Yesus Lia Di'ak
tuir
Mateus
Yesus Niakaan bei uluk sia
1
1-2 Hakerek ne'e katak lia nosi Yesus Kristus, Ema mak Na'i Maromak nameno kedan hori uluk atu solok mai. Nia ne'e, Na'i Daud husar-binan no Bei Abraham husar-binan.Nahuu nosi Bei Abraham to'o Na'i Daud, siakaan husar-binan mane, dalas sanulu resin haat. Siakaan naran, mak ne'e:
Abraham oan, naran Isak.
Isak oan, naran Yakob.
Yakob oan, naran Yahuda. Yahuda moos sei noo maun-alin tenik.
3 Yahuda oan, naran Peres no Sera (siakaan inan, naran Tamar).
Peres oan, naran Herson.
Herson oan, naran Ram.
4 Ram oan, naran Aminadab.
Aminadab oan, naran Nahason.
Nahason oan, naran Salmon.
5 Salmon oan, naran Boas (Boas inan, naran Rahab).
Boas oan, naran Obet (Obet inan, naran Rut).
Obet oan, naran Isai.
6a Isai oan, naran Daud.
6b-11 Nosi Daud to'o oras ema Isra'el kona soe baa Babilon, siakaan husar-binan mane, dalas sanulu resin haat tenik, mak ne'e:
Daud oan, naran Salomo (Salomo inan, uluk Uria feen).
Salomo oan, naran Rehabeam.
Rehabeam oan, naran Abia.
Abia oan, naran Asaf.a
Asaf oan, naran Yosafat.
Yosafat oan, naran Yoram.
Yoram oan, naran Usia.
Usia oan, naran Yotam.
Yotam oan, naran Ahas.
Ahas oan, naran Heskia.
Heskia oan, naran Manase.
Manase oan, naran Amos.b
Amos oan, naran Yosias.
Yosias oan, naran Yekonya. (Yekonya no niakaan alin sia moris baa oras ema Isra'el sia kona soe baa Babilon.)c
12-16 Baa oras sia kona soe baa Babilon to'o baa Yesus, siakaan husar-binan mane, dalas sanulu resin haat tenik, mak ne'e:
Yekonya oan, naran Saltiel.
Saltiel oan, naran Serubabel.
Serubabel oan, naran Abihut.
Abihut oan, naran Elyakim.
Elyakim oan, naran Asor.
Asor oan, naran Sadok.
Sadok oan, naran Akim.
Akim oan, naran Eliut.
Eliut oan, naran Eliasar.
Eliasar oan, naran Matan.
Matan oan, naran Yakob.
Yakob oan, naran Yusuf.
Yusuf ne'e mak Maria la'en. Maria ne'e mak niti baa Yesus. Yesus ne'e mak Kristus, mak Na'i Maromak boi kedan hori uluk.
17 Nahuu nosi Abraham to'o Daud, husar-binan dalas sanulu resin haat; nosi Daud to'o oras sia kona soe baa Babilon, husar-binan dalas sanulu resin haat; no nosi Babilon to'o Kristus, husar-binan dalas sanulu resin haat.
Maria nahoris Yesus
18 Lia Maria nahoris Yesus nune'e:
Maria sasudin no Yusuf ti'an. Mais sia na'in rua sei la namutuk dauk hanesan feen-la'en, Maria netan ti'an nosi Kmalar Lulik.d 19 Baa oras Yusuf natene na'ak Maria netan ti'an, nia nakara sia rua fa'e malu. Mais Yusuf nia, ema moon. Nia la no'uk namoe Maria iha ema lear oin. Tan lia nia, Yusuf buka dalan atu fa'e malu no-nook dei.
20 Mais baa kalan ida, oras Yusuf sei nanoin baa-mai, nia me'i. Iha me'i nia, nia naree Maromak Niakaan makbukar lale'an ida mai katak baa nia na'ak, “Yusuf! O ne'e, Na'i Daud husar-binan. Keta makerat atu mola Maria, tan lawarik oan mak iha niakaan notak nia, Maromak Kmalar Lulik mak nase'i. 21 Maria atu nahoris oan mane ida. O musti manaran nia ma'ak, Yesus, tan Nia mak atu sori Na'i Maromak eman sia nosi sala.”e f
22 Lia nia atu nato'o saa mak Na'i Maromak katak kedan hori uluk. Tan Nia naruka mako'an Yesaya nakerek nela na'ak,
23 “Hanono, mai!
Feto lawarik ida mak sei la natene mane, atu netan.
Hotu nia nahoris mane oan ida.
Sia atu nanaran Nia na'ak, Emanuel.”
(Iha lia Ibrani, Emanuel lia isin na'ak,
Na'i Maromak namutuk no ita.)g