2-3 Natoon baa oras nia moos, na'ilulik ulun sia no ema Farisi sia, naruka sondadu Roma klibur ida no ema makdaka na'in hira, baa Yudas, tan sia natene Yudas nakara fa'an Yesus. Yudas natene to'os nia, tan dala wa'in Yesus no Niakaan maktuir sia naklibur iha fatin nia. Tan baa nia, Yudas nodi ema wa'in nia baa buka Yesus iha to'os nia. Sia nodi klonus, badut, no ro'at-meik.

4 Tuir loos, Yesus natene ti'an lia hotu-hotu mak atu dadi baa Nia. Tan lia nia, Nia la'o soruk baa, hotu nusu sia na'ak, “Emi mai buka see?”

5 Sia nataa na'ak, “Ami buka ema ida, naran Yesus nosi leo Nasaret.”

Hotu, Yesus katak na'ak, “Nia, mak Ha'u.” Baa oras nia, Yudas mak fa'an Yesus moos nariik namutuk no sia. 6 Oras Yesus dale na'ak, “Nia, mak Ha'u,” ema nia sia hotu-hotu nakiduk, nakloti baa rai.

7 Hotu Yesus nusu tenik na'ak, “Emi mai buka see?”

Sia nataa na'ak, “Yesus, ema Nasaret nia.”

8 Yesus dale na'ak, “Ohin Ha'u katak ti'an ka'ak, Nia, mak Ha'u. Kalo emi buka Ha'u, keta kohi ema seluk. Habusik sia baa.” 9 (Nia dale nunia atu natebes lia ida mak Nia dale kedan ti'an na'ak, “Ama. Ema hotu-hotu mak Ama latan ti'an baa Ha'u, la noo ida mak lakon.”)

10 Natoon baa nia, Simon Petrus nodi surik ida. Naree ema wa'in nia mai buka Yesus, nia losu surik. Hatene baa, nia taa kotu ema ida tilun kwana. (Ema nia, naran Malkus. Nia, na'ilulik ulun boot ain-liman.) 11 Naree nunia, Yesus nakahik na'ak, “Petrus! Maknua mikar okaan surik. Keta saseni, tan Ha'ukaan Ama katak ti'an na'ak, Ha'u kmusti ketan susar oin nune'e.”^a

12 Nunia hotu, sondadu sia no siakaan ulun, no makdaka sia, mai kohi Yesus, no kesi nola Nia. 13 Hotu, sia nala'o nodi uluk Nia baa Anas, mak Kayafas banin mane. Kayafas mak dadi na'ilulik ulun boot baa tinan nia. 14 Uluk, nia mak foo lia tate'an baa Yahudi ulun sia na'ak, “Di'ak liu, ema ida mate bodik ema hotu-hotu.”^b

15 Sia nodi Yesus baa, Simon Petrus tuir nosi kotuk, bele-bele no maktuir seluk ida. Nia, mak ha'u, Yohanis. Tan na'ilulik nia natene ha'u, ha'u kbele tama ko Yesus baa uma lalawar. 16 Mais, Petrus la tama. Nia nariik loos iha luan, kre'is odamatan nanokar. Hotu, ha'u ksai kikar, dale ko feto ida mak daka iha nia, nebee Petrus bele tama. 17 Oras ami tama, feto nia nusu baa Petrus na'ak, “O moos Niakaan maktuir ida ka?”

Mais Petrus nataa na'ak, “Lale!”

18 Iha lalawar nia, makdaka sia no ain-liman sia naniruk ha'i, tan rai malirin. Naree nunia, Petrus baa naniruk no sia.

19 Iha uma nia laran, na'ilulik ulun boot nusu Yesus na'ak, “Okaan maktuir sia, mak see? O manorin saa baa sia?”

20 Yesus katak na'ak, “Ha'u la kdale subar. Loro-loron Ha'u kanorin loke fore ti'an iha ema hotu-hotu oin. Ha'u moos kanorin ti'an iha Uma Hamulak Huun no iha itakaan uma hamulak sia hotu. Fatin ne'e sia, mak loron-loron ita ema Yahudi haklibur fatin. 21 Tan saa o musu Ha'u nunia? Di'ak liu, musu du'uk baa ema mak rona ti'an Ha'ukaan dalen. Nanis, sia natene saa mak Ha'u kanorin ti'an.”

