Sia ko'a lia nunia, tan ema Yahudi siakaan loron boot sia nahuu baa wainrua. Loron boot nia sia, ema temi na'ak, ‘Dahur Paska’ no ‘Dahur Tubi Bakae.’ Sia nadahur loron nia sia nodi nanoin baa oras siakaan bei uluk sia sai nosi rai Mesir.^a

3 Iha leo Betania, noo ema ida naran Simon. Uluk, ema nakribi nia tan kona moras funi mea. Mais oras ne'e, nia di'ak ti'an.

Loron boot nia sia sei la to'o dauk, Yesus sia baa naa iha Simon uman. Sia no'i naa, feto ida mai nasoru Yesus. Feto nia kaer nodi mina morin botir ida. Mina morin nia folin todan. Botir moos noo folin tan halo hosi fatuk.^b To'o Yesus baa, feto nia ta'e naroe botir matan. Hotu, fui nanii mina nia baa Yesus ulun atu foo tadak na'ak nia nakneter Yesus.

4 Oras nia, ema seluk moos tuir naa. Sia naree feto nia nalo nunia, sia dale baa malu nodi naksa'ek aan na'ak, “Hoi! Feto saa mak ne'e, to'o soe butan mina morin folin todan basuk nia! 5 Di'ak liu, fa'an mina nia dei, nebee fa'e osan baa ema mukit sia! Mina nia folin manesak no ema ida kansera tinan ida.” Hotu, sia krakat feto nia.

6 Mais Yesus dale na'ak, “Keta hasusar feto ne'e! Habusik baa! Ha'u neon di'ak tan nia fui mina ne'e baa Ha'u. 7 Ema mukit sia namutuk no emi bei-beik. Emi bele tulun sia hei-hein. Mais la kleur ona, Ha'u la kamutuk ko emi ti'an,^c 8 tan Ha'ukaan moris la kleur ona. Nodi fui mina baa Ha'u, feto ne'e nahulin kedan Ha'ukaan isin, hanesan nia falun ti'an Ha'ukaan maten. 9 Rona, tan Ha'ukaan dalen ne'e, tebes no loos! Oras ema keke lema Na'i Maromak Manfatin Di'ak baa raiklaran tomak, sia moos katak feto ne'e niakaan dadi'ak, nebee ema hotu-hotu nanoin baa nia.”

10 Nosi Yesus Niakaan maktuir na'in sanulu resin rua nia, ida naran Yudas Iskariot. Baa loron nia, nia baa buka na'ilulik ulun sia atu latan Yesus baa sia. To'o baa, nia katak niakaan hakara. 11 Rona nola Yudas hakaran nia, ema boot nia sia neon di'ak lo-loos. Sia namate lia no Yudas na'ak, “Kalo o makara fa'an Yesus, nanis ami sosa.” Hotu, Yudas sai baa buka dalan atu latan Yesus baa sia.

12 Hotu, ema Yahudi siakaan loron boot sia to'o mai ti'an. Baa loron dala uluk, sia tunu tubi mak la kahur tua teen tubi, no no'o bibi malae. Baa loron nia Yesus Niakaan maktuir sia mai nusu baa Nia na'ak, “Ama! Ohin kalan ne'e ita musti hahuu Dahur Tubi Bakae hodi ko'a bibi malae atu haa baa Paska. Dadi, Ama nakara ami baa hadi'a dahur nia iha nabee?”

13 Rona nola nunia, Yesus naruka maktuir na'in rua na'ak, “Emi baa uluk iha kota laran. Iha nebaa, emi atu hasoru hola mane ida no'i natiu lolo no wee. Emi baa tuir nia. 14 Kalo nia tama baa uma nabee, emi moos tama tuir. Hotu, husu baa uma na'in ha'ak, ‘Mau! Ama Boot nusu fatik ida atu nodi naa Dahur Paska no Niakaan maktuir sia.’ 15 Hotu, uma na'in nia atu natudu ke'an luan ida iha tetu leten. Nia nadi'a tetuk ti'an ke'an nia. Emi baa hadi'a loos haan dei.”

16 Rona nola nunia, sia na'in rua moos baa. To'o baa, sia naree sa-saa hotu-hotu, tuir saa mak Yesus katak ti'an baa sia. Sia moos nadi'a dahur Paska iha nia. Hotu, sia baa bolu Yesus no maktuir rumak sia.

