Yesus Lia Di'ak
tuir
Lukas
Tan saa Lukas nakerek lia ne'e
1
1-3 Ama Teofilusa mak ha'u kakneter!Tabe.
Ema wa'in nakerek kokon ti'an lia nosi Yesus mak dadi iha amikaan leet, mak nato'o Na'i Maromak mamenon hori uluk. Sia nakerek lia Yesus nia, nodi libur lia mak uluk ami dale hosi ibun baa ibun, no lia mak ami rona hosi Yesus eman sia, no lia mak ami rona hosi ema seluk mak naree nodi matan du'uk.
Ha'u kleno lotu-lotuk lia nia sia hotu-hotu, kosi huun to'o rohan. Hotu, ha'u kakotu atu kakerek kalo ta-taek. Hodi nunia, ama bele natene malorek.
Lukas 1:1-25
Makbukar lale'an ida nasee kedan nosi Yohanis Mak Sarani Ema
5 Lia nosi Yesus huun nune'e: Baa oras Na'i Herodes kaer ukun iha rai Yudea, noo katuas ida naran Sakarias. Nia, na'ilulik Yahudi nosi Bei Abia klibur na'ilulik sia. Sakarias feen, naran Elisabet. Nia moos nosi na'ilulik husar-binan, tan nia, husar-binan nosi Bei Musa alin Harun.b 6 Sia rua moris moon tuir Na'i Maromak harukan no ukun-badu hotu-hotu. Ema moos nakneter sia. 7 Sia rua otas ti'an, mais la noo oan tan Elisabet kiuk.
8 Baa loron ida, Sakarias no na'ilulik seluk sia nosi klibur Abia netan leet atu serwisu iha Uma Hamulak Huun iha kota Yerusalem. 9 Tuir siakaan adat, na'ilulik sia suut liman, atu nodi natene see mak netan leet atu tama baa Ke'an Lulik Kaliuk, nebee sunu ai morin iha Na'i Maromak oin. Baa loron nia, suut liman kona baa Sakarias. 10 Hotu, Sakarias tama baa. Baa oras nia sunu ai morin iha Ke'an nia, ema lear namulak iha lalawar. 11 Teki-tekis, Maromak Niakaan makbukar lale'an ida natadu aan iha ai morin fatin sorin kwana.
12 Naree nunia, Sakarias nata'uk tebes. 13 Mais makbukar lale'an nia katak na'ak, “Sakarias! Keta mata'uk! Na'i Maromak rona ti'an okaan hamulak. Okaan feen atu nahoris oa mane ida bodik o. O musti manaran oan nia ma'ak, Yohanis. 14 Oan nia atu nalo o neon boot. Ema wa'in moos neon di'ak bele-bele no o, tan oan nia. 15 Nahuu nosi inan sei ko'us, Kmalar Lulik tuun baa oan nia ti'an. Nia musti naluli nemu lanuk hotu-hotu. Baa oras boot ti'an, Na'i Maromak atu foti nia baa ema mak noo folin.c 16 Nia atu namaus ema Isra'el wa'in atu fila tuir Na'i Maromak, dadi baa siakaan Ulun. 17 Oan nia lisan no beran nu'u Bei Elia, mak Maromak mako'an hori uluk. Oan nia mai uluk lai, foin Na'i Maromak solok Niakaan ema mak Nia nameno kedan hori uluk. Oan nia atu nalo ina-ama sia nadomi nikar siakaan oan. Ema mak se'i kotuk baa Na'i Maromak, nia atu filas sia nebee tuir nikar Na'i Maromak. Hodi nunia, nia nalo ema nadi'a neon atu simu Na'i Maromak eman mak Nia nameno ti'an nia.”d
18 Makbukar lale'an dale notu nunia, Sakarias nusu fila na'ak, “Nunabee lia nia bele dadi? Ha'u ko ha'ukaan feen otas ti'an! Oinsaa ha'u kbele katene ka'ak dale nia tebes?”
19 Makbukar lale'an nataa na'ak, “Nune'e! Ha'u ne'e, Gabriel, Maromak Niakaan makbukar. Nia du'uk naruka ha'u kmai katak lia di'ak ne'e baa o.e 20 Mais, tan o la fiar baa ha'ukaan dalen, o atu metan tadak nune'e: nahuu baa oras ne'e to'o oan nia moris, okaan nanaan dadi matek. Hodi nunia, o bele matene du'uk, saa mak ha'u kdale ne'e atu dadi tebes, kona baa niakaan oras.”
21 Oras makbukar lale'an dale no Sakarias nunia, ema lear mak namulak iha luan benar karin, tan Sakarias la sai. 22 Mais baa oras nia sai mai, nia la bele dale ona. Nia foo tadak baa sia nodi liman, foin sia natene na'ak Na'i Maromak natudu lia blaar ida baa nia iha Ke'an Lulik Kaliuk nia.
