2 Baa oras loron di'ak nia kre'is mai ti'an, na'ilulik no manorik ukun Yahudi sia buka dalan atu no'o Yesus. Mais sia buka dalan no-nook, tan sia nata'uk baa ema lear mak nakara rona Yesus.^a

3 Nosi Yesus Niakaan maktuir na'in sanulu resin rua nia, ema na'in ida naran Yudas Iskariot. Baa oras ema buka dalan atu no'o Yesus, diabu ulun tama baa Yudas neon. 4 Hotu, Yudas sai baa buka na'ilulik ulun sia no makdaka ulun sia iha Uma Hamulak Huun, tan nakara fa'an Yesus baa sia. 5 Rona nola Yudas dale nunia, sia neon di'ak tebes. Sia namate lia na'ak, “Di'ak ti'an! Kalo o makara fa'an Yesus baa ami, ami nanis sosa.” 6 Rona nola nunia, Yudas simu. Hotu, nia nahuu buka leet atu fa'an no-nook Yesus baa sia, nebee ema lear lalika natene.

7 Hotu, ema Yahudi siakaan loron boot nia sia to'o. 8 Yesus naruka Petrus no Yohanis na'ak, “Emi rua baa uluk, atu hadi'a kedan fatin nebee ita hodi hadahur Paska bele-bele.”

9 Rona nola nunia, sia rua nusu na'ak, “Ama! Ami musti baa hadi'a fatin iha nabee?”

10 Yesus nataa na'ak, “Baa oras tama kota Yerusalem, emi hasoru mane ida no'i loi lolo nakonu wee. Emi baa tuir nia to'o uma baa. 11 To'o baa, katak baa uma na'in ha'ak, ‘Ama Boot nusu fatin ida atu nadahur Paska no Niakaan maktuir sia. Bele ka?’ 12 Hotu, uma na'in nia atu natudu ke'an luan ida iha tetu leten mak nadi'a kedan ti'an. Hela emi hadi'a loos haan dei.”

13 Rona nola nunia, sia rua moos baa. To'o baa, sia netan hotu-hotu tuir saa mak Yesus katak ti'an nia. Hotu, sia nadi'a haan Paska iha nia.

14 Hotu-hotu tetuk ti'an, Yesus no maktuir seluk sia moos to'o. Yesus tuur atu naa-nemu no klosan sia. 15 Nia katak baa sia na'ak, “Oras Ha'u sei dauk ketan susar, Ha'u kbeer basuk kaa Dahur Paska ne'e ko emi. 16 Hatadan lia ne'e di'a-di'ak. Ha'u la kaa tenik Dahur Paska ko emi ona. Da-dau to'o Ha'ukaan Ama nabesi aan kaer ukun ti'an, foin Ha'u kaa tenik.”

17 Hotu, Yesus foti nola hemu fatik mak noo anggor ween. Nia namulak sera dodan baa Na'i Maromak, hotu lolo foo hemu fatik nia baa sia, nodi dale na'ak, “Simu hola hemu fatik ne'e, nebee emi ida-idak hemu. 18 Hanoin Ha'ukaan dalen ne'e! Nahuu baa ohin kalan ne'e, Ha'u la kemu tenik anggor ween ona. Da-dau to'o Ha'ukaan Ama nabesi aan kaer ukun ti'an, foin Ha'u kemu tenik.”

19 Hotu, Nia foti nola tubi baluk ida. Nia namulak sera dodan baa Na'i Maromak, hotu tohi fa'e tubi nia, lolo foo baa sia nodi na'ak, “Tubi ne'e, Ha'ukaan isin mak Ha'u atu klatan bodik emi hotu-hotu. Emi haa ne'e, hodi hanoin Ha'u nohuun.” 20 Baa oras sia naa notu, Nia nola hemu fatik mak noo anggor ween. Nia dale tenik na'ak, “Anggor ween ne'e, Ha'ukaan raan mak atu nakduar bodik emi. Na'i Maromak namate menon foun no emi, nodi raa ne'e.^b

21 Mais sintidu, tan ema ida mak tuur namutuk no ita iha ne'e, atu fa'an Ha'u.^c 22 Tebes! Ema Raiklaran Isin musti mate tuir Na'i Maromak hakaran. Mais rona, tan ema mak fa'an Ha'u nia, atu natiu dinu du'uk!”