17 Oras loro atu monu, Yesus no maktuir na'in sanulu resin rua nia moos baa fatik nia. 18 To'o baa, sia tuur naa. Baa oras naa, Yesus katak na'ak, “Rona, tan Ha'ukaan dalen ne'e, tebes no loos! Ema ida nosi emi atu fa'an Ha'u baa ema seluk.”^d

19 Rona nola nunia, maktuir sia noran la di'ak. Sia ida-idak katak baa Yesus na'ak, “Lahoos ha'u mak Ama dale nia. Tebes ka Ama?”

20 Yesus nataa na'ak, “Ema mak lobas tubi baa mako ne'e laran namutuk no Ha'u, nia mak atu fa'an Ha'u. 21 Hanoin di'a-di'ak! Ha'u ne'e, Ema Raiklaran Isin. Ha'u musti mate tuir saa mak hakerek kedan ti'an iha Hakerek Moon. Mais sintidu! Ema mak fa'an Ha'u nia atu natiu niakaan dinu! Di'ak liu, niakaan inan la nahoris kedan nia!”

22 Baa oras sia naa, Yesus foti nola tubi baluk ida. Nia nusu matak-malirin baa Na'i Maromak, hotu tohi fa'e tubi nia, lolo baa Niakaan maktuir sia nodi katak na'ak, “Tubi ne'e, Ha'ukaan isin. Simu hola, haa baa ona!”

23 Nunia hotu, Nia nola hemu fatik ida mak noo anggor ween. Nia sera dodan baa Na'i Maromak, hotu lolo baa Niakaan maktuir sia, nebee sia nemu. 24 Nia moos katak na'ak, “Anggor ween ne'e, Ha'ukaan raan mak atu nakduar nodi foo moris baa ema lear. Hodi raa ne'e, Na'i Maromak namate menon foun no emi.^e

25 Rona, tan Ha'ukaan dalen ne'e, tebes no loos! Nahuu baa oras ne'e, Ha'u la kemu tenik anggor ween ona, to'o Ha'u kabesi aan kaer ukun ko Ha'ukaan Ama iha lale'an ti'an, foin Ha'u kemu kikar.”

26 Hotu, sia nananu kananuk ida nodi tonu-naboot Na'i Maromak. Kalan nia moos, sia la'o kedan baa foho Saitun.

27 Oras sia la'o, Yesus katak baa Niakaan maktuir sia na'ak, “Ohin kalan ne'e, emi hotu-hotu atu halai hela Ha'u. Hori uluk Maromak mako'an nakerek nela kedan nosi lia ne'e na'ak,

28 Nunia tebes. Ha'u nanis mate. Mais, moris kikar. Oras moris kikar ti'an, Ha'u kbaa uluk kein emi iha rai Galilea nebaa.”^g

29 Rona nola nunia, Petrus sakar na'ak, “La bele nunia Ama! Masik ema hotu-hotu nalai nela Ama moos, ha'u lale!”

30 Mais Yesus nataa na'ak, “Petrus! Rona mai, tan Ha'ukaan dalen ne'e, tebes no loos! Ohin kalan ne'e moos manu sei la kokoreek isin rua dauk, o meli Ha'u isin tolu ti'an ma'ak, o la matene Ha'u!”

31 Mais Petrus naka'as aan nodi nataa na'ak, “Lale Ama! Kalo Ama mate, ha'u moos mate tuir. Ha'u la keli Ama.”

Petrus niakaan mamaluk sia ida-idak moos dale nunia.

32 Hotu, Yesus sia la'o liu baa to'os ida iha foho Saitun lolon. To'os ne'e naran ‘Getsemani’. To'o baa, Yesus katak baa Niakaan maktuir sia na'ak, “Tuur hein iha ne'e lai, tan Ha'u atu kbaa kamulak.”

33 Mais nia bolu nola Petrus, Yakobus no Yohanis atu baa no Nia. Nahuu baa oras nia, Nia noran susar to'o, no neon la metin. 34 Nia katak baa sia na'in tolu na'ak, “Ha'ukaan neon susar basuk! Koran nu'u atu mate dei. Emi tuur daka iha ne'e lai.”

