2 Mais Yesus nataa na'ak, “Uma ne'e kabaas tebes. Mais la kleur ona, ema atu naro'on mohu fatuk ne'e sia hotu-hotu.”

3 Hotu, Yesus baa tuur iha Foho Saitun, nebee bele mana mai Na'i Maromak Niakaan Uma Hamulak Huun. Niakaan maktuir na'in haat mak Petrus, Yakobus, Yohanis no Andreas baa tuir Nia atu dale mesan no Nia. 4 Sia nusu baa Yesus na'ak, “Ama! Katak malore lia mak Ama dale ohin nia nosi Uma Hamulak Huun. Wainhira loron nia to'o? Niakaan tadak oin nunabee?”

5 Yesus nataa na'ak, “Emi musti daka aan di'a-di'ak, nebee keta kona be'ur. 6 Ema oi-oik atu mai loko aan na'ak, ‘Ha'u ne'e, Kristus, mak Na'i Maromak nameno kedan hori uluk.’ Hodi nunia, sia be'ur nola ema wa'in. 7 Mais, lalika hata'uk kalo emi haree ema natuda malu, lale emi rona ha'ak ema natuda iha fatin hotu-hotu. Hahalok oi-oik nunia, musti mosu uluk lai, foin rai falu fila. 8 Ema klubun ida atu natuda sakar klubun seluk. Rai ida atu natuda sakar rai seluk. Rai kakekuk mosu iha nabee-nabee. Dinu salaen boot basuk moos mosu mai. Lia nia hotu-hotu foo tadak na'ak, oras rai falu fila kre'is ona, hanesan feto mak notak moras ti'an, tan oras nahoris kre'is ona.

9 Emi musti daka aan di'a-di'ak! Ema atu mai kohi emi, hotu dada nodi baa moon-metan, tan emi tuir Ha'u. Sia moos ta'e nababu emi iha uma hamulak laran. Sia moos kesi nola emi baa hataa ema makaer ukun sia. Mais emi musti katak malorek Ha'ukaan Manfatin Di'ak baa sia. 10 Ha'ukaan Manfatin Di'ak nia musti keke lema baa ema klubun hotu-hotu iha raiklaran tomak, foin rai falu fila. 11 Hanoin di'a-di'ak! Kalo ema kesi emi nodi baa moon-metan, keta makerat. Keta neo-neon ha'ak emi atu hataa saa, tan Maromak Kmalar Lulik foo lia fuan baa emi atu hodi hataa.^a

12 Hanoin! Ema mak fiar baa Ha'u, ema atu hirus nia, to'o niakaan familin du'uk buka dalan no'o nia. Kalo aman fiar, oan du'uk mak atu no'o aman. Kalo oan fiar, inan-aman du'uk mak atu no'o oan. 13 Ema hotu-hotu atu hirus emi, tan fiar Ha'u. Mais ema mak naterus aan tuir Ha'u bei-beik, nia nanis netan moris to'o nima-nimak.”^b

14 Hotu, Yesus nanorin tenik na'ak, “Ema aat basuk ida atu mai, tama baa nariik iha fatik lulik iha Na'i Maromak Niakaan Uma Hamulak Huun, to'o ema nakribi fatik nia. Na'i Maromak moos tali'ur nela. Dadi, kalo emi haree nunia ti'an, sintidu! (Ema mak leno ne'e moos, musti sintidu!) Hahalok nia foo tadak na'ak, loron susar to'o ti'an. Kalo naree nunia ti'an, ema rai Yudea musti nalai sa'e baa foho ona.^c 15 Musti halai lai-lais, nebee keta kona susar. Ema mak sai nosi uma ti'an, keta fila baa nola baho'ak ona. 16 Ema mak iha to'os, keta fila baa nola tais ona. Halai liu baa ona!^d 17 Baa oras nia, ema susar kaliuk, mak feto mako'us no feto mak sei nasusu lawarik oan, tan sia la bele nalai lai-lais. 18 Di'ak liu, hamulak hodi hakro'an, nebee loron aat nia sia keta mosu mai kona baa rai udan. 19 Loron nia sia, susar basuk! Nahuu nosi Na'i Maromak nase'i raiklaran to'o oras ne'e, ema sei la naree dauk susar boot oin nunia. Ema moos la naree tenik susar oin nunia.^e 20 Kalo Na'i Maromak la nabadak loron susar nia sia, la noo ema ida moos mak bele moris. Mais Nia nadomi Niakaan ema mak Nia boi nola ti'an. Tan lia nia, Nia nabadak loron susar nia sia.

