Yesus fasi maktuir sia ain
13
Loron boot Paska sei la nahuu dauk, Yesus natene kedan Niakaan oras to'o ti'an atu la'o nela raiklaran ne'e, fila nikar baa Aman iha lale'an. Mais Nia nadomi basuk Niakaan ema sia iha raiklaran, to'o latan to-tomak Niakaan moris bodik sia.2 Noo Yesus Niakaan maktuir ida naran Yudas, mak Simon Iskariot oan. Baa oras Yesus sia tuur naa dahur Paska, diabu ulun babilan Yudas neon, nebee Yudas fa'an Yesus.
3 Yesus natene Nia mai nosi Na'i Maromak. Nia natene, la oras dei, Nia musti fila nikar baa Na'i Maromak. Nia moos natene, Niakaan Ama latan beran hotu-hotu baa Nia. 4 Oras Yesus sia tuur naa dahur Paska, Nia nariik, hotu kolu faru. Nia moos nola tais ida, kobar baa notak. 5 Nia fui wee baa hanek ida, hotu nodi fasi Niakaan maktuir sia ain. Fasi notu ida, no'as namara nodi tais mak iha notak nia. 6 Nia fasi ida-idak ain nunia. Oras atu fasi Simon Petrus ain, Simon Petrus nusu na'ak, “Ama moos atu fasi ha'ukaan ain ka?”
7 Yesus nataa na'ak, “Oras ne'e, o sei la matene dauk saa mak Ha'u kalo ne'e. Mais kleu-leur moos, o matene.”
8 Mais Simon Petrus sakar na'ak, “Keta nunia Ama Boot! Keta fasi ha'ukaan ain.”
Yesus na'ak, “Kalo Ha'u la kfasi, o la talin aan mo Ha'u.”
9 Simon Petrus na'ak, “Kalo nunia, Ama keta fasi ha'ukaan ain dei. Mais fasi no ha'ukaan liman no ulun!”
10 Yesus katak baa nia na'ak, “Kalo ema nariis ti'an, niakaan isin moos ti'an, nia lalika fasi tenik. Musti fasi loos ain dei. Kalo emi, emi moos ti'an. Mais lahoos emi hotu-hotu.” 11 (Yesus katak na'ak “Lahoos emi hotu-hotu” tan Nia natene see ida nosi sia mak atu fa'an Nia.)
12 Fasi notu siakaan ain, Yesus tau nikar faru, hotu baa tuur naa nikar. Nia nusu baa sia na'ak, “Nunabee? Oras Ha'u kfasi emikaan ain, emi hatene hahalok ne'e ka, lale? 13 Emi simu Ha'u ahan nu'u emikaan Manorik no emikaan Ulun. Lia nia makonak, tan Ha'u nunia tebes. 14 Ha'u ne'e, mak emikaan Manorik no emikaan Ulun. Mais oras ne'e, Ha'u kfasi ti'an emikaan ain ahan nu'u ata ida. Emi moos musti fasi malu ain nunia. 15 Ha'u kalo nunia nebee dadi knaninuk bodik emi. Ha'u kalo nunabee, emi moos musti halo tuir nunia.a 16 Ha'ukaan dalen ne'e tebes no loos: ema ata ida la maka'as liu nosi na'in. Ema ain-liman ida la maka'as liu nosi ema mak solok nia.b 17 Kalo emi hatene tebes hanorin ne'e ti'an, hotu emi halo tuir, emi sotir boot.
18 Ha'ukaan hanorin ne'e la kona baa emi hotu-hotu, tan Ha'u katene kedan ema mak Ha'u kboi ti'an. Mais noo lia mak musti dadi atu nato'o saa mak Hakerek Moon nakerek ti'an na'ak, ‘Ema mak tuur naa namutuk no ha'u, tali'ur nodi la'o nela ha'u.’c 19 Ha'u katak kedan lia nia baa emi, nebee nosi ikus, kalo ema la'o nela Ha'u nunia ti'an, emi bele fiar ha'ak, Ha'u ne'e, mak Kristus. 20 Rona di'a-di'ak, tan Ha'ukaan dalen ne'e, tebes no loos. Ema mak loke neon nodi simu ema mak Ha'u ksolok, nia simu Ha'u. Ema mak simu Ha'u, nia moos simu Ha'ukaan Maksolok.”d
Yesus katak kedan na'ak, ema ida atu fa'an Nia
21 Yesus dale notu nunia, Nia noran neon la di'ak. Nia katak na'ak, “Rona mai, tan Ha'ukaan dalen ne'e, tebes no loos: ema ida nosi emi atu fa'an Ha'u.”
