2 Te ngaa Yesus b'ala, peka na, “Ladhe èdhi tèdhi liru mea ropa lod'o cèna, èdhi te'a, na, ‘Bèli èj'i mai boe.’ 3 Aa ladhe lod'o rea, aa liru mèdhi, na èdhi te'a, na, ‘Doe ne'e, oe èj'i.’ De ladhe miu bisa patadhe mere tadha ètu liru sèmi sèra, nga tao ka miu bisa boe patadhe mere sasoa nèti tadha-tadha jaman? 4 Miu dhèu lod'o limuri ne, me'a dhodhoka ad'u-ue bhabhelu di! Miu pusi-pahae boe Ama Lamatua! Masi ka miu manèngi tadha malaa, te ngaa Ja'a dale boe tao. Lula uru èèna, Lamatua dhu tao le tadha malaa re Yunus, ca dhèu nèti lii padhai Ama Lamatua. De èèna d'ai le!” Ropa padhai lii nare, hèia Yesus tèke eele si.^b

5 Ropa Yesus si lasi asa ca bèka dano, hèia ana madhutu Na, heka sanèd'e, na, rèngu rèti boe roti tao gee j'ara. 6 Tadèngi rèngu padhai lii sèmi èèna, hèia Na peka na, “Miu baku pamud'e dènge ragi dhèu Parisi dènge dhèu Saduki.”^c

7 Ropa tadèngi rare, hèia ana madhutu Na bingu, ka ra peka, “Na peka ngaa nèi? Ele boe ne'a na, èdhi tèti boe roti, sina ma?”

8 Te ngaa Yesus ne'a ngangee rèngu. Ka Na padhai lii, aku Nèngu na, “Wee, miu seli-kolane, nga! Nga tao ka miu padhue dhoka roti di! Miu parcaya boe Ja'a, do? 9 Miu dhae me'a iia mèka koasa Ja'a, do? Te lod'o Ja'a pamae lèmi bua roti ho panga'a lèmi riho dhèu sèra, dhu sisa, miu pakaboko mere pèri soe?^d 10 Aa tasamia hari dènge roti pidhu bua dhu Ja'a panga'a èpa riho dhèu sèra? Abhu pèri soe hahake dhu miu pakaboko nèti dhu ra'a risi sèra?^e 11 Nga tao ka miu mo'o boe me'a dènge lii padhai Ja'a deo na? Ja'a padhue-padhai boe lula roti. Te Ja'a neo pasanèd'e miu, sèna ka miu baku pamud'e dènge tatao dhèu Parisi dènge dhèu Saduki. Te lii aj'a-nori ra bisa ère rare dhèu ae, nuka sèmi ragi dhu tao roti j'aj'i kapai.”

12 Ropa Yesus padhai lii sèmi èèna, hèia heka rèngu re'a kèna, na Nèngu peka boe roti. Te ngaa Na padhue-padhai nèti a'aj'a dhu sale nèti dhèu Parisi dènge dhèu Saduki.

13 Èle, hèia Yesus si lasi asa rai dhu padètu dènge kota Kaisarea Pilipi. Ètu talora j'ara, Na karèi ana madhutu Na, aku Nèngu na, “Madhutu lii papeka dhèu, Ja'a, Dhèu Rai-haha Tare'a-re'a ne, cee?”

14 Ra dhaa, peka na, “Abhu dhu peka na, Ama ne, Yohanis tuka sarani dhu mamuri hari. Cahag'e peka na, ele boe Ama ne, Elia. Cahag'e hari ale na, Yermia. Ladhe aad'o, na, ca dhèu leo nèti dhèu rèti lii padhai Ama Lamatua uru-uru sèra.”^f

15 Ka Yesus karèi hari si, “Ladhe madhutu miu mesa mi, Ja'a ne, cee?”

16 Hèia Simon Petrus dhaa, aku nèngu na, “Ama ne, Kristus, nuka Dhèu dhu uru èèna Ama Lamatua pajaji tèke ho neo hia mai! Aa Ama ne, Ana Ama Lamatua dhu mamuri toke d'ai mia-mia!”^g

