Lasarus mate
11
1-2 Noo ema ida, naran Lasarus. Nia nein iha leo Betania namutuk no biin na'in rua naran Maria no Marta. (Maria ne'e, mak uluk fui mina morin baa Yesus ain, hotu no'as nodi niakaan fuuk.) Baa dala ida, Lasarus moras todan.a 3 Niakaan biin sia solok lia baa Yesus na'ak, “Ita Boot belun Lasarus, moras todan.”4 Rona lia nia, Yesus dale na'ak, “Moras ne'e la nodi nia baa mate. Na'i Maromak atu nodi lia ne'e natudu Niakaan kabaas, nebee ema foti-nahaas Ha'u, mak Niakaan Oan ne'e.”
5 Yesus dodan Marta no alin Maria no Lasarus. 6 Mais oras Nia rona na'ak, Lasarus moras, Nia sei nein loron rua tenik iha mota Yordan balu baa. 7 Nunia hotu, Nia katak baa maktuir sia na'ak, “Mai ita baa hikar Lasarus leon iha rai Yudea.”
8 Mais sia sakar na'ak, “Foin da-dauk ne'e, Yahudi ulun sia atu tuda no'o Ita Boot iha nebaa. Oras ne'e Ita Boot sei nakara tenik baa nebaa ka?”
9 Yesus nataa na'ak, “Keta hata'uk! Sura loron, loro matan naksinak hori seisawan to'o loraik. Ne'e na'ak, noo kroman tuku sanulu resin rua laran. Kalo la'o iha kroman, ema la sidi ain, tan loro nakroma raiklaran. 10 Mais kalo la'o iha makukun, ema sidi ain, tan la noo kroman.”b
11 Yesus dale notu nunia, Nia katak tenik na'ak, “Itakaan belun Lasarus toba ti'an. Mais Ha'u atu kbaa fu'a kadeer nia.”
12 Rona Yesus dale nunia, maktuir sia na'ak, “Ita Boot. Kalo nia toba, ne'e na'ak, nia atu di'ak nikar.”
13 Tuir loos, Yesus dale soe lia nosi Lasarus mamaten. Mais, sia la kohi. 14 Hotu Nia katak malorek na'ak, “Nune'e. Lasarus mate ti'an. 15 Mais Ha'u neon di'ak, tan baa oras nia mate, Ha'u la iha. Mai ita baa Lasarus ona, nebee saa mak atu dadi, bele nalo emi fiar baa Ha'u.”
16 Iha nia moos no maktuir ida, naran Tomas, mak ema temi na'ak, “oa karuak”. Rona Yesus dale nunia, nia katak baa maktuir rumak sia na'ak, “Mai ona! Di'ak liu ita hotu-hotu baa nebaa, nebee ita mate bele-bele ho Nia.”
Yesus baa Betania atu nasoru Marta no Maria
17-19 Nunia hotu, Yesus sia baa leo Betania.
Leo nia, dook nosi kota Yerusalem kilo tolu dei. Ema Yahudi wa'in moos mai nosi nebaa atu namalu neon namutuk no Marta no Maria.
Yesus sia to'o leo tehen, foin natene na'ak, ema nakoi Lasarus loron haat ti'an.
20 Oras Marta rona nola Yesus mai ti'an, nia sai baa nasoru Nia. Mais Maria nein iha uma laran dei. 21 Nasoru ti'an, Marta katak baa Yesus na'ak, “Adeei, Ama Boot! Kalo Ama iha ne'e, nanis ha'ukaan alin la mate. 22 Mais ha'u kfiar, Ama nakara nusu saa baa Na'i Maromak, Ama nanis netan.”
23 Hotu Yesus katak baa nia na'ak, “Marta! Okaan alin atu moris nikar.”
24 Marta nataa na'ak, “Tebes. Ha'u katene, baa oras rai falu fila Na'i Maromak atu nalo ha'ukaan alin moris nikar bele-bele no ema hotu-hotu mak mate ti'an.”
25 Mais Yesus katak na'ak, “Ha'u koo beran atu kalo ema moris nikar, tan Ha'u ne'e, moris huun. Ema mak fiar baa Ha'u, masik sia mate ti'an moos, sia netan moris to'o nima-nimak. 26 Nunia moos baa ema mak sei moris. Marta, o fiar baa Ha'ukaan dalen ne'e ka?”
27 Marta nataa na'ak, “He'e, Ama Boot! Ha'u kfiar Ama Boot ne'e, Kristus, Na'i Maromak Oan mak Nia nameno ti'an atu solok mai raiklaran ne'e.”
Yesus tanis
28 Marta dale notu nunia, nia moos fila uma. To'o baa, nia bolu nola alin Maria. Sia rua mesan, hotu Marta katak na'ak, “Ama Boot mai ti'an. Nia nakara nasoru o.” 29-31 Rona nola nunia, Maria nariik lai-lais baa nasoru Yesus. Ema Yahudi mak tuur iha uma laran naree nunia, sia moos tuir kedas Maria, tan sia naneo na'ak, nia atu baa tanis iha rate.
Baa oras nia, Yesus sia sei la tama dauk baa leo laran, tan sia sei iha fatin mak ohin sia nasoru Marta. 32 To'o fatin nia baa, Maria naree Yesus, hotu nia nakni'a iha Yesus ain nodi katak na'ak, “Adeei, Ama Boot! Kalo Ama iha ne'e, nanis ha'ukaan alin la mate.”
