'e hini ètu rupa-rupa rai
4 Ca tèka, dhèu mai nèti rae-rae ho tenge Yesus. Ropa dhèu ae se pakaboko, hèia Na lolo dènge ra pake lii pakasame èci, aku Nèngu na, 5 “Abhu ca dhèu sab'a oka-tedhe, dhu la'e ceb'e hini asa d'ara oka na. Hini se cahag'e lèke ètu j'ara. Ropa dhèu kako re èèna, j'èli lèke hini se. Aa manu-bhui mai ka tutu ra'e aa'i. 6 Hini cahag'e, lèke ètu dedha rai dhu pènu dènge hadhu. Hini se muri, te ngaa nèbhu boe hèia kamale dhae-dhae, lula èi kura. 7 Hini cahag'e hari lèke ètu era aj'u padhudhu. Te ngaa ropa hini muri, aj'u padhudhu hèlu pamadhe aa'i si. 8 Aa hini dhu leo lèke ètu dedha rai hèu mèngi. Hini se muri dènge sega, toke kapai ka hua. Hua ae titu kèna, d'ai cangasu hari.”
Lolo èle ka, Yesus pa'èle lii pakasame ne, dènge lii dhu mèdhu, aku Nèngu na, “Miu dhu pasa dhilu, na, ngee paie-iie!”
Lamatua Yesus peka na, nga tao ka Nèngu d'èi pake lii pakasame
9 Èle èèna ka, ana madhutu Yesus karèi sasoa nèti lii pakasame deo na.
10 Na dhaa, peka na, “Sèmi ne'e! Lula miu se d'èi madhutu dad'èi Ama Lamatua dènge d'ara kateme, nèti èèna ka Ja'a peka paled'a, ho miu me'a tasamia Lamatua neo paredha dhèu unu Na. Te ngaa dhèu leo ro'o boe pare'a dènge dad'èi Lamatua. Nèti èèna ka, Ja'a aj'a-nori si pake lii pakasame di. Te dhèu nèti lii padhai Lamatua dhu suri tèke le, peka na,
‘Rèngu se rèdhi le,
te ngaa ro'o boe re'a.
Rèngu tadèngi le,
te ngaa ro'o boe sèmi.”’b
Lamatua Yesus peka sasoa nèti hini deo sa
11 Hèia Yesus peka sasoa nèti lii pakasame ne, aku Nèngu na, “Hini se, nuka Lii Holo-Nori Ama Lamatua. 12 Hini dhu lèke ètu j'ara, nuka dhèu dhu nanene Lii Holo-Nori Ama Lamatua, te ngaa dhèu aae nidhu mai parame nare nèti d'ara rèngu. Dènge j'ara ne'e, rèngu parcaya boe Lamatua, aa abhu boe mamuri. 13 Hini dhu lèke dedha hadhu, nuka dhèu dhu nanene Lii Holo-Nori Ama Lamatua dènge d'ara karej'e. Te ngaa amo na marèma boe. Rèngu parcaya, te ngaa ropa paraga dènge j'aj'èra, rèngu manahu. 14 Hini dhu lèke era aj'u padhudhu, nuka dhèu dhu tadèngi, ka ra sèmi rare Lii Lolo Be'a. Te ngaa nare nèbhu boe, ka rèngu bhèlu eele Lii Lolo Be'a, lula rèngu bhute dènge laladhe sasab'a-la'a rèngu, mèdha-panyau rèngu, aa dènge neo mamuri karej'e di. Nèti èèna ka, parcaya rèngu dènge boe kab'ua ngaa-ngaa. 15 Te ngaa hini dhu lèke ètu dedha rai hèu mèngi, nuka dhèu dhu mamuri mola dènge d'ara hua iia. Ropa rèngu tadèngi Lii Lolo Be'a Ama Lamatua, rèngu sèle asa d'ara rèngu. Dènge j'ara ne, rèngu parcaya taa-taa, aa ad'u-ue j'ara dhu be'a.”