23 Rona nola nunia, Yesus klosan sia nahuu nusu baa malu na'ak, “See mak atu nase'i aat baa Nia nunia?”

24 Hotu, Yesus klosan sia toe malu nosi lia see mak boot liu.^d 25 Rona nola nunia, Yesus de'an sia na'ak, “Na'in mak la natene Maromak, sia ukun hutun-renu todan liu resik. Masik nunia moos, hutun-renu simu nodi na'ak, na'in nia naliku sia. 26 Mais emi keta nunia. Ema mak boot, musti lisan hanesan ema ki'ik, nebee naliku ema hotu-hotu. Ema mak ulun, musti lisan hanesan ema ain-liman, nebee serwisu bodik ema hotu-hotu.^e 27 Katak kokon, ema nabee mak boot. Ema mak tuur naa ka, ema mak naliku haan? Nanis, ema mak tuur naa, nia mak boot. Mais Ha'u la kalo aan nunia, tan Ha'u kmai atu kaliku emi.^f

28 Baa oras Ha'u ksusar, emi ne'e mak hamutuk ho Ha'u. 29 Ha'ukaan Ama foti Ha'u ti'an atu kaer ukun iha Niakaan Fohorai. Oras ne'e Ha'u moos foti emi 30 atu tuur haa hamutuk ho Ha'u iha lale'an. Ha'u moos latan beran baa emi atu kaer ukun baa ema Isra'el hunun sanulu resin rua.”^g

31 Hotu Yesus katak baa Petrus na'ak, “Petrus! Diabu ulun atu sasa karin emi hosi Ha'u, hanesan ema tata'ek foos.^h 32 Mais Ha'u kamulak bodik o, Petrus, nebee o fiar Ha'u bei-beik. Kalo o fila mikar mai Ha'u ti'an, o musti makbiit mamaluk sia neon.”

33 Petrus nataa na'ak, “Lale Ama! Ha'u la kla'o kela Ama. Ha'u kadi'a aan tama bui ko Ama. Masik ha'u kmate ko Ama moos, di'ak.”

34 Mais Yesus nataa na'ak, “Petrus, rona di'a-di'ak! Ohin kalan ne'e moos, manu sei la kokoreek dauk, o meli Ha'u dala tolu ti'an.”

35 Hotu Yesus nusu baa sia na'ak, “Hori hirak nia, baa oras Ha'u ksolok emi baa katak Ha'ukaan Manfatin Di'ak iha fatin hotu-hotu, Ha'u kakahik emi nebee keta hodi osan, keta hodi kakaluk, no keta hodi kaso. Baa oras nia, emikaan saa mak la to'o?”

Sia nataa bele-bele na'ak, “To'o hotu, Ama.”ⁱ

36 Hotu Yesus dale tenik na'ak, “Mais oras ne'e, seluk ti'an. Kalo emi hoo osan, hodi baa. Kalo hoo kakaluk, hodi no. Kalo la hoo surik, baa fa'an emikaan faru, hotu sosa. 37 Tan ema Yahudi sia filak Ha'u baa ema aat. La oras ona sia mai kohi Ha'u. Tebes. Tan lia nia nato'o saa mak Yesaya nakerek nela kedan na'ak:

38 Rona Yesus dale nunia, sia katak na'ak, “Ama! Ami hodi surik rua.”

Yesus nataa na'ak, “To'o ona.”

39 Yesus no klosan sia naa notu Dahur Paska, sia sai baa foho Saitun, hanesan loron-loron.

40 To'o baa, Yesus katak baa sia na'ak, “Hamulak nebee emi keta monu baa sala.”

41 Hotu Nia nakiduk nela sia. La dook nosi sia, Nia nakni'a nodi namulak na'ak, 42 “Ama! Kalo Ama nakara, tulun foti sees susar ne'e nosi Ha'u. Mais keta tuir Ha'ukaan hakara, tuir Ama nakara dei.” 43 [Hotu makbukar lale'an ida, mai nakbiit Yesus neon. 44 Tan Yesus susar basuk, Niakaan kosar turu hanesan raa.]^k

45 Namulak notu, Yesus nariik baa matan Niakaan maktuir sia. Mais Nia netan sia toba dukur, tan sia kole no neon susar. 46 Naree nunia, Nia nasee sia na'ak, “Aikee! Tan saa emi toba?! Di'ak liu hamulak nebee emi keta monu baa sala.”

47 Yesus sei dale nunia, Niakaan maktuir ida naran Yudas mai no ema wa'in. Nia mai nare'is aan baa Yesus nodi nako'ak de'i Nia. 48 Mais Yesus nasee nia na'ak, “Hoi, Yudas! Modi de'i, o fa'an Ema Raiklaran Isin ne'e ka?”