23 Serwisu mohu, Sakarias fila uma. 24-25 La kleur, Elisabet moos ko'us. Nia namuka aan fulan lima laran nodi dale na'ak, “Tonu Na'i Maromak! Nosi ikus Na'i Maromak natudu laran di'ak baa ha'u. Kalo ha'u ketan husar-binan ti'an, ema la namoe ha'u ona.”
Makbukar lale'an ida mai nasoru Maria
26 Baa oras Elisabet ko'us tama fulan neen ti'an, Na'i Maromak solok Niakaan makbukar lale'an Gabriel baa leo ida naran Nasaret iha rai Galilea.
Lukas 1:26-56
27 Iha nia noo feto nurak ida, naran Maria. Nia sasudin ti'an no mane ida, naran Yusuf. Yusuf nia, Na'i Daud husar-binan. Gabriel baa nasoru Maria,f 28 hotu nia nare'is aan baa feto nurak nia nodi na'ak, “Tabe! Na'i Maromak boi bete ti'an atu nalo lia kabaas ida bodik bete. Na'i Maromak namutuk no bete.”
“Maria! Lalika mata'uk.
Tan Na'i Maromak atu natudu laran di'ak baa o.
31 La kleur, o atu ko'us.
Hotu, o atu mahoris oa mane ida.
Musti manaran Nia ma'ak, Yesus.g
32 Nia atu dadi ema boot.
Na'i Maromak atu temi Nia na'ak, ‘Ha'ukaan Oan.’
Nia, Oa nosi Na'i Maromak Mak Aas Kaliuk.
Na'i Maromak atu foti Nia kaer ukun,
nu'u Niakaan Bei Daud.
33 Nia atu kaer ukun nima-nimak baa ema Isra'el sia.h
Niakaan ukun atu nafati nohuun.”i
34 Rona nola nunia, Maria nusu baa Gabriel na'ak, “Ha'u ne'e sei la katene mane dauk! Nunabee ha'u kbele ko'us?”
35 Gabriel nataa na'ak, “Nune'e bete! Maromak Kmalar Lulik atu tuun baa o. Beran nosi Maromak Mak Aas Kaliuk moos atu taka nola o. Hodi nunia, Oa mak atu moris nia, moon tebe-tebes tan Nia, Na'i Maromak Oan.
36 Keta blaar! Bete familin ida naran Elisabet moos ko'us ti'an. Tuir ema, nia la bele nahoris ona tan otas ti'an. Mais baa oras ne'e, nia ko'us fulan neen laran ti'an, 37 tan la noo lia ida mak Na'i Maromak la bele nalo!”j
38 Rona nola nunia, Maria nataa na'ak, “Di'ak. Ha'u ne'e, Na'i Maromak atan. Ha'u kadi'a aan simu Niakaan hakaran. Nebee, lia hotu-hotu ne'e dadi tuir saa mak o dale ti'an nia.”
Nunia hotu, makbukar lale'an nia la'o nela Maria.
Maria baa nateke Elisabet
39-40 Loron hira siku ti'an, Maria la'o nela Nasaret, lai-lais baa Sakarias leon iha rai Yudea foho leten. To'o nebaa, nia tama baa Sakarias uman nodi foo tabe baa Elisabet.
41 Baa oras Elisabet rona Maria foo tabe, oa iha niakaan notak nakfodak. Elisabet moos nakonu no Maromak Kmalar Lulik. 42 Hotu, nia dale nodi maka'as na'ak, “Maria! Ema atu foti-nahaas okaan naran liu feto hotu-hotu iha raiklaran ne'e! Sia moos atu foti-nahaas oa mak iha okaan notak! 43 Ha'u neon boot, tan ha'ukaan Na'in inan mai nateke ha'u. 44 Oras o tama foo tabe baa ha'u, oa iha ha'ukaan notak nakfodak kedas, tan neon di'ak. 45 Na'i Maromak natudu laran di'ak baa o, tan o fiar ma'ak, Nia atu nala'ok Niakaan mamenon.”
Maria tonu-naboot Na'i Maromak
46 Hotu Maria foti lian na'ak,
“Ha'u kfoti-kahaas no tonu-kaboot Na'i Maromak
kodi neon no laran tomak.
47 Ha'u neon di'ak,
tan Na'i Maromak, mak ha'ukaan Maksorin.
48 Nia tau matan baa ha'u, rai matan baa ha'u,
masik ha'u ne'e, Niakaan ata mak la folin.
Nahuu baa oras ne'e, ema hotu-hotu nafoli ha'u na'ak,
feto mak sotir basuk,k
49 tan Na'i Maromak nase'i lia boot bodik ha'u.
Nia, mak Beran Kaliuk, Lulik Kaliuk.
