Ra pare pamadhe Yohanis tuka sarani
14
Tèu èèna, dhèu aae Herodes nèd'u paredha ètu propensi Galilea. Nèngu ne dhu tadèngi le kahèi rupa-rupa j'ara lula-nèti Yesus. 2 Na peka dènge dhèu sab'a na sèra, aku nèngu na, “Ele boe Yesus ne, nuka Yohanis tuka sarani, dhu ca hari ni ja'a pua dhèu poro rare kètu na. Limuri ne, na mamuri hari le! Nèti èèna ka, na abhu koasa, tao tadha-tadha malaa sèra.”3 Dhèu aae Herodes peka sèmi èèna, lula uru èèna nèngu dhu tao lii langu dènge Yohanis, toke na kèpe Yohanis aa pamaso asa d'ara bèdho. J'aj'aj'i lii langu ne, sèmi ne'e ka: dhèu aae Herodes leo nare dhèu èmu ari na Pelipus, ngara na Herodias. Aa te ngaa Pelipus dènge Herodias dhae pa'ia-pa'ela mèka. 4 Nèti èèna ka, Yohanis kai ne pahari-pahari, peka na, “Ama dhèu aae, baku paleo èmu dènge dhèu èmu ari mu. Te j'ara ne, pamèci boe dènge ad'a èdhi dhèu Yahudi!”a
5 Te ngaa Herodes dale boe lii kai na, hèia leo nare Herodias. Madhutu iia-iia na, Herodes neo pamadhe Yohanis tuka sarani. Te ngaa na madha'u dènge dhèu ae sèra, lula ra parcaya na, Yohanis ne, ca dhèu nèti lii padhai Ama Lamatua. Nèti èèna ka, na pua dhèu sab'a na pamaso Yohanis asa d'ara bèdho.
6 Te ngaa nèbhu-nèbhu, hèia Herodes tao pesta hari jadi na. Lod'o èèna, ana bhèni nèti bhèni aae Herodias la'e roge ètu madha tamu se. Na roge be'a titu kèna, toke d'ara Herodes karej'e bia. 7 Na roge nare, hèia Herodes paroa ne, ka na peka, “Èu neo manèngi hadia ngaa nèti ja'a, na peka la! Te èèna na ja'a hia èu. Ja'a leko boe-monya boe. Aa ja'a subha dènge kolongara Ama Lamatua.”
8 Ropa na tadèngi dhèu aae peka sèmi èèna, hèia ina na kakèj'i ne. Nèti èèna ka, ana ne la'e peka na, “Ama! Ja'a manèngi kètu nèti Yohanis tuka sarani. Tèke ne mi d'ara dula, ho rèti mai asa ne'e hia ja'a.”
9 Ropa tadèngi lii manèngi ana bhèni ne, hèia d'ara Herodes roe dènge. Te ngaa nèngu bisa boe ère nare hari lii subha na, te tamu aa'i-aa'i dhu tadèngi le. Nèti èèna ka, na madhutu dhoka dad'èi ana bhèni ne di. 10 Ka na paredha dhèu lasi poro rare kètu Yohanis ètu d'ara bèdho. 11 Ropa ra poro rare, hèia ra tèke mi d'ara dula ho rèti lasi hia mi ana bhèni ne. Ropa ana bhèni ne sèmi nare dula, hèia nèti asa ina na.
12 Lod'o ana madhutu Yohanis se tadèngi, ka mai rare ngi'u aae na, ho lasi padhane. Èle ka, lasi peka dènge Yesus j'ara dhu j'aj'i ne.
Lamatua Yesus panga'a lèmi riho risi dhèu
13 Lod'o Yesus tadèngi ngaa dhu j'aj'i mi Yohanis, hèia Nèngu dènge ana-ana madhutu Na tèke eele era èèna. Hèia ra ca'e koha, ho lasi asa era dhu dhèu pea boe, sèna ka ra ae rare ciki. Te ngaa dhèu ae ladhe rèdhi koha Yesus si dhu oro-oro re sebhe dano. Ka dhèu se mai nèti rae-rae, kako karohe-karohe re dedha rai. Nèti èèna ka, dhèu se d'ai uuru nèti Yesus si. 14 Ropa Na puru nèti dedha koha, hèia nèdhi dhèu ae-ae dhu mate le Nèngu. Ka Na rasa kasia mi rèngu. Hèia Na puri-pa'èle papèd'a-tarègu ra.
15 D'ai lod'o nihia, hèia ana madhutu Na, peka dènge Ne, “Ama! Hua iia Ama pua dhèu se, sèna ka lasi hèli nganga'a ètu rae-rae dhu padètu ètu se'e. Te lod'o nihia le! Ètu ne'e nganga'a aad'o.”
