11
Haninu baa ha'u, hodi halo tuir ha'ukaan moris dalan, tan ha'u kaninu baa Kristus kodi kalo tuir Nia.aIha uma hamulak, feto no mane musti foo hakneter halo loos
2 Ha'u ktonun emi, tan masik nunabee moos, emi sei hanoin ha'u nohuun. Emi sei hala'o lia hotu-hotu mak ha'u kanorin ti'an. Di'ak tebes! 3 Mais ha'u ksei koo lia ida atu katak baa emi. Lia nia nune'e: keta halu'a emikaan huun-abut. Mane nahabut baa Kristus. Feto nahabut baa mane. No Kristus nahabut baa Na'i Maromak.b
4 Mane lalika taka ulun baa oras namulak, no baa oras nato'o Na'i Maromak mamenon. Kalo taka ulun, hahalok nia, ahan nia namoe Kristus, tan nia la nala'ok tuir itakaan adat kneter. 5 Mais feto musti taka ulun baa oras namulak, no baa oras nato'o Na'i Maromak mamenon. Kalo la taka ulun, hahalok nia ahan nia namoe niakaan la'en, tan la nala'ok tuir itakaan adat kneter. Nia moos namoe aan du'uk, ahan feto ulun koi molik . 6 Tebes. Kalo feto la no'uk taka ulun atu dadi tadak nia nakneter la'en, di'ak liu, nia koi molik ulun. Mais kalo nia noran moe tan ulun koi molik, di'ak liu, taka ulun dei.
7 Haneo kokon nune'e: mane lalika taka ulun, tan Na'i Maromak nase'i mane tuir Niakaan ilas. Hodi nunia, mane dadi Na'i Maromak liman rasan mak nalore Na'i Maromak Niakaan maka'as. Mais feto dadi baa liman rasan mak nalore mane niakaan maka'as.c 8 Na'i Maromak la nase'i mane nosi feto. Mais nase'i feto nosi mane. 9 Nia moos la nase'i mane bodik feto. Mais nase'i feto bodik mane.d 10 Tan lia nia, di'ak liu, feto taka ulun nebee ema hotu-hotu bele naree na'ak, oras nia nariik atu namulak no nato'o Na'i Maromak mamenon, nia foo hakneter tuir loos. Makbukar lale'an moos bele naree nia nalo nunia. 11 Mais ita mak talin aan ho Kristus, ita hatene ha'ak, feto no mane la ida-idak moris du'uk. 12 Dala uluk, feto dadi nosi mane. Hotu nunia, mane moris nosi feto. Mais Na'i Maromak mak nase'i sia hotu-hotu.
13 Haneo du'uk! Kalo feto namulak baa Na'i Maromak nodi la taka ulun, emi horan hahalok nia di'ak ka, lale? 14 Tuir emikaan adat iha Korintus, kalo mane fuuk naruk, nia namoe aan. 15 Mais kalo feto fuuk naruk, nia kabaas basuk. Nia netan niakaan fuuk naruk nia, nebee bele taka nola ulun.
16 Kalo ema sakar ha'ukaan dalen ne'e, ha'u kataa nune'e: ami malikuk hutun sarani la natene adat seluk. Iha hutun sarani fatin hotu-hotu, sia nala'ok nune'e dei.
Keta oi-oik baa oras hamutuk hodi hanoin Yesus mate
17 Oras ne'e, ha'u kdale lia ida tenik. Iha lia ne'e, ha'u la kbele mose emi, tan baa oras emi haklibur, emi la halo tuir loos, mais emi hetak hahutan aan.
18 Ha'u krona ema dale na'ak, baa oras emi haklibur atu hamulak, emi hakfa'ek aan. Lia mak ha'u krona nia, arumak tebes. 19 (Tan emi hakbelan malu nunia, nosi ikus ita bele hatene malorek see mak tebe-tebes nanono baa itakaan Na'in, no see mak lale.)