22 Rona Yesus nataa nunia, makdaka ida mak nariik iha nia, basa Nia nodi na'ak, “Keta dale nunia baa ulun boot!”

23 Yesus katak na'ak, “Kalo Ha'u kdale sala, ma'ak malorek sala nia. Mais kalo Ha'u kdale loos, tan saa o basa Ha'u?”

24 Nunia hotu, Anas naruka sia nodi Yesus baa Kayafas, tan nia mak na'ilulik ulun boot. Oras sia nala'o nodi baa, sia sei kesi nafati Yesus.

25 Natoon baa nia, Simon Petrus no'i naniruk ha'i. Hotu, ema seluk ida nusu nia na'ak, “O moos Niakaan maktuir ida ka?”

Mais Petrus neli na'ak, “Lale!”

26 Iha nia moos, noo na'ilulik ulun boot ain-liman ida. Nia famili nosi ema mak Petrus taa kotu tilun. Ema nia nusu Petrus na'ak, “Hoi! Ohin nia, o mak iha to'os nia! Ha'u karee o.”

27 Mais Petrus neli tenik na'ak, “Lale!” Baa oras nia moos, manu kokoreek kedas.

28 Baa seisawan nia, sia nodi Yesus nosi Kayafas uman, baa gubernur uman iha sondadu Roma fatin.^c Mais ema Yahudi sia la tama baa ema Roma fatin nia, tan lia nia nalo sia sasobo, to'o la bele naa Dahur Paska. 29 Ema Yahudi sia to'o baa, gubernur Pilatus sai nasoru sia nodi nusu na'ak, “Emi tula sala saa baa Ema ne'e?”

30 Sia nataa na'ak, “Nune'e, ama. Kalo Ema ne'e lahoos ema aat, nanis ami la mai kakoen ama.”

31 Mais gubernur la no'uk simu. Hotu nia katak na'ak, “Loos emi dei mak tetu du'uk Niakaan lia tuir emikaan ukun-badu Yahudi.”

Mais Yahudi ulun sia katak na'ak, “La bele, ama. Ami ema Yahudi la hoo beran atu taa ukun mate baa ema. Ukunrai Roma dei mak noo beran nia.” 32 (Baa oras sia dale nunia, saa mak Yesus dale kedan hori uluk, dadi ti'an. Tan uluk, Nia katak ti'an baa niakaan ema sia na'ak, Nia atu mate tuir ukunrai Roma. Ne'e mak, sia nedi no'o Nia baa ai karuus.)^d

33 Hotu gubernur tama nikar baa sondadu fatin. Nia bolu nola Yesus nodi nusu na'ak, “Nunabee? O ne'e, ema Yahudi na'in ka?”

34 Yesus nusu fila na'ak, “Ama du'uk mak nakara nusu nunia ka, ema seluk mak nasara baa ama?”

35 Gubernur nataa na'ak, “Hoi! Keta maneo ma'ak ha'u ne'e ema Yahudi. Okaan ema du'uk no na'ilulik ulun sia mak latan O baa ha'u. O malo sala saa ti'an? Ma'ak ona!”

36 Yesus moos katak baa na'ak, “Ha'u lahoos na'in nosi raiklaran ne'e. Kalo Ha'u na'in raiklaran, nanis Ha'ukaan ain-liman sia mai lituk Ha'u bele-bele, nebee ema Yahudi sia la bele kohi nola Ha'u. Ha'u ne'e, Na'i tebes, mais lahoos ema raiklaran mak foti Ha'u.”

37 Hotu gubernur nusu nikar na'ak, “Dadi, O ne'e, na'in tebes ka lale?”

Yesus nataa na'ak, “Ama du'uk mak na'ak Ha'u ne'e Na'in. Tuir loos, Ha'u kmoris mai atu dadi Na'in. Ha'u kmai iha raiklaran ne'e atu kanorin hanorin loos. Ema hotu-hotu mak kaer metin hanorin loos nia, sia mak dadi Ha'ukaan renun.”

38a Rona nola nunia, gubernur nusu na'ak, “Hanorin loos nia mak nabee?”

38b Gubernur Pilatus dale notu nunia, nia moos sai nikar baa ema Yahudi sia, nodi dale na'ak, “Ha'u kleno Nia ti'an, mais la ketan sala ida kois.

39 Tuir itakaan kakotun, sura tinan baa oras dahur Paska, gubernur musti nabusik ema bui ida bodik emi. Dadi, nunabee? Tinan ne'e, ha'u kabusik Na'i Yahudi ka? ”

40 Rona nola nunia, sia hotu-hotu nahii bele-bele na'ak, “Keta! Keta habusik Nia! Habusik Barabas dei!” Sia na'ak nunia, mais tuir loos, Barabas nia, ema aat basuk.^e