Sia nodi Yesus baa gubernur Pilatus
15
Seisawan oan, ema hotu-hotu iha moon-metan nia kabuar lia atu no'o Yesus. Hotu, sia kesi Nia, nodi baa gubernur Pilatus, tan gubernur mak bele taa ukun mate baa ema.a 2 To'o baa, gubernur nusu Yesus na'ak, “Ema ne'e sia na'ak O ne'e, ema Yahudi Na'in. Nunia tebes ka?”Yesus nataa na'ak, “Tebes! Ama dale nia loos.”
3 Oras nia, na'ilulik ulun sia tula lia wa'in baa Yesus nodi katak baa gubernur na'ak, “Ema ne'e, nalo sala wa'in ti'an!” 4 Hotu, Gubernur nusu tenik Yesus na'ak, “O la rona siakaan dale nia ka? Sia tula sala wa'in boot baa O. Mataa lai!”
5 Mais Yesus la nataa kedan, to'o Gubernur moos benar.
Gubernur Pilatus taa ukun mate baa Yesus
6 Sura tinan, natoon baa loron ema Yahudi nadahur Paska, gubernur nabusik ema bui ida tuir ema lear boi. 7 Baa tinan nia, noo ema bui ida naran Barabas. Uluk ema kohi nia no niakaan maluk sia, tan sakar ukunrai Roma. Nia moos no'o ema. 8 Tan loron boot sia to'o ti'an, ema wa'in baa Gubernur Pilatus nodi nusu na'ak, “Ama Gubernur! Dahur Paska to'o ona! Kalo bele, ama nabusik ema bui ida tuir itakaan adat!”
9 Rona nola nunia, Gubernur nataa na'ak, “Tebes! Mais ha'u kabusik see? Nunabee kalo kabusik ema Yahudi Na'in ne'e? Bele ka?” 10 Gubernur nusu nunia, tan natene na'ak na'ilulik ulun sia nodi Yesus baa nia, tan sia rai hirus baa Yesus.
11 Rona gubernur dale nunia, na'ilulik ulun sia sasu'at ema wa'in nia, nebee sia hotu-hotu nataa gubernur na'ak, “Ami la ho'uk ema nia! Habusik Barabas dei!”
12 Hotu, Gubernur nusu tenik na'ak, “Kalo nunia, ha'u kmusti kalo saa baa Yesus ne'e mak emi temi ha'ak, ‘Na'i Yahudi’?”
13 Sia moos nahii bele-bele na'ak, “Ho'o nia dei! Hedi Nia baa ai karuus!”
14 Hotu, Gubernur nusu tenik na'ak, “Mais Nia sala saa? Ha'u kleno Nia ti'an, mais la ketan sala ida kois!”
Mais sia nahii maka'as liu tenik na'ak, “Ho'o nia! Hedi nia baa ai karuus!”
15 Tan gubernur nakara nalo ema wa'in nia neon di'ak, nia moos nabusik Barabas tuir siakaan hakara. Hotu nia naruka sondadu ta'e no'at Yesus nodi oe besi tarak.b No'at notu, nia latan Yesus baa sondadu sia, nebee sia nodi baa, nedi no'o baa ai karuus.
Sondadu sia ta'e nakdiuk Yesus
16 Nunia hotu, sondadu sia dada nodi Yesus baa lalawar boot ida iha siakaan fatin.c Hotu, sia bolu nola siakaan mamaluk klibur boot ida. 17 Sia moos natais Yesus nodi faru klobor ida. Faru nia ilas mean asuaten, hanesan na'in siakaan tais. Hotu, sia nola ai tarak lain, noman nalo baa sabeo tarak. Hotu, tuku natama sabeo tarak nia baa Yesus ulun nodi naleuk nakdiuk Nia, hanesan sia foti na'in foun nodi sabeo na'in.
18 Hotu, sia tabe naleuk nia na'ak, “Tabe, Na'i Yahudi!” 19 Sia asufanu sudur baa Yesus. Sia moos taniru Nia, no ta'e nakdiuk Niakaan ulun. 20 Naleuk nakdiuk Nia notu, sia kolu faru klobor nia, hotu natais nikar Niakaan tais baa. Hotu, sia nodi Nia sai baa kota Yerusalem luan, atu nedi no'o baa ai karuus.
Ema nedi Yesus baa ai karuus
21 Oras sai nosi Yerusalem, sia nasoru ema ida nosi leo Kirene iha dalan klaran. Ema nia naran Simon. Nia, mak Aleksander no Rufus aman. Oras nia atu tama Yerusalem, sondadu sia kohi nola nia. Hotu sia seten nia natiu Yesus Niakaan ai karuus.d 22 Hotu, sia dada Yesus to'o fatik ida naran Golgota. (Naran ne'e na'ak, ‘fatin ulun ruin’.) 23 Iha nia, sia foo Yesus nemu kokon tua kahur ai moruk, nebee Nia bele terus moras. Mais Yesus la no'uk. 24-25 Baa oras takseer tuku siwi seisawan, sia nedi Yesus baa ai karuus, hotu taman ai karuus nia. Nunia hotu, sondadu sia suut liman atu nodi natene see mak bele netan Yesus farun.e 26 Sia moos nakerek baa ai kabelak ida na'ak,
“Ema ne'e, Na'i Yahudi”
Hotu, sia nedi ai kabelak nia baa ai karuus iha Yesus ulun fafuhun leten, nebee ema bele natene lia krarain taa ukun mate baa Nia. 27 Iha fatin nia sia moos nedi no'o ema madauk teen na'in rua. Ida iha Yesus sorin kwana, ida iha sorin karuk. 28 [Nodi nalo nunia, sia nalo tuir saa mak hakerek hori uluk iha Hakerek Moon na'ak, “Ema nalo Nia nu'u ema aat.”]f g
29 Ema hotu-hotu mak la'o tuir fatin nia naree Yesus iha ai karuus. Sia nakmulis ibunnodi naleuk Nia na'ak, “O mak dale ma'ak, O bele maro'on Uma Hamulak Huun, hotu baa wainrua O mariik mikar. Tebes ka?h 30 Kalo nunia, sori aan ona, tuun mosi ai karuus nia! Nunia lai, foin ami bele fiar ha'ak, o ne'e tebe-tebes Na'i Maromak Oan!”