Lii upama nèti saguru labhu pake èru rai
16 Ka Yesus peka hari, na, “Abhu ètu mia, dhèu paheo rare labhu iiki, ho èèna na saguru dènge èru rai. Aa abhu ètu mia, dhèu tao labhu ètu ro'a koi. Te ladhe tao sèmi èèna, dhèu bisa boe rèdhi heo na. Labhu dhu guna, nuka padhèdi ètu era dedha, sèna ka heo na bisa pasaraa dhèu dhu maso mai.c 17 Èci èèna kahèi dènge aa'i-aa'i dhu pahuni limuri ne, bèli-camèd'a pasabhoka. Aa madha j'ara-madha j'ara dhu dhèu re'a boe limuri ne, èèna na dhèu bisa re'a mèu.d
18 De miu hud'i pangee paie-iie ku j'ara se'e. Dhèu dhu neo tenge tare'a-re'a dad'èi Lamatua, nèngu asa d'èlu-mèu. Te ngaa rèngu dhu pusi pahae boe dad'èi Lamatua, rèngu asa goa.”e
Cee ka dhu tare'a-re'a a'ari Lamatua Yesus?
19 Ca tèka, Yesus bhute dènge dhèu ae. Hèia ina dènge ari Na mai neo paraga dènge Ne. Te ngaa ra bisa boe lasi padètu, lula dhèu se, ae titu kèna. 20 Ka abhu dhèu la'e peka dènge Yesus, na, “Ama! Ina dènge ari Ama, ètu li'u sèi. Ra neo paraga dènge Ama.”
21 Ka Na dhaa, peka na, “Oo! Te ngaa sèmi ne'e. Ina dènge a'ari Ja'a, nuka rèngu dhu tare'a-re'a d'èi nanene Lii Lolo Be'a Ama Lamatua, aa tao madhutu.”
Lamatua Yesus pamau ngèlu aae
22 Ca lod'o, Yesus gale dhèu pajuu-paleha Na, aku Nèngu na, “Mai lati ka asa cabèka dano.” Ka ra ca'e koha cue, hèia pakèd'i lasi. 23 Ropa rèngu ètu talora dano, Yesus bhèj'i. Nèbhu boe cag'ag'a laa, ngèlu aae mai. Naha tèb'e koha, hèia èi maso sa d'ara, ka oe molo.
24 Ropa rèdhi sèmi èèna, hèia ana madhutu se parèi Ne, peka na, “Ama! Ama! Kèd'i ho tolong ku laa! Te èdhi madhe aa'i kèna!”
Ka Yesus kèd'i. Hèia Na kai ngèlu dènge naha, peka na, “Mau ka!” Kaca'a laa, ngèlu dènge naha mau dènge ka.
25 Hèia Na pasanèd'e ana-ana madhutu Na, aku Nèngu na, “Nga tao ka miu parcaya mèka Ja'a?”
Rèngu madha'u dènge malaa, ka ra pakarèi èci dènge èci, aku rèngu na, “Cee ka Yesus ne? Tasamia ka Nèngu bisa paredha ngèlu dènge naha, ka ra madhutu dad'èi Na?”
Lamatua Yesus babège eele nidhu nèti dhèu huj'u
26 Nèbhu boe rèngu d'ai rai Garasa, ètu sebhe dano Galilea.f 27-29 Ètu era ne'e, dhèu èci dhu nèbhu ae le, nidhu ae pahuj'u ne. Dhèu ne dènge boe èmu, ka na pea ètu era ro'a dhèu madhe. Bèli-bèli èèna kako la'e-mai, dhu pake boe mèdha-papake. Te nidhu sèra loe boe paredha ne. Dhèu dhu èki le pèri-pèri hari dènge rate aa pakanau ne dènge kanau bèsi, te ngaa na lèku èta si. Ka nidhu se laka-seti ne ho la'e asa era dhu kaliu.
Ropa Yesus si puru nèti dedha koha, ka dhèu huj'u ne mai asa Yesus. Hèia na pa'oo-parodha. Ka na pabèbhe iisi, aa na patitu kètu urutuu ètu haga Yesus. Hèia Yesus paredha nidhu sèra, aku Nèngu na, “Ee, nidhu! Rai eele nèti dhèu ne'e!”