22 Rona nola nunia, Niakaan maktuir sia benar. Sia titu baa malu, tan la natene Yesus dale kona baa see. 23 Baa oras nia, ha'u, Yohanis ne'e, moos tuir bele-bele ko maktuir seluk sia.e Ha'u mak tuur iha Yesus sorin. 24 Tan nunia, Simon Petrus natadan nodi ulun baa ha'u, nebee kusu Yesus dalen nia, kona baa see.
25 Karee nunia, ha'u kare'is aan baa Yesus, hotu kusu ka'ak, “Ama. Ema mak Ama Boot dale nia, kona baa see?”
26 Yesus nataa na'ak, “Lei haree. Ha'u atu kola tubi rohan ne'e, lobas baa mako, hotu foo baa see, ema nia mak ha'u kdale.” Hotu Yesus lobas tubi nia foo baa Yudas, Simon Iskariot oan. 27 Oras Yudas simu nola tubi nia, diabu ulun moos tama baa nia. Hotu Yesus katak baa Yudas na'ak, “Lai-lais ona! O atu malo saa, malo baa ona. Keta mein tenik.” 28 Maktuir rumak sia mak tuur naa iha nia, la natene Yesus dalen nia isin. 29 Sia balu naneo na'ak, tan Yudas siakaan makaer osan, arumak Yesus naruka nia baa sosa sa-saa bodik haa dahur Paska. Balu moos naneo na'ak, arumak Yesus naruka Yudas baa fa'e osan oda baa ema mukit sia.
30 Simu nola tubi nia, Yudas sai lai-lais. Baa oras nia, rai kalan ti'an.
Yesus foo ukun foun
31 Yudas sai ti'an, Yesus katak na'ak, “Ha'u ne'e, Ema Raiklaran Isin mak tuun mai nosi lale'an. Na'i Maromak Niakaan oras to'o ti'an atu foti-nahaas Ha'u. Hodi nunia, ema bele naree Niakaan kabaas. 32 Lia nia, la kleur dadi. Nia atu foti-nahaas Ha'u, tan Ha'u ktalin aan ko Nia.
33 Oa sia! Ha'u kadomi emi basuk, mais la kleur tenik Ha'u la kamutuk ko emi ona. Emi atu buka Ha'u, mais la hetan. Saa mak Ha'u katak ti'an baa Yahudi ulun sia, Ha'u katak tenik baa emi ka'ak, ‘Ha'u atu kbaa fatin ida mak emi la bele tuir.’f 34 Tan nunia, Ha'u kfoo ukun foun ida baa emi nune'e: emi musti hadomi malu. Ha'u kadomi emi oin nunabee, emi moos musti hadomi malu oin nunia.g 35 Kalo emi hadomi malu nunia, ema hotu-hotu bele natene malorek na'ak, emi ne'e Ha'ukaan maktuir.”
Yesus katak kedan na'ak, Petrus atu neli Nia
36 Nunia hotu, Simon Petrus nusu baa Yesus na'ak, “Ama Boot atu baa nabee?”
Yesus nataa na'ak, “Ha'u atu kbaa fatin ida mak oras ne'e, o sei la bele baa dauk. Mais nosi ikus, o moos bele baa.”
37 Mais Petrus nataa na'ak, “Ama Boot! Ha'u kadi'a aan ti'an atu mate bodik Ama. Tan saa oras ne'e, sei la kbele dauk?”
38 Yesus nataa na'ak, “Tebes ka? O makara latan okaan moris atu mate bodik Ha'u ka? Rona, tan Ha'ukaan dalen ne'e, tebes no loos: manu sei la kokoreek dauk, o meli Ha'u isin tolu ti'an.”