31 Na'ilulik ulun sia no manorik ukun sia moos naleuk Yesus na'ak, “Nia bele sori ema seluk, mais la bele sori aan du'uk! 32 Uluk Nia na'ak, Nia ne'e ‘Kristus’ mak Na'i Maromak nameno kedan hori uluk. Ema seluk dale na'ak, nia ne'e ema Yahudi Na'in. Kalo nunia tebes, habusik Nia tuun du'uk nosi ai karuus, nebee ita haree. Nunia ti'an, foin ita bele fiar.”
Ema madauk teen na'in rua iha Yesus sorin moos naleuk Nia.
Yesus mate
33 Nunia hotu, nakukun luri taka nola rai nia nosi loro natetu to'o tuku tolu loro malirin. 34 Baa oras tuku tolu loro malirin, Yesus nahii nodi siakaan lia Aram na'ak, “Eloi! Eloi! Lema sabaktani?” (Lia fuan nia na'ak, “Ha'ukaan Maromak! Ha'ukaan Maromak! Tan saa tali'ur la'o mela Ha'u nune'e?”)i
35 Oras ema na'in hira mak kre'is ai karuus nia rona Yesus lian nia, sia dale baa malu na'ak, “Rona lai. Nia bolu Elia, mak Maromak mako'an uluk nia!” 36 Hotu, ema ida nalai baa nola wee teen, lobas tama baa tua siin. Nia tuu wee teen nia nodi ai lolon ida, hotu lolo baa Yesus ibun, nebee Yesus modas. Ema nia dale na'ak, “Hein lai! Ita haree kokon! Arumak Elia mai natuun Nia nosi ai karuus ne'e.”j
37 Hotu, Yesus nahii tenik nodi lian maka'as. Nahii notu, nawan moos kotu.
38 Iha Uma Hamulak Huun laran no tais odamatan boot ida mak ema nisa nodi neli Na'i Maromak Ke'an Lulik Kaliuk. Natoon baa Yesus nawan kotu, tais odamatan nia naksira fa'e baa rua nosi leten to'o raik.k
39 Iha Golgota, noo sondadu ulun ida mak daka kre'is baa Yesus Niakaan ai karuus. Oras naree Yesus mate, nia sarebak nodi na'ak, “Adeei! Ema ne'e, Na'i Maromak Oan tebes.”
40-41 Iha nia moos noo feto wa'in mak nariik nosi dook, titu Yesus mate. Uluk, sia mak naliku Yesus no niakaan ema sia iha Galilea. Nosi feto nia sia, noo Salome, Maria nosi leo Magdala, Maria ida tenik (mak Yakobus no Yoses inan) no feto wa'in tenik mak tuir Yesus mai bele iha Yerusalem.l
Ema nakoi Yesus
42-43 Baa oras nia, noo ema boot ida naran Yusuf nosi leo Arimatea. Nia tuur iha moon-metan Yahudi. Nia ema laran di'ak mak no'i nei-nein Na'i Maromak kaer ukun. Natene nola Yesus mate ti'an, nia buka dalan atu natuun Yesus maten nosi ai karuus.
Yesus mate nia, kona baa loron lima. Awan, kona baa ema Yahudi siakaan loron hamulak. Tan lia nia, oras loro atu monu baa loron lima nia, Yusuf nakbiit neon baa nusu kedan Yesus maten nosi gubernur Pilatus. 44 Rona Yusuf nusu nunia, gubernur moos blaar hotu katak na'ak, “Adeei! Ema nia mate ti'an ka?! Ha'u kanoin, sei dauk!”
Hotu, gubernur naruka ema baa bolu sondadu ulun mai. To'o mai ti'an, gubernur nusu nia na'ak, “Nunabee? Yesus nia mate ti'an ka?”
45 Sondadu ulun nataa na'ak, “Nia mate hori ohin ti'an ama!” Rona nola nunia, gubernur moos foo leet baa Yusuf atu baa nola Yesus maten.
46 Hotu, Yusuf baa sosa tais foun ida mak folin todan. Sosa notu, nia baa Golgota. To'o baa, nia natuun nola Yesus maten nosi ai karuus. Hotu, nia falun di'a-di'ak nodi tais foun nia. Baa oras nia, ema foin ba'at notu fatuk kuak ida atu nadi'a kedan rate bodik Yusuf no familin sia. Hotu, Yusuf sia nakelu natama Yesus maten baa rate nia. Hotu, sia dudu nola fatuk boot ida, nodi taka kuak nia. Hotu, sia fila.
47 Baa oras nia, Maria nosi Magdala no Maria ida seluk (mak Yoses inan), sia moos tuir to'o nebaa. Sia naree di'a-di'ak, nebee bele natene dalan baa rate nia.