Hèia dhèu huj'u ne pa'oo, peka na, “Baku gagu ja'a! Te ja'a ke'a Èu ne Yesus, Ana nèti Ama Lamatua dhu Dedha Risi Eele! Èu baku paj'èra ja'a!”
30 Ka Yesus karèi ne, “Ngara èu cee?”
Hèia nidhu se dhaa, aku rèngu na, “Legion, te ji'i se ae, sèmi sordad'u riho-riho.” Na lii sèmi èèna, lula nidhu se ae-ae dhu maso ètu d'ara ngi'u dhèu èèna.
31 Nidhu se loe boe pamako Yesus, sèna ka baku pua rèngu lasi asa d'ara Ro'a J'aj'èra, nuka era taha koasa bhabhelu-katub'a.
32 Te ngaa dhu padètu ètu èèna, hahi canau kateme dhu nyuu rai ètu sebhe ledhe. Ka nidhu se manèngi Yesus, peka na, “Pua la ji'i maso asa d'ara hahi sèi!” Hèia Yesus d'èi kahèi. 33 Ka nidhu se kalua ka nèti d'ara dhèu mone ne, lasi maso asa hahi. Hahi se aa'i-aa'i ra huj'u, ka ra rai paj'ala puru nèti sebhe ledhe ne, hèia caroco asa d'ara dano. Aa cène, ka madhe aa'i-aa'i ra.
34 Ropa rèdhi sèmi èèna, dhèu madhenge hahi se, rai lasi palème rae-rae ètu sèra, lolo aa'i-aa'i ngaa dhu j'aj'i. 35 Ropa dhèu ètu rae se tadèngi lii lolo se, ka lasi ae-ae sèna ka neo rèdhi unu ra tatao dhu j'aj'i le. D'ai era èèna, rèngu ladhe, na, dhèu dhu nidhu tao èèna, madhèdi mau-mau padètu ètu haga Yesus. Nèngu pake le mèdha-papake, aa na huj'u heka. Ladhe rèdhi sèmi ne'e, ka aa'i-aa'i ra j'aj'i madha'u. 36 Hèia dhèu-dhèu dhu ladhe rèdhi ngaa dhu j'aj'i ne, ra palolo dènge dhèu-dhèu dhu heka mai sèra, tasamia ka dhèu huj'u ne èle nèti papèd'a na. 37 Ka dhèu Garasa aa'i-aa'i ra manèngi Yesus ho tèke eele rai rèngu, te rèngu madha'u titu kèna.
Hèia Yesus si ca'e lasi asa dedha koha, sèna ka lèpa hari asa cabèka dano Galilea.
38 Te ngaa dhèu deo na dhu nidhu tao, loe boe pamako Yesus, aku nèngu na, “Ama! Hud'i laa ja'a madhutu Ama kahèi!”
Te ngaa Yesus dhaa ne, peka na, 39 “Sèmi ne'e ku laa! Be'a risi èu lèpa ka asa a'ari èu. Lamu lolo aa'i dènge ra, na, Ama Lamatua tao le j'ara dhu be'a hia èu.”
Hèia dhèu ne kako palème d'ara kota ne, na palolo dènge dhèu aa'i-aa'i ra, peka na, Yesus ka dhu pa'èle nèngu.
Lamatua Yesus pamamuri hari ana bhèni nèti Yairus, aa pa'èle bhèni èci dhu lèke papèd'a bhèni
40 Èle èèna ka, Yesus si lasi hari dènge koha asa cabèka dano Galilea. Lod'o rèngu puru nèti dedha koha, dhèu ae dhu mate mema le Yesus. Dhèu se mai ae-ae ho soru Ne. 41-42 Ètu ne'e abhu ca dhèu, ngara na Yairus. Nèngu kapala èmu manèngi-mangaj'i ètu d'ara kota ne. Ana na dhoka ca dhèu di; ana bhèni, umur na canguru dua tèu. Ana bhèni ne dhu pèd'a aae, oe madhe. Ropa Yairus nèdhi Yesus mai, hèia la'e patitu kètu urutuu na ètu madha Yesus. Na manèngi ho Yesus dhuli èmu na, sèna ka puri-pa'èle ana na.
