Lamatua Yesus puri-pa'èle ca dhèu pèd'a kusta
8
Lod'o Yesus puru nèti ledhe, hèia dhèu ae-ae lasi madhutu Ne. 2 Kabèdhi laa, ca dhèu dhu pèd'a kusta mai paraga dènge Ne. Hèia na patitu kètu urutuu ètu madha Yesus, ho manèngi, aku nèngu na, “Lamatua! Sue ku ja'a la! Ladhe mo'o, na, puri ku papèd'a ja'a ne, sèna ka dhèu madenge ia ka dènge ja'a, aa ja'a bisa hari sabaj'a ètu d'ara èmu manèngi-mangaj'i.”3 Ropa tadèngi nare, hèia Yesus j'ole kacui-aai Na ka Na g'ag'e dhèu ne, hèia Na lii, aku Nèngu na, “Ja'a ko'o! Èu èle kèna!” Kabèdhi la, èi papèd'a dhèu ne èle dènge ka. 4 Hèia Yesus peka dènge ne, “Sanèd'e paie! Èu èle le nèti papèd'a-tarègu, te ngaa baku èu lolo dènge dhèu èci sa. Aa èu hud'i madhutu ku atora Musa. De lamu asa ama agama ho na parisa ngi'u èu, sèna ka ne'a na èi papèd'a mu ele le, tare'a, do dhae. Èle na, èu hia persembahan tadha makasi, sèna ka dhèu re'a, na, èu ne èle tare'a-re'a le nèti papèd'a.”a
Lamatua Yesus puri-pa'èle ana sab'a èci nèti komedhaa sordad'u Roma
5 Èle èèna, hèia Yesus maso asa d'ara rae Kapernaum. Ètu era ne'e, komedhaa sordad'u Roma ca dhèu, mai manèngi ho Yesus soru-bara ne, aku nèngu na, 6 “Ama! Ana sab'a ja'a ca dhèu, pèd'a aae, ka na j'èra titu kèna ètu èmu. Na bisa boe puru nèti era j'unu na.”
7 Ka Yesus dhaa, peka na, “Oo! Pe Ja'a dhiu puri-pa'èle ne.”
8 Te ngaa komedhaa ne b'ala, aku nèngu na, “Ama! Ama roca ia ka mai asa èmu ja'a, lula ja'a nia boe sèmi Ama asa d'ara èmu ja'a. Sad'i Ama ku peka dhoka lii ca hèb'a di nèti ne'e, tatu ana sab'a ja'a ne èle dènge nèti papèd'a. 9 Ja'a ke'a j'ara ne, lula ja'a dènge dhèu paredha dedha kahèi, dhu dènge koasa ho paredha ja'a. Aa ja'a dènge koasa kahèi, sèna ka paredha sordad'u ja'a sèra. Ladhe ja'a pua, peka na, ‘Lamu sa nèi!’ tatu na la'e dènge. Aa ladhe ja'a peka, ‘Mai asa ne'e!’ tatu na mai. Aa ladhe ja'a paleha dhèu sab'a ja'a, peka na, ‘Sab'a ne'e!’ tatu na tao madhutu. De sad'i Ama ku lii di, tatu ana sab'a ja'a èèna, èle dènge nèti papèd'a na.”
10 Ropa Yesus tadèngi nare, hèia Na malaa. Ka Na padhai lii dènge dhèu ae sèra, aku Nèngu na, “Nèbhu nare sange ne'e, Ja'a dhae paraga kèdhi mèka dènge ca dhèu sa nèti dhèu Yahudi dhu lèka èra sama sèmi dhèu Roma ne! 11 Nanene paie-iie! Te bèli-camèd'a dhèu leo rai kara ae-ae, nuka sèmi dhèu Roma ne, mai nèti haa, nèti dhimu, ho madhèdi ra'a-rinu mei èci dènge Abraham, Isak dènge Yakob ètu d'ara èmu Ama Lamatua ètu sorga.b 12 Masi ka Lamatua dhu hag'e nare le dhèu Yahudi, sena ka j'aj'i dhèu unu Na, te ngaa ae ka dhu pusi-pahae boe Ne. Èèna na, Lamatua tule eele si asa era dhu maroga kiu-kiu. Ètu era ne'e, ra tangi roma iisi d'ara pèd'a, aa ra j'èra titu kèna.”c
13 Padhai lii nare, hèia Yesus peka dènge komedhaa ne, “Lèpa ka. Te ana sab'a èu èèna èle le, madhutu sèmi parcaya èu ne.” Ka lod'o dhu Na padhai èèna, ana ne èle dènge ka.
Lamatua Yesus puri-pa'èle dhèu pèd'a ae-ae
14 Ca tèka, Yesus la'e asa èmu Petrus. Na ladhe nèdhi ina dhèu èmu Petrus dhu j'unu ètu dedha koi, dhu pèd'a maringi-sagoro. 15 Ka Yesus kèpe kacui-aai na, hèia ina ne èle nèti papèd'a na. Hèia na kèd'i, ka la'e lalau nganga'a hia Yesus si.