17 Èle èèna ka, Yesus lii, peka na, “Simon, ana Yunus! Èu ne, oto kapai! Te nèti boe dhèu rai-haha dhu peka lii ne'e dènge èu. Te ngaa Ama Ku ètu sorga ka peka dènge èu. 18 Nanene, ee! Karèi nèti deo ne'e ne, Ja'a pangare èu, ‘Petrus’. Dhu sasoa na, hadhu.^h Lula parcaya èu, èra sèmi hadhu, èèna na èu j'aj'i era padhèdi nèti dhèu-dhèu Ja'a dhu parcaya. Masi ka rèngu abhu j'aj'èra toke madhe, te ngaa rèngu taha taruu. 19 Ja'a èèna na hia èu hak, sèna ka èu uri dhèu-dhèu Ja'a, nuka sèmi èu mèd'u gagoe sorga. Te, ngaa dhu èu kai ètu rai-haha, èèna na Lamatua kai ètu sorga kahèi. Dènge ngaa dhu èu hia isin ètu rai-haha ne, Lamatua hia le isin ètu sorga kahèi.”ⁱ

20 Padhai lii nare sèmi èèna, ka Yesus kai si ho rèngu baku peka dènge dhèu, na, Nèngu ne, Kristus.

21 Karèi nèti lod'o èèna, Yesus peka dènge ana madhutu Na sèra, aku Nèngu na, “Ja'a hud'i laku ku asa Yerusalem. Te ngaa ètu nèi, Ja'a abhu j'aj'èra ae-ae, nèti dhèu heka-dhèu heka ad'a, kètu agama Yahudi dènge mese agama sèra. Èèna na ra pamadhe Ja'a, te ngaa camèd'a èèna, Ja'a mamuri hari.”

22 Ropa Yesus padhai lii nare, hèia Petrus ère nare Yesus asa karasa, ka na kai, aku nèngu na, “Ama, baku padhai lii sèmi èèna! Tatu Ama Lamatua soro tèke boe j'ara ne j'aj'i!”

23 Te ngaa lii padhai Petrus ne, madhutu boe dad'èi Lamatua. Nèti èèna ka, Yesus kabib'a, ka jèke ne, peka na, “Heh! Pakaj'èu nèti ne'e! Lii padhai èèna nèti dhèu aae nidhu! Èu baku bhabhae Ja'a! Èu ne dhodhoka pangee madhutu dad'èi dhèu rai-haha di, te ngaa madhutu boe dad'èi Ama Lamatua!”

24 Èle èèna ka, hèia Yesus aj'a ana madhutu Na sèra, aku Nèngu na, “Dhèu dhu neo madhutu Ja'a, nèngu hud'i taha taruu ku bèli-bèli! Nèngu hud'i pa'uru ku dad'èi Ama Lamatua, aa pabhèlu eele dad'èi nèngu unu na. Masi ka dhèu neo pamadhe ne, nèngu hud'i madhutu Ja'a taruu, sama sèmi dhèu pasae aj'u palolo-palèbha na, la'e asa era mamadhe na.^j 25 Te dhèu dhu sadia madhe lula na madhutu Ja'a, bèli-camèd'a nèngu abhu mamuri taruu dènge Ama Lamatua. Te ngaa dhèu dhu d'èi dhoka mamuri hia ngi'u aae na di, èèna na mamuri nèngu ele iie d'ara!^k 26 Nanene paie-iie! Ladhe èu abhu aa'i isi rai-haha ne, te ngaa ladhe Lamatua core eele èu, a'oto na ètu mia? Masi ka èu pasae mèti aa'i isi rai-haha ne, èu bisa boe pasilu dènge samanga èu!

27 Ja'a peka mema dènge miu j'ara aa'i-aa'i ra, lula Ja'a ne, Dhèu Rai-haha Tare'a-re'a. Bèli-camèd'a Ja'a mai hari dènge dadedha nèti Ama Ku, palere-lere dènge ana pajuu Na nèti sorga. Lod'o èèna, pe Ja'a b'ala mi ca dhèu-ca dhèu madhutu tatao ra.^l 28 Sanèd'e paie! Nèti miu aa'i-aa'i se, bèli-camèd'a abhu cahag'e dhu madhe boe, toke ra rèdhi Ja'a, nuka Dhèu Rai-haha Tare'a-re'a ne, j'aj'i Dhèu Aae dhu kèd'u paredha.”