Dhaa nare ka, Yesus madhutu dènge ne asa èmu na. Aa dhèu ae madhutu rèngu. Ka rèngu paseti èci dènge èci.
43 Abhu kahèi dhèu bhèni èci dhu kako dènge rèngu. Bhèni ne dhu lèke papèd'a dhèu bhèni dhu loe boe canguru dua tèu kèna. Doi-dhari dènge mèdha-panyau na èle aa'i le, ho b'ae dote-matarii. Te ngaa abhu boe dhu bisa puri-pa'èle ne. Papèd'a na asa na hoe.g 44 Ka na ara padètu-dètu asa Yesus nèti kabodho. Hèia na gai lèke suu kodho Yesus. Ropa na gai lèke kodho Yesus ne, hèia papèd'a na èle dènge ka.
45 Cag'ag'a laa, Yesus titu taha. Hèia Na karèi, peka na, “Cee ka dhu goi lèke Ja'a?”
Te ngaa abhu boe ca dhèu sa dhu mangaku. Ka Petrus b'ala, aku nèngu na, “Ama! Dhèu ae-ae ka dhu tao paseti aa patule-pajuku nèti kabodho. Sèmi ne'e ne, te'a na cee ka dhu goi lèke Ama!”
46 Te ngaa Yesus peka dènge ne, “Aad'o! Deo na Ja'a rasa abhu koasa dhu kalua nèti ngi'u Ja'a. De Ja'a ke'a, na, ca dhèu dhu sangaja gai Ja'a.”
47 Ropa bhèni ne ne'a, na, nèngu bisa boe pasili, hèia na madha'u titu kèna. Isi na rèbha-rèbha, ka la'e patitu kètu urutuu ètu madha Yesus. Hèia na lolo mi dhèu ae sèra, nga tao ka nèngu gai Yesus. Aa na lolo kahèi, na, ropa nèngu gai lèke Yesus, nèngu èle dènge nèti papèd'a na.
48 Hèia Yesus lii dènge ne, peka na, “Ana hèni! Èu èle nèti papèd'a, lula èu parcaya Ja'a. Lèpa ka dènge mera-milu!”
49 Lod'o Yesus padhai lii era dènge bhèni ne, ca dhèu nèti Yairus mai peka dènge ne, “Ama, ee! Ana ama aad'o heka. Na madhe le, de paj'èra ia ka Ama Mese.”
50 Te ngaa ropa Yesus tadèngi nare lii peka dhèu èèna, hèia Yesus lii dènge Yairus, “Mau-mau! Baku madha'u! Parcaya mi Ama Lamatua di. Nèngu ka dhu hia mamuri mi ana èu.”
51-53 Ropa rèngu d'ai èmu Yairus, dhèu ae le. Ra tangi dènge d'ara pèd'a. Ka Yesus kai si, peka na, “Ae eele ka tangi laa! Ana ne madhe boe. Dhoka na bhèj'i di!”
Te ngaa dhèu se pahae boe, ra mari pakapengo hèb'a, te rèngu rèdhi unu ra ana ne ma'ète a'ae. Hèia Yesus manèngi sèna ka ina-ama nèti ana bhèni ne, Petrus, Yohanis dènge Yakobis maso lasi palere-lere dènge Ne. Dhèu leo sèra, Na hia si mate ètu li'u.
54 Rare d'ara, ka Yesus kèpe ai ana ne, hèia Na paroa peka na, “Ana! Kèd'i ka!” 55 Cag'ag'a laa, ana ne mamuri hari, ka na kèd'i titu. Hèia Yesus lii dènge ina ana bhèni ne, na, “Hia ana ne na'a!” 56 Ina-ama ana ne malaa-maloha. Te ngaa Yesus pasanèd'e si, baku palolo dènge dhèu, ngaa dhu j'aj'i ne.