20 Baa oras emi haklibur atu naa tubi no nemu anggor ween nodi nanoin Na'i Yesus mate, emikaan hahalok la fatan. 21 Lia kakaer mak ne'e: oras emi haa-hemu nia, emi la hein malu. Emi balu haa rotus. Balu tenik hemu lanu. Mais rumak sia salaen, tan la netan fafa'ek. 22 Nunabee? Emi la haa iha emikaan uma ka? Emi hakara hahaat hutun sarani naran di'ak ka? Emi hakara hamoe ema mukit sia ka? Emi hakara ha'u kdale oin nunabee? Hakara ha'u kmose emi tan lia ne'e ka? Keta kedan!
Tubi no anggor ween nia, dadi tadak baa ita hodi hanoin Yesus mate
23 Itakaan Na'in du'uk katak kedan lia ne'e baa ha'u. Oras ne'e, ha'u katutan tenik baa emi nune'e: Baa kalan ema atu fa'an Na'i Yesus, Nia foti nola tubi baluk ida. 24 Hotu namulak nodi sera dodan baa Na'i Maromak. Namulak notu, Nia katak baa Niakaan maktuir sia na'ak, “Haa tubi ne'e, tan tubi ne'e, Ha'ukaan isin lolon du'uk. Ema atu nadodok Ha'ukaan isin lolon bodik emi. Haa hodi hanoin Ha'u.” 25 Nunia tenik, baa oras sia naa notu. Nia nola hemu fatik mak noo anggor ween, nodi katak na'ak, “Anggor ween ne'e, dadi lia tadak na'ak, Na'i Maromak nakara namate menon foun no emi nodi Ha'ukaan raan. Sura oras emi hemu anggor ween ne'e, emi musti hanoin baa Ha'ukaan mamaten.”e 26 Tebes. Tan Yesus dale nunia, sura oras ita halo lahan ne'e hodi haa tubi no hemu hosi hemu fatik ne'e, ahan ita katak hikar lia nosi itakaan Na'in mamaten to'o Nia namaan aan mai nikar.
Kalo neon la loos, keta tuur hamutuk atu hanoin Yesus mate
27 Kalo ema ida naa tubi nia no nemu nosi hemu fatik nia atu nanoin itakaan Na'in, mais ema nia neon la loos, Na'i Maromak nanis kastikar nia. Tan tubi no anggor ween nia mak Na'i Yesus isin lolon no Na'i Yesus raan. Kalo ema neon la loos, nia la fatan tuir naa no tuir nemu, tan niakaan hahalok nia nahaat Na'i Yesus. 28 Di'ak liu, ema ida-idak leno du'uk aan lai. Kalo noran neon loos, foin bele naa tubi no nemu anggor ween nia. 29 Mais noo ema mak naa-nemu nodi neon la loos. Sia naneo na'ak, “Yesus mate nia, la noo folin. Niakaan isin lolon la noo folin bodik ha'u.” Ema oin nunia natiu nola siakaan susar du'uk, tan sia atu kona kastikar. 30 Mais tan emi halo hahalok nunia, emi balu la biit, balu moras, no balu mate ti'an iha emikaan klaran.
31 Mais kalo ita leno di'a-di'ak itakaan neon uluk lai, ita la kona kastikar nunia. 32 Kalo itakaan Na'in kastikar ita, Nia nalo nunia atu nanorin ita baa dalan loos, nebee ita keta kona kastikar to'o welon bele-bele no ema mak se'i kotuk baa Nia.
33 Mamaluk sia mak ha'u kadomi! Kalo emi haklibur atu haa-hemu hodi hanoin Na'i Yesus mate, emi musti hein malu. 34 Kalo salaen basuk, di'ak liu haa uluk iha uma lai. Hotu, oras emi haklibur bele-bele, emi keta kona kastikar.
Sei noo lia seluk sia mak emi husu baa ha'u. Mais hein ha'u kmai lai, foin kahulin di'a-di'ak.