50 Nia natudu dadomin baa ema hotu-hotu mak nakneter no lo'u baa Nia,
nosi husar-binan ida baa husar-binan ida.
51 Nia nodi Niakaan beran,
atu tokar lauk ema mak loko aan, no ema mak naksa'ek aan.
52 Nia natuun makaer ukun mak nahaas aan.
Mais Nia nahaas ema mak naraik aan.l
53 Nia nahaan ema salaen to'o bosu,
mais te'ur nasai ema maksoin sia
nebee sia la'o nodi liman mamuk.
54 Nia tulun Niakaan ema Isra'el sia,
tan Nia nadomi sia nohuun.
55 Uluk Nia namate menon no itakaan bei uluk,
mak Bei Abraham no niakaan husar-binan hotu-hotu.
Baa oras ne'e, mamenon nia metin nafati.”m
56 Tonu notu nunia, Maria nein no Elisabet to'o fulan tolu laran. Foin nia fila baa Nasaret.
Elisabet nahoris Yohanis
57 Elisabet loron nahoris to'o ti'an, nia moos nahoris oa mane ida.
Lukas 1:57-80
58 Hotu lia nia keke lema baa familin no ema leo laran sia na'ak, Na'i Maromak natudu ti'an laran di'ak nodi foo oa ida baa Elisabet. Rona nola nunia, sia hotu-hotu moos neon di'ak.
59 Oan nia otas loron walu ti'an, sia nalo lahan hamane aan baa nia, tuir ema Yahudi ukun-badu. Sia nakara nanaran nia Sakarias, tuir aman naran.n 60 Mais inan la no'uk na'ak, “La bele nunia! Musti hanaran nia Yohanis!”
61 Mais sia nataa na'ak, “Tan saa mili naran Yohanis? La noo ema ida iha emikaan familin mak tau naran nia!” 62 Hotu sia foo tadak baa Sakarias atu nodi natene nia nakara tau naran saa baa oa nia.
63 Hotu Sakarias foo tadak nodi nusu fatuk hakerek. Sia foo baa, nia nakerek na'ak, “Naran Yohanis!” Naree nunia, ema nia sia hotu-hotu moos blaar karin.
64 Baa oras nia moos, Sakarias nanaan matek nia, mamar kedas. Nia moos tonu kedan Na'i Maromak. 65 Ema hotu-hotu iha nia, nata'uk no blaar. Lia nia keke lema nosi ibun baa ibun, to'o ema iha rai Yudea foho leten sia moos natene hotu. 66 Ema mak rona lia nia nanoin na'ak, “Malorek tebes! Na'i Maromak beran tuun baa oan nia. Nia boot mai, nia atu dadi saa?”
Sakarias tonu-naboot Na'i Maromak
67 Baa oras nia, Sakarias nakonu no Maromak Kmalar Lulik. Hotu nia dale na'ak,
68 “Ha'u ktonu-kaboot ha'ukaan Na'in. Nia, mak ema Isra'el siakaan Maromak!
Nia namaan aan mai ti'an
atu sori Niakaan hutun-renu nosi moris nu'u ata.
69 Nia foti ti'an Ema ida nosi Na'i Daud husar-binan.
Ema nia atu sori ita,
nodi Niakaan beran boot.
70 Na'i Maromak nameno kedan lia nia hori uluk,
nodi Niakaan mako'an moon sia.
71 Oras ne'e, Nia loke dalan atu nabusik ita
nosi funu,
no nosi ema mak laran moras baa ita.
72-73 Nia natudu laran di'ak baa itakaan bei uluk sia,
tan nanoin bei-beik Niakaan mamenon
mak Nia namate hori uluk no Bei Abraham.
74 Nia nabusik ita nosi funu,
nebee ita bele lo'u baa Nia,
no la hata'uk tenik.
75 Nia nabusik ita
nebee ita bele moris moon no loos iha Niakaan oin nohuun.
76 Yohanis! O ne'e, ha'ukaan oan.
O boot mai, ema atu natene na'ak, o ne'e, mako'an baa Maromak Mak Aas Kaliuk.
O atu baa katak ema,
nebee sia simu Na'in namaan aan mai.o
77 O atu baa matudu dalan baa Niakaan eman sia,
nebee sia natene na'ak, sia bele moris no Na'i Maromak,
tan Nia kasu siakaan salan.
78-79 Na'i Maromak neon monu baa ita,
to'o Nia foo leet foun baa ita,
nu'u loro foun nasai kroman foun.
Bodik ita mak moris iha makukun laran,
no ita mak hata'uk mate,
kroman mai ti'an atu nala'o ita baa dalan dame.”p
80 Nunia hotu, Yohanis hetak kleur, hetak boot. Maromak Kmalar Lulik moos nakbiit nia. Boot ti'an, nia baa nein iha rai fuik, to'o nahuu nala'ok serwisu bodik ema Isra'el.