33 Naree Maria no ema Yahudi mak tuir nia sia tanis nade'un aan, Nia neon monu nodi noran susar. 34 Hotu Nia nusu na'ak, “Emi hakoi nia iha nabee?”
Sia nataa na'ak, “Mai Ama Boot! Mai haree du'uk baa.”
35 Rona nola nunia, Yesus moos luun turu, tan neon susar basuk. 36 Hotu ema Yahudi nia sia dale baa malu na'ak, “Maree kokon baa. Nia nadomi Lasarus liu resik!”
37 Mais balu dale na'ak, “Ema ne'e, bele namoon ema delek matan. Tan saa Nia la bele sori nola Lasarus nebee keta mate?”
Lasarus moris nikar
38 Nunia hotu, Yesus neon susar tenik. Nia nare'is aan baa fatuk kuak mak ema nakoi Lasarus baa. Fatuk kuak nia, sia taka ti'an nodi fatuk boot ida. 39 Naree nunia, Yesus naruka ema iha nia sia na'ak, “Foti sees fatuk ne'e!”
Rona nola nunia, Marta, mak Lasarus biin, sakar na'ak, “Keta, Ama Boot! Nia mate loron haat ti'an! Nanis dois ti'an.”
40 Mais Yesus foo natene baa nia na'ak, “O sei manoin ka lale, ohin Ha'u kdale nia? Ha'u katak ti'an ka'ak, kalo o fiar tebe-tebes baa Ha'u, o atu maree Na'i Maromak Niakaan maka'as.”
41 Hotu, ema na'in hira dudu sees fatuk boot nosi rate nia. Yesus tanaat sa'e baa lale'an, nodi katak na'ak, “Ama! Ha'u ksera dodan, tan Ama rona Ha'u. 42 Ha'u katene hori uluk ti'an Ama rona Ha'u nohuun. Tan baa nia, Ha'u kdale tenik baa oras ne'e iha ema wa'in oin, nebee sia natene, Ama mak solok Ha'u.” 43 Dale notu nunia, Yesus nahii nodi lian maka'as na'ak, “Lasarus! Sai mai ona!”
44 Ema maten nia moos sai kedas nosi kuak nia. Tais mak ema nodi falun ain no liman, sei nafati. Tais lesu moos sei taka nola oin. Hotu Yesus naruka ema iha nia sia na'ak, “Loke hola tais nia lai, nebee nia bele la'o!”
Ema buka dalan atu no'o Yesus
45 Naree nunia, ema Yahudi wa'in mak mai namalu neon no Maria, fiar baa Yesus. 46 Mais balu baa nasara lia nia baa ema partee Farisi sia.
47 Rona hotu lia nia, na'ilulik ulun sia no ema Farisi sia naklibur atu kabuar lia fuan. Sia dale baa malu na'ak, “Ema nia nase'i tadak blaar oi-oik ti'an! Ita musti halo nunabee tenik? 48 Kalo ita habusik Nia dei, ema hotu-hotu bele fiar baa Nia hanesan na'in. Hodi nunia, sondadu ukunrai Roma nadodok itakaan Uma Hamulak Huun no ita ema Yahudi hotu-hotu.”
49 Natoon baa tinan nia, Kayafas mak dadi siakaan na'ilulik ulun boot. Nia dale baa sia na'ak, “Hoi, beik sia! Emi la hatene saa ida! 50 Di'ak liu, ema ida mate bodik ema hotu-hotu. Kalo lale, sondadu Roma sia nadodok welon ita ema Yahudi tomak.” 51 Tuir loos, Kayafas dalen nia, Na'i Maromak mak dale nodi Kayafas oin, tan tinan nia, Kayafas mak na'ilulik ulun boot. Hodi nunia, nia katak kedan na'ak, Yesus atu mate bodik ema Yahudi hotu-hotu. 52 Mais tuir loos, Yesus la mate bodik ema Yahudi mesan dei. Nia mate bodik Na'i Maromak oan sia hotu-hotu iha raiklaran ne'e. Sia tuur keke lema rai, mais Nia atu nalo sia dadi baa hutun ida.
53 Nahuu baa oras nia, ema Yahudi ulun sia nametis lia mesak atu no'o Yesus, tuir Kayafas dalen.
54 Tan baa nia, Yesus la nalore aan tenik iha Yahudi ulun siakaan klaran. Nia no maktuir sia nakiduk baa leo ida, naran Efraim, kre'is rai leet ida. Hotu, sia nein heik iha nia.c
55 Natoon baa nia, ema Yahudi siakaan loron boot Paska kre'is ti'an. Sura tinan, ema wa'in nosi luan mai kota Yerusalem atu tuir nadahur Paska iha nia. Sia mai uluk atu namoos aan tuir ukun-badu. 56 Ema wa'in mak mai Yerusalem baa tinan nia, nakara nasoru Yesus. To'o Uma Hamulak Huun, sia nusu baa malu na'ak, “Nunabee? Yesus moos mai dahur ka, lale?” 57 Mais na'ilulik ulun sia no ema Farisi sia naruka na'ak, “Kalo noo ema mak natene Yesus iha nabee, hasara baa ami lai!” Sia dale nunia, tan sia nakara kohi Yesus.