2 Hèia Yesus paroa nare ana iiki èci, mai patitu asa talora aae rèngu. 3 Ka Na peka dènge ra, “Nanene paie-iie! Dhèu dhu neo j'aj'i dhèu unu Lamatua, rèngu hud'i ub'a ngangee ra, ho j'aj'i sama sèmi ana iiki dhu ne'a boe padedha iisi.^b 4 Lula dhèu dhu ne'a pahaha iisi sama sèmi ana iiki ne, nèngu èèna ka dhu kapai risi ètu madha Ama Lamatua. 5 Aa dhèu dhu sèmi nare dhèu haha nuka sèmi ana iiki ne, lula na parcaya Ja'a, na, nèngu sèmi nare le Ja'a ne.”

6 Èle èèna ka, Yesus padhai lii hari, peka na, “Ladhe abhu dhèu dhu tao ana iiki sèna ka madhutu j'ara dhu sale, toke ana ne parcaya heka Ja'a, na, mata unu na! Be'a risi dhèu èki hadhu aae cue,^c mi ladha goro na, ho pacène ne asa d'ara dhasi marèma. 7 Rai-haha ne mema era dhu pènu dènge dhudhu-sete, lula abhu j'ara ae dhu pamanahu dhèu asa d'ara sasala-sasigo. Te ngaa dhèu dhu dui babia risi, nuka dhèu dhu tenge-tenge j'ara ho soro dhèu asa d'ara sasala.

8 Ladhe èu tao sala, pake kacui-aai èu, do, haga èu, na, poro eele ne! Te be'a risi èu maso asa d'ara sorga dènge ai cabèka, do, haga calaa. Mage dhoka ra core èu asa d'ara ai naraka, dènge ai do haga dhu tesa.^d 9 Ladhe èu tao sala, pake musi madha èu, na, cèru eele ne! Te be'a risi èu maso asa d'ara sorga dènge musi madha cabèka. Mage dhoka ra core èu asa d'ara ai naraka, dènge musi madha dhu tesa.”^e

10 Ka Yesus tuhu hari lii Na, aku Nèngu na, “Sanèd'e, ee! Baku mi pahaha ana iiki sèmi se'e se. Te abhu ana pajuu Ama Lamatua nèti sorga dhu madhenga si. Aa ana pajuu se dhu lasi taruu, peka dènge Ama Lamatua ngaa-ngaa dhu j'aj'i mi ana se.

11-13 Mi pangee paie-iie, te Ja'a hia lii pakasame èci sèmi ne'e ka: abhu dhèu èci dhu kahib'i-kalèbho na, cangasu ngi'u. Ca lod'o, ci'u nèti kahib'i-kalèbho se, kako sala j'ara. Madhutu ngangee miu, dhèu madhenga ne tao tasamia? Tatu na tèke eele ceo nguru ceo ngi'u sèra ètu ledhe, ho la'e tenge ci'u dhu ele ne.^f

Ladhe na abhu hari, tatu na karej'e, ropa na ladhe nèdhi ci'u ne, risi nèti kahib'i-kalèbho na ceo nguru ceo ngi'u dhu ele boe sèra. [Ja'a, Dhèu Rai-haha Tare'a-re'a ne, mai ho hia mamuri mi dhèu dhu kako sale nèti j'ara dhu mola.]^g 14 Te, masi ka ana iiki ca dhèu di dhu kako sala j'ara, te ngaa Ama Ku ètu sorga d'èi boe kahèi.”

15 Yesus lii hari, aku Nèngu na, “Ladhe a'ari èu dhèu parcaya tao sale mi èu, na, èu mesa mu lamu paraga dènge ne. Ladhe miu dua mi mesa mi, heka èu peka sasala nèngu kèna. Ladhe na sèmi nare lii padhai èu, na, miu dua mi pabe'a hari le kèna.^h 16 Te ngaa ladhe no'o boe sèmi nare lii padhai èu, lamu paroa more angalai mu ca dhèu do dua dhèu, ho lami paraga dènge ne, sèna ka padhai lii hari. Te ètu d'ara Sasuri Mola-Mèci Ama Lamatua dhu suri tèke, peka na, ‘Ètu d'ara lii langu èci, hud'i abhu ku dua-tèlu sakasii dhu lii èci, heka sèmi rare lii galaa ra.’ⁱ 17 Te ngaa ladhe no'o boe nanene lii miu, lami lole dènge juma'at. Aa ladhe na d'èi boe nanene lii juma'at kahèi, tao ne nuka sèmi ca dhèu dhu tadhe boe Lamatua. Ladhe aad'o na, cap ne nuka sèmi dhèu bhelu, conto sèmi dhèu roro bea sèra.