21 Kalo loron susar nia sia to'o ti'an, emi atu rona ema na'ak, ‘Haree lai! Kristus iha ne'e!’ Ema seluk na'ak, ‘Kristus iha nebaa!’ Mais keta fiar! 22 Ema atu mosu mai nodi nola aan na'ak, ‘Ha'u ne'e, Kristus!’ Balu tenik na'ak, ‘Ha'u ne'e, Maromak mako'an.’ Sia atu nase'i tadak blaar oi-oik nodi diabu beran to'o be'ur nola ema. Sia buka dalan nebee Na'i Maromak eman sia moos bele kona be'ur! 23 Dadi, emi musti daka aan di'a-di'ak! Loron susar nia sia sei la to'o dauk, mais Ha'u foo katene kedan baa emi!”

24 Hotu, Yesus katak kedan tenik baa Niakaan maktuir sia na'ak, “Kalo loron susar nia sia siku ti'an,

26 Lia nia sia siku ti'an, foin emi bele haree hikar Ha'u, Ema Raiklaran Isin ne'e. Baa oras nia, Ha'u ktuun mai kodi kalo'an. Ema hotu-hotu atu naree Ha'ukaan beran no Ha'ukaan maka'as.^h 27 Hotu, Ha'u atu karuka Maromak Niakaan makbukar lale'an sia, nebee baa libur nola ema hotu-hotu mak Ha'u kboi kola ti'an kosi rai ulun to'o rai ikun, kosi lorosa'e to'o loromonu, nosi lorokaras to'o lorokbelan.”

28 Hotu, Yesus katak tenik nodi lia hatetek nosi ai huun na'ak, “Kalo ai tahan nahuu nakmodok, nia foo tadak na'ak, loro falin kre'is mai ona. 29 Nunia moos, loron susar mak Ha'u katak ohin nia sia. Kalo loron susar nia sia to'o mai ti'an, nia foo tadak na'ak, Ha'u kre'is mai ona. 30 Rona, tan Ha'ukaan dalen ne'e, tebes no loos! Nosi ema hotu-hotu mak moris baa oras ne'e, balu sei la mate dauk, mais loron susar nia sia mai ti'an. 31 Masik lale'an no raiklaran lakon mohu, Ha'ukaan Manfatin nafati nohuun!”

32 Hotu, Yesus katak tenik na'ak, “Oras ne'e, Ha'u kfoo katene kosi oras Ha'u kmai kikar. La noo ema ida mak natene niakaan loron no niakaan oras. Maromak Niakaan makbukar lale'an sia la natene. Ha'u na'in du'uk moos la katene. Ha'ukaan Ama mesan mak natene.ⁱ 33 Tan baa nia, musti daka aan di'a-di'ak, tan emi la hatene wainhira oras nia to'o mai.

34 La kleur ona, Ha'u atu kla'o kela emi, mais nosi ikus Ha'u kmai kikar. Lia nia hanesan ema ida mak la'o nela uman, baa fatin dook. Nia naruka niakaan ema serwisu atu babilan di'a-di'ak niakaan uma. Nia fa'e serwisu baa sia ida-idak no naruka makdaka odamatan nanokar atu daka di'a-di'ak to'o nia mai nikar.^j 35 Nunia moos emi. Musti daka aan loron-kalan, tan emi la hatene wainhira uma na'in mai nikar. Nia fila baa loron ka, kalan boot ka, oras loro sa'e ka, emi la hatene. 36 Keta arumak nia mai nikar teki-tekis, toma nola emi sei toba.

37 Lia mak Ha'u katak baa emi ne'e, Ha'u moos katak baa ema hotu-hotu ka'ak, ‘Daka aan di'a-di'ak hodi hein Ha'ukaan mamain.’”

[Yesus nanorin Niakaan maktuir sia iha foho Saitun nunia dei.]