16 Te ngaa Yesus b'ala si, peka na, “Baku! Miu ka dhu panga'a si.”
17 Te ngaa ra dhaa, aku rèngu na, “Ira ee, Ama! Ji'i se dènge boe ngaa-ngaa, ho panga'a dhèu ae-ae sèmi ne'e ne. Ji'i tao tasamia? Te abhu dhoka roti lèmi bua di, aa i'a dua ngi'u di!”
18 Te ngaa Yesus lii, peka na, “Oo! Be'a kèna. Mèti ku mai!” 19 Ka Na pua dhèu se aa'i-aa'i ra madhèdi kaboko ètu dedha j'u'u. Èle èèna ka, Yesus nare roti lèmi bua dènge i'a dua ngi'u sèra. Hèia Na ladhe asa dedha, ho manèngi makasi mi Ama Lamatua. Èle ka, Na pamae roti se, hèia j'ole asa ana madhutu Na, sèna ka ra papala mi dhèu se aa'i-aa'i ra. 20 Ka dhèu se ra'a toke bècu. Ra'a rara, hèia ana madhutu se pakaboko rare dhu ata, pènu canguru dua soe. 21 Dhèu aa'i-aa'i dhu ra'a se, dhèu mone pe d'ai lèmi riho sa, iga mèka dhèu bhèni dènge ana iiki.
Lamatua Yesus kako re dedha èi
22 Ropa dhèu aa'i-aa'i se ra'a rare, hèia Yesus pua ana madhutu Na ca'e koha, sèna ka lasi uru asa cabèka dano. Te ngaa Nèngu ètu èèna era, sena ka pua dhèu se lèpa. 23 Ropa rèngu lèpa aa'i mèu-mèu, hèia Yesus ca'e la'e asa ledhe èci, ho sabaj'a. Toke mèda, Nèngu mesa Na ètu èèna era. 24 Lod'o èèna, koha ana madhutu Na d'ai le talora aae dano. Te ngaa rèngu tuku d'ai madhe, lula ngèlu nèti madha, aa naha kapai tatèb'e koha ra. 25 Oe d'ai mèu, hèia Yesus la'e madhutu si. Te ngaa Nèngu dhu kako re dedha èi. 26 Ropa ladhe rèdhi, ana madhutu se cag'ag'a, hèia ra padhai dènge lii madha'u, aku rèngu na, “Heeh! Nidhu kèna!”
27 Te ngaa Yesus lii dènge ra, peka na, “Miu baku madha'u! Te Ja'a ne, Yesus! Mau-mau la!”
28 Ropa ra tadèngi lii ne'e, hèia Petrus peka na, “Ladhe Ama kèna, pua la ja'a kako re dedha èi ne, dhiu asa Ama.”
29 Ka Yesus dhaa peka na, “Mai ka!” Hèia Petrus puru nèti dedha koha, la'e re dedha èi, asa Yesus. 30 Te ngaa ropa Petrus rasa na ngèlu aae, hèia na madha'u bia. Ka na mulai cène, hèia na pa'oo, aku nèngu na, “Ira oo, Ama, ee! Soru ku ja'a la!”
31 Yesus j'ole dènge ka kacui-aai Na, ka kèpe nare Petrus. Hèia Yesus padhai lii, aku Nèngu na, “Petrus, ee! Nga tao ka d'ara èu kajari? Èu parcaya èra boe mi Ja'a, do?”
32 Ka dua ra ca'e lasi asa dedha koha, hèia ngèlu mau dènge. 33 Ropa rèdhi sèmi èèna, ana madhutu Na koa-kio padedha-dedha Ne, peka na, “Ira ii! Ama ne, mema tare'a-re'a Ana Ama Lamatua!”
Lamatua Yesus puri-pa'èle dhèu-dhèu pèd'a ètu Genesaret
34 Ropa rèngu d'ai cabèka dano, hèia ra puru lasi asa dedha nebhe nèti rae Genesaret. 35 Lod'o ra puru èèna, dhèu ae dhu tadhe le. Hèia dhèu pa'oo, peka na, “Wee! Yesus mai le!” Ra rai lasi peka palème, hèia dhèu rèti dhèu pèd'a aa'i-aa'i. 36 Ra manèngi sèna ka ra goi lèke kodho Yesus. Te ra pangee na, “Sad'i dhèu pèd'a goi lèke suu kodho Na, tatu dhèu se èle dènge nèti papèd'a ra.” Ka dhèu dhu pèd'a aa'i-aa'i se goi kodho Yesus, ka ra èle dènge nèti papèd'a.