18 Sanèd'e paie-iie lii padhai Ja'a ne! Ngaa dhu miu oro ètu rai-haha ne, èèna ka dhu Lamatua oro le ètu sorga. Aa ngaa dhu miu hia isin ètu rai-haha ne, èèna ka Lamatua hia le isin ètu sorga kahèi.^j

19 Aa Ja'a peka hari, na, ladhe abhu dhèu dua dhu sabaj'a dènge d'ara èci, pe Ama Ku ètu sorga hia ngaa dhu ra manèngi. 20 Te, ladhe abhu dua, do tèlu dhèu, pakaboko sabaj'a sama-sama, lula rèngu dhèu Ja'a, na, Ja'a ètu talora aae rèngu kahèi.”

21 Èle èèna, ka Petrus karèi Yesus, aku nèngu na, “Ama, ja'a neo karèi ciki. Ladhe a'ari ja'a tao sale pahari-pahari mi ja'a, èèna na d'ai pèri hari ja'a hud'i hia ne abho? D'ai pidhu hari, do?”

22 Hèia Yesus dhaa, peka na, “Aad'o! Èu hud'i abho ne pidhu kali pidhu nguru hari,^k toke èu ige more heka.^l 23 Miu hud'i tao ku sèmi èèna, lula Ama Lamatua nuka sèmi dhèu aae dhu ige kèlu na ètu pegawi na. 24 Ropa na ige nare, hèia na pua dhèu lasi paroa pegawi dhu pakèlu toke riho kehi.^m 25 Te ngaa pegawi ne b'ae nare boe kèlu na. Ka dhèu aae paredha, peka na, ‘Lami pahie eele dhèu ne dènge bhèni-ana niki na aa'i-aa'i, sèna ka ra j'aj'i ènu. Aa mèdha-panyau na, pahie aa'i kahèi, ho b'ae kèlu-g'ètu na.’

26 Ropa pegawi ne tadèngi nare, hèia na pabèbha iisi, ho patitu kètu urutuu ètu madha dhèu aae, ka pamako, aku nèngu na, ‘Ira ee! Ama dhèu aae hia ja'a tebho d'ai ciki sa! Sèna ka ja'a b'ae kèlu ja'a aa'i-aa'i ra.’ 27 Ropa tadèngi, hèia dhèu aae rasa kasia dènge ne. Ka dhèu aae pabhèlu eele aa'i mèu-mèu kèlu na, ka pua na lèpa.

28 Te ngaa ropa na d'ai li'u, hèia pegawi ne paraga dènge angalai na dhu pakèlu nèngu doi ciki di.ⁿ Ka na kèpe angalai ne, hèia pacèli ladha goro na, aa na jèke ne, aku nèngu na, ‘Weh! B'ae ka d'ara lai-lai ne kèlu èu sèra!’

29 Ropa angalai na tadèngi, hèia na patitu kètu urutuu, ka pamako ne, peka na, ‘Ira ee! Angalai, ee! Hia ku ja'a tebho d'ai ciki sa! Pe ja'a b'ae kèlu ja'a sèra!’

30 Te ngaa pegawi ne peka na, ‘Bisa boe! Ja'a mate heka panèbhu. Èu b'ae dènge ka lod'o doe ne'e kahèi!’ Èle ka, la'e pamaso angalai na asa d'ara bèdho, toke na b'ae aa'i kèlu na. 31 Ropa pegawi dhu leo ladhe rèdhi ngaa dhu j'aj'i ne, hèia d'ara ra susa. Ka lasi lolo dènge dhèu aae.

32 Ropa tadèngi nare, hèia dhèu aae ne paroa pegawi dhu ne'a boe manèngi makasi ne. Dhèu aae jèke ne, aku nèngu na, ‘Heh, dhèu bhelu-katub'a! Lula èu ne manèngi sèna ka ja'a sue èu, nèti èèna ka ja'a pabhèlu eele le kèlu èu sèra. 33 Te ngaa, nga tao ka èu kasia boe angalai èu sa hèi, sama sèmi ja'a kasia èu ne?’ 34 Ka dhèu aae nasa bia dènge ne, hèia na pua pamaso dhèu ne asa d'ara bèdho, sèna ka ra paj'èra ne, toke na b'ae aa'i kèlu na sèra.”

35 Hèia Yesus pa'èle lii pakasame Na, peka na, “Ama Ku ètu sorga pa'iga sèmi èèna kahèi mi dedha miu. Pe Na huku miu, ladhe miu mo'o boe pabhèlu eele sasala nèti a'ari miu dhèu parcaya sèra.”