16 Ropa lod'o oe cèna, hèia dhèu sèra mai rèti dhèu rèngu dhu nidhu tao. Hèia Na paredha nidhu se, peka na, “Eee, nidhu! Rai pakaj'èu nèti ne'e!” Hèia nidhu se kalua dènge ka. Na puri-pa'èle kahèi dhèu aa'i-aa'i nèti papèd'a-tarègu ra. 17 Na tao j'ara se, ho pamèci dènge lii dhèu nèti lii padhai Ama Lamatua, ngara na Yesaya, dhu suri tèke le, peka na,
“Na puri-pa'èle papèd'a-tarègu èdhi.
Aa pasae nare j'aj'èra èdhi.”d
Dhèu dhu neo madhutu Lamatua Yesus hud'i madhutu ku dènge d'ara kateme
18 Èle èèna ka, Yesus nèdhi dhèu ae-ae mai kalibhu rare Ne. Hèia Na peka dènge ana-ana madhutu Na, aku Nèngu na, “Mai pakèd'i lati asa cabèka dano.”
19 Hèia mese agama ca dhèu mai, padhai lii dènge Ne, peka na, “Ama Mese! Sad'i Ama asa mia èèna ka, ja'a bera-bera dènge Ama!”
20 Ka Yesus dhaa, peka na, “Be'a kahèi do! Te ngaa sanèd'e. Dhèu rai-haha aa badha-manu aa'i-aa'i, dhu dènge era pea-palu'u. Busa hui lèpa asa ro'a na. Manu-bhui la'e asa rèd'a na. Te ngaa Ja'a Dhèu Rai-haha Tare'a-re'a ne dènge boe era pea-palu'u. Nanèlu ho bane kètu dènge boe kahèi.”
21 Èle ka, dhèu èci hari mai peka dènge Yesus, na, “Ama! Ja'a neo madhutu Ama, te ngaa hud'i ja'a ladhe-leru ku ina-ama ja'a. Ladhe ama ku madhe, ho padhane kore, heka ja'a madhutu kèna.”
22 Te ngaa Yesus padhai lii, peka na, “Sèmi ne'e! Hud'i laa dhèu leo dhu parcaya boe Lamatua padhane dhèu madhe. Te ladhe èu neo madhutu Ja'a, na, madhutu la dènge d'ara kateme!”
Lamatua Yesus pamau ngèlu aae
23 Èle èèna ka, Yesus ca'e asa dedha koha, palere dènge ana-ana madhutu Na. 24 Ropa rèngu ètu talora dano era, Yesus bhèj'i. Kaca'a laa, ngèlu aae mai. Naha aae tèb'e koha ne, toke èi maso asa d'ara. 25 Ropa ladhe rèdhi sèmi èèna, hèia ana madhutu se lasi parèi Yesus, aku rèngu na, “Ama! Ama! Kèd'i ku la! Bara ku ji'i, te èdhi molo madhe aa'i ti kèna!”
26 Hèia Yesus dhaa, peka na, “Wee! Nga tao ka miu se madha'u sèmi ne'e ne? Miu parcaya boe Ja'a, do?” Ka Na kèd'i. Èle ka Na kai ngèlu dènge naha ètu d'ara dano ne, peka na, “Mau ka!” Hèia naha dènge ngèlu mau dènge ka.
27 Ka ana madhutu Yesus se malaa-maloha. Ra papeka na, “Ira ii! Cee ka Dhèu ne'e ne? Tasamia ka Na bisa paredha ngèlu dènge naha, ka madhutu dad'èi Na?”
Lamatua Yesus pa'èle dhèu dua dhu nidhu tao
28 Nèbhu boe ka rèngu d'ai cabèka dano, ètu rai Gad'ara.e Ètu era nèi, abhu dhèu dua dhu nidhu tao. Rèngu pea ètu era ro'a dhèu madhe. Dua ra se'e bhelu titu kèna, toke abhu boe ca dhèu sa hèi dhu bani kako re era èèna. Ropa rèdhi Yesus mai, hèia 29 ra pa'oo, peka na, “We, Ana Ama Lamatua! Nga tao ka Èu mai gagu ji'i se? Masi ka d'ai mèka lod'o ho hia hahuku mi ji'i, te ngaa Èu mai le ho neo paj'èra ji'i!”
30 Kaj'èu boe ètu era èèna, abhu hahi canau dhu nyuu rai, tenge nganga'a. 31 Hèia nidhu se manèngi Yesus, aku rèngu na, “Ladhe babèga eele ji'i, na, pua la ji'i maso asa d'ara hahi sèi!”
32 Hèia Yesus paredha nidhu se, peka na, “Lami ka!” Hèia nidhu kalua tèke eele dhèu dua se, lasi maso asa d'ara hahi deo sa. Ka hahi se rai paceb'a re sebhe ledhe ka manahu asa d'ara dano, hèia ra cèna, ka madhe aa'i si.