35-36 Hotu, Nia la'o soruk tenik oda baa, foin nakni'a sudur to'o rai nodi namulak na'ak, “Ama! Kalo Ama nakara, Ha'u lalika katiu kola susar ne'e. Ha'u katene la noo saa ida mak Ama la bele nalo. Dadi, kalo bele, Ama foti nola susar ne'e soe dook nosi Ha'u. Mais keta tuir Ha'ukaan hakaran. Tuir Ama hakaran dei.”

37 Namulak notu, Yesus baa nikar maktuir na'in tolu nia. Mais, sia toba dukur. Hotu, Nia katak baa Petrus na'ak, “Hoi, Petrus!^h O toba ka? Tan saa emi la bele daka oda no? 38 Haroma emikaan matan, hotu hamulak nebee keta kona sokur. Emikaan neon nanis nakara nalo di'ak, mais emikaan isin lolon la biit.”

39 Hotu, Yesus baa namulak nodi nakro'an tenik baa Na'i Maromak, nebee Nia lalika natiu susar nia. Mais keta tuir Niakaan hakaran, tuir Aman hakaran dei. 40 Namulak notu, Nia fila nikar baa maktuir na'in tolu nia. Mais, sia toba nikar ti'an tan matan nakati tebes. Nia nasee tenik baa sia, mais sia la natene atu dale saa.

41 Hotu, Yesus la'o nela sia baa namulak baa dala tolu. Namulak notu, nia fila nikar baa sia nodi na'ak, “Emi sei toba ka? To'o ona! Oras ne'e, ema mak atu fa'an Ha'u Ema Raiklaran Isin ne'e, mai ti'an. Nia atu kohi Ha'u, latan baa ema aat liman. 42 Hadeer! Haree kokon iha nebaa! Ema mak atu fa'an Ha'u nia, mai ti'an. Mai ita baa hasoru nia!”

43 Yesus sei dale nunia, teki-tekis Niakaan maktuir ida naran Yudas mai no ema wa'in. Sia mai nodi surik no ai kaliduk atu kohi Yesus. Sia nalo nunia, tan ema boot Yahudi sia mak naruka. Ema boot nia sia, mak na'ilulik ulun sia, manorik ukun sia, no fukun adat sia. 44 Uluk Yudas foo kedan tadak baa sia na'ak, “Haree di'a-di'ak! Ema mak ha'u de'i, kohi hola nia hodi baa ona, tan Nia mak emi buka!”

45 Tan nameno ti'an nunia, baa oras Yudas to'o baa, nia la'o natutuk kedan baa Yesus nodi nasee na'ak, “Tabe, Ama Boot!” Hotu nia moos nako'ak nodi de'i Yesus. 46 Naree tadak nia, ema wa'in nia moos soruk baa, kohi nola Yesus.

47 Ema ida iha nia moos losu nola surik, nodi taa kotu ema ida tilun tahan. Ema kanek nia, na'ilulik ulun boot atan. 48 Hotu, Yesus moos katak baa ema wa'in nia na'ak, “Tan saa emi mai kohi Ha'u hodi surik no ai kaliduk?! Emi haneo, Ha'u ne'e, ema aat ka? 49 Sura loron Ha'u kamutuk ko emi oras kanorin iha Uma Hamulak Huun, mais emi la kohi Ha'u. Mais so'in baa! Kohi hola Ha'u ona! Maromak mako'an sia nakerek nela kedan lia ne'e hori uluk.”ⁱ

50 Titu-naree nunia, Yesus Niakaan maktuir sia nata'uk tebes to'o ni'it aan nalai nela Nia.

51 Iha nia moos noo ema nurak ida mak la'o tuir Yesus nosi kotuk. Nia nafu'ut loos tais. Ema nia sia moos atu kohi nia, 52 mais sia kaer nola niakaan tais dei. Hotu, nia nalai fila nodi walan dei, tan nata'uk tebes.

53 Hotu, sia dada nodi Yesus baa na'ilulik ulun boot uman. Iha nia, ulun boot Yahudi sia naklibur ti'an atu nalo moon-metan. Ema nia sia, mak na'ilulik ulun sia, manorik ukun sia, no fukun adat sia. 54 Oras sia dada nodi Yesus baa, Petrus tuir no-nook nosi kotuk. Nia moos tama baa uma nia lalawar atu naniruk ha'i bele-bele no ema mak daka iha nia.

