Ama Lamatua pad'elo dadedha Lamatua Yesus
17
Èle èna lod'o, ka Yesus paroa Petrus, Yakobis dènge ari na Yohanis, sèna ka lasi asa ledhe dhu dedha èci, ho pea mesa ra ètu nèi. 2 D'ai nèi, ra ladhe na, rupa Yesus leko-leo. Rèhu Na kaha'a nuka sèmi madha lod'o, aa mèdha-papake Na j'aj'i pudhi kale'e. 3 Kaca'a la, rèngu ladhe rèdhi Yesus dhu padhai lii dènge Musa dènge Elia. 4 Hèia Petrus bingu, ka na padhai lii leli, aku nèngu na, “Ama! Ji'i karej'e titu kèna ètu era ne'e ne! De be'a risi ji'i patitu paleo tèlu bua. Cue hia Ama, cue hia Musa, aa cue hari hia Elia.”5 Lod'o Petrus padhai lii sèmi èèna era, cag'ag'a laa, ra'i-liru puru mai sarimu nare rèngu. Hèia rèngu malaa-maloha tadèngi lii èci dhu kalua nèti d'ara ra'i-liru ne, peka na, “Nanene! Yesus ne, Ana pasue Ja'a. Nèngu ne'e ka dhu pakarej'e taruu d'ara Ja'a. Nanene Ne paie-iie!”a
6 Ropa tadèngi lii ne, hèia ana madhutu Na madha'u titu kèna, ka ra bèbha sagèb'a ètu rai. 7 Te ngaa Yesus mai gai si, ka Na peka na, “Mi kèd'i ka, baku madha'u!” 8 Ka ana madhutu se boti kètu ra, te ngaa ra ladhe rèdhi heka dhèu èci sa ètu era èèna, dhoka Yesus di.
9 Èle ka, ra puru nèti ledhe ne. Hèia Yesus kai si, aku Nèngu na, “Ngaa dhu heka ladhe mèdhi deo na, mage peka dènge dhèu èci sa kahèi! Te Ja'a Dhèu Rai-haha Tare'a-re'a ne, hud'i madhe uuru ku. Èle èèna, ladhe Ja'a mamuri hari, heka miu lole dènge dhèu kèna.”
10 Hèia ra karèi Ne, aku rèngu na, “Ama ne mema Kristus, te ngaa Elia ètu mia? Te mese agama se aj'a, peka na, Elia hud'i mai uuru ku, èle èèna, heka Kristus mai kèna. Te ngaa madhutu Ama, tasamia?”b
11 Ka Yesus dhaa, aku Nèngu na, “Mema lèke. Elia hud'i mai uuru ku, ho bhoke j'ara hia Kristus. 12 Nanene paie! Elia mai le, te ngaa dhèu tadhe boe ne. Rèngu paj'èra ne, madhutu dad'èi ra. Sèmi èèna kahèi, bèli-camèd'a rèngu paj'èra Ja'a, Dhèu Rai-haha Tare'a-re'a ne.”c
13 Ropa ra tadèngi rare, ana madhutu Na heka re'a, na, Elia dhu Yesus peka ne, nuka Yohanis tuka sarani.
Lamatua Yesus pa'èle ana èci dhu nidhu tao
14 Èle ka, ropa rèngu lèpa, paraga dènge dhèu ae dhu mate le. Hèia ama ca dhèu mai patitu kètu urutuu, ka na manèngi Yesus, 15 na peka, “Ama! Sue ku ana ja'a la! Te nèngu dhu huj'u kahib'i, aa na j'èra titu kèna. Ladhe èi papèd'a ne cèu, na bèbhe sa d'ara èi, do d'ara ai. Ama sue ku la! 16 Ana ne, ja'a kèti le asa ana-ana madhutu Ama ku, te ngaa ra tao rare boe ne.”
17 Ropa Na tadèngi sèmi èèna, hèia Yesus jèke ana madhutu Na sèra, aku Nèngu na, “Heh! Miu se seli-kolane! Ja'a aj'a le miu pahari-pahari, te ngaa miu me'a mèu boe. Aa miu parcaya boe Ja'a dènge d'ara kateme. Ja'a hud'i mate hari ku miu, d'ai pèri lod'o? Mèti ana èèna mai!”
18 Hèia, rèti ana ne, ka Yesus babège eele nidhu nèti ana ne'e. Ka nidhu rai tèke eele ne, hèia ana ne èle dènge ka.
19 Èle èèna ka, ropa Yesus mesa Na dènge ana madhutu sèra, ka ra karèi Ne, peka na, “Ama! Nga tao ka ji'i bisa boe babège ngare nidhu deo na?”
20 Ka Yesus dhaa, na, “Miu babège mere boe, lula miu parcaya boe dènge d'ara kateme. Sanèd'e! Ladhe miu parcaya Ja'a tare'a-re'a, masi ka ciki oo'e èèna ka sama sèmi lamusi ana iiki-iiki èci,d miu bisa paredha ledhe èci, peka na, ‘Hee ledhe, hari sa nèi, lamu!’ Tatu na hari kahèi. De miu bisa tao ngaa èèna ka, sad'i parcaya dènge d'ara kateme.e 21 [Te ngaa sanèd'e! Nidhu sèmi se'e se, mema bhelu titu kèna. Ladhe miu sabaj'a boe aa puasa boe, ho manèngi mi Ama Lamatua, na, miu babège mere boe nidhu sèmi sèra.”]f
Lamatua Yesus peka dua hari kèna, lula-nèti mamadhe Na
(Markus 9:30-32; Lukas 9:43b-45)
22 Ca lod'o, Yesus dènge ana madhutu Na dhu pakaboko ètu propensi Galilea. Na peka dènge rèngu, na, “Nèbhu heka, te ra neo pahie Ja'a asa dhèu leo rai kara. 23 Hèia ra pamadhe Ja'a, Dhèu Rai-haha Tare'a-re'a ne. Mema tare'a Ja'a madhe, te ngaa asa camèd'a Ja'a mamuri hari.”
Ropa ana madhutu Na sèra tadèngi lii deo na, hèia d'ara ra susa titu kèna.
Lamatua Yesus peka-padhai lula-nèti b'ae bea èmu sabaj'a
24 Lod'o Yesus dènge ana madhutu Na lasi asa rae Kapernaum, hèia dhèu roro bea mai paraga dènge Petrus, ka ra karèi ne, na, “Mese miu b'ae bea Èmu Kapua Manèngi-Mangaj'i do, aad'o?”g
25 Hèia Petrus dhaa, “Na b'ae!”
Ropa Petrus lepa, ka Yesus karèi dènge ka, aku Nèngu na, “Simon, èu pangee ku la! Dhèu aae-dhèu aae ètu rai-haha ne abhu bea nèti cee? Nèti ana matana ra, do, nèti dhèu leo?”
26 Petrus dhaa, na, “Nèti dhèu leo!”
Ka Yesus tuhu lii padhai Na, peka na, “Ladhe sèmi èèna, ana dhèu aae di dhu b'ae boe, si? 27 Sèmi èèna kahèi dènge bea Èmu Kapua Manèngi-Mangaj'i. Te ngaa hud'i laa, sèna ka dhèu roro bea se baku nasa dènge èdhi. De be'a risi lamu madulu i'a asa d'ara dano. I'a dhu èu abhu uuru èèna, èu bhoke hèb'a na. Pe èu abhu doi iia cue. More, ho b'ae bea èdhi dua ti. Te doi ne, d'ai le bea èdhi dua ti.”h