49 Baa oras ema maktuir seluk sia natene nola Yudas naneo aat nunia, sia moos nusu baa Yesus na'ak, “Ama! Ami hodi surik! Ami sakar sia ka?” 50 Hotu ema ida nosi maktuir sia losu surik, taa siit ema ida tilun tahan kwana. Ema kanek nia, na'ilulik ulun boot atan.

51 Mais Yesus nataa na'ak, “To'o ona! Keta sakar!” Nia moos koko ema nia tilun, hotu di'ak kedas.

52 Ema mak kohi Yesus nia sia, mak na'ilulik ulun sia, fukun sia no makdaka ulun nosi Uma Hamulak Huun. Yesus nusu baa sia na'ak, “Nunabee to'o emi haneo ha'ak, Ha'u ne'e ema aat, hotu emi mai kohi Ha'u hodi surik no ai kaliduk! 53 Sura loron Ha'u kamutuk ko emi iha Uma Hamulak Huun. Tan saa emi la kohi Ha'u iha nia? Mais soin baa dei, tan emikaan oras to'o ti'an. Oras ne'e, diabu ulun mak ukun ona!”^l

54 Sia kohi nola Yesus, hotu dada nodi Nia baa na'ilulik ulun boot uman. Petrus moos tuir no-nook nosi kotuk. 55 Iha uma nia lalawar ema nalaka ha'i atu naniruk. Petrus moos baa naniruk iha nia. 56 Oras naniruk, ata feto ida naree Petrus nodi nahilas di'a-di'ak. Hotu feto nia nasa'e lia baa ema iha nia sia na'ak, “Hoi! Ema ne'e moos tuir no Yesus!”

57 Mais Petrus neli na'ak, “Lale! La katene ema nia. O matene saa?”

58 La kleur tenik, ema ida seluk soe matan nahilas Petrus nodi dale na'ak, “Tebes! O ne'e, Yesus eman ida!”

Mais Petrus sakar na'ak, “Lale! Lahoos ha'u!”

59 La kleur, ema seluk tenik dale na'ak, “Hoi! Ema ne'e, Yesus eman ida, tan nia moos ema Galilea ida!”

60 Mais Petrus neli naka'as na'ak, “O dumatak ema dei!” Petrus dale notu nunia, manu kokoreek kedas.

61 Baa oras nia moos, Yesus fila kotuk mana baa Petrus. Naree nunia, Petrus nanoin nola Yesus dalen ohin nia na'ak, “Ohin kalan ne'e, manu sei la kokoreek dauk, o meli Ha'u dala tolu ti'an.” 62 Nanoin nunia, Petrus sai nosi lalawar nia nodi tanis nade'un aan.

63 Hotu, ema mak daka Yesus sia naleuk Nia, nodi ta'e nakdiuk Nia. 64 Sia tutus Yesus matan, hotu nusu na'ak, “Hoi! Kalo o ne'e Maromak mako'an tebes, katak kokon see mak tuku o ne'e?” 65 Hotu sia moos tolak nasasi Nia.

66 Seisawan ti'an, na'ilulik, manorik ukun, no fukun adat sia libur malu atu leno Yesus lian ona. Sia naruka ema dada nodi Yesus mai baa moon-metan laran. 67 Yesus tama ti'an, sia nusu Nia na'ak, “O katak kokon lai! O ne'e tebe-tebes Kristus ka, lale?”

Yesus nataa na'ak, “Masik Ha'u kataa moos, emi la fiar. 68 Kalo Ha'u kusu lia ida baa emi, emi moos la hataa Ha'u. 69 La kleur ona, Na'i Maromak atu nodi Niakaan beran maka'as foti sa'e Ha'u, mak Ema Raiklaran Isin ne'e. Hotu, Ha'u ktuur iha Niakaan sorin kwana atu kaer ukun kamutuk ko Nia.”^m

70 Rona nola nunia, sia hotu-hotu nusu na'ak, “Kalo nunia, O maneo Na'i Maromak Oan mak O ka?”

Yesus nataa na'ak, “Tebes. Nu'u emi dale nia!”

71 Hotu, ema sia mak leno Yesus lia dale bele-bele na'ak, “Ita hotu-hotu rona du'uk ti'an! Nia foti aan dadi Na'i Maromak Oan. Tuir itakaan ukun-badu, kalo ema nalo aan nu'u Maromak, nia musti mate. Nunabee? Ita lalika buka tenik saksiin ona. Taa ukun mate baa Nia dei.”