55 Iha uma nia laran, ulun boot sia ko'a lia. Sia buka lia kakaer atu nodi nasalak Yesus, tan sia nakara taa ukun mate baa Nia. Mais sia la netan lia kakaer. 56 Masik sia natama mataa lia tolek wa'in atu nodi nahonu Yesus, siakaan lia fuan moos la kona malu.

57 Nosi ikus, ema ida tenik nariik nodi nataa tolek na'ak, 58 “Ami rona Ema ne'e katak na'ak, ‘Ha'u atu karo'on Uma Hamulak Huun mak ema raiklaran nalo. To'o wainrua, Ha'u kariik kikar, mais la kodi ema raiklaran liman.’”^j 59 Mais siakaan dale nia sia moos, la kona malu tenik.

60 Hotu, na'ilulik ulun boot nia nariik baa ema hotu-hotu oin, hotu nusu baa Yesus na'ak, “Ema wa'in tula sala baa O. Tan saa o no-nook dei?”

61 Mais, Yesus la nataa kois. Hotu, na'ilulik ulun boot nia nusu tenik na'ak, “O katak lai! Hori uluk Na'i Maromak nameno kedan atu solok Kristus mai. O ne'e Kristus, mak Na'i Maromak Oan ka?”

62 Yesus nataa na'ak, “Tebes! Ha'u mak Kristus. Emi hotu-hotu atu haree Ha'u, Ema Raiklaran Isin ne'e, kabesi aan kaer ukun iha Na'i Maromak mak beran kaliuk sorin kwana. Nosi ikus, Ha'u moos atu kamaan aan mai kikar kosi lale'an kodi kalo'an.”^k

63 Rona nola Yesus dale nunia, na'ilulik ulun boot nia krakat tebes, to'o lees nahaat niakaan faru klobor. Hotu, nia katak baa ema nia sia na'ak, “Ita lalika buka tenik mataa lia ona! 64 Emi rona ti'an Nia na'in du'uk katak na'ak, Nia ne'e Na'i Maromak Oan. Ne'e na'ak, Nia dale nahaat Na'i Maromak ti'an! Tuir itakaan ukun, kalo ema ida nalo aan nu'u Maromak, ema nia musti mate! Dadi, ita atu hakotu nunabee?”

Rona nola nunia, sia moos nakotu lia na'ak, “Ema ne'e, sala tebes. Musti taa ukun mate baa Nia!”^l

65 Hotu, ema na'in hira soruk baa nodi taniru Yesus. Sia tutus Niakaan matan, hotu ta'e nakdiuk Nia. Sia naleuk Nia na'ak, “Kalo O Maromak mako'an tebes, O katak kokon see mak ta'e O nia?” Hotu, sia naruka makdaka Uma Hamulak Huun mai nola Nia nodi baa. Oras sia nodi Yesus baa, sia moos basa nakdiuk Nia.

66-67 Baa oras nia, Petrus sei tuur naniruk ha'i iha uma nia lalawar. Na'ilulik ulun boot atan feto ida mai naree Petrus iha nia. Feto nia nahilas di'a-di'ak Petrus oin, hotu nasee na'ak, “Ohin nia o moos bele-bele mo Yesus, ema Nasaret nia. Tebes ka lale?”

68 Mais Petrus nataa na'ak, “Lale! Tan saa o musu nunia?! Ha'u la katene ema nia!” Hotu, Petrus sai baa nariik iha ba'a odamatan oin. [Baa oras nia moos, manu kokoreek.]^m

69 La oras, feto nia mana tenik Petrus. Hotu, nia foo natene baa ema iha nia sia na'ak, “Nia ne'e, ema ida nosi sia!”

70 Mais, Petrus sakar na'ak, “O bula arumak! Ha'u la katene ema nia!”

La kleur falik, ema ida seluk nasee Petrus na'ak, “O keta maktolek tenik ma'ak, o la mamutuk mo ema nia sia! Emi hotu-hotu ne'e ema Galilea.”

71 Mais, Petrus sakar tenik na'ak, “Tuku fatuk! Ha'u la katene ema nia!”

72 Oras Petrus katak nunia, manu moos kokoreek isin rua. Rona nola nunia, Petrus nanoin nola Yesus lia fuan ohin nia na'ak, “Manu sei la kokoreek isin rua dauk, o meli Ha'u isin tolu ti'an ma'ak, o la matene Ha'u.”

Nanoin nola nunia, Petrus moos tanis no aan.